摩星嶺影蝶

網上有人貼翠藍眼交尾的相,話係大草地影,好直覺以為係東涌消防局後面工程完咗再開,後尾有人講嗰度已經起咗樓先知搞錯,原來係新大草地,在摩星嶺配水庫公園.真係山長水遠,要搭去堅尼地城站再轉小巴58再行十幾分鐘上山.

去到好多人,好多都熟口熟面,翠藍眼未見但首先迎客係小紅蛺蝶,我未影過所以瘋狂連拍,佢肯停低但會不停轉身,要影咗好多轉先有一張真係啱焦平面既.

翠藍眼終於出現不過冇交尾,單隻都好過冇.

仲有另外一隻有啲唔同樣,可能一隻係男,一隻係女呱?佢背部藍色有幾個眼形既點係好靚,可惜全部都係停地上,好多雜草好亂.

裴豹好靚,可是唔夠罕有冇乜人有興趣,影得唔好嘥,停花咪好囉,係咁停鐵柱.

搵唔到嘢影見邊度成班人走埋去實有收獲,原來有兩隻小蝶交尾,好彩我唔怕重帶埋舊機身同微距鏡來.

又有人圍埋一齊,原來係佢,上次龍鼓灘停鐡線網累我執餐死,今次可以慢慢影四正佢.

怡和午炮

這個咁經典既場面一直冇去體驗係因為只有一發,而且背景頗雜亂,最近冇乜好節目就的起心肝去一次.有兩個方向可以選擇,一邊背景係有樹既街景,一邊係對住維港既街景,應該係維港個背景遠啲,有利虛化,但又好驚個天太光會同炮火既煙黐底,所以最後都係揀咗有樹個邊做背景.

為咗虛化背景要盡量長焦同大光圈,最後揀咗85mm,煙既範圍會小咗,光圈設定F2.8,再大會覆蓋唔到個人,日光日白用呢個光圈快門係超快,變咗更難撞中開火嗰吓火光,我加咗ND8降翻低個快門速度,跟住一見炮手準備就高速連拍,好遺憾都係影唔到發射嗰吓火光,咁都正常,一秒十張快門要低到1/10秒先肯定中到,咁慢個人又肯定矇.

利東街夜光龍

大坑舞火龍復辦,一連三日唔駛急,可以去影埋利東街夜光龍先.章程話會舞出街外一個圈再入翻利東街,所以冇諗住擔凳仔霸頭位,因為太近用Wide鏡影會搞到頭大身細之餘亦出唔到散景.所以七點幾先去到,估唔到前排仲有位,橫掂唔駛等好耐又一於企吓.

專登唔企正面,一來太近,二來背景係黑媽媽酒店景,揀咗側邊對正燈籠既位,心大心細究竟用85mm定50mm好呢?85mm驚爆框,50mm又驚背景好亂.終於我揀咗85mm,影到噴煙但背景啲燈都唔係好出.

冇耐條龍就起動,於是按原定計劃去街尾用135mm影,終於週圍都係燈籠,但亦都週圍都係手機,面對手機最大鑊係佢地可以舉到好高,咁都冇計喇.

原本話會舞出街,結果係掉頭去翻街內,咁又係,人山人海咁出外街應該會產生交通問題.終於包到個燈籠背景,成堆咸疍黃咁.

亂晒大籠之下我跟住條龍走,佢停低之際我乘機攝咗去前排,冇人理我,換翻85mm影個大頭噴煙先.

澳門煙花節

想去影好多年,一直都猶豫因為好遠水路.今次朋友話好想去,有伴之餘可以輪更守住位置,行開行埋去洗手間,買嘢食都方便啲.食完早餐就去發,希望啲人食完晏先去霸位......太天真喇,十二點前到西望洋山觀景台已放滿腳架,咁啱碰到熟人,佢地話朝早八點幾都已經冇位.

退而求其次去斜坡觀景台竟然冇人,放低腳架就開始漫長既等待,直到四點幾先有其他人來,之後冇耐已經又腳架滿座.終於捱到九點,煙花發射位置被旅遊塔擋正,冇計只好照影,先來一張煙花較紅的.

成也旅遊塔,敗也旅遊塔,原本佢咁高制造咗一個空間襯托煙花,可惜卻在不合適的位置,再來張青色類既.

為咗彌補空虛的空間,裁張直度玩吓,果然幾飽滿,之後翻屋企係好大問題,十點先完,落山15分鐘,再轉兩程巴士先去得到口岸,坐埋金巴分分鐘趕唔到尾班車而要搭的士.好彩在教堂哪邊的朋友有約車而有位多,直接到關口在尾班車開出前五分鐘趕到.

鳳園普通蝶

群組有人發起去鳳園影蝴蝶,其實影蝶圈開始小人去鳳園,因為品種比較普通,但因為好多人係第一次影,鳳園比較方便.

買完入場卷,竟然見到隻比較小見既,好活躍所以影出來翼係矇,蝴蝶眼上是很美的陰天漸變光,即係暗,好彩有400mm及快速自動對焦,影咗幾張佢已經飛走咗.

沒有更衰,竟然落大雨,被迫滯留在一期涼亭個幾鐘,雨後有太陽,多咗好多蝴蝶出來,呢隻普通嘢其實每次都見到但佢有個習性係一停定就開翼,咁既形態一定要喺極短時間內影完.

又係普通嘢,不過其實警覺性好高,呢隻冇咁活躍終於成功.

呢種蜻蜓仔平時唔影啦,見陽光穿透佢身體幾得意又紀錄吓,唔知尾部黑黑地既係咪佢啲便便呢?

忽然間見到隻花紋好靚既,睇真啲原來都係普通料,呢種蝶好合作,見到又冇風既話通常都有時間慢慢影靚佢.

足毽比賽

呢排成日落雨,好在仲有啲室內活動.

倒掛係經常會用既招數,唔係太難影到.

防守通常只靠身體攔網.

飛身踢都係一種方式.

泰國隊成績唔太標青,但係好肯用大招,打晒跟斗先起倒掛,又有瞓身踢,超級鐘意.所以一聽到泰國隊有比賽就即刻去定影佢地個場個位.

旁邊的細場只用來初賽,決賽係要去中間個大場,反而有點不利我,距離遠咗要用200mm,光圈得翻F2.8,用到ISO 3200快門仲要降到1/320秒先夠光.失敗率比較高畫質也較差.

全日壓軸係女子決賽,中國對越南,越南愛用倒掛,但攻擊比較單調,幾乎都落在一個人身上.

中國隊冇乜用倒掛,通常都係就咁申腳就踢,唔好睇但勝在實際,慳力又可以睇定形勢先決定方向,速度其實唔太差,大招係華麗速度快,但動作太大,攻擊完之後要較多時間復位,攻擊途中亦好難改方向.兩隊勢均力敵,一分一分咬住上,越南隊失誤多咗小小,最後中國隊險勝.

城門水塘雜錦

朋友說打完風落咗咁多雨,不如去城門水塘影水浸白千層,咁耐以來其實我都冇影過,一於去體驗吓.

可惜.....係冇浸既,可能之前水太小,好想執翻把沙,釣魚大叔都好.

朋友說入啲既地方有機會有,比呢個官方位靚,途中遇到隻青鳳,我有預感可能有蝴蝶,所以Wide鏡之外都帶埋100-400,本來唔係飛來飛去較易影,但佢喺正路中心,人來人往,好不容易接近了又有人經過,又要重來,搞咗好耐,終於都把握咗一次機會.

終於來到非官方位置,果然有浸,唔知點影好,硬係好亂,盡量影特寫,連天空都唔要,只影樹頭及倒影.

過小小逆光位啲影幾得意又影吓,咁就算喇.

回程見到好多蜻蜓仔,順便又執一張.

終於都見到馬騮喇,不過去埋晒啲陰位好暗,鏡頭又得F5.6光圈,ISO又已經去到1000,唔想再高,結果用1/25秒快門搏到一張.

快慢武術比賽

又有武術比賽,今次要試多啲用慢快門先得.

我鐘意有架生的,呢種武器都係第一次見,長者動作比較慢,硬係冇乜動感,只係手腳有小小矇.

輪到三節棍,超級精彩,快到,哎呀,太快添,有冇發覺有節棍唔見咗,係因為郁得太多變成幾乎透明既扇形,不過個人係幾有動感.

雙節棍可能係小朋友玩既關係,腳冇乜點郁,支棍又係幾乎唔見咗.

玩咗咁多慢快門,到影跳躍動作,要入翻高波鬥快,南刀好有氣勢,除咗舞刀,仲要大叫.

有刀自然有劍,加埋劍指.

跟住係普通刀.其實不同項目都有頗多動作係相似,我盡量唔重覆.

難得有個玩棍既倒空翻,原本玩槍都有一下不過我影唔到,真係得一個女仔做呢一下,其他人都冇做呢個動作,錯過咗就冇喇.

虛實合一

今次係抄襲,我見人地咁影我又影,不過我係影橫度而對方係直度.Google map係搵唔到邊度係長實橋.可以望到舊立法會同電車軌都估到既,原來係長實中心對面天橋.

方法係影一張慢快門車軌,再影多一張高速涷結既電車夾埋.影車軌都搞咗幾耐因為冇乜車,反而影電車好易,但鏡頭光圈一定要夠大,開到F1.4, ISO 1250先影到架車夠光同唔矇,F1.8會要用到ISO 2000,如果F2.8就係ISO 5000喇.好好彩一連有四架電車又冇其他車阻住.

合成要全人手操作,自動的話會有光軌穿過車身.咁電車四四方方都唔太難搞既.但原來最難搞既係啲電線,電車過嗰陣係會拉郁啲電線,同影車軌冇負荷時係唔同位.要靠人手慢慢搞,有啲位甚至搞唔到,只好胡混過去 :P

慢快門影跳舞

終於搵到有機會試吓用慢快門影跳舞,疫情前多數喺政府體育館搞,隨便行入去就影得,疫情搞到去晒一間小學既禮堂搞,私人地方唔知入唔入得去.

跟多數舞蹈比賽一樣,觀眾,評審都做成一個好混亂既背景,全場唯一最乾淨既背景就係頒獎台,畢竟唔係好規則既活動而且只有一個位影,唔敢用到太慢快門,只試咗1/100秒,標準舞啲衫飄飄吓真係幾靚.

搞搞吓居然有評審企咗出頒獎台前睇,係咪痴線架?個台已經突出咗一忽,你再企前面有必要咩?旁邊咁多位.最緊要係阻住我嘛 :P

長長的飄絮有助顯出旋轉的感覺.

跟住到拉丁舞,其實有好多好大動作的,不過要就背景冇計,只影到啲基本步,好彩評審啱啱唔喺度,否則又變廢相.

呢對個女仔頭髮長,裙又長,轉起來好大效果,可惜一張乾淨背景既都影唔到 @@