鳳園夜攝

只係外圍古家園附近影吓,唔想咁大陣像所以早小小食咗晚餐就近去一去.雖然過了驚蟄,都係靜英英,夜攝不太強求有甚麽特別物種,主要係搵個唔多郁既目標可以慢慢影靚佢.

終於見到隻普通到唔普通既嘢,不過位幾好,唔高唔低,可以用最穏定既姿勢,冇遠係樹幹可以做背景,雖然咁簡單,最後都要夾咗三張相先影到成隻清.

正想袋住一張相結束今晚活動,幸運地在路邊發現隻普通蝶,菜粉已經試過爆頭,但呢種未試過,先穏穏陣陣來張大頭相先.

下一步就係灑水花喇,哎呀,竟然整醒咗佢,仲開始飲水,個頭仲要側埋一邊,同身體成咗一個角度,冇計都要跟個頭角度,影到咁大其實要好多張去增加景深的,但實在太震太難影,最後只夾咗兩張.

福岡旅遊

印象中福岡在日本來講好似冇乜特別,除咗去市中心比較方便之外,不過有人做搞手不宜太多意見.頭一日去到都有啲晏,行吓商場街就算,原來現在酒店已經變咗三日先執一次房而且冇樽压水送.去到仲要俾消費稅,服務大不如前.

第二日搞手話去太宰府,已經去過所以申請離隊自己玩,海之中道有個風箏節,去到唔見有風箏,不過櫻花就幾靚,今年遲開咗啱啱好.

終於有風箏喇,雖然天上都好多,但離得太遠影出來唔壯觀,只好襯佢仲見到地面就影,夾埋個人睇到佢有幾大.

市中心既舞鶴公園係睇櫻花熱點,特別來影佢既夜櫻,原本諗住在城堡上俯瞰市景,點知唔俾上,唯有下面影佢,做乜外面既櫻花冇燈照架?有點失望.

到了人氣行程油布院,仲要係搭油布院之森,一人要成500蚊車錢,單程兩個半鐘,呢張相得一個機會影,就係落車後等架車開出,我唔知佢即走所以手忙腳亂,未設定好就夾硬影,講翻油布院,我係唔理解點解要來的,只有賣紀念品的店舖,連最出名既金麟湖都好普通.加上又落雨,好失望.

我又離隊喇,影賽艇呢啲活動應該冇人會有興趣,但就好啱我,香港冇得影.

唔單純係比賽,其實等於香港既馬場,不過馬變咗快艇咁解,影埋轉彎既水花.

影到五點就走喇,放棄最尾兩場,趕去鷲尾愛宕神社影埋個夜景.

今日去柳川坐船,特登攞支200mm來影人地隻船,有兩隻船同時出發,最理想係坐先出發既船尾,咁就可以影另一隻船既船頭,唔好彩太多人要坐後出發既船,雖然係船頭但一路都係影船尾,好彩中途有對頭船,咁我又影到船頭喇.

要翻屋企喇,仲有半日,去博多塔影吓日景,可惜呢度五點就關門,冇得影夜景,否則一定安排一晚俾佢,360度景觀,其中一邊可以望到賽艇場添.

追逐豹斑雙尾灰

見到FB給這隻蝶洗版,我又未影過,而且聽講隻蝶好合作,只要位好就會影得靚,更加有人話三點後必出,不過.......要上蠔殼山山頂影,好彩山唔算好高.

食完晏先上去,又有成十個人等緊,主角未出,達摩鳳蝶先出來,居然係偶爾停吓,終於影到張比較四正既.

四點了,主角出來了,係好合作唔會飛來飛去,但現場超大風,跟本冇可能影得到,成班人只好等,咁既情況唔駛出微距,冇可能夾相,只好鬥快.

後尾又停咗個好位而且冇乜風,大家又狂影一輪.

小輪車分齡賽

好耐之前影過,不過都係快快門冇乜睇頭,今次要挑戰慢快門.

原本起點正面影好多車都正路,但慢快門就要側影先有效果,以為好易影,一開始成堆車唔知對焦邊架先係頭車,局勢一明朗已經差唔多完.

另一個重點係影到架車凌空,搞咗成日都係影唔到,最多都只可以係咁.

跟住係要影啲車在兩邊大彎位上爬行,呢個相對易影,因為垂直對住頭車,佢速度相對好慢,其實我應該用更慢快門先啱.

就咁直線行既就幾多都有,兩架並排先值得影吓.

大埔滘影蝶

FB見到褐斑鳳蝶居然早過黑丸出,我記得去測量站路途頗費力,隻蝶係影過不過未影過合翼,都要去一趟.爛鬼Google Map帶咗我唔知去邊,到最後叫我碌落山,侷住放棄,只好改路去松仔園.

呢度基本上已經冇乜人會來影蝴蝶,但居然有十幾人喺度,原來有攝影班,原來兩棵園中既山指甲正盛開,呢種花花期好短,一個星期已經冇晒花,我係幸運撞到,更幸運係有隻蝴蝶剛剛出世任影,尾部仲有啲液體慢慢排出緊.

另一個幸運,有對蝴蝶交尾,不過個位好難搞,就咁喺欄杆內影既話塊葉會遮咗其中一隻既腳,卒之搞到要爬出欄杆,但角度又斜斜地,盡力影咗兩張唔同對焦位置的,期望唔大因為姿勢唔多穏,估唔到最後又夾得埋喎.

之後攝影班去測量站,咁我就梗係跟啦,原來直上就係喇,不過要行幾百級樓梯,印象中隻褐斑鳳蝶好合作嗰喎,但嗰日成日都飛來飛去冇停過,最後係影唔到,不過都影到隻幾乎甩晒色既綠灰.

曲棍球攝影

有一排冇影,自從入咗100-400之後對300 F2.8依賴小咗,最大作用就係影呢類長距離又想淺景深既情況.

就咁兩個人追住個波既爭奪畫面雖然都唔係冇難度,不過有啲普通就盡量唔影,今次大會唔俾走去底線,只可觀眾席側影,咁就企近龍門影多啲佢.有啲人着白衫,個波又係白色,好多時會黐埋一舊睇唔到嘥咗的.

一撲一碌我最鐘意,其實前兩張個攻擊球員係凌空的,不過守門員矇咗.

咁都唔可以淨係影龍門既,兩個人爭波就太悶,多幾個都OK既.

再影埋擊球打起水花就差唔多喇.

花展影蟲

好耐冇去花展,次次都差唔多佈局有點悶,於是有個念頭係去影吓蜜蜂,我記得見人地有啲紫花係好多蜜蜂的.

天陰陰,冇乜蜜蜂,細心搵吓見到有堆魯冰花有幾隻,就好似上次預到的有一樣有一小段騰空時間,又冇點轉身,試咗一陣就影到.非常幸運,因為之後預到的都飛得太快,一係就唔啱方向.

蝴蝶都有啲,但多數係非常普通的,咁啱有一隻停紅葉又影吓,可惜就冇錄底喇.

單輪車攝影

好耐之前影過,不過嗰次欄晒欄杆,仲要係成塊藍色布嗰種,只可以影正面,連單人計時賽都係在欄杆來進行.全部要超近影冇乜嘢影到.今次聽聞有競速賽,希望可以有幾架車同時爭奪的畫面.

影人練習熱吓身先,用到1/50秒都好似冇乜效果,事關車速太慢.

再下試1/40秒,效果好似都係差唔多,算啦,正式比賽應該會快啲.可惜最擔心既事情發生咗,就係啲家長攞住電話在跑道旁邊影,幸好家長唔多,都仲有啲空位,只有更衰,個唔知評判定教練竟然係跟住啲運動員跑的,即係遮晒冇得影.

冇計,得翻單拖跑既障礙賽,唔係直線運動,更加冇效果.

後來專影起步嗰一段,比較好啲.

與其張張都咁普通決定博一博,下試1/30秒,咁啱又有架比較快既車,成為成日效果最出既一張相.

換腦

部電腦原來已經用咗10年,嗰陣仲係Window 8.1,最近Microsoft話唔支援,次次開機都提醒我,冇乜事就照用囉.忽然又收到Capture One話唔再支援Express版本,睇怕都係Sony冇再俾錢,咁我用得就照用啦,只要唔再買新型號相機.點知前陣子係突然間唔俾用跳翻出來.死火,只好下載Sony個廢廢原廠軟件頂住先,點知又係唔支援Win 8.1裝唔到.睇怕其他廠新軟件都應該有同樣問題,死死地氣問電腦維修可唔可以幫手改成Window 11,唔得喎,最小8代以上CPU先有機會,4代差太遠唔掂.

冇計,卒之要換機,經過漫長既等待........原來部機好大,幾乎唔夠位放.跟住要搬資料好痛苦.

元宵綵燈會

記憶中綵燈會啲節目都幾悶,唔係唱歌就係跳舞,不過好耐冇去過又去下.穏陣起見,都係去翻最熟識既文化中心,呢度有樓梯坐前面冇咁遮擋.我入場比較遲,座位都冇得七七八八,但唔知點解中間有幾個位係冇人坐,我梗係唔客氣啦,始終影相係對正比較好.

一開場就係區瑞強同鄭志誠唱歌,都好係識既人.

之後有啲社團唱歌跳舞,坦白講係唔多精彩,直至有多國小朋友,表演普通至小衫比較靚.

終於有雜技表演,靜態嗰啲唔影喇,打跟斗快門又唔多夠快,最後得呢張還可以,可惜又出咗界.

跟住又有武術,專影跳高動作先,原本九節鞭都好精彩,可惜條鞭同淺色背景黐晒底,影完出來隠咗形.

跟住唔記得咗係咪黃梅調,唱曲加Fing手袖咁,又係玩慢快門時間.

壓軸係水袖舞,瘋狂連拍時間因為要玩慢快門,影到爆Buffer,最後用得既得幾張.