慢快門影曲棍球

冇錯用300mm F2.8影有大入光量同背景虛化的優點,可惜舊鏡對焦鎖實並不出色,一下的涷結還可以,要一直追焦做慢快門係唔多掂,而且佢係定焦,太近會爆框,一場比賽又啱距離又動作好的時間其實不多.

於是我轉用了100-400mm去影,新鏡唔駛加轉接環焦點咬得實,而且變焦也可以多啲機會影,曲棍球唔小得帶波畫面啦.

我發覺大部份成功的相焦距都在200mm內,用300mm應該冇乜幾多張收獲,人多啲氣氛好啲.

為咗要有一定效果,我將快門設定做1/60秒,偶爾玩一張1/50秒.

全部都係盤球唔多掂,也要有交戰畫面,咪以為包頭佬白晒頭髮好論盡,曲棍球差唔多係佢地國技,球員配合得非常好.

呢張有啲失手,唔見咗半個波.

曲棍球攝影

有一排冇影,自從入咗100-400之後對300 F2.8依賴小咗,最大作用就係影呢類長距離又想淺景深既情況.

就咁兩個人追住個波既爭奪畫面雖然都唔係冇難度,不過有啲普通就盡量唔影,今次大會唔俾走去底線,只可觀眾席側影,咁就企近龍門影多啲佢.有啲人着白衫,個波又係白色,好多時會黐埋一舊睇唔到嘥咗的.

一撲一碌我最鐘意,其實前兩張個攻擊球員係凌空的,不過守門員矇咗.

咁都唔可以淨係影龍門既,兩個人爭波就太悶,多幾個都OK既.

再影埋擊球打起水花就差唔多喇.

拍攝曲棍球

難得又有一次拍攝運動機會.仲要係個場好正既曲棍球,有厠所,有飲水機同埋有瓦遮頭.

一開場係少年賽,竟然係縮細一半個場來打,死火,我得支300mm F2.8,前場爆晒框,只好盡量影後半場,影翻張典形曲棍球比賽相.比賽好短,一陣間就影完,下一場女子賽係......個半鐘頭後.

等到瞓着,我希望盡量唔好影咁多又係兩個人並排追波相,影龍門係最好,咁啱影到佢瞓身救波,放大睇有小小唔清,原來已經用到1/2000秋快門.影運動真係兩難,快門太快又話冇動感,慢又好易冇貨交.

兩個人爭奪個波都冇咁悶.最後係男子賽......又要等一個鐘.

又係兩人平排添,不過男子組動作快太多了,偏偏又開始日落,快門越來越慢添.

ISO開始頂磅,好彩係用300mm F2.8,如果係用200-500mm應該一張都影唔到,只可以坐定定睇波.

328影曲棍球

有一排冇攞支328出去晒太陽,以往影曲棍球都係用200-500mm影,係好方便,但畫質頗鬆散,仲要小小陰天都唔夠光.依家可以影靚啲.

京士柏真係好,有厠所,有飲水機,有觀眾席,仲有頂,幾hea影都得.我見有人直情開住三腳架,耐唔耐先影兩張.坦白講曲棍球其實都幾千篇一律,來來去去都係用碌棍爭吓波,又或者對方未到就一棍打走個波.328中焦既解像力真係爆燈,我影影吓都慣晒全開光圈影,爭取最散散景.

淨係得兩個人爭波太悶,影啲一堆既,全片幅來講300mm事實上有啲短,我試過加1.4x,解像力還可以,但追焦就好差,慢之餘成日唔中,都係留翻來影唔多郁既嘢算喇.

都係爭波畫面,但比較肉緊,原本由F7.1(用200-500我唔會全開光圈)升到F2.8應該夠用有突,但佢係定焦,作戰範圍有限,所以入射程我就希望中,唔好搏,快門最慢都1/1000秒,結果陰天既話ISO都試過去到1600.

影到人飛身,呢張就係ISO 1600先有1/1000秒,唔好以為咁快實清,其實叭地前影到兩張都係矇,到地減速先影到清.

好小影到龍門真係救球,因為多數都被後衛救咗又或者成堆人阻住影唔到,呢張其實都救完,不過見到成堆人又有啲水花就照影啦.

嗰日泰國隊好掂,大數對手,完場時竟然有觀眾走去派錢,有五百蚊咁多呀.

曬到死影曲棍球

近排天氣真係搞到唔多敢報名影戶外活動.不過京士柏曲棍球場就唔驚,因為觀眾席有蓋,只要唔好落到唔停,有雨大不了就避入觀眾席最多唔影注.

一早確實係有小小天陰既,但係過咗一陣就陽光普照.天文台明明話狂風大雨喎.好學唔學,學埋財政司咁死人都話落雨,唔落你地咪好開心囉.咁都係既,好在出門口時靈光一閃,攞埋遮陽帽出來,否則肯定變燒豬.大太陽又用到70-200mm,1/1250秒幾乎涷結一切.

即使用長鏡,都仲可以保持到1/800秒,奔跑動作都勉強可以搞掂,球在半空機會不多的.

成堆人既畫面,仲連棍都跌埋,一到這種雜亂場面,細光圈既缺點就出晒來.但唔用佢又唔夠長.

勁曬換來快快門及快對焦,其實我係寧願曬啲既,影唔到幾舒服都冇用.由於在底線,冇乜點影過龍門,哈哈,一影就影到佢呵疍 :P

隨住時間過去,太陽開始下山,又係咁,最勁既隊伍係排在最後.睇樣都知係勁隊,曲棍球最勁唔係鬼佬,係阿差.有半邊場已經陷入陰影,得翻半邊場影,瞓埋一堆都好過冇啦.