上次帶咗支200mm來呢個位影,裁完之後幾乎放社交媒體都唔夠解像度,今次帶支300mm加埋1.4x增距再影過.
點解唔簡單啲帶支100-400mm就算?夜晚實在唔夠光.加咗增距得F4光圈,1/20秒快門都要用到ISO 4000.影到咁近又有景深唔夠既問題,唔夠光光圈不能縮小,我做咗一件好瘋狂既事就係景深堆疊,一張對焦水馬前方地面,一張對焦中間位置再合成,原本動態場面實穿崩,但因為慢快門啲人矇矇地,稍加一點手工可以胡混過去.
等到天光事情就簡單好多,光圈縮到F8增加景深,快門1/100秒已經夠快,景深堆疊就行唔通喇.呢個時候亦多咗好多人上來影.
再對焦在後面,景深是多了,但前邊矇了總覺有點不對勁,退一步想,可能不加增距影小一點,再裁切就可以做到全清吧?
知道最近大生圍有藍喉歌鴝出沒,好多人都影到,我也去襯一吓熱鬧吧.本來只打算影些證件相,估唔到有人開壇打飛.有啲幸運.開壇的意思係整定個高位,放蟲等目標來食,由於在高位,一定要飛,咁就係我地拍攝機會喇.
其實冇乜技術可言,三腳架固定咗個構圖,全畫面連續對焦,確保樹枝在對焦範圍內,一見目標在地上起飛就瘋狂連拍,成個過程都係兩,三秒,之後就係睇吓係唔係影到有樣,唔係背住,如果係單反,對焦區唔夠闊,用手動對焦都得,首先來既反而係黃鶺鴒,由於最終會食條蟲,理論上實中焦.
不過食蟲相唔可以太公開,會被人話破瓌生態,只可以貼啲飛行途中既,咁焦點就有機會有偏差,只好祈求唔差太遠,細雀飛行速度係超快,由於相機係完全靜止,冇跟住佢移動,用到1/6400秒快門都唔係張張得,早知就用1/8000秒.
主角出場喇,佢未食到蟲嗰啲冇張得,唔係影到背面就係縮埋一舊,一唔係快門就唔夠快,最終得呢張好啲.條蟲遮咗個咀小小,只好同佢做做手術.
技術有限,最終只可以係咁喇.
呢樣未試過,因為機會太小,意思係每半個鐘只有一次機會,就算入場一整天都係得幾次機會,分分鐘空手而回.唔理咁多,博一博.
唔敢用咁慢快門,先試1/100秒,唔掂,騎師唔係單純直線運動,個頭經常會上下移動,要啱啱唔郁嗰吓同步到,而且最好係垂直拍攝位置,第一場完全唔知影咗乜.第二場排除所有雜念,一心一意做足教科書般的動作,居然畀我成功咗一張.
所有場數開跑閘都係視線範圍外,唔知點解有一場係搬咗去觀眾席前面,搞到好多人走晒埋來睇熱鬧,由於太近影會反應唔切,我係站在離跑道遠一點既梯級上,此刻左右都係人,大動作一點都碰到佢地,但啲馬跑來入閘有好多機會影,執翻幾張,比賽時馬唔會咁近欄,影唔到人頭,現在就冇計.
之後幾場都失敗,唔係我把握唔到就係啲馬跑散咗.終於我決定離場去出面既天橋影一堆馬畫面,呢度疫情間封咗,現在開翻.影完就係時間走喇.
又是發掘鳥攝點的時候.之前有人講錦田河有鷺鷥爭魚,好想影哦,但又聽講加咗玻璃圍欄,咁去唔去呀?後來問人先知圍欄唔係好高.
一來到就係見到好多黑翅長腳鷸.基本上係一堆.
最好係佢地經常飛來飛去,陽光照耀下,水顏色靚,又有倒影,正光鳥眼夠晒鮮紅,係練習影飛好機會.
不過我係來影鷺鷥既,佢地集中咗係另一面,先講一講現場環境,玻璃圍欄唔算太高,基本上都唔阻突支鏡頭出去,而且好奇怪有啲位係冇裝既,最大問題反而係個路肩好短,支腳架放唔到上去,要縮短兩支腳放在圍欄邊,另一支腳申長勉強放在路肩上,中軸斜咗既問題係一移動水平會偏咗,都冇計只好翻去後制.難得有鷺鷥低飛,一於打飛加倒影.
原來低飛並不難得,仲不停上演踢水起飛,呢度大把位,唔似得天恩河咁又遠又影尾,只可惜天色變得有雲,冇咁金黃色既河水.
這個表演冇乜宣傳,官方網頁都冇講,上次就咁錯失咗,今次有內幕消息先知道,不過都搵咗一輪,說是在觀塘海濱公園天橋,但我由頭行到尾都唔見,原來佢唔係向住海方向,反而在背面,幸好聽到音樂聲先搵到.
天氣有點冷,以為太涷取消,原來係暖水水缸,座位只有兩行,第一行太近,第二行又會被第一行遮住,我選擇企在第二行後面,咁就可以企起身影又唔會阻住後面冇位坐既人,人魚出來喇,果然好神似,條尾都做得好好.
好快中場休息,聖誔節的關係,加件聖誔衫,反而好似太假,水缸好反光,偏偏有人自帶機頂LED燈,嗰支燈仔對照明冇乜幫助,但就整咗個發光長方形反光出來,搞到好多相都廢咗,好彩佢之後可能察覺到熄咗支燈.
表演者有兩位,這個噴氣泡動作令到真實性增加,後期加背景係好難做到,原本有啲成個人彎成一個圓圈的,但係我覺得腳一屈條魚尾就摺咗,反而唔真實.
臨尾會兩條人魚一齊出,明白人人都想企正中間影,所以我企在最後一行外面,頭先嗰位用LED燈既都一樣,不過佢唔係企喺我格離,而係一個唔該都冇就企在我前面,大家都係影相你咁真係........我無奈只好走去佢側邊影,我用緊定焦換唔切鏡,有部份都爆晒框,好在都仲有啲要得.
上次影水墨畫風格效果都算唔錯,今次影秋天風格,我見Demo件衫幾靚,同埋慢快門幾有挑戰性.
咦,件衫咁求其既?陳間換衫呱?一來就來呢個易食動作,上次試1/50s成功率很高,今次再試1/30s,差很遠,只得兩張成功,有啲睇落一隻眼清,另一隻已經旅轉緊,風險都幾大.
終於換咗我想要既衫,夠紅之餘衫袖夠晒大,今次1/30s唔成功,好彩1/50s既冇事,由於帶隊只會畀你睇一睇成唔成功就會重覆動作,係冇乜時間改設定的,1/50s改1/30s比較簡單,只需要改光圈及快門而且改動幅度好小.但通常我會影三個速度,先用1/320s十拿九穏影咗先,成功就轉1/50s,再成功就轉1/30s甚至更慢,1/320s同其他速度互換就要郁埋ISO,而且幅度頗大,有機會手忙腳亂,所以我都係用我先前講過既相機記憶功能去做.
呢張都係1/50s先成功,其實預咗失敗,因為Model係成個跳起的,只有在跳到最高點頭部移動才會變靜止,要剛剛嗰吓就影先成功,如果你相機連拍速度快係會高啲命中率.
呢個動作個頭基本上唔郁,可以慢到極限,1/320s唔駛試,即來1/50s好成功,再試1/30s都冇問題,最後試埋1/15s,睇樹葉都睇到快門係好慢.
等這個比賽等咗好耐,上次用1/50秒影效果都幾好,今次要試1/30秒.
頭一轉係200m,應該係最高速項目,朝早又正光,仲影到香港隊,所有好的條件都齊晒,只係我焦距上有點保守,想畫面多啲獨木舟,用咗比較保守既焦距300mm,人比較細粒.
唔理咁多,全部用晒400mm影,陽光好快被雲層遮咗,海水變灰,星加玻實力非凡,速度飛快.原本仲有我睇唔起既直立板,記得上次啲人唔夠水流快去唔到起點,今次有個洋人選人竟然超快,可惜我影唔掂,因為直立板個頭好似爬龍舟咁郁得好勁.
突然間有船埋來收走個浮板起點,唔係咁快就完呱?問啲工作員先知原來200mm完咗要搬個起點去500m,因為終點唔郁得,咁樣搞一搞竟然差唔多去到中正,正光變背光.
呢位日本選手濺起既水花成把大關刀咁.
賽起來亦是超快,國際賽水準果然高很多.
