2020年2月20日 星期四

影飛人

連電視都叫人唔好去人多地方,去行山,咁我一向都去開既,不過咁鬼涷上山影夜景驚攝親,要搵個朝早影完就走得既景,就決定去昂坪影吓飛人.


唔知係咪個個都咁諗,幾乎仲多人過上大東山睇芒草,好大煙霞,不過一場來到都影翻張景啦.


死火,冇乜風,得一個人準備飛,我聽到佢同教練講係咪成日都係咁架,係就走喇,冇計,走過小小影吓白沙灣.


好彩過咗冇耐開始又風,仲出埋太陽,啲人唔知邊度走出來,突然間多咗十幾個滑翔傘在準備,影吓佢地試傘先,陣間飛咗出去未必影到咁大.


不過唔係好對路,點點個個都淨係放吓個傘就算,冇人真係飛出去,睇怕應該全部都係菜鳥,上緊初班,算喇,走去影吓牛.


影影吓突然起哄,原來真係有個人飛咗出去,我都估到係呢個,係得佢一個定啲冇咁騰.即刻跑去影啦,連200-500都換唔切,不過咁都好,多啲景,夠近既話其實135都夠長,仲sharp啲.


飛到好高嗰啲影底就唔影喇,見佢只係繞咗一個圈就降落,啱晒,又可以影多一張半空相.



2020年2月15日 星期六

影橋底

呢排成日見到拍戲拍電視都喺呢度取景,雖然我覺得影橋面靚啲,但係唔想行咁多路,所以就咁決定啦.


去到竟然真係有人拍緊嘢,好彩唔係封晒,呢個係日落位來架,之但係,點解咁側架,魚眼都未必影得晒,應該係季節問題,太陽唔啱位,夾硬來終於變成咁.


只好等夜景啦,方位又要唔同,唔駛就太陽位置,我希望盡量就到條橋唔好大細邊.越走越近,卒之……先生你入咗鏡,可以移過啲嘛?我地好快影完.咁好啦,等呀等,個天開始黑佢地都好似未有意思執嘢.唔理咁多喇,最多我話翻你知我好快就影完,事實我真係好快,幾分鐘就搞掂,耐都冇用,靚光係好短時間.

2020年2月9日 星期日

惜於微時

這是一個在1881的微縮展.呢個時勢要花一個口罩先去到都幾重皮架.


有啲意外,唔係咁多人,可能大家都驚,我今次既構想係要盡量真實,唔可以見到城市有個巨人,又或者玻璃反光搞到古古怪怪,不過實行起來難度都幾高.呢個茶樓飲茶畫面我影到好大,盡量裁走晒外圍穿崩位置.可惜始終有小小反光.


這是最容易影的賣茶粿,只係店內被屋簷遮住好暗,要用LED燈正面補翻啲光.


呢張都等咗幾次先等到冇人,後面既獅子山其實只係一張相,雖然航拍角度係立體啲,但個個都係咁我就要玩另類,影到似一張風景相.


之後就係去地下影幾個經典場面,舞火龍事實上我之前已經影過,不過之前既擺位唔係幾好,做唔到冇巨人,今次其實都麻麻,後面好多橙色光管勁反光,好多位侷住唔入鏡.不過效果比上次好


太平清醮個景原本好大,又係唔多識影.側邊影飄色太細唔知係乜,而且好多嘢遮住.侷住正面大特寫.


搶包山我原本唔想影到個包山咁貼頂,但啲光管反光我真係執唔掂,向右手邊捕地亦都太複雜喇,最後只好咁.

2020年2月3日 星期一

後備電源

未搬屋之前部舊電腦就係因為一次跳掣,個硬碟即刻瓜咗,當時問過人可以裝舊後備電源,萬一跳掣唔會即刻冇電,可以頂一陣等你Save咗未做既嘢再用正常程序關機.不過老婆覺得擺咁大舊電喺屋企好似好危險,尤其係大陸做既.搬屋之後都擺脫唔到呢個惡夢,耐唔耐又會跳吓掣.搵師傅睇過都搵唔到原因,試過有一次去旅行個雪櫃啲嘢壞晒.幸運始終有限度,終於真係用緊電腦既時候跳掣.好彩開翻機冇事,科技先進咗真係好,可惜.....過咗幾日,E:損壞,無法讀取資料.好彩仲有隻外置硬碟有備份,不過最近嗰啲就冇晒喇.老婆見我咁慘就話不如都係買嗰舊電啦.


去電腦商場都唔識講,想搵嗰啲停電都唔驚既嘢,原來叫UPS.平貴就係睇斷電之後可以捱幾耐,最平既都捱到十幾二十分鐘,乜都夠啦,我最緊要夠時間啪翻着大掣啫.二來唔想咁大舊.頭一次用要义一晚電.


另一個問題係我部腦特別衰,隻牛要用兩個插頭的,我仲擔心細隻既UPS得一個,不過啲設計就真係....竟然係太近兩個插頭互頂插唔到,搞到要用刀片做一輪手工.好彩係軟膠唔係都幾頭痛.都睇吓說明書啦,原來兩個插頭唔係貼心設計,係因為我唔記得咗個Mon都要用電,唔係點睇到儲存未做好既工作同埋熄機?冇計,再買多舊太阻地方,反正我只係開翻個大掣就得,最後決定唔插Mon,真係停電最多長按開關熄機.

2020年1月29日 星期三

自制淺景深

有一張菜粉交尾相原本幾喜歡,但影嗰陣背景太雜.上網睇教做淺景深既片都一定要做退地,一來功夫多,二來退得唔靚邊界會好怪.


再細心睇翻張相,其實都唔係話一啲淺景深都冇,只係太岩岩殘殘好礙眼,我決定試吓只整矇出面嗰忽.


首先用內容感知執走晒所有嘢,只淨低背景.再做個超勁模糊.


跟住就係疊張舊相上去,然後慢慢用筆刷露個底出來,之前一路搞唔掂就係要擦到到好貼,硬係留翻條好怪既邊,今次擦開啲,反正黐到蝴蝶既位基本上都係淨色既(兩條鬚真係續粒像素搞咁滯),效果都勉強可以啦.下次影都係搵人放塊大葉喺後面好啲喇.

2020年1月23日 星期四

航拍第二擊

上次大水管影既相麻麻,由於只係電話質素,所以要靚景先決,於是去都唔算好遠既馬草壟.之前搭51K已經古古怪怪,小巴站既51K係去河上鄉的,要行去另一個位有一架又係51K特別班先係去馬草壟的.今次竟然冇咗,問站台先知改咗51B.一睇班次,嘩,20至60分鐘一班咁虛,既然來咗就只好等,好在都唔係等咗好耐啫.


要避免大反差最好早上順光影,由於又要睇屏幕又要睇架飛機去咗邊,我攞咗塵封已久既漸變眼鏡來,接駁之後出現紅色警告字眼,裝置在放電,乜搵咗咁嘢搞,飛飛吓冇電會唔會炒機架,但係遙控同主機電量又似乎冇乜急速下跌,咁就速戰速決影幾張就算,上次以為飛咗五百幾米,我估應該係五十幾米, 因為飛到七十幾米已經唔係好睇到架機.但係唔再飛高喇,一來有啲擔心電量問題,二來我想要埋啲樓,角度太大陣間拉直會裁太多.降落後我知乜裝置放緊電喇,係我部電話,一拔出遙控即刻冇電熄機.要研究吓點解會咁先得.影完張相好淡色,我要事後狂加飽和度先好啲.

2020年1月17日 星期五

影吓攬球

原本計畫去影日落,不過天氣又好似唔係好肯定食得出,朋友話放棄,咁我就去影吓攬球囉,用吓支328.


大學生比賽都預咗唔會好精彩,盡量淺景深影吓糖水相.同樣一個動作,背景化啲感覺即刻唔同.


大場比賽,實際啱射程又影到面既機會甚小,唔玩慢快門了,大光圈另一好處係入光量大,ISO 200已經有1/1600秒.可惜冇乜成個人在半空畫面,有啲浪費.


攬來攬去張張差唔多,又影吓啲人跑.哈,有啲想追求中焦個人個頭後面冇嘢,好似影人像咁.


最後影埋交波就算數,界外球竟然係冇影到,有咁啱次次都喺我附近開,328爆晒框,半身都唔掂.

2020年1月12日 星期日

京崑藝術共欣賞

上次因為美麗的誤會影咗霸王別姬,最精彩就只有將軍跳起嗰一吓.今次講明有大量動作就又影吓.如果諗住好似牛池灣文娛中心咁,可以水平對正個台影就大錯特錯.社區會堂就係普通椅水平放,擔高頭睇嗰隻. 要應對呢個情況只好後排攻擊,企起身影減低低炒既變形.我帶埋300mm,最壞情況就係企到最後唔會阻到人.原來咁諗既人唔止我一個,最後面貼牆已經冇晒位,幸好最後排座椅後面仲有企位,135mm都夠長.


點知一開波,前面坐緊嗰兩個人企起身不特止,仲企埋上張椅度,完全俾佢遮晒.我同旁邊位師兄都唯有咋咋底企上椅度影.開場冇耐就有打鬥畫面.


終於……俾人鬧,你地唔可以企上椅度喎,我冇所謂,最緊要前面都唔好企高就得喇.咁大家一齊企起身其實後面都係被阻的,我一早預咗,有絶招反mon,舉高過頭就搞掂,不過就攰啲.影咗一輪高速快門決定搏吓玩慢,影咗一大堆先影到一張,我比較奄尖,塊面矇咗既唔會要.


會堂仲有一樣比劇院差就係光線.比體育館仲要暗2/3級,我見有人用150-600mm之類細光圈長炮影,可能要全程玩晒慢快門先夠光.上次影將軍跳起,今次影埋兩個嘍囉襯佢.


原本話一共兩場,突然間又話多一場,可惜係文戲,個個停晒手,我都係隨便影幾張交差就算數,橫掂有時間,搏多張慢快門.


之後就係到萬眾期待既天女散花.超長水袖做出各種花式.個個睇到拍爛手掌,亦係燃燒快門既時候.記憶卡寫入紅燈幾乎長着.捲出四個圈真係勁.


飛身轉圈一樣掂,可能係太精彩關係,見到又有人偷雞企上椅度影,希望唔好搞到有人投訴下次冇得影啦.


最後原來會做海報轉出成個圈既動作.死火,我啱啱玩緊慢快門,有機會影矇咗,最後成個圈嗰張真係唔得,喊都無謂,事實上慢快門對絲帶既形態影響唔係咁大,唔值得咁搏,不過手既模糊就好明顯,得翻張唔圓既,都好過冇.

2020年1月5日 星期日

大生圍影窿窿

朋友通知大生圍又開始有窿窿影,FB亦開始有人洗版,上年唔得閒冇去到,今次補翻.


清水疍的天氣但係超多人呀,比較多窿窿的水邊幾乎滿晒人.只好揀冇乜窿窿既水邊,事實上太多水窿窿唔係好現.而且角度太低啲窿窿扁晒,後小小係高位,可以影到窿窿圓啲,不過除非全世界一齊後退,否則去後面影等於影人背脊.走開咗亦實有啲缺德既人走埋去,等於影人像個個用wide鏡覇前面咁無奈.退一步只係想影晒個大環境都有難度,孤形好靚既水邊都係一大堆人.但係裁咗佢個構圖又好單調,搏一搏影埋佢地,事後P走佢,最後個天用之前技倆加小小藍色,完成.