室內五人足球

下雨天又要侷限於室內活動,其實都唔錯既,可以涼住冷氣影相.

同樣係五人足球,室內難度係高好多的,室外快門要幾快都得,室內就要睇燈光,一來就鏟到飛起,啱晒我.

就咁喺地面碌來碌去影來都冇意思,專影佢地頂頭鎚,可惜又頂唔中.

呢個畫面睇翻覺得好奇怪,波似係迎面而來但又見到後面既人起腳.我估係個波速度慢停咗喺嗰個位.

終於影到頂頭鎚,同理想有分別,得一個人唔係爭頂.

追續叮噹纜車

難得好天,朋友說想去昂坪影叮噹纜車,咁啱我又冇乜預定計劃咁就成行.纜車票真係好貴,單程要180,同搭的士差唔多,來回咁就冇咗250喇.唔明做乜唔做八達通就咁入,依家要排隊換票好花時間,估唔到既係,咁貴都居然排晒大隊.

睇網頁知道只有四架叮噹車,裝咗支85mm一路等,終於迎面碰到最多叮噹嗰架,無奈走近時被支架阻住,早知用長鏡遠影,之後三架係好短時間就會出現.搞咗一輪都唔係好理想.

去到昂坪話有荷花展,一盤盤好人工化,噴霧又唔湯唔水,冇乜興趣影,去到裏面見到有人影相我又偷影幾張.

冇乜好搞,走翻去車站入口,即係唔駛畀錢嗰個位等,影到有咁大架得咁大架.之後既計劃係排隊搭車落山,到龍頭時企埋一邊等上叮噹車之後嗰一架,咁就成程跟住佢,可以等到構圖靚靚先影喇,結果嗰架係水晶車箱,有錢人限定.......

運動會霹靂舞

上次在商場拍霹靂舞的體驗非常差.自己人圍住個細圈幾乎全程遮晒,只可以在二樓高炒.今次個場有樓梯級又近,希望可以影得好啲.

去到依然係啲人圍到好前,不過就冇限自己友,所以我都去咗第一排,85mm都有時爆框,今次腳掂地既唔影喇.

小朋友水準一點不差.好多翻騰動作.

直情離晒地,我幾鐘意背景係評判,好過亂到七彩既觀眾.

公開組動作有力度好多,但唔知點解硬係好悶,成日都淨係扭來扭去,好難先有一嘢單手支撐.嗰日超大雨,即使有頂地面仍然有一段時間濕晒,要拖水再等佢乾,主持話下次搞室內唔駛咁麻煩,我內心當然唔讚成啦.

成也電子快門,敗也電子快門

電子快門呢個技術有咗好耐,可以冇聲,又唔需要活動既零件,非常耐用,而且唔會震,影相唔駛黑屏因此連續對焦干擾更小,仲可以做到超高速快門及連拍,但唔好處係影移動既嘢會有果涷效應及用唔到閃光燈.

直到Sony A9出現,電子快門果涷效應已減到接近機械快門.最近見好多有錢蝶友都轉咗Sony A1,電子快門都一樣用到閃燈,不過同步速度只去到1/200秒.要用機械快門先可以去到1/400秒.由於電子快門唔多傷機,可以瘋狂連拍.我幾乎冇見過有用A1既人會用機械快門.

但係,影蝴蝶想用閃光燈又唔想快門得1/200秒可以點,將閃光燈設定做高速同步就搞掂.這就是盲點,高速同步係會大大降低閃燈效能,於是唔夠輸出,回電慢,勁耗電,傷閃燈等副作用出晒來.有人同我講支細閃燈唔得,回電好慢,我叫佢將快門降翻做1/200秒,即刻可以不停閃都得.其實好多人都嘥咗A1個機械快門,1/400秒高速同步唔係咁多機有,但就冇乜人用.

全港運動會攀石

呢個所謂運動好靜態,未影過試吓都好,而且機會唔多的,冇乜公開比賽.落雨唔駛考慮咁多.

網頁話十點開始,結果搞到十二點,正面對住攀石牆既位置幾乎畀大會攝錄機霸晒,不過我都唔鐘意嗰個位,諗住高啲樓層有冇高位可以水平影,大會衰格到特登貼啲單張遮晒三樓既窗唔知乜用意,好彩四樓冇遮,等咗兩個鐘,工作人員都影住先.

呀.....又係小朋友,畀我影到證明水準唔錯,好多二樓都未到就失手,所以三樓係應該最多機會.

同時影到兩個人更加難得.

你咁夾硬來唔得架,結果係難逃一跌.初初得我一個人喺度影,後來有人發現咗就走埋上來.

一共有三條比賽路線,最近嗰條用到50mm先唔會爆框,成朝就係得呢個洋人小朋友可以上到頂.下午又話要兩點半先開始,睇怕影極都係差唔多,不如去下午茶.

全港運動會滑板

之前已經影過滑板比賽,其實都係差唔多,不過朋友唔知點解好想影,咁我就陪吓佢.比賽10點開始,朋友話遲啲先來,眼見全部都係小小朋友,已暗覺不妙.果然全部都係就咁滑來滑去,一點跳躍動作都冇,訊息朋友如果未出門口可以唔駛來.

不過佢已經到咗附近,有信心晏啲會有高水平比賽,捱到差唔多食晏,去影吓街場啲人玩仲精彩.

下午翻來依然係小朋友組,不過有一兩個比較突出肯跳吓,呢位小朋友好勁,最高嗰個台得佢一個敢跳,仲跳得唔錯,冇乜失手.

將軍澳成個場得兩個跳起位係背景冇咁雜亂,一個啱135mm,一個啱200mm,好在每人有4次機會,只計最高分一次,影咗一次估錯咗之後仲有3次機會.

最後終於有公開組,點知……功力比小朋友仲低,只得一個比較好啲,我也把握埋最後機會.

龍鼓灘餵蚊

死心不息又想去影紅鋸,難得有一日係好天,龍鼓灘遠啲都的起心肝約埋朋友去一次.

都未入到去就已經有迎客蜻蜓交尾,隔住鐵絲網影咗一輪,決定冒險潛入去近啲影大啲,噢,飛走咗冇得影.

這個環境乜咁似山寮神壇.原來係有位師兄私人用水泥起的,火山口形狀仲加上泵水設備,可以整濕附近引蝴蝶落來,超有心.呢隻黃蝶超活躍,基本上係一路飛,今次第一次見佢停低,仲要有倒影,可惜距離比較遠影唔到數毛.

終於,目標紅鋸出現了,又係停到古古怪怪,開翼之餘仲要被花遮咗半邊身.

唔想一直等,出翻外面搵吓,有隻唔知係咪普通遷粉,但我覺得佢眼上的紅線都幾靚.

入翻去人工神壇,朋友問我做乜唔睇訊息,睇鬼到咩,都收唔到,原來有珍灰,雖然我都影過算好理想,不過都照影吓啦.要講講神壇附近啲蚊好癲,已經勁噴蚊怕水仲係好多處中招,睇怕我有排都唔敢來.

全港運動會乒乓球

成個月都係落雨,只好向室內活動埋手,咁啱係全港運動會,可以唔駛好似做賊咁先入到去影相.

元朗體育館超暗,F1.8, ISO 1600,竟然只有1/250秒快門,其他體育館多數有1/400秒,侷住影慢小小既動作,見到削球既手都有小小模糊.

前輩教落個波一係貼拍,一係過網,我冇咁嚴謹,只要唔好唔知去咗邊或者黐咗底就算喇.哈哈,係我最鐘意既直拍橫打.

改吓角度從側邊影.

反手拉上旋.

快門慢的關係唔係好影到正手,通常用正手都會轉腰搞到轉埋個頭,一係等拉個波飛到好遠,一係好似呢吓咁偏擋球既個頭先冇咁郁.

追續小鳳姐

蚜灰一向有個外號叫小鳳姐,我記得只在好多年前在鳳園的古家園見過,之後再去搵都冇喇,唔知點解啲人消息咁靈通,話山寮有而且仲影到交尾,咁近我冇理由唔去一次.

見到人地出交尾相再去多數都冇,非常幸運地都仲見到單隻,隻蝶好細唔係咁易發現,我都係見到好多人圍住影先知道,可惜個位非常暗,光圈,ISO都用到好盡吓,結果1/60秒拼了好多張先影到.

一場來到梗係去埋神壇,壇上冇蝶,地下有隻鶴頂,一路都冇影過因為好小停低.就算偶爾停低都係45度開翼,但完來落到地係會合翼的,不過合咗翼就見唔到背上既鮮艷橙色花紋喇.

離開的路上見到一大堆小豹律,原來係食緊人地拜山既生果,太多反而黐埋一堆,好不容易先搵到一隻落單既.

異形巢穴

政府整個咁既藝術品真係會令人聯想到異形既巢穴,仲會發光添.一直覺得走入裏面超近影啲疍唔多靚,見人地襯埋個海景會有啲意思,但個高位又好似喺要預約位置入面,初期都幾爆,預約唔到.........

直到預約到,去到先發現影相個位係唔駛預約都去到的,我一入去轉個頭就出翻來,連工作人員都好驚訝,由於我預計到浮在海上既疍會郁,除咗24-70之外,仲帶埋有F1.8光圈既50mm,結果24-70真係唔夠入光量,用佢要用到ISO 2000.好彩50mm都勉強影得晒,一張過搞掂.疍係會唔同色的,藍紫色會同個黐底,我等到紅紅綠綠先影.