天恩河reload

好耐冇去天恩河,朋友未去過就同佢一齊去.

今天幾熱鬧,好多人,先見到對岸有隻白胸翠鳥,咁遠通常得個恨字,佢竟然連爆兩次水,第一次錯失咗,第二次影到,雖然好細粒,裁盡都勉強可用.

跟住影吓呢度既住客,唔珍貴只好動作搭夠,腳趾啱啱掂到水第二次都影唔翻.

今日超多鴨,今次唔影一堆影單隻,放大睇先發覺原來佢有牙的.

Lulu出現喇,夠早睇到佢,今次仲影唔到飛版.

落水始終都係好遠,不過條魚咁大要勁裁都要影呀.

塱原拍鳥

塱原總有拍不完的題材,今次專心去影鳥.

天氣熱到透不到氣,搞咗一輪冇乜收獲,就走去小屋陰影小休,佢前面剛好有支稻米般植物,心想如果有鳥在上面就好喇,可能老天爺聽到我心聲,真係有隻黑鳥好似香港公園咁去食,唔止有雀,仲係飛緊,得來全不費功夫.

見幾好玩,我走咗去白鴿聚集地再試,我發覺佢地落地動作比較慢,易影過起飛,雖然要判斷降落的位置.

呢隻其實好普通,每次去都見到,不過今次企既位幾好.

棕背柏勞唔太常見,但係佢好合作,走到好近都得,企在木上都唔算太人工景.

呢隻應該係小見,成班人圍住佢影,由於佢在地上,為咗要有更好拍攝角度不惜扒地.

塱原經常會聽見鳥叫聲,係一個訊號.即係有黑翅長腳鷊鷸準備飛,四周望望就有機會影到飛.

重返香港公園

記得初初想影雀,香港公園係一個好好既練習場地,可以超近距離影,又多奇珍異鳥,影得多就會轉去影野生既,見冇乜新地點就隨機過來睇吓.

唔想影一堆背景雜亂既證件相翻去,除咗注意背景外,想影一些有點動態的,留意到這種雀總是動過不停,非常幸運地佢採緊草起巢,於是就拍到一張在半空中的照片喇.

由於佢好鐘意連行帶跳咁移動,要影到在半空其實唔難.

其他雀就唔容易喇,由於空間細,就算飛起,飛行時間也太短,來不及反應,唯有影啲背景冇咁雜亂既相攬竽充數一下,哈,竟然撞到佢出恭.下次都係戴翻頂帽穏陣啲.

話唔影證件相又影,因為佢比較稀有,叫銀耳相思,啲工作人員話好嘢,咁就影啦.

空山基特展

朋友通知有呢個展覽,幾得意但又冇諗住特登去,後尾有人話約埋一齊咁就去啦.

個展覽意念係反光,透明,倒影等等,門口已經見到大個反光公仔,我唔想廣角鏡低炒,所以特登用支85mm遠影,盡量保持眼平視角.

帶咗成堆鏡頭來,點知...........係攞唔到入去既,唔可以帶背包,必須要放在儲物櫃內,無奈只可以帶一支24-70mm,入口沒多遠就是這個真人比例人型反光公仔.

再入去就係幾個公仔有唔同pose.

剛才體驗咗反光,再入就係反光加倒影,好多鏡反射來反射去亂到唔知係乜,這個展櫃好窄,影全身會穿崩,外圍係我補上去的.

再入有啲比較細呎吋展品,呢條恐龍幾細緻.再入仲有鯊魚,擺得好亂影出來唔靚,之後既紀念品細緻度同展品冇得比都唔影喇.係喇,究竟透明展品去咗邊?

吹氣公仔夜攝

文章出既時候呢啲公仔已經走咗,我手腳係比較慢.一開始就一心要影夜晚,諗住光靚啲.吸收咗影黃鴨仔既經驗,除非諗住夾相,否則腳架冇乜用,公仔在水上飄來飄去,快門唔可以太慢.公仔擺放既編排有點古怪,除咗叮噹及Labubu可以見到正面,Elmo同滑嘟嘟係用腳板面向觀眾的.

燈光又係唔掂,超光,影出來背景黑晒,好在Lightroom好聰明可以侷部提亮背景,叮噹擺得超近.50mm好易爆框,侷住用35mm影.

襯住個天仲有小小光嗱嗱聲影埋Labubu,佢遠啲可以用50mm.

勉強有個位可以影到Elmo側面,滑嘟嘟就冇計,點都唔會影到面部,除非畀錢上高位,咁梗係唔會駛呢啲無謂錢啦.原來仲有一個位可以高角度影,就係喺山頂用支長鏡影落來,仲可以影晒四個公仔同框,下次要試試.

三葉球攝影

又係新興體育活動,多數特點就係道具好簡單,宣傳直頭話搵個煎pan做球拍都得,主要係個波有個彈力頭,球拍硬啲冇問題.

佢只需要好細個場,體育館開到幾個場之外另外一面仲可以搞其他活動,所以背景係花到嘔.

影背牆一面背景可以乾淨啲.玩法有啲似匹克球,又係可以彈地先接.

比賽都有雙打,呢隊幾認真,有埋自己球衣,其他人就比較求其,有啲甚至係親子,睇得出似係第一次玩.

秋深的朗屏

最近聽聞朗屏有很多蝴蝶,而且很多綜灰交尾,有人笑稱已變了合歡山.很奇怪,已經秋深時份,應差唔多蝶季完結咁滯,可能今年熱得不平常.

去到入口已經有幾個人,仲即時有形客珍灰,想起第一次為咗影佢出到大澳,依家到處都係,佢最大好處係唔太活躍,位靚通常都有啲收獲.

山上更多人,蝴蝶都幾多不過一係好普通,一係飛來飛去影唔到,有人話山路有紫灰,於是成班人走晒去,我唔記得我有冇影過,總之位係麻麻.

聽到有青鳳交尾好興奮,但個位超亂,影完唔多開胃,果然有咖灰交尾,可惜更靚既位都影過,隨便作過紀錄.

三點半左右原來有個秘點影棕灰交尾,實際上也不是好秘,只係入口分义向左行五分鐘,一般唔會咁行,似係工地,原來最終係一個水泥做平台,好多單隻棕灰但交尾就冇,反而有隻飛蝦幾定吓,背景又乾淨,係光線差咗啲,意外收獲.

搞咗一大輪都係得啲亂草上單隻,最後有隻停喺平台上唯一既花度,更巧合係我企正隔離,即刻蹲下連拍,多張都冇,影咗兩張就飛走咗.唓...........原來又係咖灰.

居合道攝影

睇Youtube係好型,一劍斬斷竹蓆,我又未影過.

睇咗一陣唔係好對路,好似冇竹蓆,估計係成本太高,比賽唔駛咁認真,就咁做吓動作就算.即係劍道形,以慢打慢,慢快門影把劍既殘影.個個開始都會先劈一劈,殘影似一把扇.

也有直剌的動作,影劍道個個依嘩鬼叫,但係依家靜到把劍破風聲都聽到,我都唔敢用機械快門,靜音快門係會有果涷效應都冇辦法,由上而下既動作冇咁覺,橫向動作把劍會變形後好怪.

反手向上劈,要搵深色背景否則會搞到把劍唔見咗.

呢吓收劍動作真係超慢,於是下試1/30秒快門,我估最慢啲都得,不過唔係驚個人郁咗,反而係驚我手震.

最後就係移動中劈劍,我唔敢玩搖拍,個人真係會變斜的.

誤中筲箕灣避風塘

見打風天諗住去大浪灣影人滑浪,不過又驚大雨,最後揀咗打完風冇落雨既日子先去,結果........係冇人滑浪既.心有不甘,横掂要去筲箕灣搭港鐵,順便去避風塘睇吓有冇雀影.

來到先搵張凳坐坐,唔係呱?近處竟然有隻白胸定翼追住樹幹,即刻嗱嗱啉攞架生,希望唔好安裝得來佢已經走咗,好彩佢企在樹幹任影,現場好暗,相信佢再定翼我都冇辦法影得掂,企喺度都殺啦,快門都去到好危險程度.

終於飛走咗就去海邊睇睇,夜鷺大把而且飛得好近任影.慢慢試都得.

遠處的船見到呢隻花紋比較多既,一於要影佢既飛行版,影係影到但背景唔多靚.

好彩有機會再試,背景比較好但正面又好似麻麻地而且比較遠裁好多,算數天開始暗,想磨爛蓆都冇光喇.

柔道形攝影

形即係唔係對打,係做動作,好似香港空手道金牌差唔多性質.動作分為投,固,極,柔同護五種,但其實我只對投有興趣,柔真係好柔,似打太極,護就係針對受攻擊時點保護自己,啲人攞住啲假槍,假劍好鬼假,極我理解唔到,好似樣樣都有啲咁.

好彩去得早,一開始就係高級組先,見冇乜人走埋場邊,只敢屈在觀眾席影,後來見有其他人影先膽粗粗走埋去.呢招叫浮落,邊可能咁輕鬆?有啲似合氣道.

肩車成個人抬高掟落地好型,可惜面對評判做冇嘢影,幸運地影到裏投,呢招從未在比賽見過,可能好易扭親腰骨.

巴投都好多人用,可以用自身重量幫手,力量唔太夠都用到.

固技本來都冇乜好影,兩個人瞓埋一舊,見佢表情幾交戲,反而固人地嗰個表情太cool.

高級組好快就冇喇,等咗一輪先落去又試吓鏡頭焦距嘥咗好多機會,小朋友組真係好假,個背負投好似扶住對手咁,黃帶,橙帶大家知乜事啦,早啲收工.