2017年6月27日 星期二

鳳園夜攝

次次去松仔園夜攝都要行嗰條長命斜.夜攝又多架生鬼咁論盡.鹿頸冇車又去唔到.燃起咗要搵個就腳地方既念頭.嵐山起咗之後,去鳳園多咗好多車,去或者翻都易好多.一於就.........


其實我咁做唔知有冇觸犯法例.因為鳳園實際上係要買票先入得去的,但買票既地方咁夜又已經休咗息,咁開放時間之外入去又理論上應該唔得.原本諗住淨係古家園一帶巡吓,但係啲狗好煩,係咁吠,侷住要行入啲.未入到裏面已經見到好多呢啲白色小東西,一時間都搞唔清邊度係頭,邊度係尾.


平時都冇留意,原來裏面好多閉路電視的,我估冇事冇幹唔會有人翻睇啲錄像呱?小心啲,盡量唔好照到自己個樣.夜晚會多咗好多飛娥類既東西飛來飛去.但形態靚既唔係咁多.多數頭細身大,又唔多合翼,除非爆頭,否則就係一個白色三角形,呢隻好細,影盡1:1先有咁大,當晚其實落完雨,從水滴上可以見到LED燈及閃燈的倒影.


物種都唔比傻仔園小喎,青蛙叫個不停,草蜢,八星虎甲蟲都有.不過位唔靚,背景好難搞.見到呢啲大嘢本該好開心,唔駛對焦對餐死.代價就係好難將佢從背景抽離.爆頭又成日俾佢對前腳遮住.


第一次見到龍眼雞就係鳳園,今日又見翻佢.影大嘢背景一定要夠遠,否則就好似剛才咁.


唔知係咪影得全身多,我發覺我手冇以前咁定.加咗1.4X之後成日唔中,之後要練習多啲先得,暫時既方法就係除走個1.4X.好耐冇試過呢種膚淺影法,重溫吓先,哎呀....陰公豬哦,原來前腳斷咗的.之前冇留意,佢眼下面有粒好似瘡咁既結構.


唔通佛祖又想玩我,影影吓竟然行雷閃電.陣間新聞紙報告有人深夜在鳳園被雷劈,就算唔死得都成世冇面見人喇.都係嗱嗱聲影埋隻肥蟲就走人.行行吓聽到好似開始有雨滴聲添,弊弊弊,呢度唔似得傻仔園咁有個亭可以避雨執嘢,陣間要開住遮執嘢都唔敢諗會衰成點,哎呀,都話咗玩我架啦,臨到出口竟然見到有隻手掌咁大既飛娥,應該係南嶺見到嗰隻品種,影唔影埋好呢?掙扎一輪都係算喇.陣間打水戰就..........
張貼留言