2021年1月26日 星期二

九龍坑山日出

拍日出係麻煩過日落好多的,除咗要早起身,多數地方都要搭的士.九龍坑山係其中一個行路就去到既山頭.

搵咗日冇咁涷,天氣報告又話好天既日子出發,落到街先見到個天好多雲,既然都出咗來都搏吓啦,夜晚上山其實反而冇落山咁驚,因為天會越來越光,亦會有好多晨運既人上山.雖然日出時間係七點,但最遲六點十五分就要到,襯住城市未熄燈前影咗個燈光先.之後就係捱冷風喇.開始有晨運客經過,哎呀,今日唔好天呀,昨日靚好多,終於等到日出喇,不過係被厚雲遮住.晨運客翻轉頭話個咸疍好靚,我就覺得麻麻,冇乜能量感.

未絶望既,等個太陽升到啲雲既隙縫可能有機,山頂有人爽叫,可能到咗頂好開心,果然,等到太陽再露面,有啲雲做吓點綴仲好,又係時候收工,咁早收工都好小有.

2021年1月22日 星期五

影秋英

呢排個個都影秋英.可我對微距式的影法冇乜興趣,一路都冇去,直至見到有人影到一片花海再加日落就知道係出發時候喇.

地點是錦田鄉村俱樂部,原來唔駛入場費,花田只係小小一塊,人就多到圍住晒,可惜後排係行人路,否則兩排人都有份,我無奈只可以去到好側.好彩都仲見到個太陽.平時影風景前景都好遠吓,只要收到F11光圈,甚至再大小小光圈都可以全清,但今次啲秋英實在太近,卒之都要堆疊景深,仲要兩張都唔得,前中後三張先搞得掂,初初諗唔掂又疊景深又包圍曝光唔夠時間搞,但實際上疊景深嗰幾張同一個曝光就得,包圍曝光只係最遠距離嗰部份.依然係清水疍但不太介意,始終花田先係主角.

2021年1月20日 星期三

僭建食飯枱

Yahoo年代舊址好多小問題要解決,例如自己換晾衫架繩,做冷氣機引水管,落街鋸矮個櫃等.......自從搬咗新居,好似冇咁多麻煩嘢,呢方面既積極性都差咗,物件爛咗就換.

呢個係食飯枱既玻璃面,揀玻璃係貪佢夠硬,唔駛鋪枱,可惜當初驚唔夠位出入買細咗,變咗長期係開大狀態,問題來喇,唔鋪枱如果食到枱面有餸汁或者湯之類液體,就會經由開大枱面既接駁位流落地下,只好小心啲食,一有液體就抺咗佢,頗麻煩,就咁忍咗好多年,同老婆講不如換咗佢.


出去姨媽傢俬睇咗幾張諗住買,點知老婆話不如淨係買張枱面放上去咪得囉,咁又係喎,不過木枱面會花,最後就走咗去玻璃舖裁一塊翻來.但係都要固定佢比較安全,原本諗住用玻璃膠,不過好樣衰,結果就係四塊雙面膠紙就搞掂.變咗呢個雙層結構喇,原來都幾重.


2021年1月11日 星期一

長甫頭攝影

網上睇到華山可以有日落,雖然地景一般,但交通都幾便捷,上水站坐10分鐘巴士就到登山口,啱晒依家唔想坐長途巴士既要求.

網上講到啲路好斜好艱辛,仲話粉嶺嗰邊上舒服啲,不過上水呢邊好似近啲,斜就斜啦.事實上真係濕濕碎,斜度同去菠蘿山差唔多,不過全水泥路.行咗20分鐘左右到咗一個叫長甫頭既地方,幾好冇遮擋可以影到日落.不過咁多時間梗係行入啲,行到好入個景都係差唔多,高就高啲,但好多位前面都有啲草阻阻地,索性走翻轉頭影.

之後就係影埋個夜景啦,其實行翻轉頭仲有個目的,就係可以急步趕到6點半巴士,因為30分鐘先有下一班車.

2021年1月1日 星期五

大棠以外的選擇

前後共有三班朋友約我去大棠影紅葉,果真紅葉風頭不可擋,可是最後都一一推掉.最近疫情咁緊要,大棠又咁多人,自駕肯定冇車位,要搭一定係塞得滿滿既巴士實在係好得人驚.

終於搵到替代方案,就係之前都去過既九擔租,自駕可以去到小巴站附近,都係有機會抄牌,要搏,行幾分鐘就睇到好大棵既楓香樹,不過就係得一棵囉.放飛機都冇乜睇頭.平日小巴又疏,以為冇乜人,結果都係好似旺角咁,如果唔係自駕分分鐘冇車走.


之後沿入來鹿頸條路走就會經過南涌.入去就會有一大片蘆葦田,低位影麻麻地,不過放飛機原來都係冇乜睇頭,最後反而喜歡地下影既.