尾波沖浪

上次影嗰種滑水係快艇一路有條繩拉住做動作,有借力可以容易做出空中翻騰動作,今次進階版,要放手先做動作,平衡力要求高好多,動作會冇咁誇張.

今次個人會近好多去盡量利用船尾啲浪,終於可以影到船加人喇.

來看看運動員的表現,這個是比較有技術的,成個人跳起.

直情離開滑板.

另一個角度,當日係有女子組的,除咗動作好悶之外仲成日失手,所以冇影到,第二輪女子組我直情收機去食午餐.

賽道上有一隻好奇怪既小船,成日喺度,啲人八卦問我係做乜,我估係旁證呱?後來終於知道原來係執人用的,有啲運動員不停失手,成日要搞一大輪先再上到水,花好多時間,好似係失手三次主船就會唔理,繼續去起點開始下一場,呢隻小船就係負責載翻個運動員走.

又影玩水

朋友問有甚麽好地方鳥攝,我就帶咗佢來呢度,交通方便之餘點都會有點收獲.有一排冇來因為維修緊,水池斷開咗,啲雀走晒去後面,依家已經整翻好.

坐低冇耐小啡雀落來玩水,用了高速快門,雀及水的型態都靜止下來.

來咗好多白頭鶲,不停飛水,唔好執輸影餐飽.

噪鵑男一來就走,好彩都留低了牠的飛行模式.

鵲鴝也來跳躍一翻.

最後用較慢快門增加一點動感.

慢快門影船

飛機同車都影過,今次試吓影船,船速慢比車難影,要用到勁慢快門,但又好過影飛機,至低限度出現次數比較密.

終於試到1/6秒效果先叫做可以,頭一輪唔熟好多都炒咗,居然首先成功既係隻細船,理論上佢應該好難影,因為啲浪會令佢又高又低.

新渡輪唔掂,船速太慢,唔夠效果.

終於見到最快既澳門船,我揀呢個位就係因為佢同埋背面有發光既大橋,原來尾部噴射器真係有做嘢,唔係得個樣的.

呢種船都好快,由背景燈光拉線長度可估到一二.

可以影既時間只有日落後大約廿五分鐘以內,之後全黑隻船就會冇光到,推到極限用1/4秒快門,博到一張.

象牙花太陽鳥

有說有象牙花的地方就有太陽鳥,松仔園裏面就有好多,之前影蝶都見到有太陽鳥,相思等,今次就專門去影佢地.

雖然研習園裏面既象牙花又低又近,但我唔係好鐘意佢黑底,襯朝早正光就先在門口梯級上影一轉先,呢度背景夠晒遠,但主體都有啲遠,影唔到好大隻.

有幾棵係頗近距離的,但係啲雀硬係去遠嗰幾棵,呢隻睇落去唔同色,應該都係同一品種.

接近中午頂光,一於入園裡面食啲嘢下午再戰,正想開餐有一隻飛到極近,咁就影埋先,園內有一個窄角度係可以影到冇黑底,嗰日唔知做乜鬼完全冇雀,等咗個幾鐘決定放棄.

探鳳園

好耐冇去鳳園,佢啲蝴蝶都見過晒,加上每次都要廿蚊入場費,不如去其他地方,最近有朋友報料話整咗個人工濕地,好多紅色浮萍,燕鳳在上面射水好靚.....…

不出所料,所謂人工濕地就係以前二期個水池,我運氣比較差,係有燕鳳射水,可惜係開翼瞓喺度射,又冇乜其他蝶影,成朝都冇收獲,諗住去一期睇一睇冇嘢就走,點知有人搵到小眉眼交尾,玩咗一大輪,影到有紅底添.

見到有隻蟬,順便影埋佢.位麻麻地,睇翻舊相景深差小小,今次夠但扒在樹枝上冇乜散景.

行埋出古家園檢視吓山指甲就走人,朝早都來過,好多普通蝶,居然有壇方,又係好爛,好在佢啲紋同爛既地方都唔難補.