冰上聖誕滙演

由於聖誕前兩日先影,所以貼文己經過咗聖誕.

活動係臨時睇到,冇記錯年年都有搞,等啲學生可以有演出經驗,一出場就梗係聖誕老人啦.之前我都係設定一個高速快門影跳躍動作,一個慢快門影搖鏡,動態模糊,但有時成堆人動作又唔係好快就兩頭唔到岸,高速係得但相會比較粗,慢速又好似危險得滯,所以今次設定多一個中速.影呢啲行行企企就啱晒.

我想影到啲手既模糊動作,就用慢快門設定.

Pan 鏡當然都係慢快門啦.

來到跳躍動作自然係高速快門.一個上年都有既問題今年一點都冇改善,現場打燈係亂咁來,經常打唔中一係就背光.嘥咗好多相.呢張都係夾硬推光,實際係冇燈光到的.

吹氣大熊貓

政府話搞熊貓經濟等我去嚮應吓.吹氣公仔放文化中心出面夠方便.

熊貓唔係好大,抗浪性好低,郁得好勁,快門不能太慢,所以要大光圈,高ISO,另外佢對正舞台,本來燈光照到係好事,但係對面雜物同人既影都一齊照埋上去,我已經加咗閃光燈但都只能夠減淡小小.講翻個展品,同黃鴨仔來比高下立見.首先嗰塊墊好遺和,點解唔整成一隻船?另外成身繩都好礙眼,或許是成本問題吧.要搞盛事真係唔易的.

塱原自然生態公園

之前去塱原一直都唔成功,因為工程中,久等咗幾年,終於以塱原自然生態公園既新面目重開.

來到門口居然有形客松鼠,可惜位唔係好靚,粗粗影咗再入裏面.

入面啲湖係一定會見到長期住客,今次影吓倒影.

之後就係主菜鳥群,場面真係好壯觀,由於稻米未收割,引來大量食客.

一次影唔到唔駛可惜,不停都有機會,今次影吓背光,睇到啲翼透光幾得意.

等候期間見湖面上有啲蜻蜓都飛得幾定,難得有機會影到飛緊.今次係搭小巴去到河上鄉行入去,其實如果上水站去的話,搭到燕崗村入仲近.

屯門高達展

見交通都算方便,我又去襯吓熱鬧.呢類商場展覽仲要係大型展品,通常問題就係背景好雜,我想試吓盡力整矇個背景,帶晒三支大光圈鏡,50mm,85mm及135mm.

首先梗係要影主角大高達啦.用50mm我已經覺得係不可能的任務,永遠有人用電話企正前面.不過只要耐心等候事情係有轉機,用埋85mm都仲得,最後挑戰埋135mm,原本仲想退後啲,但已經頂到扶手電梯.可惜雜始終係雜,最後只能夠咁.

另一方向有個Q版的,用135mm的話要企在通道上,只好用85mm,背景都係雜.

高達復仇的安魂曲既高達變咗奸角,人人話醜,你覺得如何?

反而渣古變咗主角,用百鳥歸巢既方法砌出來都可以同高達打.

最後有個打卡位,可以自已扮係模型零件.

草埔影高鐡

發現內地有個位置可以影到高鐡配合城市景,而且唔遠,蓮塘口岸搭幾個地鐡站,再行一陣間就到,地點係布吉農批市場,走到最尾嗰座,上樓梯到平台就係.今次構想係開燈以後,最初擔心要用wide鏡光圈唔夠大.因為天黑高鐡又郁緊會搞唔掂,如果焦距要短過50mm就大鑊,好在最後可以用85mm.

襯冇車既時候就要影咗個底景先,車要另外影,因為要開大光圈同高ISO影,之後再夾上去.運氣有啲差,天未黑齊時居然冇乜車,最後搞到F1.6,1/80秒,ISO 6400架車先夠光,好彩暴力除雜訊之後都用得,原本驚車頭燈太光搞到乜都睇唔到,最後發覺咁反而幾得意.

最後就係影埋夜景啦,原本想整到有三架車,不過難度太高,車疊車夾位要好精準處理.

饒宗頤文化館舞龍

落雨天冇乜地方好去,見有舞龍推廣活動就去睇吓.印像中好似冇乜大空地可以玩舞龍喎.冇估錯,真係得一個小地方,幾乎條龍拉直都唔夠位.

情況只有更壞,差唔多開場有個人企正中間前面用wide鏡,唔駛旨意影到腳喇.只好集中影上半身,慢快門影到龍頭清算成功.

活動係推廣舞龍,講多過舞,中間仲要畀觀眾試玩,真係影都唔知有冇半個鏡,有啲冇頭冇尾,但中間個人幾清楚.

都係半身,慢快門下好似出緊降龍十八掌咁.

滑冰比賽

落雨天最好係室內活動,咁啱又有個滑冰比賽,聽講仲有集體組,又要係又一城夠近啱晒.

單人已經影到好厭,用來玩吓慢快門.

所謂既集體組,全部都係小朋友咁滯,得意有餘但就冇乜速度,只好影吓定格.

好在都有啲大個啲既,都係唔夠速度,快門已經去到頗危險既1/50秒.

同方向唔掂,只好針對有反方向動作既.

或者有人企定定,有人都得.郁既場合都得.

細灰大爆發

呢隻蝶好奇怪,多數喺市區出現,上次係華富村,今次係九龍公園,見到人出相,咁方便梗係去啦.星期三見到相已經好心急,交尾既嘢時間唔維持得幾耐.星期日去到幾乎成個影蝶界都來晒.

完全唔駛自己搵,見到成班聚集就應該有交尾喇,位唔係幾靚,雖然有粉紅花,但背景比較黑而且都幾遠吓,公園有圍欄又唔可以走近,用盡400mm烏埋身先勉強影到.

唔緊要,內園又有,陰影下冇咁爆光,背景都係麻麻地.

第三對喇,連公園保安阿姐都奇怪做乜咁多人,知道真相後仲畀部電話我地幫佢影,交尾中真係好定,電話都影到.

過對面大家樂食個飯翻來又有,今次背景夠晒光,不過係太光,但另一半邊依然係太暗.

之後就再冇交尾喇,呢啲花幾特別,單隻照殺.

再探芝加哥大學

上次去一時發夢錯失咗日落.雖然懊悔不過個景又都好似麻麻,冇乜動力去多次,偶然在網上見到原來個砲台係會着燈,咁就再探啦.

今次打醒精神喇,影埋日落同開燈,講開又講,現今軟件進步咗好多,以前用HDR會搞到卡通片咁,又32 bit, 又tiff搞餐死.依家就咁auto就已經好自然,而且除鬼影真係除到,以前係幾乎冇作用的.

之後隨便影埋個夜景就收工.

摔跤攝影

之前影過相樸,摔跤應該都係差唔多.

今次冇咗大肥佬,唔係日式,應該係西式,見得最多就係鬥牛咁大家鬥推或者扭埋一舊,專登唔影咁多呢啲例牌畫面.呢個都係攬埋一舊,不過攬得特別啲.

希望唔好咁靜態,影啱啱倒地嗰下.

其實唔係成個人Fing起,只係拉腳拉跌前一刻.

搞搞下有啲似影柔道,影咗成日終都冇我想影到既倒頭摔.我諗要大賽先有呢啲招出.

南瓜星人闖科園

聽個名都知道係萬聖節嘢,諗住應吓節但又唔想去蘭桂坊迫就近近地去影吓裝飾就算.

海報話5米高外星人都估到實係吹氣啦,實物咁大舊好貴的,特登加入齒輪,螺絲釘鬼怪不足,反顯得趣怪.

樓梯有一個都好大既,又係吹氣公仔.

仲有蜘蛛啦,啲蜘蛛網真係太求其.

最後梗係唔小得南瓜頭啦,自從有咗淘寶之後,到處都係差唔多既南瓜,我屋企樓下嗰啲竟然同公司樓下既係一模一樣.

雜錦一碟

最近影蝶不利,次次出動都係得一兩張,可能已經係天涼關係,一於炒埋一碟.

松仔園傳出有枯葉蛺蝶,令到呢個已經幾近被人遺忘的地方一早聚集咗十幾人,無奈大家要失望而回,蝶毛都冇隻,最後影得一個空心殼.

好耐冇去過獅子會自然教育中心,記憶中都係冇乜嘢影,但有車直達唔駛點行,果然,成日就係見到一隻裴豹,咁蝴蝶園果邊係有好多青班既.

兩次失敗之後決定去遠啲既大澳,超級多人,可惜蝶就............搞咗成日得一隻珐灰,交尾都影過變得冇乜價值.

去五指耙公園打疍帶咗長鏡,未到時間居然見到蝴蝶交尾,普通係普通啲,好過冇.

花叢好多細蝴蝶,上花又影多張.

五指耙公園打疍

朋友問我話有人帶路去光明區影景,事實上我上個星期先去完,會唔會又係去嗰度架?是關水路都好遠,重覆就唔好啦.後來知道唔係咁就去啦.

原來今日既目標係打疍,即係影咸疍黃太陽,打疍我其實興趣不大,因為前景會變咗剪影黑媽媽,純粹為見吓好耐冇見既朋友.既然一場來到就諗吓點影靚佢.帶埋腳架來做HDR,以前HDR做出來好卡通,現今Light room做出來已經頗自然,原本太陽會移動係會有鬼影.我用咗包圍曝光同電子快門,一來用到400mm焦距會好震,機械快門連拍真係會矇的,二來相機自動加曝光可以確保1/10秒就影第二張,盡量減小太陽移動幅度.朋友的目標係要影到個太陽正正在兩個塔中間,位就得一個,可以影既時間亦非常短,我就側小小都冇所謂啦.

冇口罩冰壼盃

首次影冰壼盃係疫情期間,雖然影咗但戴住口罩實在樣衰,所以要影多次.

今次多咗隊伍同時比賽,有時會遮咗其他隊伍,洗地唔係組組都影到,有啲成日望地下影唔到面,成日就得呢隊最好影.

之後就剩推冰壼出嗰吓.全場幾乎得一個位影,餐廳嗰邊個位太後,除非坐入裏面,對面其實都好敏,已經係界限線後面,遇着去到盡先出手既就影唔到.

本來就冇喇,只係得兩種畫面值得影,不過見呢個參賽者壓得好低都幾得意,影埋佢.

家國情微型藝術展

好多微縮展展品都係用完又用,今次聽講有新展品.原來展覽有兩層,樓下幾乎全部係舊嘢,睇過晒唔花時間,如果你未睇過其實都好精彩,特別係舞火龍,搶包山同賽龍舟係好精美.

新展品大三巴,其實係有埋前面條樓梯的,不過影埋既話會太多反光,最後決定只影個排坊

港珠澳大橋,個設計好有問題,原本日夜變色係好想法,但有乜理由條水平線唔係喺底架,變咗兩條水平線.

今日主菜就係火箭發射,明明寫住搭正同30分表演,竟然早咗5分鐘,失落咗一次,跟住我早10分鐘已經企定好位,燈光加煙霧都有啲像真度.

呢個肯定係新做的慶祝熊貓BB.

小蠻腰一啲都唔小,成個人咁高,結果影出來一睇就知係模型,我比較喜歡做細啲,配合廣州市全景.

華潤大厦都一樣,唔夠特式.