誤中筲箕灣避風塘

見打風天諗住去大浪灣影人滑浪,不過又驚大雨,最後揀咗打完風冇落雨既日子先去,結果........係冇人滑浪既.心有不甘,横掂要去筲箕灣搭港鐵,順便去避風塘睇吓有冇雀影.

來到先搵張凳坐坐,唔係呱?近處竟然有隻白胸定翼追住樹幹,即刻嗱嗱啉攞架生,希望唔好安裝得來佢已經走咗,好彩佢企在樹幹任影,現場好暗,相信佢再定翼我都冇辦法影得掂,企喺度都殺啦,快門都去到好危險程度.

終於飛走咗就去海邊睇睇,夜鷺大把而且飛得好近任影.慢慢試都得.

遠處的船見到呢隻花紋比較多既,一於要影佢既飛行版,影係影到但背景唔多靚.

好彩有機會再試,背景比較好但正面又好似麻麻地而且比較遠裁好多,算數天開始暗,想磨爛蓆都冇光喇.

柔道形攝影

形即係唔係對打,係做動作,好似香港空手道金牌差唔多性質.動作分為投,固,極,柔同護五種,但其實我只對投有興趣,柔真係好柔,似打太極,護就係針對受攻擊時點保護自己,啲人攞住啲假槍,假劍好鬼假,極我理解唔到,好似樣樣都有啲咁.

好彩去得早,一開始就係高級組先,見冇乜人走埋場邊,只敢屈在觀眾席影,後來見有其他人影先膽粗粗走埋去.呢招叫浮落,邊可能咁輕鬆?有啲似合氣道.

肩車成個人抬高掟落地好型,可惜面對評判做冇嘢影,幸運地影到裏投,呢招從未在比賽見過,可能好易扭親腰骨.

巴投都好多人用,可以用自身重量幫手,力量唔太夠都用到.

固技本來都冇乜好影,兩個人瞓埋一舊,見佢表情幾交戲,反而固人地嗰個表情太cool.

高級組好快就冇喇,等咗一輪先落去又試吓鏡頭焦距嘥咗好多機會,小朋友組真係好假,個背負投好似扶住對手咁,黃帶,橙帶大家知乜事啦,早啲收工.

大埔賀國慶

無意中睇到呢個活動,仲話有煙花放,雖然都估到係好細規模,我住得近去又何妨.

成個大埔都唔見有海報講,估計冇乜人,六點來到都仲有位,影相既都係得十零人,現場安排係非常混亂,開始有啲暖場表演.但係河上係好多古古怪怪船掛晒大字牌,幾乎遮晒個舞台,後來有觀眾嘈先散去,我反而對兩隻夜光龍舟有啲興趣.

期待兩隻龍舟鬥快既情境係冇,只係慢速Hea爬翻來,周圍又黑媽媽冇燈冇乜收獲,跟住到開幕禮,有舞獅贈興,佢地成程只係對住嘉賓舞,背向觀眾,我把握最後一刻擰過來先影到一下.

終於等到放煙花喇,不出所料係好細規模,而且全部直射冇爆開,算啦求其影埋佢.煙花後仲有表演,唔慌精彩,早啲收工.

影飛水

上次影玩水原來難度唔高,今次挑戰要加埋飛.

雖然冇乜奇珍異鳥,但好多普通鳥跳來跳去,啱晒我呢啲對焦唔夠勁既架生,起碼可以試多幾次,而且橫向飛多,難度比正面衝埋來既細,飛起來帶水花效果真不錯,可惜隻雀剛合上眼簾搞到似白內障.

Cheap到你都驚既紅耳聛,飛版立即身價升幾倍.

難得有一隻冇咁普通的,可惜尾掂到水差小小.

舞蹈擺拍

我好鐘意影跳舞時啲衫飄來飄去,見有呢個活動就參加.

開始時有啲糾結究竟用高速快門定慢快門好,跳起既要高速,衫飄來飄去要慢速,個安排真係細心,會先做一次動作示範,然後重覆做三次,冇可能影唔到呱?就連對焦點都放啱晒位置等事情發生,好似有預知能力一樣.

除咗跳起用晒高速快門,其他動作我都係首輪用高速保險有相,之後用晒慢速,呢個動作擺到明要慢速先靚啦.

初階玩完就到連續跳舞,都係會跳幾次,我策略一樣,一次快,全部慢.

加埋道具更加有效果.

真係超鐘意呢件衫,不過如果有啲色冇咁黐背景,最後仲有就咁擺pose寫字同彈古箏,嗰啲唔影喇.

藝術體操

今次似乎係一個新團體主辦的藝術體操.去看看他們搞成如何.不得不讚是有兩幅大牆擋住人群,背景不再是一個個黑色人頭,看來大會對攝影有一點認識.

早上的比賽全是幼稚園及小學,真係悶到發癲,我影吓人地練習算喇,背景冇咁好睇但影到波球在半空.

好在午後先有導師表演,動作流暢之餘件衫都好睇啲,正規鑲珠片體操服其實好娘.

另一位導師的絲帶操都係唔同水平,成場冇失手,睇唔到一般參賽者要解絲帶的尷尬場面.

跟住梗係要玩吓慢快門,除咗絲帶,似乎圈操最多大動作,哈哈,角度不對,圈變咗繩,至於捧操係只有小數人玩,我又趕住走,所以冇收獲.

爛尾熱氣球節

一直都好想去台灣既熱氣球節,網上睇相場面非常壯觀,可惜台東交通太唔方便,依家居然香港有,雖然鬧市規模一定不及人地,叫做好過冇.

第一日就去影,中環海濱以往都搞過幾次活動,已經知道係會加晒圍板等你睇唔到侷你買飛,明明話五點放氣球,夠鐘完全冇聲冇氣,一於食個早飯先翻來,天未黑,見好多人舉高手機在圍欄頂影,甚至有人帶圓凳來,好彩我都夠高,加埋反Mon幫手都勉強影到,太近既關係,大氣球爆晒框影唔到,影吓啲細既,現場好亂,有啲氣球都未充氣放在一邊.

走去我計劃中既中環碼頭,係夠高不過大厦做背景影唔到維港或者藍天,算數落翻去影Magic hour既細氣球.搞到天黑都仲未搞到啲氣球入晒氣.

最後去翻中環碼頭等啲氣球升高,等來等去都係咁,冇乜癮早啲走,事後爛尾既事大家都知道啦,嗰班工作人員都知道,怪不得噴一陣火又唔噴,係咁意扮做嘢.

天鵝湖花園

網上睇到呢度有得鳥攝,雖然要一早上大陸,唔算太遠可以試吓.搭深圳地鐡到穚城北行去都係11分鐘,七點半前就要到,否則影既時間會小咗.

點解咁有限制,因為有幾個人每朝會喺度開壇,抛魚或者田雞引啲雀鳥爆水捉魚,可能啲雀已經慣咗畀人餵,我早咗去到,佢地一見人已經飛晒去附近既樹上等,同出海影差唔多,不過灰鷺大隻過海鷗好多.好容易影.

鏡頭唔駛好長,300mm都足夠,因為啲食物抛唔到幾遠,其實呢度主要目的係影隻鷹搶啲灰鷺嘢食,不過嗰日佢只出現咗一次,而且影唔到佢正面有啲可惜.

逃過一劫再次助跑起飛,啲人唔會不停咁掟魚,大約半個鐘一輪,每輪掟三次左右,影完第一輪會有人攞個付款碼出來一人收十蚊人仔,買食材都要成本既,比起出西貢影係平得多.

影埋爆水,九點半係時候收工.

超得閒七人攬球賽

 除了七人攬球,那些傳統十人,十五人真係唔好搞我,悶到核爆.

就算七人都到咗瓶頸冇乜進步,慢快門好難試,其實唔係咁多機會影,一場比賽個波去到射程範圍都係得十次八次,仲玩慢快門分分鐘乜都冇影到.所以啲相都好例牌,例牌既界外球.

攬埋一舊太普通,攬到飛起應該好啲,可惜塊面向下有點黑.

要影到波在空中,交波有點普通都照影.

另外最容易就係高空搶波啦.唔記得咗講點解係超得閒,比賽分三段,比賽每場只係二十分鐘,三場之後既休息時間竟然個半鐘,又未食飯都唔知做乜好,食飯時間嗰段又係個半鐘都算合理,點知又話天氣太熱要等多半個鐘,差得幾遠呀?史上最hea攬球賽.

北區公園打飛

鴨腳木加上相思已經影過很多次,今次要增加難度打飛.FB見到北區公園有得影.

要影凌空既相思必定要高速快門,所以必定要是陽光普照的日子.由1/1600秒快門試起,卒之要去到1/3200秒先叫做冇咁易矇,相思移動時會跳跳吓咁,撞得中既話就可以影到在空中喇.

但只係跳躍好似有啲呃人,點都要影到張翼飛行先得,自從高階機有預拍之後,網上多咗好多雀鳥起飛的相片.我部老爺機係冇,唯有靠撞,見到郁先影一定已經飛走咗,我係見相思想郁就開始打空炮.例如佢企定定望遠處或者郁完停一停就要行動.

忽然有雲遮一遮個太陽,快門被迫降至1/2500秒,但極好運有隻相思在空中定咗一定,反而影得最清楚.

你會發現所有相思清既啲花都清,基本上要對焦隻相思我部機係唔夠快,只能夠應付到橫向移動既情況,相思往前或後飛就會對焦失敗,臨尾好好運有相思打交.又執多張.

青衣公園大小翠

呢排FB日日被小翠炸版,我見有啲人似乎係日日去,影極都唔厭.誓要影遍小翠在公園每一角落.既然咁常出,我又去八卦吓.

午餐後出發,多人到嚇死人,除咗曝曬既地方,幾乎成個湖邊都企滿人,見到餐廳老闆出來同啲人講唔可以放腳架喺啲枱旁邊,會影響做生意,小翠選擇最窄嗰個位爆水,個位就算第三排都逼到爆,所以我就放棄咗,跟住一路都靜英英,等到四點諗住走,小翠居然出來同大家打招呼,正正就係去中間冇人既地方,仲要係最近嗰個蓮蓬,全世界一擁而上,啲腳架攞唔切,個個手持影反而有啲空位,我都執翻張.

陽光冇咗,柔和既光線本來係好,但快門下降到好危險既水平,尤其小翠分分鐘一陣間就飛走,太博可能冇相,果然飛走,好在係停在另一個蓮蓬上,死就死啦,照博,好彩都影到.

有收獲正想走人之際,大翠居然出埋來,距離就遠好多喇,但有荷花同蓮蓬豐富構圖.