室內跟室外最大既分別係室內圍欄好高,用長鏡好易會被圍欄阻住.所以好多人都會走近圍欄用wide鏡影,但係咁會影到頭車後面既車好細粒,而且咁近玩Pan鏡係超高難度.我決定要就到用到85mm影,要影到後面好多車,全個場得8個位可以做得到,就係四個彎位既出彎位.我分別試咗大直路出半圓位同埋半圓位出大直路.前者係唔得的,圍欄太高,冇可能用到長鏡,除非你接受隔住玻璃影.後者都唔易,好多時都影到欄杆,實在嘥咗太多時間,我決定照影,最多事後P走啲欄杆.好在頭段係繞圈賽,有幾十次機會,點都影到啲.
跟住我又試吓135mm,太爆好難影,仲有企吓其他位,最後真係得4個位可以影到我要既畫面,都係唔好搞太耐,陣間繞圈賽玩完就弊,翻屋企睇翻啲相成功率真係頗低.因為轉彎到出彎嗰吓相機要由斜轉直,好唔慣,下次再有機會影應該會熟啲.而且我發覺有小小欄杆都唔係太差,都費事P走佢.
都話咗唔好試咁耐架啦,群揪一陣間就玩完,得翻啲小人既比賽,冇計喇,只好影吓普通既橫向Pan鏡,缺點就係好難會影到好多架車既畫面.不過成功率大增,甚至可以試更慢快門.
繼續都係小車畫面,呢個時候有人話就快完,唔係呱?個賽程表去到下午好晏個喎.睇真的,賣桔………原來後面嗰啲全部係頒獎來架.草草收工添.
沒有留言:
張貼留言