2020年11月29日 星期日

蝌蚪坪攝影

又搵到一個市區近近地影日落地點,半個鐘都唔駛就上到來.

景就一般啦,有啲似深水埗嘉頓山,市區樓景.可以睇到沙田水泉澳村.


睇翻日落方向,都係幾悶既樓景,咁近不能太高要求,又係熟識的清水疍.


估佢唔到,個天又有啲爆紅,這個不是改動白平衡既人做效果,我覺得為咗個天靚,夾硬搞到成張相變橙色係好怪的.但這次現場睇真係咁紅.


最後影埋個夜景仲趕得切翻屋企食飯.


2020年11月24日 星期二

大尾篤船仔清水疍

天氣好好,好到一舊雲都冇,燒天應該冇行,唔值得行餐死,一於去車到即影既大尾篤.

我之前來過一次航拍.飛得太高啲船會好細粒,結果只係高地面小小,咁我不如地面用大機影靚得多.雖然有腳架,但啲船仔係郁得好勁的,任何曝光合拼方法都係不可行的.只可以靠相機寛容度硬拼.所以我揀咗白色船仔嗰邊影,會比較易推翻光,暗色底既就好難搞得好.唯一可以合拼既係個天冇接觸到船既部份.最後就係咁喇,好彩都幾多船,個清水疍冇咁覺眼啦.

2020年11月17日 星期二

火燒蠔殼山

又打風,搵個矮山上去搏吓,影日落都係高小小有個地景好過平地高炒.雖然要去到元朗,但巴士到博愛醫院行冇遠就到登山口,上到山頂都唔駛半粒鐘.

果然又中,日落冇耐就開始燒天,火燒天咁既構圖啲人應該會覺得我黐線.係人都盡量影多啲個天啦,可能係心理作用,我覺得旁邊兩個年青人用好奇怪眼光望我.呢個大叔支鏡竟然係水平唔係向天???

今次燒天持續時間比較長,我原本想等到天黑着多啲燈先改變構圖,終於都忍唔住影多啲個天,有啲後悔,雖然個天係幾靚.但那窄窄像一條線的地景始終有啲不是味道.冇乜立體感.早知就等耐啲等多啲燈着影靚第一張.

跟住我作出更奇怪既舉動,就係冇等個天燒完,急急腳走咗去反方向影夜景.本來燒天咁靚應該下次先來影呢個夜景.但我已經郁咗構圖,又未必會短期內再上來就想一次過影埋佢.我不敢望那兩個年青人了,呢個黐線大叔竟然影夜景唔影燒天.

2020年11月11日 星期三

慈雲山雲隙光

這地方其實都幾費腳骨力,幾乎全部係樓梯,不過就最啱我,唔會跣,唔會迷路,付出多一點氣力實在不算甚麽.

終於到了樓梯盡頭,再去就係上發射站的普通泥路,今日既雲有啲空隙,透出所謂耶穌光,可惜時間早,大厦又未開燈,但唔影又驚陣間冇咗,之前影HDR一定係開腳架,懶之下我試吓手持再用PS對正,結果係搞得掂.

時間尚早,行去發射站睇吓位置會唔會好啲.證實係冇嘢睇既,好多樹阻住,去翻樓梯盡頭,樓梯側邊係好多樓既景,今日主力唔影佢啦.

原本想等到接近開燈先影個耶穌光去夾,不過越等越唔對路,光開始變小,嗱嗱啉影咗先再等開燈,今次真係要開腳架喇,冇可能手持等半粒鐘,開燈後光線好暗亦都會手震.

2020年11月4日 星期三

火燒馬草壟

打風天,預感會有火燒天,但又唔係十分有把握,適宜去啲唔好咁辛苦既地方.馬草壟之前影HDR失敗咗,只靠單張推光,今次就算冇燒天都可以用全片幅影翻靚啲.

秋天既太陽側埋一面,影地面偏重既構圖反光會有啲怪,日落啲雲又好似幾靚,就改用咗天空為主既樣圖.

之後就係等夜景,點知等等吓天空既厚雲居然變紅,應驗咗預感,其他在場既人都好開心,之後既夜景反而因為太多雲而唔靚.