2017年10月21日 星期六

新地方

影蝴蝶來來去去幾個地方,但今次短時間內去咗兩個未去過既.


在一個天氣不甚穏定的日子,穿過朗屏村到達一個露天停車場,穿過後竟然有一大片草地,原來仲可以有路行上丫髻山,時晴時雨真係冇乜蝴蝶喎,蟲都殺啦,蟲有個好處係冇咁易飛走,仲係交尾,磨爛蓆慢慢影都得.難度係要景深包晒兩隻,咁啱有陽光可以收光圈,唔駛出飛燈.


但其實係落雨多過有太陽,所以大家都圍埋一齊避雨多,諗住落雨冇乜人會來啦,結果係越多越多人冒雨上來,最後應該有超過20人喺度避雨,雨一停又出去碰碰運氣,呢種小灰蝶都幾多,冇大隻既就影吓佢囉.


嘩,有蝴蝶交尾,儘管位唔係好好(黑底),都一樣排晒大隊,我都排咗轉,後來撞到有人話原來下面都有,個位仲靚好多,唔駛排隊………住,咁樣講一講,終於又係排大隊啦.結果影到甩尾大家先肯收手@@.


跟住係第二個地方,丫髻山山腳,平時一嘢就上咗山頂,原來未上山前行前啲又係一大片草原,一樣又係咁多人啦.今次Hea啲,冇帶腳架閃燈,次次都咁多人實在都幾難搞咁大龍鳳.出現啲咁既嘢自然又係排晒隊,今次用A99II既APS-C模式影,睇得出跟A700既分別嗎?老實講真係差唔多,不過高ISO好小小.


地方就大喇,不過冇乜嘢影,出口有隻小蝶一路飲水唔走.背景冇乜,一於玩爆框,影到咁大不得不靠晒閃光燈,我只帶咗一支燈,畫面上半部既背景黑黑地,事後搞搞佢都算OK喎,全片幅有呢樣好,推光暗位冇咁多noise,A700肯定點都覺眼啲.

2017年10月17日 星期二

影航母

知道航母列根號訪港其實都想去影吓,不過一路都唔知乜位可以影到.可能係上天聽到我既心聲吧.真係有朋友約去影喎.咁我自然係報名啦.


拍攝既地方係三支香,我都試過上去影夜景,當時對我來講都幾吃力,仲諗住未必要真係去到山頂,結果就真係要到頂啦,不過可能體能好咗,又唔係咁吃力喎.距離實在太遠喇,用盡500mm先影到全隻艦.天氣有煙霞之餘仲勁熱,有啲熱氣流影響,影極都唔sharp,就算有腳架都冇幫助,試過加快快門都係一樣.就算暴力PS,最後都只可以係咁.


諗住原路走啦,但朋友係行山發燒友,健議不如由春花落走,斜小小但會快好多,咁既然快咪試吓囉,而且有人帶路唔驚唔識路,行低啲,可以近小小影到列根號,焦距短啲冇咁矇,但都係離理想好遠.而且越行越唔對路,邊只斜小小呀,簡真係亡命懸崖,手腳出晒先掂,有啲被人昆既
感覺.......

2017年10月11日 星期三

台北宜蘭攝影之旅

捱咗兩個血拚之旅,同老婆傾掂數整個純玩團,淨係影相同食.原來去台北有一件事好重要,就係一落機就要9秒9跑去過關,我地冇咁做,結果係打晒蛇餅,用咗超過一個鐘頭先過到關,奇怪既係行李帶仲未見自己件行李,原來因為等太耐,行李帶行季已經多到不能負荷,侷住被放埋一邊.


去得酒店搞check in,食個車站壽司已經三點幾,原來車站好多食店,基本上可以講乜都有.唔係要好刁鑽既淨係來呢度都得.睇翻日落時間居然係5:45.原本計劃咗三個行程變咗直接去最尾嗰個.雙溪公園呢度既大王蓮真係好壯觀,為咗要拍出翠綠既蓮葉,我買咗我平時唔多用既CPL.


之後夜晚先係主菜,好多公園夜晚都係求其有啲路燈就算,呢度有幾盞幾光既燈照住個蓮池,側光咁影啲蓮葉既細節出晒來真係唔錯.


第二天一早既節目係拍攝台北橋機車海,諗住上班時間慌死唔夠早7點鐘就去到.車都好多但未到塞滿的程度,但最大問題其實係光線,太陽光只照到穚的後半段,前排車幾近全黑.雖然靠後制都或者搞得掂.不過等到啱光不是更好嗎?差不多8點陽光終於照到最前排,更好既係越來越多車,終於塞滿條大橋.走既時候經過車站入口,有個念頭閃過,爬上入口級位影街度好多車應該幾壯觀.最終驚俾人拉就作罷.


台北站買啲卥味,關東煮同麵包翻酒店做早餐就出發去礁溪,原本諗住去籣陽博物館,好彩酒店知道係休館冇白行一趟.唯有對掉明天既行程.咁其實好趕,因為我計劃既行程要就埋交通,一個南一個北,將半日行程轉日子係行唔通的,為咗節省時間同腳骨力決定包的士.第一站唔知乜嘢寺,總之佢有好出名既玉媽祖,成個係玉仲高過個人,連妹仔都係玉.


仲有頂樓既金媽祖,成個都係金,唔知係咪實心呢?


總共三層,周圍都係彿像,真係滿天神彿,除咗咁,呢度頂樓望出去可以見到廟啲雕塑加埋南方澳既海港景,形成幾特別既畫面.同台北橋一樣,太陽只係照到一半,前面的龍雕接近全黑,用閃燈全出都唔補得幾多,只好靠後制,雖然閃燈唔幫得幾多,但有光到同全黑直接推光質量還是有差的.


跟住就係趕去南方澳觀景台.呀…實際上都係要搭的士,跟本冇可能行上來,死火,呢個木做觀景台真係好化學,只要有人行就會震,對長時間曝光非常不利.睇你好唔好彩,3.2秒幾乎已是極限,我影咗好多張先揀到一兩張OK.


冇時間慢慢等天色啱喇.草草影到就算,原本對呢個景好大期望,真係有啲失望.


咁又一日,終於可以去籣陽博物館,不過之前去一去幾米廣場先,有人話未去過幾米廣場唔算去過宜蘭,直情車站出面都唔去真係好唔俾面,但事實上只係得幾個公仔,頗細規模.


籣陽博物館外形頗獨特,夜晚開咗燈加埋倒影都應該唔錯,橫掂要等天黑就入去睇吓,地方都幾細,陣間就睇完,之後就係等等等,哎呀,做乜唔開燈架,算啦,黑媽媽只好走人,做乜冇的士架?走去問吓買檳榔的店,係冇架,邊會有的士入來,全部都係電召入來,為人為到底,幫你叫一部啦,真係唔該晒佢.


又一日,原本諗住去貓空影吊車,查過網頁開車時間先去,點知…係冇開的,真係大整蛊,變咗遊車河,去翻第一日去唔到既節目,就係松山機場跑道尾影飛機升降,距離係超近,飛機就在頭上飛過之後在你身後降落,嗰吓嘈音真係乜嘢Dolby Atmos, DTS-X都要行埋一便.我用長鏡盡量想影到架飛機近地面,但硬係冇嗰種感覺.事後想起應該用廣角鏡影佢起過頭頂嗰吓就夠大包埋個地景.


影埋降落同起飛.我可以肯定有個洗頭水廣告用飛機引擎吹起model啲頭髮係假.起飛嗰吓風壓連企都企唔穏.我老婆笑我地成班傻佬咁都玩一餐,唉,呢啲男人既浪漫你唔明架喇.至於起飛其實係影唔到既,一來發機要滑行好遠先離地,鏡頭唔夠長,二來飛機噴出來既熱氣會搞到矇晒.


晚上安排咗去影星光橋,我見人地個角度好靚的,可以從高處影到橋加埋地上的路,但係我搵咗好耐都搵唔到個位,最後只好從地面影,真係普通過普通.聽日仲有乜影?梗係去血拚啦,唔係諗住真係要老婆陪我影足咁多日相呀?做吓樣都要啦 :P

2017年10月6日 星期五

大澳影貓

聽人講大澳好多貓,勾起咗我整翻次土炮野生動物拍攝之旅 :P


有啲唔多對路,又話大澳好多貓,但一路上我一隻都見唔到.哎呀,終於在一條卷見到有一隻,不過好鬼遠,我得支135mm,因為聽人講可以好近影,用wide鏡都得.影咗一兩張之後諗住行埋啲,點知貓貓好驚人,閃咗 @@


死啦,唔通咁就玩完,行行吓見到間屋好多貓裝飾,埋去睇睇,有隻貓瞓緊吊床好嘆.佢唔係好理我任影,不過吊床包實晒唔係好識影添.


算啦,都影咗兩隻,走翻出碼頭條路竟然同時見到兩隻,仲完全唔驚人,啲人係咁搵手機影佢佢都懶理,你係咪想影呀,咪扮嘢啦,影咪影囉.


呢隻有小小怕醜,走埋一二面,唔緊要,隔住欄杆影仲有家貓feel.


竟然撞翻頭先隻怕醜貓,今次大街大卷佢又完全唔驚我喎,仲擺埋post俾我影,真係俾佢激死.


初初一味掛住淺景深呀,淺景深呀,係咁開盡F1.8影,實際上係淺得滯,有啲特寫連貓貓個樣都唔夠景深.後尾都要縮翻到F3.5至F4先正常啲,雖然貓身都係矇,但再收光圈應該背景會好雜.兩頭唔到岸.呢次真係好運,我走之前就撞到有貓,否則又係大澳白果之旅 :P

2017年10月2日 星期一

又影吓人

本來都冇諗住去影人,有人見我影既相有興趣想我帶佢去影吓.呀.....其實上網搵搵係好多啦,一場相識,咁我都冇所謂既.


好多時都係搵啲花花草草做背景,都唔知點解硬係要走到冇雷公咁遠影.呢度雖然簡簡單單,但係有前景有背景都算唔錯啦.我係想影全身的,不過又係好多人用wide鏡........


換咗全片幅已經叫做好啲,50mm都算wide,不過今日有三個人用24-70mm,真係冇運行.其實啲人知唔知道下下用24mm影會阻住人架?唔係話一定要用長鏡,但你影咗幾張都讓個位俾人影吓呱?有個人問我做乜用水泥牆做背景,呀.....其實我唔想鬥wide特登去側邊影,model好識做,會轉過來照顧吓我.


前半段我都冇乜影過相,話咁快又換衫,今次去啲空曠啲地方,勉強可以用85mm影.都已經接近黃昏,陽光射落model既頭髮感覺幾好.


糖水相就係冇乜深度架喇,但又真係幾好睇,要讚吓model好肯擺post,上欄桿,瞓地都冇所謂,實際上好多model都係成日就咁企喺度,影到悶唔想影的.


秋天日落比較早,等我試吓影唔影到咸疍黃加人先.設定唔駛諗,ISO 100,快門1/250秒最高速同步,光圈就啱背景就算,閃光燈全輸出,影到乜就係乜.結果太陽都係有小小爆,好在事後用Highlight搞得掂.

2017年9月27日 星期三

誓闖尖風山

延續上次去完鷓鴣山發現新路既故事.上午有一點小雨,下午睇睇個能見度,西貢又去到50km,原本諗住好冇上青山,不過青山附近能見度得40km,一於就決定去尖風山.


絲帶路非常隠閉,要在路邊突入一個密林,再跟住無數絲帶慢慢搵路.條路應該冇乜人行,幾乎俾草遮晒咁滯,途中仲有個位俾蜘蛛網封咗路,真係唔好意思要夾硬破壞咗人地家園.而且因為落過雨既關係,路都幾跣,行到身水身汗,經過一翻努力,去到一個電線杆位置.哎呀…呢個位我來過啦,上次條路易行得多.最弊係呢個位跟住就冇路,上次就係咁食白果.冷靜一吓,周圍睇睇原來有個鬼鼠位有絲帶,係一條好斜既上山路,跟住上果然係入口,條路更加難行,簡直要剷草咁滯,而且唔係直上,中途要落低跟住又再上.幾經辛苦終於上到來,呢個就係我要既景,成個匡湖居影晒,再加埋部份白沙灣.有一點可惜呢張相係用APS-C模式影的,70mm唔夠長,會影到好多草.


當然我有帶埋135mm來,跟據山下影到半個匡湖居既相推斷(當時大約係180mm),135mm應該就成個影晒,結果同推算差不多,不過就幾敏,幾乎爆框,應該用85mm加1.4x增距會啱啲.而且放腳架位都有問題.地上生滿晒草,腳架放在草上根本唔穏,好彩有勞工手套,除一除草先搞得掂.

2017年9月22日 星期五

一次滿足兩個願望

要為雨天塞滿節目不容易,日落一定唔駛諗,而且拍攝地方要係室內,即使真係落雨都唔怕.


多得朋友又帶我地去有蓋地方影相思雀.不過細光圈鏡加上天陰陰,ISO 1600只得1/100秒快門.唔想再高ISO喇,因為開咗APS-C模式都唔夠長,仲要裁,雜訊開始不太能接受.相思個頭不停郁來郁去,1/100秒其實幾搏吓.真係好多相炒咗,最後得一張叫做比較好,背景冇黑,影到兩隻冇咁齋,果實也夠紅,上面仲有點點水滴.哈哈,好似賣廣告咁.


第二波我地去活化工厦,即係利用工厦作拍攝場地,今次石膏手幫唔到手,因為欄杆所處既地方唔多啱.死火,啲牆都好高,腳架開到最高都係差小小,要zoom出小小旁邊既牆先唔會入鏡.就就就,啱啱仲影到個迴旋處,影唔到張相就差好遠.腳架再高啲就好,個迴旋處可以擺出啲.


雖然其他方向都有景,但都係麻麻,襯仲未黑齊影多個迴旋處特別就收工.

2017年9月17日 星期日

膽生毛

單反其中一個優點係可以換鏡.但係副作用就係好易會入塵,而黐住感光完件既塵係會在相片中見到的.攝影界一路都視清潔感光完件為洪水猛獸,個個都係叫人一定要翻廠搞.有啲品牌保養期內免費,否則都要二三百蚊架.有時唔係錢問題,而係入塵非常常見,話唔定剛剛清潔完,轉過頭又入過,就算唔駛錢,下下將部機搬來搬去都煩死啦.所以我第一日開始已經決意要自己搞.一路我都係用抹sensor筆,其實只係鏡頭筆,不過角位做咗三角,咁就賣貴一倍.但比起其他濕抹或者翻廠搞都係快靚正平.


大家睇唔睇到有乜問題呢?Sony單反由於係用半透反光鏡,影相時塊反光鏡係固定,無需要反上去的.可以反起全因為要清潔感光完件.亦唔需要好似其他單反咁要開清潔模式,又要充滿電先唔驚塊反光柀在清潔過程因為冇電回彈做成損壞,問題就係,之前既型號塊反光板反高後感光完件係完全露出,來到A99II,個設計竟然係反光板升高後依然仲遮住部份感光完件.無論抹sensor筆,啫喱或者sensor wrap應該都抹唔到上半部份.可能原廠會有啲曲柄工具呱?


呢個設計搞到我好困擾,淨係得翻吹氣球一個清潔方法,好衰唔衰,卒之有粒塵在右上角點都吹唔甩,搞到次次執相都要同一位置除塵,心裏有條剌硬係唔舒服,人無知就無敵,走去藥房買咗包棉花棒.承惠港幣兩個半.感光完件上面有塊玻璃,玻璃喎,好硬架嘛,冇咁易爛既,用筆抹都係咁啦.驚甩棉花,搵支冇乜毛突出來既囉.輕輕推咗兩吓再開機影.哈,粒塵真係唔見咗.傻人有傻福.

2017年9月12日 星期二

盧吉道攝影

居住香港的人應該好小會冇去過山頂呱?一般人多數會聚集在山頂廣場一帶,一來有商場隨時可以入去涼冷氣,食嘢.二來也有免費觀景台可以欣賞夜景,有錢的話仲可以上老襯亭,不過我覺得免費觀景台人太多之餘景也不太好,會影到好多山.老襯亭就冇試過.又係勁多人,俾完錢可能都冇乜分別.


拍友多數會去盧吉道,路程也不遠,景比觀景台好得多.不過都唔係成條路都得,只有三個位置較冇嘢擋,黃昏的光線變得金黃,令較平淡無味的日景也有點好看.


最入影到日落既位置其實麻麻,會影到幾多山,不過今日日落又好似幾靚,冒住冇咗個夜景位去影咗一陣.猶豫既代價就係個太陽已經太低.


嗱嗱聲趕翻去夜景位,不出所料已經滿人,厚住面皮夾硬擠入兩個人中間,好在又帶咗欄桿神器石膏手來,如果要攝支腳架入去可能會俾人鬧.呢度人多,可以順便試吓欄桿有人觸碰會唔會有問題.今日既人都比較斯文,冇乜人撞啲欄杆,而且呢度啲欄杆都好實淨,30秒曝光一啲問題都冇.


想行開去第二個位影多張冇乜可能喇,只好轉角度影完右邊影左邊.都係一堆樓咁啦,天色亦已經開始變黑,係時候走喇,去到巴士站嚇咗一驚,巴士不缺呀,但條龍長到一人嘟一下上車都可能要超過半粒鐘,食啲嘢先囉,翻來都一樣係咁多人,只好硬食,咦,工作人員突然俾我地上先,原來差唔到排到既人要等下一架有位坐,可以早啲走企就企啦. 

2017年9月7日 星期四

武術攝影

雨天日子最好影室內活動啦,之前都影過,俾嗰啲太極乜,太極物悶到抽筋.今次睇過有刀有劍,有棍,有槍先來.


下午先來,應該太極完晒,點知仲有喎,而且仲有好多,救命,莫講話悶死我,我諗張三峯見到太極搞成咁都死不冥目.好彩,有兩個場其中一個玩刀,其實啲觀眾都識貨,個個走晒去睇舞刀.就咁擺架式扮型既唔影喇,專等跳起嗰吓.


今次舞刀項目出奇地有好多跳躍動作,一下影唔到可以等下一次再試.正面跳之後可以影埋斜跳.


呀......乜咁多舞刀架.開始有啲悶,好不容易等到舞棍出場,頭一個運動員真係俾佢嚇死,竟然玩太極版,如果個個都係咁我就走喇.好彩跟住既都係快打,出奇地幾精彩.但好難影到有動感,所以最好又係影佢跳起.


呢位運動員對我地真係好,跳來跳去.個個都係咁就好,爆咗小小框添.


輪到我認為係當日最精彩既項目,舞槍仲好睇過大戲.連空中翻騰都有.可惜塊面係望地下.


有時個人唔郁都可以表達動態既,就係變形既兵器喇,當然個人一齊跑就更加好啦.


呢個時候其實已經係晚上八點半,開始淨翻一個場,呢個係我呢次期望好大既對打.因為之前既都係單人套路,似跳舞多過打功夫.點知........原來都係套路,所有招式都係夾過晒的,而且動作都有小小太極.就好似政府叫人修葺舊樓個廣告咁,有位大叔大嬸係咁意拆兩招嗰種.評分標準除咗動作靚唔靚之外仲要計時,早咗或者遲咗完都係要扣分的,打交計時居然唔係跟住計點算睇吓邊個贏,而係睇吓邊隊控制得準,又長知識了.

2017年9月1日 星期五

中伏鷓鴣山

上次影匡湖居加白沙灣個位始終唔係好靚,而且我支70-200mm唔知係咪跌過落地,硬係影唔到成個畫面都sharp.今次就挑戰吓鷓鴣山,有兩個方向可以揀,璧屋上最近但好陡斜.將軍澳嗰邊就好遠.影完夜景唔想行咁遠喎,斜就斜啦.


呀,原來都真係幾斜,同埋前兩日落過啲雨,地下幾跣.最大鑊係,啲路好似唔多明顯,要喺啲樹中間穿來穿去,斜最多慢慢來,但天黑迷路會好論盡,行得幾行唔係好對路正想放棄之際,見到冇遠有條繩,哎呀,原來係我偏離咗正路,有好心人加咗條繩俾人借力.咁唔驚迷路就繼續,半個鐘左右就上到標高柱,又唔係好對路,啲樹好高,再行翻落啲睇吓.終於見到比較開揚既地方.


側小小就係呢個景,行行吓竟然有成班人喺度.老友,你點上來架?一路都冇見你既.我喺璧屋嗰邊上囉.嘩,嗰邊好跣喎.都係架,不過快吖嘛.啱喇,你地嗰邊上來有冇見到邊個位可以影到白沙灣?冇架,想影只可以成個人企上標高柱影.


一於又走翻去標高柱度試吓.哎呀,真係我見到人地影既構圖.咁就死得,標高柱邊夠位放腳架?即係夜景唔駛諗.


唔理咁多,搵長鏡影埋個特寫先.如果呢個構圖影到夜景就好喇.有兩個選擇,一係等入黑去翻頭先下面嗰兩個夜景位,一係就早啲收工走人.橫掂頭先兩個位咁普通.走條路又咁跣,都係早啲走啦.唔係好甘心走翻去上次璧屋附近嗰位諗住影多次.,點知已經俾啲樹遮晒.不過又俾我見到有條小路有晒絲帶.可能係另一個上山入口.趕唔切上去喇,體力都用得七七八八.下次先再來深過路.