2016年5月4日 星期三

兒童乒乓球打吡大賽

影兒童賽多數都係中招的.好多時兒童賽等於低水準,但唔駛去我最憎既伊館,又落雨,室外活動死晒,就去啦.


去到撞到個朋友做大會攝影,仲講我知邊幾個大熱要留意,可惜......兩個場中間係唔俾入的.即係只可以在場後面再隔住家長或者教練席後面影,135mm影得好細粒.所以我得翻最入面嗰兩個場影,係嗰度先可以企側邊.小朋友的水準比想像中好,起碼一定打贏我,影個標準反手先.


影埋正手.呢度冇伊館咁黑底,就算黑頭髮,着黑衫都唔會黐晒底.


仲有肉緊既表情.


一路都唔知甚麽叫做打吡大賽,終於有人話俾我聽係只可以參加一次咁解,贏咗可以代表香港打亞洲賽,輸咗想出年再來過係唔得的.唔知係咪個個都諗住實贏?好多輸咗既喊到唔停.肥仔輸咗兩局已經喊住打,睇見都陰公,不過人生係要受吓挫折先會長大既.


到準決賽階段竟然.........淨係開中間既枱.即係唔夠近影特寫.只好影吓有兩個既畫面唔駛咁空虛啦.見跟住再影都係咁上下,早啲走 :P
張貼留言