2019年2月16日 星期六

影煙…………花

早兩年話影煙花要中午就去排幾個鐘頭隊已經覺得好誇張,上年已經提早到朝早7點先有位,今年仲誇張,要早一晚排通宵.影張相啫,唔駛去到咁盡呱?我呢啲老人家真係頂唔順,雖然有朋友話幫我霸埋位,唔好意思既,下次搵你幫手排你唔去咩?好好彩有朋友話佢既ICC煙花位票有多,係啲公司禮物,唔去都係嘥,咁又冇所謂,商人知道有需求就會諗計,據聞普通人要消費滿一定金額先換到張票,海運停車場同對面海海港中心都有類似安排.


個位其實麻麻,前面有個花槽頂住,同海運差好遠,要zoom到70mm先唔會影到側邊啲物件,左下角啲草就冇計喇.襯個天仲藍影定個底先,好衰唔衰,隔離位師兄踢到我支腳架,再影已經冇咁藍.之後就係咁吹風吹個幾鐘,比起去文化中心霸位已經好好.終於等到8點.影一張睇吓設定啱唔啱先,都算唔錯.陣間高啲大朵啲既應該更好.


第二張有啲唔同色,冇第一張咁好,翻去先剷走佢.


咪住,做乜忽然間咁多煙?簡直遮晒啲煙花呀,情況越來越嚴重,跟住已經淨係得翻啲煙同埋放堙花既響聲,大家都放晒手等收工,估唔到最初嗰兩張就係唯一既兩張.我估對面海順風會好得多,我原本構圖都冇咁tight預咗影高空既煙花,依家咁空虛,只好裁一裁佢.

24 則留言:

  1. 好耐好耐以前都影過一次煙花,要等幾個鐘我就已經放棄咗。

    回覆刪除
  2. 直係唔好彩, 比人一腳踢無運行 :(
    過去睇煙花d煙多是向西走, 要企過d東面先少機會比煙摭住, 不過香港煙花出名大煙, 同自己講是看煙同火好了:P

    回覆刪除
    回覆
    1. 人多實係咁,有個家長問可唔可以俾佢個小朋友攝兩支腳架中間睇,我未出聲隔離位師兄已經即刻話唔得.咁啱風向唔啱啫,我見人地對面海影既都冇問題.

      刪除
  3. 明年會唔會試下去摩天輪影煙花^^

    回覆刪除
    回覆
    1. 摩天輪郁緊又用唔到腳架影得唔靚喎,而且唔係話上就上,又有時間限制.

      刪除
  4. 影煙花要有好位,又要有好天先可影得靚!

    回覆刪除
  5. 第二張雖不及第一張靚,但其實也不錯,無需要摌走

    ㊗️元宵快樂🏮🥳

    回覆刪除
    回覆
    1. 謝謝鼓勵,依家得兩張梗係唔剷啦,如果冇煙影到啲靚啲既就唔會留咁多喇.

      刪除
  6. 今年飛都唔去迫睇電視算
    不過 TVB D鏡頭控制水準真係時好時差
    今次大部份 wide shot zoom in 同 titl up 都少咗真係好穩陣

    回覆刪除
    回覆
    1. 初初影片既人都好鐘意zoom來zoom去,懶係有運鏡技巧咁,影得多就知好暈 :P

      刪除
  7. 我一次維港煙花都未睇過,有一年年初二專登上去香港最高嘅酒吧唸住高角度睇,點知個日霧氣彌漫...

    回覆刪除
    回覆
    1. 真可惜,現場睇其實頗震撼的,唔怕年年都有幾次機會.

      刪除
  8. 第一張好靚,今年煙花有開電視睇,但當時同親戚係屋企食飯.都沒留心睇.

    回覆刪除
  9. 不用晨早去霸位都有得影已不錯了,幸好有二張靚。如果係我無貨交添哈哈~

    回覆刪除
    回覆
    1. 好彩諗住夾相一早試啱晒位,如果開始先試位試得來都趕唔切影,實際影得20秒都唔夠,呢兩張其實係試機相 :P

      刪除