加入航拍

弟弟住的地方立例大於某一重量的航拍機要攞牌先飛得,變咗冇得用就決定益吓我.諗住好簡單,開機就飛,事實上都要睇一大輪說明書同教學影片先開始到.掉以輕心好容易好似鐡達尼號咁首航就炒機.

初初諗住去樓下運動場試,但有人走來走去都係驚危險,結果就去大水管,應該冇乜人.控制其實好直接,要停就停,要行就行,反應好即時,平時冇可能咁既角度影到火車,可惜部機只有1/2.3吋cmos,同電話咁上下.低光唔係好掂,所以我係日光日白先試飛.幸好有得影raw,都仲可以執吓相.

景就得一個,我決定要試吓挑戰高度,說明書話唔好飛高過200m,嘩,好低喎.我見人地都冇咁低.為咗就算炒機都唔會有傷到人,選擇咗原地就咁升高.就算跌落來都係喺我旁邊散,續小續小升高,最後去到500m好似都冇乜事.原來鐡路旁邊係瀘水廠.好喇,降落翻屋企.

苗栗旅遊

繼新竹Reload之後又去苗栗,好似翻鄉下咁.其實苗栗就在新竹下面,不過就好似僻得多,上永安網站搵,市區竟然只得一間酒店,仲要唔近車站,有夠山旮旯.

網上睇鄭漢步道要行20分鐘至30分鐘.就同的士司機講等我地個半鐘點計,居然係照睇錶.結果用咗12分鐘就到,大片稻田加上孤形火車軌甚是開揚,本來幾分鐘就影完,不過我地要等火車經過,等咗一陣就有,可惜唔係白色既普悠馬.有啲黐底,都冇計喇,費事要司機等太耐.

客家圓樓最方便,台鐡站旁邊就係,影完沒趣既清水疍之後就係等開燈,等呀等…….終於意識到其實係唔會開燈的,全部光都係靠後面兩支街燈先有咁柔和,結果用咗三分鐘快門先夠光.網上見到既燈光秀都唔知堅定流,都係去食飯算數.

三義車站附近有彩繪天梯,其實好普通,附近仲有彩繪村,都冇乜興趣,行咗一陣就走.

又要靠的士去勝興車站.唔知點解街上係好小的士,最後要叫店舖啲人幫手先搵到,呢度最皇牌節目係自己駕小火車行真鐡路,不過要預訂同埋成個旅程要三個鐘.只想玩一陣所以冇預訂,影吓相就算.

跟住要去鯉魚潭水庫就煩喇,雖然靠車站啲人搵到架的士,但係佢只肯翻三義車站,最後要包埋佢水庫後去睇落羽松之後再翻三義先肯載我地,呀…..水庫排洪係幾壯觀既,不過旅行得幾日就唔到啦.就咁影吓囉.之後既落羽松嘛,係超綠.

經過昨天搵的士的困景,決定問吓酒店有乜計.原來有類似Uber的東西,咁就好喇,放心得多.先去龍鳳宮影影大媽祖.

之後再去龍鳳漁港,諗住好多嘢睇,好多嘢買待到日落,實情係靜英英,有啲風車同埋呢舊嘢,幸好仲有嘢食,同埋最緊要可以call車,否則要搵的士就煩.我諗依家己經冇乜人搭的士,見到好多的士都係停晒大車站做接駁,街上截的士係好渺茫.

頂唔到咁耐就去遠啲既苑里漁港,呢度有出名既彩虹橋,就算天氣唔好都可以影夜景,唔會食白果呱?大背光既日落就算HDR都唔係好掂.一於用提早開燈大法等佢開燈夾夾佢.等了又等,個天黑晒都未開燈,雖然未係好晏但路途遙遠都唔等喇,夾硬影光佢同個紅天夾一夾啦,問翻司機條橋搞乜鬼,係咪慳電唔開燈?佢話唔開燈都唔係彩虹橋啦,係壞咗未整好,唔知有幾真喇.