慢快門影跆拳道

一直都覺得跆拳道好悶,你地見到飛身旋轉踢嗰啲場面係做戲先會有,出咁大招費力之餘都好大風險,所以來來去去都係得左右開弓係咁踢,諗深一層,咁咪啱影慢快門囉,個頭唔多郁但係影到腳影.

快門唔敢太慢,先試1/100秒,成功率可以接受,決定就咁影,最常見既互踢.

踢中頭係最高分的,所以攞獎既相通常都係影到踢頭,佢呢吓其實係踢過龍再勾翻轉頭.

反身踢有時可以另對方失預算,不過呢吓冇乜力度.

反身踢如果失敗就好容易失重心整跌自己,但可以唔放棄,照踢.

幾乎係冇人用拳的,我覺得叫跆腳道合適啲,小有的出拳畫面,今次成功率都唔錯,下次可以試再慢啲快門.

長鏡的景深堆疊

之前用微距鏡由於焦距只有180mm,手可以頗定,只要扭動對焦環影幾張就做到景深堆疊,成功率頗高,但如果用100-400mm影由於焦距長唔係咁隠定,手持手動對焦有時會失焦,影幾張既話好易有啲唔中.所以一路都係影單張.

問題始終要解決,既然自動對焦可靠就用自動對焦吧,這隻網絲冇合晒翼,對焦頭部翼會矇.

之後要影其他部份,我方法係改變對焦點位置,手勢關係,構圖郁晒,之後再影多幾個位,基本上係圍住邊位影,除非中間凹咗落去,否則應該夠相夾.

心諗移咗咁多位都未必會成功,不過最後又得喎,一共用咗四張.其實我試過唔郁對焦點就咁移部相機影,如果距離唔係太遠都會成功的.

細看香港微型藝術展

又有微縮展,今次有新展品但地點遠咗啲,要去到山頂淩宵閣,幸好係免費.

比想像中小人,可能係比較遠既關係,啱晒可以慢慢影,呢個馬會模型夠晒賣廣告,可惜玻璃太貼,反光無可避免.

新模型山頂鑬車,其實係做埋成個白加道車站好靚的,不過背景超花,所以只好影架車既特寫.

又有新嘢廟街,背景都有小小穿崩,幸好前面既反光不太嚴重.

啓德新場館,係做得好仔細,但係個玻璃箱好貼,要像真只好特寫裏面,最衰頭頂有幾支光管,反光避唔到.

最後影埋個金魚館,係啲膠袋我覺得幾靚.最遺憾係影唔到天壇大佛個景,做得好靚但又係背景超花,可惜朋友唔肯同我去,個模型喺二樓冇乜人,有人幫我攞背景布應該都冇人阻.

西沙Go Park爬蟲展

無意中睇到我又未去過走去八卦吓.本想大學站搭小巴,估唔到有免費巴士咁筍,去到就明白喇,原來隔離係新地Sierra Sea.四處都是賣樓sales.

死火,以為中庭係室內,諗住涼住冷氣影相,點知係陽光直射,只有幾座係咁噴水花整到你成身濕既風扇,有個冇乜人既角落,原來係龜仔,等咗一輪終於等到佢打側同有倒影.

最有機會影到係佢地三隻一齊,可是要好位就要耐心等,除咗等距離同角度之外,仲要等冇人睇緊,成日就得一次機會咁多.

種類有很多,不過唔係瞓咗覺就係唔知喱埋咗喺邊,佢醒咗,唔係好靚都照影.

最後一種喇,細細隻但顏色好靚,角度就差啲,有得打側就靚.

山寮雜錦

攝影都係一個重覆既行為,希望喺重覆中得到一點突破,山寮來過無數次,依然希望碰到一點新東西.

照例先入神壇,即刻見到忘憂呀,居然冇人搶住影,來得既都係老街坊,乜構圖都影過晒,倒影,大頭,全身都已經影到最靚,我見到有隻蜻蜓飛得幾定而且同上次影既品種有啲唔同,用佢開齋.

都係呢度常客,我都影過不過夾得麻麻,今次可以對到正一張過.

忽然全世界好緊張,驟眼睇以為係忘憂,原來花紋差小小,叫做大二尾,小見的,個個影到唔捨得走,卒之一陣大風刮起葉片撞走咗隻蝶冇得影.

同場有隻網絲蛺蝶個個掛住影大二尾冇人理佢,我又冇所謂影埋.

係時候走人,路上遇到呢隻唔知乜來,順便影埋.

再闖龍鼓灘

去完鳳園都隔咗好耐,又係時候去餵吓蚊,唔知點解就去咗龍鼓灘.

哎呀,原來做過剷草工程,出面草地幾乎移平,再行入裏面,師兄構建的火山洞供水設備都移除咗,搵搵吓居然有隻特別蝶,佢瞓平,要高抄,好彩都夠距離,背景變咗泥土既顏色.

本來雨後冇乜蝶,一出翻太陽啲蝶就開始出來,好似係第一次見呢種弄蝶,扒在水珠上都幾得意.毛色也不錯.

以為冇乜蝶,目標紅鋸居然上花,想再走近啲突然有隻大狗衝出來嚇走隻佢,原來有人放狗,命中注定都冇計,狗主仲問我驚唔驚咁大隻狗,唔知點答佢.

走過去水溝對面亂草地搵吓,有普通蝶交尾但個位好衰,而且佢警覺性好高,行近小小都會飛走,搞咗幾次之後終於有個背景冇咁亂既位.呢個位影唔到就白果喇.

亂草地仲有隻幾鮮色既弄仔,又係專停衰位,好彩失去咗又見翻佢,最後只可以咁,遮咗小小肚.翻到屋企老婆話知我去咗影蝶,因為面上已經多咗幾撻蚊咬痕跡.

又鬥慢

室內賽艇比起滾軸溜冰易影,重覆次數更加多,室內唔駛加減光鏡,上次影用到1/40秒快門以為都好慢,今次要再慢啲.

個場佈置唔係太有利影相,裏面對住評判欄住咗唔畀入,出面對正比賽位又有個大吹氣拱門.冇計唯有斜斜地影住先,即刻下試1/20秒,失敗率好高吓,不過都搏到一張.

混吉咗一輪之後好似冇乜人理我,就博矇貼住個吹氣拱門,第一個位冇人,第二個位用50mm剛剛好,快翻小小用1/25秒,其實都係差唔多.

第三個位先有人,係最好既距離,可以用85mm影,壓縮感更強.

來到接力賽,好熱鬧,隊員圍住隨時接力,有啲仲會企起身遮住我,好彩現場有人要佢地坐翻低.

死火,滿員最前排都坐咗人,早知帶支魚眼來玩吓,變則通,可以影中間啫.反正係手動對焦,仲有人山人海感覺.

五人足球背景虛化

咁啱見到有呢個活動就去影吓.

五人足球由於球場細,背景好易就好雜亂,所以今次我要用135mm F1.8全開光圈去虛化背景,景深已經淺到個守門員都矇咗但背景依然唔係好理想.

如果啲人平排就好啲既,背景都冇計喇.

會唔會長焦距好啲?於是換上200mm F2.8影,焦距長咗但光圈細翻,效果都係差唔多,如果有200mm F2就會好啲.

鬥慢

早排去五指耙公園打疍時朋友問起哪裡可以影滾軸溜冰,於是我就留意吓,見到有就通知佢.原本都影到有啲厭,因為都係不停一個動作.不過佢又想我陪佢因為佢未影過,咁我就一齊去啦.

以往都係柴灣公園搞,今次呢個機構喺荔枝角公園,之前一直都係影近自己呢邊,已經有個諗法係帶支長鏡影對面,今次可以順便實驗吓,跟翻上次用1/50秒快門,這個速度成功率還可以.而且起步位置可以影到較多人.

朋友問我用多小快門,聽到之後覺得好驚訝,佢話要用1/6秒先有動感,雖然成功率會低啲.這對我來講基本上係冇可能,橫掂都影咗啲,我就下試1/40秒,點知跟住好多都係小朋友隊,速度好慢,1/50秒效果冇乜,於是試到1/25秒,點知突然間有一隊較快,以為衰梗,估唔到有一張得.這效果對我來講係有點太過.

咁都要影翻上次影既距離,我記得上次係用135mm影,幾舒服既距離,由於已經有100-400mm既關係,所以可以一支過唔駛換鏡.唯一變數係如果有人坐好前遮就侷住要用短鏡,好彩嗰日唔多人.

下午翻來,哎呀,改咗做障礙賽,繞雪糕筒再衝去執豆袋,真係好慢,我較到1/30秒,都叫做有點效果.

黃花配雀

春天除了是紅綿,黃花風鈴都開得好靚,成日去大埔中心都冇留意到,原來昌運中心有個露台位近距離對正幾棵黃花風鈴,咁近梗係去探吓.

已過了最多花的時間,雀仔還是不小的,不過多數係麻雀,呢隻夠近影個大特寫.麻雀數毛都唔錯.

紅耳聛幾乎實有,但佢停在比較遠既一棵上而且背光,執執佢都用得既.

佢走到好近,可惜個位唔靚,見唔到好多黃花.

全部背景都係樓,難得有一張綠底,實際上係地上一塊小草地,要隻雀咁啱停正嗰個位先得.

等咗成日先出來既相思,鑽來鑽去影咗幾十張先有一個比較好既位.