換腦

部電腦原來已經用咗10年,嗰陣仲係Window 8.1,最近Microsoft話唔支援,次次開機都提醒我,冇乜事就照用囉.忽然又收到Capture One話唔再支援Express版本,睇怕都係Sony冇再俾錢,咁我用得就照用啦,只要唔再買新型號相機.點知前陣子係突然間唔俾用跳翻出來.死火,只好下載Sony個廢廢原廠軟件頂住先,點知又係唔支援Win 8.1裝唔到.睇怕其他廠新軟件都應該有同樣問題,死死地氣問電腦維修可唔可以幫手改成Window 11,唔得喎,最小8代以上CPU先有機會,4代差太遠唔掂.

冇計,卒之要換機,經過漫長既等待........原來部機好大,幾乎唔夠位放.跟住要搬資料好痛苦.

元宵綵燈會

記憶中綵燈會啲節目都幾悶,唔係唱歌就係跳舞,不過好耐冇去過又去下.穏陣起見,都係去翻最熟識既文化中心,呢度有樓梯坐前面冇咁遮擋.我入場比較遲,座位都冇得七七八八,但唔知點解中間有幾個位係冇人坐,我梗係唔客氣啦,始終影相係對正比較好.

一開場就係區瑞強同鄭志誠唱歌,都好係識既人.

之後有啲社團唱歌跳舞,坦白講係唔多精彩,直至有多國小朋友,表演普通至小衫比較靚.

終於有雜技表演,靜態嗰啲唔影喇,打跟斗快門又唔多夠快,最後得呢張還可以,可惜又出咗界.

跟住又有武術,專影跳高動作先,原本九節鞭都好精彩,可惜條鞭同淺色背景黐晒底,影完出來隠咗形.

跟住唔記得咗係咪黃梅調,唱曲加Fing手袖咁,又係玩慢快門時間.

壓軸係水袖舞,瘋狂連拍時間因為要玩慢快門,影到爆Buffer,最後用得既得幾張.

又舞夜光龍

之前有一個栢麗大道亮燈儀式,亮燈嗰吓應該有噴煙或者煙花,諗住去襯吓熱鬧.

想影噴煙既話基本上不可能,傳媒起咗個超大既台在正面,側面又圍滿晒睇歌星既粉絲,基本上只可以從人隙中影到小小,算喇,我影吓夜光龍吧,好彩舞龍是在舞台後上方,下層要留翻畀高層拉掣,遮唔晒.

亮燈儀式噴煙後到夜光龍噴煙,糾結緊用85mm定135mm好,最後都係用135mm啦,反正用85mm都會影到下面一堆人.

再影多張散煙既就收工.

利東街巡遊

初一影花車太辛苦,初三利東街有個迷你版,唔駛咁早霸位.

初初企咗去表演開始的位置,好正路但係太近,用廣角鏡會影到變晒形,後來竟然改欄杆,見到有直位自然改位置,遊行五點半就開始,天都仲未黑但大會提早開燈,首先出場係黃仁曼芭蕾舞學校,成班人衝過來都真係好雜亂.

第二隊出場記得好似係Golden Time,件衫夠晒誇張,要投訴吓係大會啲Staff好自私,大部份時間都企正前面阻住晒,大會攝影都算喇,有啲唔關事既攞住部電話自娛,當咗係佢自己私人派對,給果全身係影唔到,等走到埋來換支50mm先影到半身.

主持人中場會走出來問問題,派吓利是,我朋友收咗一封,聽講係50蚊商場禮券,大會安排咗兩排射燈畀傳媒拍片用........不過係白色,搞到同背景格格不入.

間中會有財神出來派糖同畀大家摸吓舊金.

最後一隊全程都被大會Staff阻住,真係冇辦法影得到,得合照時有機會,都費事換短鏡喇,求其影一張紀錄吓.

蕉徑尋蝶

原本打算好似上次咁去流水響睇吓有冇蝴蝶,去到上水先發覺記錯咗,小巴站係在粉嶺的,算喇,求其去個效外地方吧,咁啱蕉徑小巴有車就照上.

冇乜蝴蝶,但好多人入來,原本附近有間觀音廟,行咗好耐見到有小昆蟲,好過食白果,由於隔條水坑,用微距會太細粒,侷住用100-400來影.

有隻比較特別既弄,好定但在草叢中,冒住被蚊咬走到佢面前慢慢搵啱位影.唔駛夾相都影到數毛.

見到普通蝶,但我未影過佢開翼,開翼最難係唔夠景深,好多蝶雖然開翼但好小係平晒,要收細光圈同唔好影咁大,隻蝶頗活耀,唔敢用微距鏡哄咁埋,用100-400手動對焦比較唔就手,好難用夾相方法,只好試多幾個距離一張過,好彩都影到成隻清.

健球攝影

地鐵站見到有廣告,歡迎公眾參觀.未影過一於去見識吓.

好可惜觀眾要坐觀眾席,只能高炒,開波似乎最易影,基本上有幾個隊員托實個波,其中一個雙鎚打出,但係如果對住你又或者背住你打就會遮住啲人,原本應該用慢快門,不過見機會唔多都冇博喇.

個波咁大好難接呱?

咁大個波好跣手.

其實個波唔重,一個人都托得起,但就係好難捉得實.

成個波在空中好有視覺效果.

人才公園黃鴨仔

香港都影過,睇吓唔同地方有冇其他構圖.

搭成個鐘地鐵先到,如果住新界西由深圳灣口岸過係會近好多,天色超級差,鴨仔個位亦都唔係好影到好多人睇鴨仔,希望夜晚有燈光靚啲.

公園唔係太大,時間未到行個圈先,呢個位可以影到隻鴨剛好在心心手中間,可以睇到環境矇成點.

差唔多入夜,心諗隻鴨仔點影都唔會有香港咁靚,索性放棄佢影個夜景算數,雖然空氣都係好矇,大廈發光都唔太差,睇到鴨仔係冇燈光照的,好彩決定得早.

投球攝影

有啲搞唔清楚投球同合球,印象中都係去到藍下面禁區就可以企定定慢慢射球,對方唔可以欄個人.

到比賽就睇到,投球個藍係網做,合球得一個黃色膠圈,玩法真係唔知有乜分別,影翻個多人爭波畫面,其實唔易有啲,企定定都射唔入先會大家跳起爭波,九成都係直入的.

中場爭波畫面最難影,因為唔知個波會去邊.男子組比較易影啲,肯跳起,女子組多數伸手接就算.

影個波掟出去比較容易.

坐右手面可以避開觀眾席,影出來背景比較乾淨,可是開賽不久已經充滿粉絲,只好將就一點坐左面.男子隊的比賽確實比較多跳躍動作.

黑人球員的彈跳能力唔講得笑.

醒獅比賽

影過幾場但係都影唔到比較四正既,唔係太多人遮住啲樁柱,就係角度歪歪斜斜,本來都冇乜興趣再影,朋友話有個攝影比賽可以去試吓.

場內觀眾席可以用高位影,唔駛好似前幾次咁俾前面既人遮咗啲樁柱.影咗一輪之後發覺都係歪歪斜斜,於是走去樓下正中試吓,獅子在空中就一定架喇,至於前面啲人用反Mon舉高部相機都避到大部份,見埋評判,見埋標題,角度正中,獅子就細隻咗啲,仲有最衰係個藍球架....

試吓影大隻獅子小小,最多標題放側啲,評判見小啲.搞掂收工.結果係名落孫山,乜獎都冇 :P

影港鐵

輕鐵影過,今次又試吓影港鐵.

首先影吓東鐵線,唔想直影車頭,打橫影用搖鏡可以增加一點動感.車好慢,終於用到1/20秒先合我要求既效果.

夜影港鐵其實唔係好可行的,雖然車廂會着燈,但車外係全黑的,上次觀塘影都用到極高ISO,唯一例外係有環境光照到佢,呢個位剛剛有燈光.

要影吓其他車款,迪恩湖可以影到迪士尼線列車,呢個位只可以影到四點左右,太陽好早被遮住,唔會影唔到,但就冇咗背光既樹葉.另外個位係極多蚊.

跟住就係機場快線,網上教去青衣城影,實際上係加咗欄杆影唔到,青衣橋影又唔多靚,卒之去到青衣海濱公園抵炒,用到400mm等角度冇咁斜.

最後呢個位冇影搖鏡,因為個雙彎位幾靚,唔想整矇佢,要兩架車同時出現在彎位好艱難,只好合成啦.