慢快門影花式單車

之前影過都幾悶,冇乜速度感純粹影姿勢,而花式好多都係相同,今次要試吓慢快門增加啲可觀性.

首先係單人組,就咁坐喺度嗰啲唔影喇,先影倒立既,由於要顧及平衡,車速都好慢,為咗增加效果,我將快門下降到1/30秒,影起來又唔係好難影.

雖然坐喺度,但我見啲手矇得幾好睇.

之後到最難搞既四人組,啲車穿來穿去好難有重點,原本睇中一個動作係一個人做中心,另外三個人繞住佢轉,好可惜嗰吓動作唔郁個人係背住我.最後只有這個排排坐動作比較好啲.

最後係雙人賽,難度好高,都唔記得咗上面個人係點上到去.另外四人組清唔晒四個人好似有啲理所當然,兩人組有一個唔清總係有啲怪.我事後都剷咗好多得一個人清既.

最後影埋反轉再反轉.

東莞鳥攝

影雀一向器材門檻太高,今次呢個團話200mm都夠,當佢作大,咁我有300mm都勉強夠呱?而且佢有長尾壽帶,平時唔容易見到.去到好多人,個架步係有個大鳥籠,前面係園景,中間係池塘,後面就係座位,朵荷花距離好近,不過200mm真係要坐第一排先得,300mm可以中排,600mm就可以後座.

壽帶唔會咁得閒特登飛出來畀你影,鳥場有位大叔下身着晒防水衣幫大家放蜻蜓,佢行開冇耐雀就會飛落來,咁樣影真係爽,唔駛得個等字.壽帶長尾係好靚.

原本有諗過帶100-400mm,最後帶咗300mm,好彩係咁,當日微雨陰陰天,開盡F2.8都要過千ISO先有1/1600秒快門.白色壽帶比較小飛落來

影完低位仲有高位,之後就到午餐,都叫做正常團餐,唔駛捱飯盒.

熟架步既人三扒兩撥就食完,原來太陽鳥飲水開壇,失咗先機又係第二排,太陽鳥好細隻,第一排距離真係觸手可及.好易影,基本上飲水時係好定.

跟住燈籠花換成大紅花,呢個時候仲落埋雨,既然咁定,我想影大隻啲可以裁小啲就加咗1.4x增距,快門下降到1/320秒,影飛緊既雀來講係超慢,居然又得喎,旁邊既人仲話用到1/125秒都得.

又有消息隔離有斑魚狗爆水捉魚,死火,個天好暗,影啲咁動態既嘢,冇計,只好夾硬谷ISO,光圈開盡,快門1/1000秒,ISO要去到4000.雖然係咁依然張張都炒晒,最後,居然有一張可以,唔駛食白果.呢篇網誌好耐之前就寫咗,後來鏟咗因為有人話咁樣係虐鳥,不過既然都影咗就照出啦.藉口自己去了動物園.

貨尾羽毛球比賽

全港運動會影咗好多相,係時候出埋佢.

拍攝位置又係高角度觀眾席,即係影頭頂,見到支球拍彎咗,唔知係真彎定係相機既果涷效應呢?

咁落去唔係辦法,換支135mm影對面個場等角度冇咁斜,原本藍色牆對突出個波好好,無奈去咗電視台個攝錄機度.

無計,只好影後面嗰個人,今次遮唔到我呱?

最後得翻一個場比賽,走去正面影吓先,呢個角度我都未影過,前面嗰個掂波太難預計影唔到,以我功力只可以影到後面嗰個.

再攝巧固球

上次夾硬在小學裏影咗一次.今次在體育館舉行,可以光明正大一點,而且有外隊,水準應更高.

好可惜,係唔畀去場邊影的,只可以上樓上觀眾席,影咗一陣,角度麻麻,影唔到跳起嗰吓感覺,扮慒去入口旁邊小小空位影出去,好彩啱啱對正攻球位,影到最標準既相片.

唔知點解,香港女子隊好多粉絲,無論觀眾席或者下面入口位都搞到水泄不通,但係男子隊就冇乜人睇,可以影飽佢.

淨係得一種構圖太悶喇,走上觀眾席遠影,雖然角度麻麻.

最後仲可以影埋救波,嗰日都有幾次飛身救波既,不過掛住影跳起就錯過咗囉.

塘朗山

網上教學係行車路,慢慢行唔辛苦,不過我呢啲心急人,就算上山時間充足,入夜落山點都係有咁快得咁快,唔係原路走會好驚,所以侷住上都係行捷徑.

山高432m,仲高過上次雲海廣場,睇中既景竟然多咗好多樹遮住,盡了力只能影一忽,真係嘥晒.

觀景台有兩邊,另一邊係極普通樓景,求其影埋就算數.