2021年12月31日 星期五

慳皮冰上大匯演

上次影記得都幾有娛樂性,有幾高水準隊伍,又有小朋友cosplay同埋聖誕老人,好有氣氛.

今次來到見到練習已經感覺到係淨溜冰表演,可能全部都係義工都未定,既來之則安之,就當來影運動.雖然沒有外隊,但水準都唔差,呢位運動員好多翻騰轉體動作,我影咗好多相.

呢個場我有經驗,知道會幾遠,準備晒兩部機加埋300mm F2.8同埋135mm F1.8.最後係幾乎用晒300mm F2.8.中距離既位唔係冇,但大會打光真係好奇怪,中場幾乎全背光,黑媽媽.應該有兩支燈蛇咗去飲咖啡.

去到後場其實300mm又唔多夠長,好彩新機像素夠,裁完都用得,呢啲跳起動作冇理用唔影呱?

團體既水準多數係比較差.但係可以拍吓多人畫面,睇陰影明明睇到係三支燈,但係居然有一半黑咗,打燈都應該有啲敬業精神呱?

最後係會所有人出晒來,再續一演幾招,又見到呢個勁運動員,今次來個飛身.

成晚唯一外國人,技術都好勁,剷到飛晒雪.

2021年12月25日 星期六

意外收獲

朋友話帶我去影龍鼓灘發電廠,路途好短唔辛苦,仲可以影埋日落.可惜,可能條路太耐冇人行,視野已經大部份被樹木遮住,冇計,只好去附近睇吓有冇啲比較開揚既位.果然行冇耐係有一舊大石可以影到附近既景.

日落太側係影唔到喇,一心影夜景啦,先影距離太陽遠的一方,因為天黑會比較快,景其實都OK的,可惜有個工地未搞好.

之後就係日落方向的油庫,估唔到都幾靚喎.夠近又有着燈,仲靚過觀景山.算係意外收獲.

2021年12月20日 星期一

應吓節

又到聖誕,聖誕燈飾好似度度都差唔多.只有西九大聖誕樹有啲似大景,又唔係好遠.呀....我真係太天真,諗住影夜景,差唔多日落先來到.對正棵樹方圓百里都已經針都插唔入,後面梯級位都企滿晒人.只好去到好側擰歪部機影.哈,原來都唔係壞事,因為我最wide得24mm,企到正反而影唔晒棵樹,不過唔好處就係會影到欄桿,同埋有時會被申出來既電話遮住.

既來之,則安之,要影到好多顏色既聖誕樹要用快快門,因為啲圖案係會郁的,一係開大光圈,一係加高ISO,我揀咗開大光圈,代價係景會比較淺,前後景會冇咁實淨,解決方法就係影多張長快門,細光圈,由得棵樹變一隻色.事後夾埋佢地.萬事俱備,其實仲要睇啲燈光點變化,在最靚光的時候如果棵樹一路都係淨色,到天黑晒先變多色,咁事後搞既難度就會高好多,效果都冇咁理想.最後執走個欄桿位就大功告成.祝大家聖誕快樂.

2021年12月16日 星期四

晚間滑浪風帆

平時影滑浪風帆如果唔係上船影,基本上係得啖笑,運動員出發時係背向你,出咗去之後就遠到冇雷公,終點又好奇怪地唔係翻起點的.所以次次都係影到背向你既一大堆船,咁就冇喇.

今次比較特別係由黃昏比賽到夜晚,風帆上仲會有發光LED,而且起點及終點都好近會展岸邊,應是盡量想大家都近距離睇到,與民同樂的活動.原本諗住只帶300mm加1.4x增距.好彩有帶埋135mm,可以影到環境加風帆的構圖,第一場比賽仲未天黑,但可以見到LED燈照到海面有啲紫色.

第二瑒剛剛日落,LED燈效果比較現,未開賽有個運動員仲表演一下身手,原來速度快係可以飛離水面的.

去到摩天輪個位,即係一半路程,跟住就翻轉頭,我原本諗住加1.4x,後來又覺得影埋個摩天輪靚啲,而且都唔夠光喇,冇咗135mm既F1.8,快門又已經跌到1/160秒,侷住開到ISO 4000.不過這時候就體會到新機既好處,去到最邊都仲有對焦點,否則真係要手動.

第三場個天已經黑晒,只好靠135mm既大光圈頂住,影唔到咁遠喇,只可以影接近終點位置.我特登等到背景有啲大厦先影,否則只係黑媽媽一片.

比賽完咗運動員仲駛向岸邊同觀眾近距離接觸,近到可以伸手摸到風帆,電話都影到,搞到啲人群好開心.


2021年12月11日 星期六

冇乜人用的功能

同事買咗新機,講起有時去旅行,會入吓室內,一陣又出翻室外,可能冇耐又入翻室內,光差極大,相機要成日轉設定搞到手忙腳亂.其實係有一個方法的,就係用相機既全自動喇.咁又唔係幾好喎,啲相質量會好飄忽.有人提出可以用自動ISO.但係ISO由室外去到室內可以好癲.反之去到室外可能用最低都爆光.咁光圈先決再自動咗快門同ISO啦.會好過全自動,起碼控制到光圈.......

又有次去影舞台,有時想用慢快門挑戰難度,但有必要有一定數量既相用快快門防止食白果,轉來轉去煩之餘會錯失畫面.有人分享咗個方法就係用兩部機,一部係快快門,一部係慢快門,睇落都可以,但......會有人有兩支同焦距鏡頭嗎?原來佢方法係長鏡影快,wide鏡影慢.........

講到呢度,我想介紹一個功能,多數相機唔計嗰啲甚麽人像,風景模式,除咗PASM之外,仲會有123呢啲模式.其實係幾個記憶位置.舉例由室外去到室內,改完設定之後儲存做1,出室外扭翻去之前你用既Mode,例如M mode,咁設定就去翻原本設定,入室內扭去1就可以,舞台攝影都一樣,一個快一個慢儲存起想轉既話扭一扭就得,唔駛兩部機,亦可以用同一支鏡.

我以為個個都係咁用,原來係冇乜人用呢個功能的.

2021年12月6日 星期一

藍田公園紫芒草

偶然見到這消息,十一月尾就會有,但草期短,所以十一月中就去睇睇,只有好小開咗,再隔一個星期又去過.

今次開咗好多,不過好難搞,影出來好雜亂,同背景黐埋一堆,只好搵啲草只有光照到佢,背景黑啲就冇咁黐.

行入啲搵到有堆比較密既.原本想景深疊疊佢,之後發覺係不可行,因為風既關係,啲草基本上係無時無刻都郁緊既.快門慢小小都會矇.

仲有早來係冇用既,除非影早場九時零來,下午既話其實都要四點後啲光先夠斜,背光時先會影到好似發光咁既效果.公園四周被大樹包圍,要加上日落是不大可能,太陽消失之前都係會太光,所以我只加入小小,照片已經有充滿光線的感覺.

2021年11月30日 星期二

麒麟山

去古洞水塘時聽見人講有條路係上山,翻去查吓應該就係麒麟山,唔太高可以去吓.

呢張心形水塘係去古洞水塘時影的,因為我決定反方向去,會近啲.

終於上到頂,好多低雲,幸好都叫做影到日落,奇怪,好似唔多夠wide咁既,哎呀,上次用魚眼設定咗APS-C模式唔記得轉翻,改正翻個日落都落完喇 :(

順便影埋個夜景,特登zoom出啲唔駛影到好似一堆光點咁.諗住突出啲條彎路,後尾諗翻可能都係影wide啲靚啲.

估唔到啲雲咁低個天都有啲紅喎,今次記得熄咗個APS-C模式,影翻正常wide.

2021年11月29日 星期一

兩探龍鼓灘

我覺得去龍鼓灘係好遙遠的.去到屯門站都仲要搭四十分鐘巴士.仲慘過去大澳.朋友告知最近有堆花好靚,又對住日落方向,遠就遠啦.

果然係好遠.依家去屯門已經好過以前,去上水搭小巴還可以,但巴士真係要四十分鐘有多.好不容易去到,好彩有日落,加埋花都幾靚.走時朋友帶我到蝴蝶站搭輕鐡去石排輕鐡站,旁邊就係小巴站,可以避咗巴士繞路嗰段,起碼快半個鐘.後尾查清楚,原來另一號小巴可以直接去到蝴蝶站,連輕鐡都慳翻.

既然唔太遠,決定去多次上皇帝巖影日落加夜景.由沙灘上去只需廿分鐘.太陽比較偏側,配唔到成個大景,冇計,zoom近啲.

順便影埋個夜景,可以轉一轉構圖,影有煙窗嗰邊,村既燈光好暗,除非等到全黑先夠光,只好事後執執佢.

2021年11月18日 星期四

又入坑

最近部機個Mon開始神神地,初初以前用完反Mon冇壓翻緊,大力一按多咗一忽藍色,好在只係畫面邊緣.有點擔心佢就快出事,而Sony終於推出咗可以用到石器時代扭螺絲對焦鏡既轉接環.就決定去搵定部後繼機.

個接環得兩部機可以支援,最貴既A1唔駛諗,即係侷揀A7 R4,想買嗰陣又出咗部A7 R4A,只係個Mon靚咗就貴一千蚊,猶豫咗幾個星期,個價跌到只差300,咁就A7 R4A啦.

為咗用得翻舊鏡,要無端端多舊嘢,都幾樣衰.接下來就係試吓係咪真係用得翻晒啲鏡,結果.....有三支用唔到.180mm微距,200-500mm直情彈出唔支援警告,乜都郁唔到.200-500就算喇,反正唔係用咁多,微距就慘喇,仲諗住新機多像素好裁啲.而家變咗舊機一定唔可以死,因為無反係冇出過180mm微距的,俾錢都冇得買.仲有支Sigma 50mm對焦古古怪怪,移來移去最後都係唔中,要用只可以手動對焦.原本諗住對焦點闊咗可以開盡F1.4用,依家又冇行.最得益就係支300mm F2.8同埋支24-70mm,終於可以用到外圍對焦點.唔知係咪我全部都係舊鏡,我發覺個全畫面眼部對焦唔係太可靠,時中時唔中,都係要縮細對焦範圍先準.

諗住買部機就算唔花咁多錢,點知條快門線又改咗接頭設計,仲要貴到死,山寨貨都要二百幾.依家侷住影微距就一定要帶舊機,影人仲煩,要帶兩部機.因為舊機要唔好咁操勞,否則佢壞咗就冇得影微距.

2021年11月15日 星期一

添食中國舞

影完京劇諗住收工,點知領隊話睇到單張知道晚上有民族舞表演,仲問埋主辦單位不如幫佢地影吓相好唔好,佢地又答應咗,問吓有冇人想影,我見佢地啲海報幾靚又一場來到,好自然咁就答應咗.

呀....好似冇海報咁大堆頭,而且不出所料,係有戴口罩的.唔緊要,當普通跳舞影.

第二隻舞仲要係得獨舞.

終於有水袖,係全晚最精彩,玩咗好多慢快門,可惜都唔係好成功.

呢隻舞都唔錯啦.

玩遮畫面都幾豐富,現場係唔止三個人的.用85mm可以影晒但啲人會好細粒.

又係得一個人,玩多啲慢快門.不過都要補翻幾張快快門,陣間炒晒冇貨交.

終於有一張用到135mm都可以影晒成隊人.除咗咁啱佢地要走埋一齊之外,仲要咁啱台前冇人頭遮住,呢度個台係比較低,前排觀眾係會遮到個台的,好多相我都要事後執走佢.

最後一隻舞喇,又係啱啱可以影晒成組人.

2021年11月9日 星期二

再影京劇

上次影過的京劇好精彩,今次一見到有新劇目就立即報名.

今次有兩個劇目,首先係林沖夜奔,呀......黑背景加黑衫真係夠晒黑夜Feel.而且.....成場得一個人做戲.冇乜好影.好彩都仲有啲跳躍動作.

希望第二場貴妃醉酒會好啲啦.大堆頭人多啲畫面豐富啲.不過好似齋講多,好靜態,我見領隊都停晒手.事實上這是一個攝影班項目,佢地主要係試多重曝光,要畫面有移動物體先有效果.


好不容易捱到飲酒的畫面,都係冇乜大動作,但就睇到演員拗腰.


再影吓成排人一齊行,都冇乜特別畫面喇,比較失望的一次拍攝.

2021年11月4日 星期四

淋坑山

這是個即興出發的好地方,雖說在天水圍,可山不高,路也不險,沒太多體力及技術的考慮.

很多分支路都可以上山,跟跟吓我都冇跟,只一味向山上行進,好快就到頂,不過原來橋喺另一面,唔緊要,行過去都好近.今天雲層比較低,看來是不會燒天了,竟然.....搞搞吓喺我頭先過來嗰邊燒.走過去恐怕趕唔切,就白白放棄咗.柳暗花明又一村,跟住到呢邊燒,雖然麻麻地,好彩冇趕過去又兩頭唔到岸.


影個近景睇清楚啲蠔排.實在應該帶航拍機來,角度會靚好多,不過懶,同埋日落低光影完都係爛,搵日好天朝早來算啦.陣間又手忙腳亂乜都影唔到.


最後影埋條橋,好可惜日落位置唔係好就到,只好影個普通夜景.路太多都唔記得咗邊條路上來,只係一味向下走,去到山腳變咗繞圈,好彩又俾我出到去.

2021年10月30日 星期六

種瓜得豆

聽聞利安後山再出現之前新出現既蝴蝶,距離我都唔係好遠,一於去探吓.

蝴蝶有,不過都係普通嘢,唔通要上山,係就係有個絲帶位,跟佢越行越入,但全部兩旁高樹,似真係行山既山路,睇方向可能可以去到馬鞍山,冇乜結果,去翻公園影蟲,咪睇佢好似成牌板咁好平,要成個背脊清晒都要夾相.


蟲其實都唔易搵,好不容易先見到呢隻乜色都冇既嘢.環境超暗,要挑戰1/60秒快門,好彩有欄杆借吓力先成功.


諗住影蝶變咗影蟲,又有消息古洞有新蝶,又去種瓜.新蝶真係有,有呱?我好似未影過呢種蝶.新係新但好似唔係好靚.


舊蝶都影來充吓數,位好似都有啲特別.結果都係影埋啲無謂嘢添.當行吓山.


2021年10月25日 星期一

影交尾

朋友通知有秘位可以影長尾藍交尾,日日都有幾對.為咗確保我影到,仲見到先見我出發,幫我睇住,真係唔話得.

要超過一個鐘先到達,而對長尾藍真係仲交緊尾.慢慢影到靚為止.

影完正光影背光,其實我係比較喜歡這張的背景色.夠晒光猛同鮮色,可惜下面嗰隻翻到屋企睇先知道係爛咗小小.

目標已達,又到食飯時間就去食咗飯先啦.出到門口見到有咖灰交尾,冇理由唔影埋啫.雖然之前都影過,不過今次停既地方不同.而且好定不用花太多精神.


食完飯翻來對咖灰竟然仲喺度,呢個時候附近又發現咗呢對異形,之前影佢都係強光下,眼睛留下很難看的多邊形光點及極大反差,今次在樹陰下可以影到純橙色既眼睛.有利有弊,樹陰即係暗,有啲唔Sharp.而且影得一次佢就飛走咗,殘念.