蝶季又來了

其實早咗啲,天氣都仲有點冷,不過鳳園三弄過年就會出,知道要黃昏先會出,而且人多好難影得靚,都碰碰運氣啦.

時間尚早,去一期搵搵,居然有珍灰,記得佢初初在香港發現時,去影佢既人冇四十都有三十,點知後來到處都係,唔駛出大澳咁遠.位麻麻,冇辦法完全垂直影,要夾兩張先夠景深.

全世界圍晒喺桔仔樹度等,結果係燕鳳出來,後面條尾實際係斷咗,我用連拍既另一張移植過去,費事同前面嗰條一樣咁假啦.

人多有樣好,有嘢影會有人通報,於是成班人去晒古家園影交尾,個位好高,抵抄有啲斜斜地,以為夾兩張搞得掂,點知上面嗰隻係好斜,最後要影多張.另一個最後係太陽落咗山三弄都未出.

天水圍公園鳥攝

去天恩河的時候認識了一位攝友,得知天水圍公園有個靚位影雀背景好乾淨,不是吧,實際上我在紅花風玲開花時去過,雀都唔多隻喎.

聽說是瀑布位,咁走去睇吓,仲唔係呢度,不過要在欄桿中間啲罅隙影過去,而且有點高角度,但正因為欄杆,啲雀警戒心低咗,走到好埋,可以影到佢地喺度玩水,位得一個,人多就要分開影,但大動作又好易嚇走啲雀.

朋友話唔係呢度呀,係行過小小穿過啲草上去,有石級地坐,對正瀑布邊,係喎,去到有幾個人影緊.白鴿類係普通啲,玩水都OK呀,個位真係唔錯,但好遠,300mm要加2x仲要裁.

水池位就要等,但身邊其實好多普通鳥,呢隻埋到幾乎爆框.

二號玩水鳥又來,好彩要影埋啲水花,否則隻雀都幾細,要裁好多.

時間有點晏,開始冇乜光,走翻去剛剛來既位睇吓,又有嘢影,可惜水花遮咗小小眼添.

金地威新中心

要在深圳搵個便捷地方影夜景,查到金地威新中心46樓轉升降機層有個公眾位,地鐡行去唔遠,隔住玻璃我都可以用cheap cheap遮光罩搞掂,不過,點解玻璃前有欄杆既?隔開咗呎幾乜都影唔到啦,而且有人守住想搏矇都唔得,睇真啲側邊有個位有屏風但冇欄杆,原來要幫襯買支百幾蚊既酒就可以入去,但係我又見到啲OL係度hea,照計冇理由咁捨得呱?

終於我厚住面皮就咁行咗入去,冇人理我就咁坐低,唔敢咁早開壇,等到差唔入黑先屏住氣息開腳架.等待既時間特別難過,個景講就好豐富,影到竹荀大厦,深圳體育館,西部通道,但係前堆樓好亂,局住zoom遠啲搞到個景好平,變得平平無奇.

粉嶺中心reload

朋友約我去嘉道理農場影山櫻加相思,原本提議都唔錯,但佢有所不知,嘉道理改咗要收50蚊入場,搭車要30蚊.咁入一入去就80.我話不如去翻粉嶺中心天橋影就算喇.

紅花風鈴木開得好靚,今次唔淨止影相思,乜都影吓,平時呢啲普通嘢就唔影喇,不過有粉紅底襯吓其實都唔錯.

咁相思都要影既,今次個天比上次光啲,加咗1.4x增距都仲勉強可以.唔駛裁咁多.

更加普通既都影埋全因佢地Pose幾好,可以順便祝大家情人節快樂 :P

平山reload

好多年前上過去.當時只影咗夜景,今次試吓夾相影埋日落.

哎呀,點解多咗咁多天枰架.連獅子山都遮埋,既來之則安之,照影,由於平山好矮,太陽好快被啲樓遮住,把握最後一刻將太陽影成星形.

之後就係影埋夜景,由於獅子山影唔到.影埋就收工.用HDR夾一夾暗位能見度比起以前高得多.

帆船河

次次經過見到紅布帆船都想影吓佢,一係冇帶相機,一係啲位好遠.今次特登留意吓佢啲班次同泊岸地點.

首先係鴨靈號,最細隻但帆佔既比例較多,最靚但路線有點麻煩,水平既時候離好近吓,但一遠離就會只影到船頭或者船尾,呢個位係即將轉向,好在用135mm 都未爆框.

其實計劃已完成,行翻去尖東站準備走人,原來有呢種叫做水上的士,我估係得個名,咁多位應冇乜可能去指定地點,同一個碼頭上落叫水上巴士合理啲.

影水上的士已經換咗85mm鏡頭,估唔到遇到張保仔號,大小啱啱好,幸運地岸上有小小光照到船身.

去到最尾重見埋最大隻既大張保,正懷疑是否要轉50mm,好彩85mm都影得晒,佢主帆冇開有啲失色,而且船身冇光到,比較黑.

夜車

冇乜節目,試吓將一啲事做得極端一點,之前搖拍極限都係1/20秒,今次要增加難度,下試1/10秒.有咁既諗法係因為電車好慢,就算1/20秒效果都唔係好出.最近既地區係會展站.不過多數位都係貼住馬路,要用wide鏡影又變形又高難度,結果係一路跟住電車軌行去搵位.

終於行到跑馬地出面嗰幾隻假馬度先有適當距離可以用85mm去影,朝早有啲背光,決定食個早飯先翻來影,有燈光效果應該夢幻啲.呢個應該係最靚時刻,個天夠藍又未黑晒,但咁啱冇電車,巴士就好多.

這個地點有一個缺點,就係拍攝點前剛好是交通燈.碰正紅燈就會速度歸零再起動,唔夠一路唔停咁快,已經慢既電車就更加慢喇.

影咗大量巴士之後我就貪心啲想影吓其它車,貨車係其中一個目標,前面有架矇咗既車其實仲好,增加一點立體感.

消防車得一次機會畀我幸運地影到.1/10秒真係唔容易,可以睇到背景的光點變成光線,即係要移動咗咁多距離都保持到同步.由於係機械快門,影嗰吓會黑一黑,純靠估計節奏.

再探天恩河

上次去由於天陰,影唔到藍天有點遺憾,襯住咁啱又水退去補考.

有陽光啲紋理出好多,快門夠快,較易影得sharp,代價就係受光位會變成死白.

出奇好彩,之前見呢隻鶿鷺食完魚飛走都係好側位,只可以追尾,今次佢在較正中位置,可以影到正側之餘距離仲近咗,裁完都勉強夠像素.

跟住就係黑臉琵鷺食魚時間,上次已經影咗好多,隨便影咗啲就算,見佢地食到差唔多飽,埋岸排好隊準備走既時候就係今日主菜.影成隊黑臉琵鷺飛走配合藍天,要嗱嗱聲走去天橋嗰等佢飛來.上次係陰天個天死白,今次居然都係得小小藍.

太陽方向既關係,再過小小其實可以好藍,不過得翻兩隻又好似唔夠充實.

天恩河意外收獲

網上見到人地影鶿鷺捉魚食好有趣,朋友帶路下去咗天恩村對出河道影,原來好遠架,400mm影完出來裁,像素小到放社交媒體都唔夠.

不過有好多鴨仔,時不時仲會成群一齊飛,速度超快,試咗好多次都冇辦法影到垂直角度,始終有小小追尾.

等等吓有隻雀仔飛到好近,應該都係普通嘢,個位咁靚又唔差在影埋佢,一條條毛都睇到.

見冇乜收獲想走,好彩旁邊有人提我,陳間水漲沖啲魚入來,黑臉琵鷺會來搵食,果然真係有,一隻到咗之後就陸續有來,難得有機會影到佢飛.

之後就係開餐喇,燃燒快門時間,翻到屋企發覺實在太多相,嗰啲捉到魚但唔見水花既剷晒佢.

懶鬼灰鷺自己唔搵食,走來執死雞.

等我走埋一邊獨食先得,近到幾乎爆框,可惜角度太斜唔係咁靚.

集體舞

有幾次都冇影,因為要每隻舞交二十張相,每隻舞先得嗰幾分鐘,肯定要攬芋充數先掂,不符合我的原則,最近話不如計翻錢畀我,結果我話不如你唔好要我交二十張咁多,我唔收你錢咁就成交.

去到先知係群舞,坦白講如果唔介意幅幅差唔多既話,其實係交到廿張的.有冇意義係另一件事,條款就係咁,小朋友跳水準不能要求太高,最後砌到整整齊齊算係咁.

呢個花式合作性其實都係差唔多.

集體舞要齊先好睇,嗰啲跳到散晒既唔多想影.

呢張其實跳到散晒,得翻四個人,不過個形態又幾靚.

難得既跳起動作,最後我都交咗接近五百張相,如果跟足規定要過千.