2019年9月17日 星期二

三文治攝影法

跟朋友一起去夜攝,我用慣常的雙燈方法,點知朋友的反應係咁咪同朝早影一樣.夜晚要玩背光嘛.經佢咁樣講一講,我又有啲新啓發.其實我都喜歡玩背光,但夜晚如果背景燈用咗來做背光會變黑底,咁又唔係好鐘意,最有效既解決辦法當然就係加多一支燈啦.但係又要買多支燈同一個可以裝兩支燈既支架,錢固然係問題,重量先大鑊,好難先擺脫咗兩個引閃,唔係好想咁搞.我有另一個想法.......


去翻古家園近近地,有草蜢,就算乜都冇,草蜢點都有啲,試想法不用太高要求.用翻舊方法影一張先,陣間白果都可以靠佢.


之後就係將支燈放到草蜢背面側小小,我既想法係直情由得背光光線直入鏡頭.Fog鏡結果就唔駛黑底喇.果然可以睇到光源方向係光的,但燈位似乎有點低,上半部都係比較暗,而且好奇怪我以為太陽白平衡應該係白底,點知居然係偏藍,咁仲好有啲色.想再改角度隻草蜢一跳唔見咗.


好極有蜻蜓,超級定,點玩都得,今次更進取地閃燈幾乎放正背面.光線三文治式夾住隻蜻蜓,背景夠晒光,但fog得過咗啲,事後要加翻對比.


上次搵餐死既蜘蛛網竟然就在路邊,好彩有帶噴水樽,直噴之下隻蜘蛛嚇咗一驚,竟然自然整爛個網等我冇得影,好在旁邊仲有個細既,今次好小心向上噴再等啲水飄落個網度,隻蜘蛛仔依然都察覺到,走出走入.最後等佢停正中間先影.個網冇大蜘蛛個咁密,好過冇.


又見到好嘢,背景夠遠啱晒,我走去兩米外設置背景燈,翻來佢仲喺度,背景夠遠真係好奶油.原本諗住玩埋背光,不過原來已經好夜,下次先玩.
呢個時候又見到Blogger既升級魔咒,希望唔好又好似上次咁搞到一鑊泡 @@

2019年9月12日 星期四

影室內

呢排個個星期都係落雨,唔搵啲室內節目真係唔掂.

影人最易啦,俾錢就有,順便可以用吓兩支新閃.好奇怪,嗰日幾乎淨係得我用閃燈,我見其他人有帶閃燈,但都係只插機頂唔開來用的.數碼機搞到個個都變晒現場光派,唔夠光就一味谷ISO.間房又細,又全部白色牆,就算得一支閃,求其搵個高位反射都好均勻,中焦就有相,唔駛帶腦.
 
 
個影樓標榜有大窗可用自然光影相,自然光真係太緊要,不過咁企就變咗大背光,唔用燈一係面黑黑,一係就背景大爆光好似上咗天堂咁.我發覺其實一枝燈插機頂都夠,但離機可以避免正面有近物爆光.
 
 
原來仲可以轉一次房,咁又係,一間房影晒應該會好悶.呢間房有頗多啡色傢私,光反射後會令膚色有點黃,要調調白平衡就翻佢.
 
 
原本想影鏡中倒影,不過好多人入咗鏡,最後侷住咁影就算.
 

2019年9月5日 星期四

新角度影維港

見到網上有個位影維港好靚,成個銅鑼灣避風塘高角度入晒鏡,東區走廊成個彎要晒真係冇得頂,經朋友調查一翻之後知道係私人大厦天台,而且據說天台己封了,不過發現到附近一間酒店天台可以影到冇咁靚角度,但就可以上到去,咁都好過冇.


其實我估間酒店都係諗住只係開放俾住客,唔係三唔識七都歡迎的,不過一個半個佢又唔係好分到我係咪住客,酒店員工又都費事同你嘈咁就得米.真係超可惜,為安全起見酒店加咗個離牆邊頗遠既圍欄,令到取景角度同牆邊差好遠.早知就帶支高腳架來,依家伸到最高都仲係冇咗一大忽避風塘,想偷偷地爬入欄杆係唔得的,因為有個酒店員工長期把關,只好將就吓,真係得一個位最好,偏小小都差好遠,日落方向構圖好差,而且當天超大煙霞,日落時間前半小時太陽已消失了,只好靜待夜景,由於腳架升得超高,穏定性好差,又有啲風,快門長小小都矇,侷住開大光圈同高小小ISO,翻去想夾相都唔成功,因為郁咗,對唔到位,侷住用一張拉光暗就算.


另一邊唔係咁靚,不過一場來到都執翻張 :P

2019年8月29日 星期四

繼續對抗反光

隔住玻璃影相真係一件好麻煩既事,之前試過好多方法唔係效果唔多好就係太麻煩,尤其去旅行,係唔方便帶埋一舊二舊去,而且好多時係要一個人影,冇人幫手,工具選擇更加小.


呢塊好似鐡餅咁既嘢其實係一個可摺疊遮光罩,專為對抗反光而設計,摺疊設計可方便擕帶.


張開之後就係咁,摺疊唔一定要直出直入,可以摺某啲角度方便斜向構圖時仍可貼實玻璃.

 
接下來試試效果,這張只用鏡頭原本遮光罩,由於要斜向構圖,未能貼實玻璃,反光非常嚴重.
 
 
之後加上遮光罩,好明顯係有作用.但發覺下面有小小睇灟眼有條線,用既時候要好小心,另外安裝比較土炮,只係靠個窿比鏡頭細小小夾硬塞入去.一受力好容易甩,尤其係要擺角度既時候.對於分秒必爭既場合,例如影夜景襯個天仲藍要轉位就好論盡.我上次去澳門都有用佢,就係搞來搞去都甩搞到個天黑晒都未得,最後只好夾硬影.如果係我設計就會啤埋個瀘鏡接環,用收螺絲方式連接,咁就最穏陣,最多呎吋唔啱再加轉接環,好過依家為咗平,為咗萬用搞成咁.
 
 


 

2019年8月24日 星期六

再探魔鬼山

上次去魔鬼山已經好耐之前.嗰陣連遊輪碼頭都未起,今次我就打算由高角度影吓佢.

呀…其實咁既角度影都唔係太靚,但呢個係日落位,幸運的話,個天可以幫你加好多分.不過今日既日落就係………又變翻得夜景.原本諗住85mm都夠長喇呱,最後終於都要加個1.4x.好彩都仲有一張相,行翻去油塘站唔係好遠.日落有機的話來搏吓都OK既.

2019年8月20日 星期二

擠出景深

近排時晴時雨,都唔夠膽有乜大計出外景,近近地去吓鳳園,落雨即走都冇乜麻煩.


唔知係咪太熱,熱到啲蝴蝶喱埋晒,搞咗大半日就係得呢隻灰仔係俾我影吓.


光線麻麻光圈開得比較大,又貪心影得比較大,結果雖然啱焦平,但景深唔多夠,放大來睇的話,頭同翼都在景深內,但個肚同尾就差小小.得一張咁多剷都冇得剷就花小小時間搞搞佢.


夾硬加sharp都可以既,但其他地方起晒邊,背景雜訊都勁咗好多,唔多自然.


唯有又夾夾佢,只露出加sharp咗既肚煲.其實個肚都係好硬,不過佢本身都係啲毛,整到硬係好似好多紋咁,至於其他地方又保持翻原來樣子,馬馬虎虎叫做好過冇 :P

2019年8月15日 星期四

移形換影大法

公司轉咗用Window 10,鎖機畫面可以用自己相.我一向唔用Wall paper的,一來好花阻住做嘢,二來會佔咗電腦資源,拖慢工作,但鎖機畫面係行開先用,咁就冇所謂.


問題來喇,單反影相一般係3:2比例,例如呢張機場跑道日落相咁.


可是電腦屏幕就係16:9,同晒相一樣,你可以留白邊(好怪),或者裁走上下,但係我平時構圖都好Tight吓,結果就搞到咁.裁高啲保留整架飛機條橋又會冇乜幾多剩,又係好怪.


如果架飛機可以移低啲,咁裁完就橋同飛機都保留到喇.早排睇Youtube有教一招用內容感知移動物件,效果好神奇,唔覺有乜破綻,於是我又跟佢咁搞一搞.呀……好核突,內容感知得唔係幾好.搬走嗰度補得幾好,不得不讚,但新位置就溶唔埋,同埋機翼變咗形,AI未夠完善,宣告失敗,我諗呢個做法要背景花小小先得,太純色搞唔掂.


唯有用自己既方法,講個秘密俾你知,原相我都係夾出來的.因為無論用單張HDR或者推陰影高光都會搞到張相顏色十分唔自然.做法係影一張個天乜都冇,曝光就啱日落既顏色.再影一張飛機啱光,但其他地方爆光既相,之後用提早開燈大法既相反做法,即係圖層混合變暗.由於飛機係暗過乜都冇既天空,而日落冇爆光嗰張又暗過有飛機嗰張其他地方,所以兩張相就會好完美溶合.既然只係在空白地方貼架飛機上去,咁其實無需要跟足拍攝位置,放側啲都得.於是我就放側啲整咗一張,放時圖層透明度可改低啲方便對位.結果飛機係移咗,但橋底下多咗啲殘影,好正常,因為飛機嗰張點爆條橋都係暗過海面.


好小問題,只要圍住飛機嗰部份正常就得喇.然後將呢張合成既相貼上日落嗰張度,擦走有鬼影嗰啲位就得,唔駛擦到好貼飛機所以冇難度.最後係P走埋好遠未飛到埋來既飛機,又係超容易,大工告成.
 

2019年8月10日 星期六

動漫2019

主要係想去影吓模型,冇嘢想買,所以我特登夠鐘開門先去,唔駛等,去到就入.

 
見到好多上年都見到既展品,例如聶風騎火麒麟,其實我都估到冇理由咁嘥用一次就唔用,已經諗咗叫朋友幫我攞背景紙,可惜佢又話冇興趣來,變咗又係影唔到,咁去Bandai睇睇啦,佢啲模型好精緻,但背對背既擺法基本上背景都係不忍卒睹.好難得見到有個比較可以接受既背景,角度斜斜地都好過冇.


好多模型都好靚,但硬係背景好花,終於搵到矇面超人館,全部白底真係開心,影翻下風雷電先.


嘩,火影忍者,如果背景唔乾淨實頭暈.


唔知比達定悟飯呢?總之就係龜波氣功.


有火自然有水,將啲水變到龍咁,唔打得都睇得.


又去到賣Q版街霸的店,上年冇影Ken今次影翻,個背景其實唔夠大,前方係我補上去的.


舞台有Cosplay大賽,早十五分鐘去到,不過冇霸中間位,果然,又係上年個肥仔做大會拍攝,稍有水準既大會拍片都一定係觀眾席最後嗰排搭個高位,唔駛用wide鏡影到變晒形,又可以同舞台同一高度,又唔會阻到觀眾.不過肥仔既做法係在觀眾席最前,舞台正中set支超高腳架,話知阻住你睇.上年中過佢招今年怕咗佢,點知佢又有新招,就係搵多幾個人組拍攝團隊.自己企正中旁邊影相,其他人再在其餘位置set多幾支超高腳架拍片,成個台包住好似龍獅節咁自己友玩晒,冇預觀眾睇,自己交到功課就算,其實中間已經有單反拍片,旁邊嗰啲電話又有,Go Pro又有,影咗都唔會用架啦.九成又係招呼啲Friend.唔激氣得咁多,只好裁走佢,搞到冇晒腳添.


啱啱有個崩位冇俾人阻到,之前有下飛劍好正,可惜位唔啱多咗個黑影.


以往會場內Cosplayer個影相位用咗來排隊,冇所謂,背景都係亂到爆,出面影仲好,又夠光,出去前經過有大會model,呢張個位最正,大會實在應該整多啲呢啲位俾cosplayer用.


始終都係好難避免有人走去cosplayer後面等機會,影咗一輪都冇乜相,咁啱見到有一隊人影合照,我又黐來影吓,企唔到正間喇,側咗小小,用軟件拉翻正都幾OK喎.

2019年8月4日 星期日

高角度影排球

一路都未影過比較好既排球相,原因之一係本地比賽好難會有運動員可以個頭跳得高過網,影出來變晒網中人唔靚,知道呢個比賽在荃灣體育館搞,有樓梯級觀眾席之外,仲有二樓,可以高角度啱晒影排球.


觀眾席係斜上,高即係遠,帶埋328去到最尾嗰行僅僅影到個頭過晒網,原本係幾理想.可惜328唔係原廠鏡,只用到中間嗰堆對焦點,真係得一點用得,成日唔中,而且原來排球動作都好快,1/400秋都矇,我又唔想谷咁高ISO.搞咗一大輪都係冇乜相.把心一橫,去二樓用135mm影就算,坦白講係太高,影頭頂咁滯,亦遠咗啲,要裁相,但就容易得多,影咗一陣就有相.


影影吓發覺剛才真好彩,遇到個左手人,用右手扣球既會成日遮到塊面,唔掂,走過對面先,又有另一個問題,隊隊既攻擊都好單調,好似就係得一個扣球手咁,由於我斜影,最理想係斜對面既位置扣球,近嗰邊角度太斜就會搞成咁.


唔理咁多,落下面影吓接球畫面,影接發球太單調喇,盡量影比賽中的接球,有小小跳起都OK啦,其實有幾吓飛身救球的,不過我把握唔到.


呢個古怪姿勢都可以.


有兩個選擇,一係繼續下面硬幹,望有奇蹟出現影到飛身救球,一係穏陣啲上翻二樓影右手扣球,應該後者易啲,又再上翻二樓,搞得幾搞搵到個節奏冇咁易遮到面,問題又來,隊隊既二傳都麻麻,大部份時間都傳唔到去網前,扣球手侷住老遠後排攻擊,冇乜力量,影相更加要影細啲先同時影到兩邊運動員.好處就係多咗相持球,多幾次機會影囉.


少有在中央的快攻畫面,冇乜準備下求其影咗一張,又OK喎.
 

2019年7月30日 星期二

一橋三食

襯住小有既有太陽日子,去完成埋影青馬橋迴旋處既目標.上次應該係太早轉右導致冇路落低位,今次唔理三七廿一去到最底先轉右.去到入口突然烏雲密佈,竟然落出雨,唔係呱?唔通要徹退,見個天一邊都幾光,等咗陣真係停雨,天雨路滑都照行啦.


 
原來一路落真係可以落到底,去到馬路路面,而且冇欄杆,可以行到出去,途中好多蜘蛛網,我破壞咗唔小人地屋企,跟住轉右原來仲有好遠水路,最後大約上翻三層左右就到適合高度,當中都有小起伏要上上落落,行行吓竟然又落雨,唔理喇,去到呢度幾大都捱埋,祈禱點都俾埋個日落我先好再落雨.唔算好靚叫做有,不過24mm原來唔夠wide影晒兩個橋墩,翻去睇咗一陣覺得唔三唔四仲裁咗小小,早知就索性影多啲個迴旋處.地面佔既部份比較大,雖然開咗燈(七點十分先日落,七點已開燈)但唔夠太陽光,冇乜睇頭.
 
 
咁就等夜景啦,唔駛等開燈喇,只要等個天夠藍,日落方向的話,個天係黑得比較慢的,成天都係雲,真係麻麻地,可以睇到冇雲既地方都仲係好光.但已經係七點四十分.
 
 
最後一食係要合拚日落同夜景,必須再要等到個天黑過日落先得,終完影成走得已經係八點,但最艱苦既部份現在先開始,要好遠水路行翻去最左手邊既樓梯,然後由山腳行翻上山上入口,通常走人係落山舒服好多架嘛,依家變咗上山辛苦到嘔,行極都仲係樓梯,啲蜘蛛好有效率,又成條樓梯都係蜘蛛網,最後用咗整整一個鐘先去到入口,連牛仔褲都濕晒,水自然係飲晒,好在之後係落山,否則真係脫水,餓到死,好在葵芳有麥記,唔該大可樂加巨無霸加粟米杯……冇喇,我地十點收工,仲有十分鐘,咁你有乜就俾乜我啦,食完都仲係好空虛,再去Seven補多支水加麵包先掂.

2019年7月25日 星期四

澳門一日零夜

港珠澳大橋影過,但就未去過,咁啱我細佬又翻來話想去,就計劃了今次一日之旅.由於我樓下就有巴士去機場,最方便方法就係搭去青馬收費廣場再轉其中一架可以去口岸的巴士,已經係星期六,過關非常暢順,大約一個鐘就到澳門,唔同搭船,呢度冇酒店免費車出澳門市區,只可以搭101X或者102X,車費六蚊.第一站原本諗住去港式飲茶,點知間酒樓啱啱執咗,終於去咗新萄京對面間麵店食崩沙腩同牛雜,幾唔錯但頗貴.


接下來就去永利皇宮搭免費吊車,亞馬喇前地即新萄京附近就有巴士直達,又係六蚊,終於都有吊車平過松山纜車喇,仲有每半個鐘一次既音樂噴泉,大約兩分鐘前去排隊就可以在高空欣賞喇,不過影相就麻麻,吊車玻璃超反光而且又厚,影出來好矇.


天氣咁熱,去室內睇吓藝術展順便嘆吓冷氣,有幾個展品都幾求其,只係用大屏幕播啲迷幻畫面就算,有啲用花砌既,呢個叫做比較特別,有啲半透明效果.


跟住都係室內啦,天氣咁熱戶外唔好搞喇.永利皇宮搭巴士去永利又係六蚊,呢度有兩場表演,又係每半個鐘一次,好多人但係都迫到去前面,首先出場既富貴樹,成個表演都好無厘頭,開頭係天花開個窿播吓畫面,然後有盞大燈降落來,地面又爆開升棵大樹上來,四周打吓燈咁.最後好似有啲銀仔掉落來.


由於半個鐘後就有富貴龍表演,所以都冇行開佔頭位,有龍始終比較型.噴晒煙加埋射燈效果幾有氣氛.


表演話咁快就睇完,去翠華食下午茶醫肚,樓下有歌舞表演順便又影吓,企唔到中間又唔想斜影結果只影到兩個人.


原本諗住上主教山影日落加夜景,不過計一計時間7點10分先日落,影得夜景來可能要7點45分,再落山,再搭車去關口,再……可能搞到好夜,就決定豪一豪去旅遊塔算數,要成160蚊架,一影完落樓下就有車走, 搭巴士又係六蚊,好似乜線都係六蚊咁,今日有陽光,不過日落都係冇料到.


只好影夜景啦,澳門半島呢邊最靚就集中影呢邊,有時間先再影第二個景.過程中見到永利有噴火表演,下次可以去影佢.


最後影埋呢邊,日落都係呢個方向,不過冇收獲.影完嗱嗱啉去翻朝早間麵店食飯就走,到關口已經九點幾,仲要坐金巴,仲要轉機場巴士,結果翻到屋企係過咗十二點@@