追續小鳳姐

蚜灰一向有個外號叫小鳳姐,我記得只在好多年前在鳳園的古家園見過,之後再去搵都冇喇,唔知點解啲人消息咁靈通,話山寮有而且仲影到交尾,咁近我冇理由唔去一次.

見到人地出交尾相再去多數都冇,非常幸運地都仲見到單隻,隻蝶好細唔係咁易發現,我都係見到好多人圍住影先知道,可惜個位非常暗,光圈,ISO都用到好盡吓,結果1/60秒拼了好多張先影到.

一場來到梗係去埋神壇,壇上冇蝶,地下有隻鶴頂,一路都冇影過因為好小停低.就算偶爾停低都係45度開翼,但完來落到地係會合翼的,不過合咗翼就見唔到背上既鮮艷橙色花紋喇.

離開的路上見到一大堆小豹律,原來係食緊人地拜山既生果,太多反而黐埋一堆,好不容易先搵到一隻落單既.

異形巢穴

政府整個咁既藝術品真係會令人聯想到異形既巢穴,仲會發光添.一直覺得走入裏面超近影啲疍唔多靚,見人地襯埋個海景會有啲意思,但個高位又好似喺要預約位置入面,初期都幾爆,預約唔到.........

直到預約到,去到先發現影相個位係唔駛預約都去到的,我一入去轉個頭就出翻來,連工作人員都好驚訝,由於我預計到浮在海上既疍會郁,除咗24-70之外,仲帶埋有F1.8光圈既50mm,結果24-70真係唔夠入光量,用佢要用到ISO 2000.好彩50mm都勉強影得晒,一張過搞掂.疍係會唔同色的,藍紫色會同個黐底,我等到紅紅綠綠先影.