膽生毛

單反其中一個優點係可以換鏡.但係副作用就係好易會入塵,而黐住感光完件既塵係會在相片中見到的.攝影界一路都視清潔感光完件為洪水猛獸,個個都係叫人一定要翻廠搞.有啲品牌保養期內免費,否則都要二三百蚊架.有時唔係錢問題,而係入塵非常常見,話唔定剛剛清潔完,轉過頭又入過,就算唔駛錢,下下將部機搬來搬去都煩死啦.所以我第一日開始已經決意要自己搞.一路我都係用抹sensor筆,其實只係鏡頭筆,不過角位做咗三角,咁就賣貴一倍.但比起其他濕抹或者翻廠搞都係快靚正平.

大家睇唔睇到有乜問題呢?Sony單反由於係用半透反光鏡,影相時塊反光鏡係固定,無需要反上去的.可以反起全因為要清潔感光完件.亦唔需要好似其他單反咁要開清潔模式,又要充滿電先唔驚塊反光柀在清潔過程因為冇電回彈做成損壞,問題就係,之前既型號塊反光板反高後感光完件係完全露出,來到A99II,個設計竟然係反光板升高後依然仲遮住部份感光完件.無論抹sensor筆,啫喱或者sensor wrap應該都抹唔到上半部份.可能原廠會有啲曲柄工具呱?

呢個設計搞到我好困擾,淨係得翻吹氣球一個清潔方法,好衰唔衰,卒之有粒塵在右上角點都吹唔甩,搞到次次執相都要同一位置除塵,心裏有條剌硬係唔舒服,人無知就無敵,走去藥房買咗包棉花棒.承惠港幣兩個半.感光完件上面有塊玻璃,玻璃喎,好硬架嘛,冇咁易爛既,用筆抹都係咁啦.驚甩棉花,搵支冇乜毛突出來既囉.輕輕推咗兩吓再開機影.哈,粒塵真係唔見咗.傻人有傻福.

盧吉道攝影

居住香港的人應該好小會冇去過山頂呱?一般人多數會聚集在山頂廣場一帶,一來有商場隨時可以入去涼冷氣,食嘢.二來也有免費觀景台可以欣賞夜景,有錢的話仲可以上老襯亭,不過我覺得免費觀景台人太多之餘景也不太好,會影到好多山.老襯亭就冇試過.又係勁多人,俾完錢可能都冇乜分別.

拍友多數會去盧吉道,路程也不遠,景比觀景台好得多.不過都唔係成條路都得,只有三個位置較冇嘢擋,黃昏的光線變得金黃,令較平淡無味的日景也有點好看.

最入影到日落既位置其實麻麻,會影到幾多山,不過今日日落又好似幾靚,冒住冇咗個夜景位去影咗一陣.猶豫既代價就係個太陽已經太低.

嗱嗱聲趕翻去夜景位,不出所料已經滿人,厚住面皮夾硬擠入兩個人中間,好在又帶咗欄桿神器石膏手來,如果要攝支腳架入去可能會俾人鬧.呢度人多,可以順便試吓欄桿有人觸碰會唔會有問題.今日既人都比較斯文,冇乜人撞啲欄杆,而且呢度啲欄杆都好實淨,30秒曝光一啲問題都冇.

想行開去第二個位影多張冇乜可能喇,只好轉角度影完右邊影左邊.都係一堆樓咁啦,天色亦已經開始變黑,係時候走喇,去到巴士站嚇咗一驚,巴士不缺呀,但條龍長到一人嘟一下上車都可能要超過半粒鐘,食啲嘢先囉,翻來都一樣係咁多人,只好硬食,咦,工作人員突然俾我地上先,原來差唔到排到既人要等下一架有位坐,可以早啲走企就企啦.　

武術攝影

雨天日子最好影室內活動啦,之前都影過,俾嗰啲太極乜,太極物悶到抽筋.今次睇過有刀有劍,有棍,有槍先來.

下午先來,應該太極完晒,點知仲有喎,而且仲有好多,救命,莫講話悶死我,我諗張三峯見到太極搞成咁都死不冥目.好彩,有兩個場其中一個玩刀,其實啲觀眾都識貨,個個走晒去睇舞刀.就咁擺架式扮型既唔影喇,專等跳起嗰吓.

今次舞刀項目出奇地有好多跳躍動作,一下影唔到可以等下一次再試.正面跳之後可以影埋斜跳.

呀......乜咁多舞刀架.開始有啲悶,好不容易等到舞棍出場,頭一個運動員真係俾佢嚇死,竟然玩太極版,如果個個都係咁我就走喇.好彩跟住既都係快打,出奇地幾精彩.但好難影到有動感,所以最好又係影佢跳起.

呢位運動員對我地真係好,跳來跳去.個個都係咁就好,爆咗小小框添.

輪到我認為係當日最精彩既項目,舞槍仲好睇過大戲.連空中翻騰都有.可惜塊面係望地下.

有時個人唔郁都可以表達動態既,就係變形既兵器喇,當然個人一齊跑就更加好啦.

呢個時候其實已經係晚上八點半,開始淨翻一個場,呢個係我呢次期望好大既對打.因為之前既都係單人套路,似跳舞多過打功夫.點知........原來都係套路,所有招式都係夾過晒的,而且動作都有小小太極.就好似政府叫人修葺舊樓個廣告咁,有位大叔大嬸係咁意拆兩招嗰種.評分標準除咗動作靚唔靚之外仲要計時,早咗或者遲咗完都係要扣分的,打交計時居然唔係跟住計點算睇吓邊個贏,而係睇吓邊隊控制得準,又長知識了.

中伏鷓鴣山

上次影匡湖居加白沙灣個位始終唔係好靚,而且我支70-200mm唔知係咪跌過落地,硬係影唔到成個畫面都sharp.今次就挑戰吓鷓鴣山,有兩個方向可以揀,璧屋上最近但好陡斜.將軍澳嗰邊就好遠.影完夜景唔想行咁遠喎,斜就斜啦.

呀,原來都真係幾斜,同埋前兩日落過啲雨,地下幾跣.最大鑊係,啲路好似唔多明顯,要喺啲樹中間穿來穿去,斜最多慢慢來,但天黑迷路會好論盡,行得幾行唔係好對路正想放棄之際,見到冇遠有條繩,哎呀,原來係我偏離咗正路,有好心人加咗條繩俾人借力.咁唔驚迷路就繼續,半個鐘左右就上到標高柱,又唔係好對路,啲樹好高,再行翻落啲睇吓.終於見到比較開揚既地方.

側小小就係呢個景,行行吓竟然有成班人喺度.老友,你點上來架?一路都冇見你既.我喺璧屋嗰邊上囉.嘩,嗰邊好跣喎.都係架,不過快吖嘛.啱喇,你地嗰邊上來有冇見到邊個位可以影到白沙灣?冇架,想影只可以成個人企上標高柱影.

一於又走翻去標高柱度試吓.哎呀,真係我見到人地影既構圖.咁就死得,標高柱邊夠位放腳架?即係夜景唔駛諗.

唔理咁多,搵長鏡影埋個特寫先.如果呢個構圖影到夜景就好喇.有兩個選擇,一係等入黑去翻頭先下面嗰兩個夜景位,一係就早啲收工走人.橫掂頭先兩個位咁普通.走條路又咁跣,都係早啲走啦.唔係好甘心走翻去上次璧屋附近嗰位諗住影多次.,點知已經俾啲樹遮晒.不過又俾我見到有條小路有晒絲帶.可能係另一個上山入口.趕唔切上去喇,體力都用得七七八八.下次先再來深過路.　

迷你石膏手

四探蛇嶺之後今次係三探彩德村.頭一趟帶了三腳架.遇到石屎牆加高欄桿,平時將一隻腳隊出欄杆,令三腳架伸前既方法用唔到,縮短兩隻腳擺上牆又唔夠高,結果侷住手持影幾張就走.跟住走去鴨記搵咗支好出名既八爪魚腳架.結果用咗一次就貢獻堆填區,穏定性超級差.抓住欄杆唔跌部相機落街都得既,要構圖就唔駛旨意,郁來郁去毫無實用性可言.原本打算搵人做個蝦公碼之類既東東.不過應該會幾大份,熱情又冷卻下來.

終於在網上見到這個產品,只係一塊小鋁板加條布帶.再加個小雲台,就算唔用擺定喺相機袋都唔會有乜負擔.

而且係靠重物拉緊,磨擦力等於磨擦系數乘以垂直壓力,即係只要件嘢唔難,壓力夠大的話,抓着力可以係無限大,終於順利碼上了彩德村的欄桿.

起初有點擔心它的穏定性,事實上只要欄杆夠硬淨,冇人碰觸條欄杆,同普通腳架係冇乜分別既,這類相機處於接近水平位置既構圖,20秒影夜景都冇問題.

再來試試佢既極限,就係向下角度影,我相信塊版係冇問題的,要擔心既係個小雲台,果然係有點勉強,會好似微距用腳架咁,鎖緊嗰吓相機會跌低小小,要估佢跌幾多,冇辦法做到好精準既構圖,亦證明已接近負重極限,而且要多留意個雲台螺絲.尤其係要旋轉部相機的話絶對要鬆晒個雲台先好,轉完之後亦要檢查有冇轉鬆到部相機,否則好容易轉鬆咗部相機而不自知導致照片模糊.總結來講最大好處係唔重,作為後備都好,普通腳架用唔到或者唔俾用既話,有佢可能就係有同冇既分別喇.

閃燈的無奈

換咗新機都冇用佢影過夜景人像,加多級ISO同更準確既對焦,焦距又短晒,應該可以易好多呱?見到有中環既活動馬上參加啦.夜晚影人其實係想影啲燈既散景,嗰啲去埋晒山旮旯,靠自己飛燈照光環境既,我不如朝早去影啦.

第一站係立法會大樓,大家準備吓啲器材先,我今次打算簡單啲.閃燈向人補光,背景就現場光搞掂.所以就咁插支閃燈其實就影得.其他人就個個出燈架.太多燈架其實好容易入鏡.都冇計啦,構圖時盡量留意吓囉.不過最大鑊既係,原來個個都唔係裝閃燈,而係裝LED燈.以往經驗,啲人為咗好影實係較到好光,.結果背景就暗晒.呢班人可能都有啲經驗,冇較到超光,但都光過背景.幸好垃圾會都算光,叫做OK.

跟住話去影光管招牌,有乜好影呀?原來又係為咗利用光管招牌既光,唔駛用閃光燈.乜閃光燈真係咁難用咩?除咗超光搞到背景全黑外,仲搞到變咗鐘無艷陰陽面,要事後執翻光另一邊面.

仲係唔捨得個光管招牌,話用佢做主光源影街景,咁就大件事喇,除咗太光之外,仲變埋雙色溫,一係個人青,一個背景超黃,事後要分兩邊執再夾翻埋,好彩model身處位置比較暗,否則真係有機會搞唔掂要掉入垃圾桶.

今次搵地方真係好hea,求其搵條街冇乜車可以企馬路中心就算數,冇乜人自然又冇乜燈,加上超光LED燈,背景只睇到零星光點.雖然我冇諗住飛燈,好彩都有帶來,既然環境咁黑就試吓好似夜攝昆蟲咁用閃燈加啲背景光啦,左手面電單車加咗光真係好啲,可惜閃燈有效距離始終有限,後面既路面都係好黑.冇計喇,影唔到唯有後期開個圖層搞搞佢.

仲搵個背景係全黑既樹葉,反差太大後期應該好難搞,照舊開閃燈補補佢,後面就冇計喇,已經推光咗一級都仲係暗,可知當時有幾惡劣.其實用LED燈只係方便咗,你可能會覺得較暗啲同現場光一樣應該就得啦,實際上用一個非常微弱既光,靠長時間曝光影到model夠光係有問題的,model點都有小小郁,好易失敗,除非用到好高ISO短時間搞掂,但質感點都冇閃燈即時成像咁實在.實在係無奈.

四探蛇嶺

印象中應該係第四次來蛇嶺.頭一次見到蛇嶺個箭咀照入諗住冇死,點知係村,路被關上鐡閘,第二次自己睇地圖搵咗個比較似樣既入口,點知又係入咗唔知乜村,喂,老友,你入來做乜?影日落,去馬草壟啦.再三睇清楚入口係罐頭形軍營,罐頭呢兩個字好關鍵,因為係有兩個軍營,同小巴司機講話軍營落有九成機會落錯車.終於搵啱路喇,不過超大霧,而且超大風,未到拍攝點已經掉頭走.襯住好天,帶隊去多次個咁隠閉既地方,司機好醒,一睇就知我地係去影相,仲懶叻咁教我地去馬草壟,我試過好多次,無論問任何人,都一定係叫你去馬草壟.冇人知蛇嶺係可以影相的.到我話要落車嗰吓大家都好驚訝,今次來條路啲草長咗好多,幾乎遮晒條路,我都有啲猶疑以為行錯路,好彩有村民指示話啱路先敢剷草入去.

路斜度很細而且得一條路,包唔會迷途,大約45分鐘就可以登頂,標高柱寫住鐡坑山,可能呢個先係真名.上次來日落非常遠,會有兩個山頭遮住,應該係季節唔同,位置改咗,再冇被山遮住,由標高柱過去拍攝點要走一小段路徑不明顯既山頭.驚要剷林帶埋勞工手套來,不過原來好平坦,慳翻唔駛用.

跟住自然係影埋夜景.呢度個景實際上跟馬草壟好相似,事實上向東望係可以睇到馬草壟.不過梗係照影啦.