西九偽極光

一連兩次有人叫我去,推咗一次第二次就去啦,反正交通好方便.

Facebook已經好多呢類相洗版,都係冇乜睇頭,比較假,好多人,勉強側小小就到唔好見到好直既投影機光線.

極光既原理就係用噴煙機制造活動投影幕反射光線,用三部投影機播放極光影像.如果風大就會乜都睇唔到,而且就成晚都係咁,冇乜變化,建議帶埋閃光燈玩影人會多啲變化冇咁悶.

星加坡自由行

出境回港終於唔駛檢疫,於是去一轉星加坡探親.

一到機場就有相影,樟宜機場早排加建咗個大漏斗,每晚仲有兩場燈光表現,等餐死原來好流,只係投影啲迪士尼公仔到水柱.我覺得平時着燈仲靚,早知唔駛等.哈,有啲似外星人襲地球既死光炮 :P

上次來唔知有激光表現,今次影翻,頭十分鐘完全冇激光,唔會慳皮取消咗呱?好彩後段係有,不過好弱,仲削過幻彩詠香江.

亞拉伯街有間有個金頂既廟都幾靚,可惜旁邊環境好亂.

最後去咗新知館,其實我唔知佢係乜地方,純粹覺得啲太陽能板配埋日落幾靚,可惜啲天氣.

附近有架大飛機,影埋.

久違了的渣打馬拉松

疫情關係,停咗兩屆,終於都再舉辦翻.好耐冇試過咁神心咁早起身,港鐵出奇地唔係好迫人,我記得有一年在旺角轉車等咗超過半粒鐘先上到車,人多車既班次又疏.所以我決定唔轉車,直出旺角東就算.

地面好多地方都有警察睇住,只可以側影,唔靚,舊天橋又封咗,於是一心一意走去今次想影既新位,死火,懶做功課,原來離好遠架,200mm都唔夠,好彩仲有APS模式,影出來就係咁.早知就帶支300mm來.

夜晚得一組影,天光熄咗燈個景冇乜睇頭,決定再裁盡啲睇多啲人,天色陰暗好易做到1/10秒,等效成400mm好彩有欄杆枕手,否則震到影唔到.

咁點都要影翻張啲人清楚既,天色其實好暗,日光日白都要ISO 800先有1/200秒快門,光圈都要開到F4,想再收小小增加景深都唔得喇.

利東街燈籠

呢度其實從來冇來過,近排又涷又唔好天,近近地行翻轉.

港鐵站一出幾分鐘就到,嘩,超多人,行到街尾影張全景先,為咗想啲燈籠睇落密啲,用到50mm影.

四周景點都堆滿人,唯獨呢兩個公仔冇乜人有興趣.

始終都要挑戰難度,另一對公仔係超多人既目標,係排住隊來影,我又想用50mm開大光圈影,結果就蹲低等咗頗耐,把握一班人剛影完而另一班人未到既幾秒鐘時間先影到.

兔年要影兔,呢度難度仲高,隻大兔就冇計喇,幸運地俾我影到兩隻細兔冇人.後面有桃花好靚,就係冇辦法再退後小小影細啲兩隻兔.

最後來個冇人阻到既構圖,就係魚眼向上影,幸好天仲有小小藍.

再到單車館

近排唔係好涷就係落雨,能見度低,總之不利上山影日落,夜景.只好搵啲室內嘢影影.好耐冇來單車館,要影既都影咗,之前明明觀眾席係可以自由出入,依家防疫放寛咗,反而去電梯個位貼住不準進入,OMG,咁咪要走,但我剛才明明見到觀眾席有人,唔理咁多,照推門入去,電梯有開,咁就去咗觀眾席.

真係好悶哦,全部都係得一個人既計時賽,希望晏啲會有多人賽,不過乜都影住先.

之後有追逐賽,兩架車相差半個圈同時起步,實力要差頗遠先可以追到,呢個畫面好難得,要啱啱爬頭嗰吓係面前,仲要唔好失手矇咗.

成個上午都係得呢啲賽,下午翻來都仲係,會唔會成日都係咁架,捱到四點,終於有多人賽,成堆車過彎真係好正.

大家都好想影個彎位,終於有wide鏡黨,俾佢遮住不特止,佢成支鏡隊出欄杆,陳間有人投訴就大家都冇得影,問佢介唔介意企高一級仲話翻我做乜唔企落去.冇計走去對面仲有一個位可以影.差唔多出晒彎位就可以影到長長車龍.

唉,wide鏡黨度度都有,都唔叫得咁多,剛才嗰邊好似冇人,又行翻過去,嗰個人走咗,可能都唔想咁乞人憎.今次再影前啲.其實難度係高過之前影彎位.車太近速度好快,未及反應都已經走咗,影Pan鏡要焦距稍長先易影,所以用wide鏡霸前面係搵自己笨.多數係影到乜都矇晒.

今次多咗個嘗試係影對面既車,我用另一部機裝200mm再加1.4x增距掛肩頭,到入彎即刻換掛頸既85mm影彎位.確保唔會嘥,因為多人賽只有幾場.車會細架啲但啲座位矇得來幾有效果.

再前啲就要靠圈內既工作人員做效果喇,好小可以咁角度影到咁多車.

慢速滾軸溜冰

影完真雪溜冰,今次影滾軸溜冰,之前影過速度滾軸溜冰,幾有速度感,希望有機會影真雪速度溜冰.

言歸正傳,今次係花式滾軸溜冰,同上次一樣,我淨係想影慢快門,唔知點解比起真雪溜冰,呢個運動員滑行速度係好慢,用到1/50秒都係冇乜效果.

再慢又唔係好搞得掂,全部矇晒,只好影吓頭部唔係太郁既動作.

點知剛才兩個已是全場水準最高的運動員,有好多係年紀好細,甚至企唔穏既,滑行動作好小,只靠手部動作表達,乜相都影唔到,這個則比較發揮得好.

影咗咁多好似就咁行路既,影翻個單腳姿勢,不過最唔好係戴咗口罩.

紅水山攝影

有一排冇去行山,體能都有所下降,襯住冇咁涷,去愉景灣通去梅窩既紅水山走一走.

路好易行,我冇行晒,去到影相位就算,景就普普通通啦,原本諗住特寫遊艇會啲船,點知出晒去,都係影wide啲.遠方原來仲見到迪士尼,不過冇理由等埋佢放煙花.早啲收工好過.

太和農墟白梅相思

咁多年我都未去過影,因為覺得低角度影肚腩麻麻地,不過今年真係開得好靚,咁啱朝早又突然好天,就即興去咗.

星期六應該唔開門,老闆好人開門俾人入去影相.我帶咗300mm,諗住加1.4x,唔多掂,太細粒,終於都要用上2x,光圈得翻F5.6,開晒都有啲散,收到F7.1先OK.入面嗰棵好影啲因為冇晒葉,而且背景係大厦牆,冇藍天都唔會死白.

近門口嗰棵如果冇雲可以有藍天,但好多葉,令到原本已經亂既畫面更加亂.

到畫面稍為簡潔啲,後面又全部都係雲.

都係裏面棵花好影啲,見到Youtube教人用1/2000秒快門,當佢開盡F6.3光圈,ISO都起碼3200.我實在係太保守,成朝擔高頭搵雀,條頸開始好攰,呢個時候亦越來越多人,係時候走人.

襯熱鬧影紅葉

今年處處紅葉盛放.卒之都有人約我去濕地公園影紅葉,嘩,售票處打晒蛇餅,好彩都去得好快,冇幾耐就入到去.

紅色落羽松只集中在一個地方,影翻張例景.

影吓啲人都幾得意.

除咗紅葉,蘆葦草,我估係呱,背光都可以影吓.

影到冇嘢好影,連殘荷都殺,行一個圈一個鐘都唔駛,咁方便唔怪得咁多人.

將軍澳爬蟲展

之前已經去過屯門公園爬蟲館,不過爬蟲種類好多既,而且廣告見到有隻有頭冠既蜥蝪好靚,淨係影到佢已經值翻.環境比想像中惡劣,好多透明箱係半球體設計,相機無法貼實影,反光超勁,啲相實在唔用得.

冇計,只好淨影平面箱的.好彩有頭冠的肯企定定,個位都算可以,係頂光比較爆,只好靠後制搞掂.

其他既唔係喱埋咗就係個位古古怪怪,正諗住只有一張相既時候,呢隻去咗個好好既位,真係得一陣間,走灟咗就影唔翻.