玩離地

又係三叔體育節,今次係藝術體操,呢個係一年之中唯一既機會,其他比賽日子都係唔俾影相的,只要走去接待處寫低個人資料就有攝影證,其實都冇對證件,亂咁寫都得 :P

影過好多次,今次要玩全離地,即係到地既唔影,先來比較hea既就咁跳起,蕙荃係偏暗既體育館,同其他館比暗咗大約2/3級,即係平時用ISO 1600,呢度要用ISO 2500,又或者要降低快門速度搏一搏.

來張認真啲既正面跳,有同以前既攝影會會員一齊來,聽到佢地快門聲係小咗好多.冇再瘋狂連拍,好多時淨係影一張,可能技術高超咗,又或者唔駛交相,影唔到就算,唔好咁傷機.

到咗比較難搞既繩操,年紀大反應慢,我其實只係想擺側個人小小,但好多次都出咗界唔見咗隻手,呢張終於成功,裁都冇咁啱.

側跳又係,硬係反應唔切冇咗一忽頭,捧操就冇咗一忽手,呢張其實都幾乎出界.

去翻評判席做背景,其實係第二日既比賽,高級組既關係多咗好多人來,我上午又唔得閒,來到靚位已經冇晒,只好對住評判影,運動員望向上因為有一支棒掟咗出去等接,早小小影到支棒在空中就好喇.

高級組先有既圈操,原本諗住去坐既位置已經滿座,搞到背景勁花添.

真正大會攝影係坐評判旁邊,機會係最多,通常表演都係盡量對住評判,不過今次既機會係我既.

死喇,乜咁耐都仲未有帶操出場架,我五點就要走喇,又係要高級組先有,終於差唔多夠鐘先出,帶操極難搞因為條帶好長,我見好多人轉咗wide鏡影,但我又唔係咁鐘意搞到個人咁細粒.哈,好似尾咁幾得意,帶操另外一個難處係運動員成日失手,做一次動作解一次帶,極不流暢,有人唔駛解帶成套舞晒已經好勁.

最後的獨木舟水球

兩年前三叔體育節仲係可以自由去池面影相,我記得我當時諗住喺觀眾席影,但池面原來有其他人見到我,就叫埋我落去,今年又打算係咁,不過去到係冇人,唔理咁多,夾硬落去影….

 

好似都冇乜人阻我,於是就開晒凳仔,單腳,攞支328出來影,嘩,好似爆得滯,換翻135都夠, 光圈又大啲, 最多裁小小,近龍門呢邊都幾乎爆,啱啱好仲見到射波個人同入咗網既波.

 

 

影吓啲人傳波,其實觀眾度有328都夠長,但就影頭頂同埋大背光.

 

 

終於,先生你係邊位?葉問上身,我只係…….一個香港人.咁都得?好啦你照影,小心啲唔好阻到人發生危險.諗住傳波,我擋.

 

過冇耐頭先個人又行埋來,先生,不如咁啦,我地橫掂冇人影相,你影完可唔可以俾啲相我地?我如果話唔得應該就要走,結果無啦啦變咗大會攝影,135影近龍門同池中間啱啱好,但池邊同另一邊龍門就太細粒,加咗單腳既328好難對位換鏡,為咗增加機動性,最後我決定手持.影一陣其實都頂得順既,好在初級組都係十零零戰術,全軍龜縮由得你慢慢攻,極小出現中場爭奪,絶對夠時間換鏡.

其實唔換鏡,用晒135都得既,我翻去發覺大部份相都係135影,因為十零零既關係,用328好多時係影後.只係偶爾傳波失誤先影到爭波場面.平時就係咁前進架喇,掟前啲個波又執翻,夠膽死完全冇人攔截的.

另一樣影得最多就係開波爭波嗰吓,大家速度差唔多既話,好易就影到佢地炒埋一堆.事後嗰個人收咗啲相都幾滿意,仲提我遲兩個星期係高級組,我諗我好似今次咁去影又交相都應該冇問題既,不過短期內連影兩次又似乎有啲悶,又唔想佢每次都搵我免費影,就決定冇再問佢,睇來以後都冇機會再影喇.

 

新竹旅行

啲人聽見我話要去新竹都覺得好奇怪,一個連旅遊書都唔多講既地方有乜好去?我覺得旅遊書講既地方都太大路,我依家計劃行程都轉晒上網搵,好小睇旅遊書,而且一個未去過既地方點都有值得見識既方面.

可能真係比較冷門,由機場去市中心要先搭捷運或客運到桃園高鐡站,再搭一個站高鐡,再轉台鐡先得,未搭過台灣高鐡,原來車票寫明自由席要去車尾的,我地大鄉里車頭直入照坐,結果幾次都係坐咗人地個位,後尾索性企吓算,因為只係10分鐘車程.

入到酒店已經3點幾,同老婆去附近shopping一陣就去第一個目標,新竹之心東門城圓環車軌,去到桌球室六樓諗住轉樓梯去天台,老闆問我做乜,我話去影相,佢話影相唔得,之前太多人去,有人踩爛咗水管要佢地夾錢整,決定以後唔俾人上去,咁我唯有咋咋底去翻樓下直接行樓梯上去囉,去到三樓又俾裏面啲人見到截住.慘,一出閘就脫腳,plan B去巨城購物中心,夾硬影張夜景,購物中心係好大,不過價錢都好大,得個睇字.

第二天天陰陰決定去眷村博物館,有啲似韓國嗰個3D藝術館,有好多假嘢俾你玩打咭,例如轟炸機,小船,單車,手拉車送貨,街市,連國旗都有得用來打咭,而且實物成份比3D藝術館多.

冇乜時間等有陽光,下午就去普天官睇大關公.已經計算好晒下午先係正光,而且星期六日博物館係免費.人算不如天算,個天白茫茫,正光都冇用.

無心插柳,個博物館原來幾唔錯,好多展品,而且啲展品好靚,唔同平時嗰啲爛碗爛杯,仲有兩張龍椅可以打咭.仲有時間搵車去頭前溪豆腐岩,雖然係要大雨後去最好,旅行冇可能就到咁啱,點知係………維修,八月才從開,慘,二度脫腳.

都係天陰陰,冇計都要照去南寮漁港,睇地圖都頗遠吓,點知45分鐘車就到.冇食海鮮買咗啲小食就算,跟住要租單車,近車站嗰間係冇電動單車的,要行入啲有間叫港邊租車既,我地租咗二人電動有蓬車,車速都好快, 仲可以出馬路,攞正牌無牌駕駛.首先去風箏比賽場睇吓人地啲巨型風箏,果然有兩隻超大型八爪魚,不過佢飛到咁過要低炒其實冇乜好影,只會變晒剪影,可能個玩家都知我地啲喜好,放一陣又收翻,又放過,搞到大家都狂影,好鬼開心.最衰係個天好多雲,我要勁執先出到小小藍.

跟住開車去著名打咭點魚鱗天梯,不過冇日落,好似冇乜料到,而架車最唔好係冇鎖,老婆要守車,想影張打咭相都唔得.

終於原來係有正式單車徑的,唔駛下下亡命跑馬路,嘩,條單車徑超長,如果冇電動應該好快頂唔順.唔知係咪可以繞一圈,見唔係好對路一個鐘左右就掉頭,老婆話未試過咁爽,要來多次,仲走去買咗條長既單車鎖.

終於都落雨喇,可是今天既行程係去睇人曬米粉,照去啦,酒店十分鐘車就到,付出不多,不出所料,冇人曬米粉,我記得網上搵到東德成米粉廠係歡迎參觀的,去到門口見到老闆娘問咗兩句就請我地入去睇,佢話因為禽流感關係,依家冇人曬米粉架喇,全部改晒烘乾,佢地四點鐘就開始磨米,壓乾水同蒸粉到三成熟增加黐性,現在見到既係用機壓成既米磚.九點鐘左右就可以見到咁多米磚.

之後會用鐡碌將米磚壓成厚片,再捲成圓柱放入有好多窿既模度擠出條狀米粉,之後就係入爐蒸35分鐘至全熟,出爐嗰吓成個室內都係蒸氣好好氣氛,不過就搞到好難對焦,事後真係得呢張OK.

之後就係拍攝重點拋米粉,原來米粉蒸完內藏好多蒸氣,唔整走佢米粉會受熱黐埋一堆,咁做等於用空氣過冷河,一筲箕米粉只有一次機會拍出白色波浪.

之後係切米粉,可以專心影拋出去嗰吓.當中仲可以影吓拉開啲米粉.

整好既米粉會排開等紮好送餐館,一部份會攞去烘乾做零售.等出爐既過程仲請我地飲支裝水同食香蕉,冇理我地係唔係採購部,又叫我地試食新鮮出爐既米粉,咁客氣真係搞到好唔好意思,所以臨走我地都買咗三包一斤压米粉做手信. 最後都分享吓有啲乜好食,有罐頭菠蘿咁甜既新鮮菠蘿,多汁冇渣既愛文芒果同埋奶昔般香滑的木瓜牛奶.

羽毛球攝影

之前影過一次,都幾難,由於啲場擺得好密,侷住場邊用短鏡影,運動員變速又快,對相機的對焦性能好大考驗.

換咗全片幅之後對焦性能好得多,命中率大增,我比較喜歡影雙打,背景可以多一個人,呢張用85mm影,差唔多爆框,我唔係好鐘意用50mm,對焦點得翻中間嗰啲.

見到觀眾席雖然收起咗啲位,但中間可以爬上去從高角度影,搏矇走上去影咗一輪,好在又冇人理我,高角度可以影到運動員正面又唔會俾網阻住.

除咗速度快之外,羽毛球最大鑊係好容易唔見咗個波.個場咁淺色,好易就黐底,如果個波速度快更加會變咗一堆白色物體.有時真係好似玩眼力遊戲咁.

真係連個波落點都要計埋,啱啱藍底就最好.

夠時間走喇,單打都殺,運動員姿勢都唔錯.係個波飛得比較遠.

終於都等到

自從Cactus引閃打柴之後一直搵緊替代方案,再買翻佢就唔會喇,盞又爛過,而且有延遲唔係咁好用.睇過神牛,規格好似真係得,但高階既似乎冇Sony份.AD200又好似巨形得滯.而且都有啲驚佢又有時滯,即管又入Sony官網睇吓啦,居然見佢出咗內置無線引閃既HVL-F60RM.

很羨慕Canon一早就有呢類閃燈,只要買兩支閃就可以做到離機閃,唔駛帶一堆麻煩的引閃,搭棚搭到好得人驚之外,萬一失靈仲要睇吓究竟係接觸不良,設定出錯或者係邊個冇電,搞得來要影既嘢都攤涷晒,model既話已經轉位,蟲仔都走晒,依家可以帶小兩舊引閃,8粒電芯,而且無線電引閃十分可靠,基本上一開機就用得,完全冇延遲,唔駛搭棚.主橙可以控制子燈輸出,記得第一代產品要自己走去子燈度搞輸出.走來走去成個傻佬咁.支燈終於有金屬腳喇,有乜理由旗艦燈會用膠腳架.而且終於打Bounce都可以用高速閃,以前係一定要直打先用得的,莫名奇妙.
又講吓唔好既地方,之前LED燈有塊橙色濾色片預黃燈環境下用,新燈唔知做乜又取消咗,坦白講,室外LED九成唔夠力,主要係室內用,只係多個扣位,多塊膠片都慳翻,又係莫名奇妙.仲有附送既橙色同綠色濾光罩顏色太深,綠色嗰個直情唔用得,白平衡推到日光都仲係綠,光管邊可能有咁綠呀?橙色嗰個就兩睇,好黃既燈係啱既,去到2800K先正常,冇咁黃就會唔啱色,我寧願佢冇咁黃我可以自行加膠片.
我第一日玩離機閃就等緊呢支燈,嗰陣問Sony佢直情叫你搵副廠,都冇諗住出,多得佢啲無反買得幾好先有機會見到呢支燈.

中國舞擺拍

就咁無無謂謂model擺拍已經冇乜新意.見有人搞影跳舞,動態拍攝,就去玩吓.

其實我影開運動,已經慣咗最惡劣既情況下影動態,依家先企定定,對好晒焦,數123再跳起,又係室外跟本零難度,不過都影咗好多張,揀啲跳得比較高及動作好啲既.

跟住轉個地方做差唔多既動作,只係背景唔同咗,其實model都幾攰吓,不停係咁跳.

跳咗咁多,靜態一點休息吓,安排model去對面橋我地用長鏡影,同場有另一班攝影班真係一啲都唔怕唔好意思,係咁狂影,為咗唔益佢地唯有暫停,等佢地走咗先再影過,我最長得135mm,結果要開APS-C模式.連靜態都要係壓腿,真係辛苦錢.

之後到玩水袖,其實我係因為呢個先參加的,對袖fing到咁長幾過癮.晧蘭傳都冇玩到咁勁.不過就侷住要用直度影.今次好好彩雖然都仲係好多人用wide鏡,好在佢地鐘意低炒(因為會影到地平線低咗),個個蹲低晒,叫做仲有機會用到85mm影,影到小小頭嗰啲就事後P走佢.

搞咗好耐之後model問我地仲有乜嘢想影,我就話你頭先嗰吓跳高再加兩袖向橫伸我影唔到(就係俾wide鏡黨阻住),佢話呢度路窄唔夠位,咁我地就出外面影,其實我都唔知做乜要搵個又窄又暗既地方影,出面夠光不過model就側側肩冇跳起只係伸長兩袖,理由係地方唔平驚扭親,呢個時候要識做唔好去搵平地,跳咗咁耐都攰啦,有時啲嘢唔一定要百分百滿足既,效果都幾好吖.

做埋個左右開弓就收工.事後講起原來對水袖只係廿蚊,我寧願加埋落套中國舞衫度會好啲啦,又係嗰句,凡事都唔係一定要完滿既.