又打風,搵個矮山上去搏吓,影日落都係高小小有個地景好過平地高炒.雖然要去到元朗,但巴士到博愛醫院行冇遠就到登山口,上到山頂都唔駛半粒鐘.
果然又中,日落冇耐就開始燒天,火燒天咁既構圖啲人應該會覺得我黐線.係人都盡量影多啲個天啦,可能係心理作用,我覺得旁邊兩個年青人用好奇怪眼光望我.呢個大叔支鏡竟然係水平唔係向天???
今次燒天持續時間比較長,我原本想等到天黑着多啲燈先改變構圖,終於都忍唔住影多啲個天,有啲後悔,雖然個天係幾靚.但那窄窄像一條線的地景始終有啲不是味道.冇乜立體感.早知就等耐啲等多啲燈着影靚第一張.
跟住我作出更奇怪既舉動,就係冇等個天燒完,急急腳走咗去反方向影夜景.本來燒天咁靚應該下次先來影呢個夜景.但我已經郁咗構圖,又未必會短期內再上來就想一次過影埋佢.我不敢望那兩個年青人了,呢個黐線大叔竟然影夜景唔影燒天.
