影木棉

木棉由於有好多雀鳥會去搵食,影出來內容會豐富好多.以往都有影過,不過天橋高唔過啲木棉樹.多數只可以低抄雀仔肚....

今次搵到停車場旁邊有木棉樹,可以上到四樓,水平影角度靚得多,之前用200-500mm光圈太細,ISO用到好高,今次改用300mm F2.8再加1.4增距影.焦距雖短小小,但入光量大可以唔駛咁高ISO,畫質好啲.最難搞係相思仔,得手指尾咁大,裁好多先睇到佢.

雖說光圈大,加完1.4X得翻F4,再要收一級先sharp得翻F5.6,現場實在係暗,勉強再開大到F5.0,銳利度還可以,都要用到ISO 1000先有1/320秒快門.雀你種類好多,眼見都有接近十種.

大隻既就易影好多,容易對焦亦唔駛勁裁,我呢個快門速度其實好保守,隻雀郁小小都會矇,只好影多幾張搏有張中.

即使ISO 3200都勉強可用,但咁係基於唔裁既情況,勁裁既話其實雜訊都會放大埋.此時開除雜訊係會滑咗,但羽毛上既細節都會變到一 pet pet.雀在花中間幾得意,但就唔夠突出囉.

樹下面更暗,侷住將快門降到1/250秒.

其實今日主要目標係影松鼠,上午一共出咗來三次,都係要用1/250秒搏嗰啲位.總算叫做影到.

將軍澳誇灣大橋

經新聞講一講,近日好多人去影嗰舊預制件,我自然都去襯襯熱鬧,由於舊預制件離岸邊頗遠,最好既方法就係航拍,亦可以就啱日落方向.不過唔知乜事,一起飛已經話訊號有問題,唔理照飛,點知一飛上去部機就直去,大驚按Home,部機竟然立即降落,停咗再按,終於正常翻,都係唔好飛喇,用單反影.

死火,啲圍欄好高,腳架仔開盡都唔夠高,好彩朋友提醒我可以放圍欄上面,條橋未起好肯定唔會開燈,即係要入黑前靠外來光影到夠光.為咗要影多一個角度,冇時間影太多相夾,由得啲船矇.

所謂另一個角度就係對正條橋,天黑得好快,要兩分鐘快門先夠光,反正唔駛再轉位,我就開大光圈,加高ISO影清啲船.搞掂收工,希望條橋完成時呢個位仲有得影啦.

影桃花

最近人人都影花,我又襯熱鬧去影一下.網上見到有人話萬德苑桃花幾靚,順便當行山去咗一趟,呀.....睇地圖好似好近,原來都要畀小小氣力的.

一早來到得我一個人,同棵花影個全景先,都知實係會好亂架喇,只係紀錄吓.其實我覺得會唔會係梅花呀?

跟住開始影特寫,由於棵花後面就係山,好多位都係影到黑底,得翻啲窿隙可以影到淺色底背景.

平時影花特寫好難影到全清,一大堆花如果只係得好小部份清係正常,我今日就試吓景深堆疊整整佢,難度原來都幾高,主要係有風,等到冇風基本上係冇可能.只好將目標降低,盡量一個平面既搞掂就算.

晏小小開始越來越多人,有人抱怨太陽未出來啲花唔夠色,都啱既,不過我反而喜歡散射光所帶來的均勻光線,但係就小咗強光既戲劇性效果,呢個時候亦越來越多人,所以我決定唔等太陽早啲落山喇.

銅鑼灣日落夜景

啱啱行完山,腳仔仲有啲攰,但陽光又幾好,唔出去好似有啲嘥,於是就揀咗告士打道天橋影銅鑼灣日落及夜景.

由於啲大厦好高,日落比預想早,幾乎趕唔切影.不過之後有啲燒天,仲靚過日落,慣常用提早開燈大法去搞.居然出事.畫面中有兩盞街燈既星芒疊到個天,唔夠個天光短咗一忽好古怪,整暗燒天嗰張或者加光夜景都會令個天變成紫色,雖然紫色也無不可,但我比較想個天紅啲,把心一橫,油走部份古怪星芒變成單向.第二個問題係燒天嗰張原來有架車啱啱駛出引起鬼影,可以唔搞既,但啱啱夜景有張可以補上去就試試,色好難夾,叫做搞咗,但海面有小小怪.

影埋夜景係指定動作,冇乜燈光既關係,就咁影個避風塘會好黑,正路做法係加長曝光影多張夠光既補上去,但我想做多一步就係保持啲船唔好矇.加高ISO無可避免,但單靠佢張相會有一忽勁多雜訊,所以要適當開大光圈.最後係開到F3.2,幾乎開盡.之後最難搞係帆船上面既一支支杆,由於啲船會郁,唔絶對蓋過晒係會見到船杆斷開兩截.蓋過晒個天就要夾色,都幾花功夫的.

將軍澳海濱攝影

去泥涌之前已經見到有人喺呢度影到青苔,於是我又來碰吓運氣.

見到橋既地方唔多,好容易就搵到,其實只係岸邊一堆石頭,可能太早既關係,青苔就冇喇.另一個我覺得靚位應該係橋上,可以高角度影到下面啲船,但在網上睇過人地航拍,知道望到船一邊係單車路,放唔到腳架.唔緊要,即管上去手持影張紀錄相.又估唔到,原來角落頭位有一個身位左右係喺單車路出面的,欄杆好高,應該是用迷你石膏手先夠高.只好手持影一張啦.

都係頭先個景特別啲,翻去影張夜景都好.用wide鏡可以影到啲石仔好似好巨大咁.這個方向是日落,不過旁邊位師兄話起咗樓之後已經睇唔到.唔緊要啦,夜景都唔錯.

再到祖堯村停車場

睇翻以前啲相,影到好爆框,我記得係為咗要避啲樹,隨住影得風景多,漸漸喜歡影wide啲.於是我又想試吓影埋啲草影wide啲.

為咗搵吓有冇好啲角度,我走咗去四周巡視,甚至爬上斜波,結論都係只好接受啲樹,呢個景如果冇樹阻住其實都唔錯既.

順便影埋後面方向,記得之前用呢個方向玩過HDR但因為啲吊架會郁所以失敗咗,就咁影夜景反而仲好.

大刀屻影火燭

這個山路入口很好找,嘉道理農場對面就係喇.開頭路段仲有指示牌,去到粉嶺要四個鐘,我帶埋架生肯定唔止,所以我同往常一樣,只會走到大刀屻影完相就原路走.

出奇地好快就望到山頂,點知唔係目的地,要落低啲又再上,上完又要落,最後四上四落先去到山頂.可以影到康樂園果邊,如果天清啲影夜景都可以既,唔想影完又要四上四落,決定行翻轉頭去有鐡欄果度影日落就算.

好大煙霞白茫茫,睇怕執餐死,沒有最衰,竟然有屋仔火燭,濃煙噴到通度都係,太陽其實仲好高吓,但已變疍黃,我都唔敢等佢再落低喇,陳間俾啲煙遮埋就乜都冇.夾硬都等埋着燈先走,否則下面太黑都唔知係影緊景.

泥涌復活

去咗幾年都影唔到泥涌海草,三月頭又試過,三月尾又試過.本來已經絶望,多得社交媒體,見有人貼相就知道有得影,唔駛估估吓,原來年年唔同時間亦可能唔係年年有,但今年二月頭已經有.唯恐過得一個星期又沖走晒,見相第二日即去,也顧不得是否大退潮,水深1.2米都搏吓.

泥涌只啱影日出,不過唔駛上山,搭港鐡再轉小巴去都好充足時間,以為坐頭班車會係第一個到,點知已經有十幾個人到咗.咁都好,即係應該有得影,其實只係得接近水面有一片,多石頭既方向已經冇晒,冇法子,原本都係搏吓,有得影已經好好.地面好濕滑,要好小心唔好滑到,我見有人直情着水鞋來.終於等到日出,情況有啲似上次影秋英,又係要景深堆疊,對焦最出嗰張包圍曝光就搞掂.終於還咗咁多年既心願.跟住就係嗱嗱趕去搭車翻工喇.

敗走禾徑山

上這山主要是見到有人影到一條路橫過城市構圖幾靚.前段多數係我最鐘意既水泥路,不過就幾遠水路吓,行咗好耐先見到上山既泥路,之後路況就差得多,好大塵,我要盡量踩住啲草行,否則對鞋唔駛要.

去到山頂離遠望到我要既景,但好多樹遮住,要另一方向落山繼續搵,越落越唔對路,啲草開始成個人咁高,再去既話陣間走真係好驚,搵來搵去,有一個位草比較低,舉高相機就可以影到條路.哎呀,我估人地都係咁影,又好似上次鷓鴣山咁,只可以手持.

一場上到來都影埋個日落同夜景先走啦,日落好側,只係影到山下矮屋,今日又清水疍,影影吓決定放棄去影條路,腳架開到最高都係咁,事後PS努力仲一輪都係無法重建到,睇來要搵人借支超高腳架先影到.

中大落羽松

同事約去流水響,次次都係唔多人既地方都唔約.總之呢期興乜就要去.好啦,去就去啦,後來越來越多交通負面消息,開始有人縮沙,縮縮吓取消埋,仲好,自己舒舒服服去中大影吓就算.

之前社會運動中大封咗唔俾入,之後欄杆一路都冇移走,以為再入唔到去.後尾知道原來只要登記身份證同講低去邊就得,阿姐仲教埋我點行.好彩冇開噴水池,可以影到天空之鏡,雖然鄒鄒地.

紅葉就得得四棵,影埋個亭都好似冇乜好搞作.

四圍行行搵個高角度水平啲影,冇計樓多背景比較雜亂,唔想迫只好將就啲.

最後影埋個逆光就走得.半個鐘都唔駛就影完.