2019年2月6日 星期三

佛光普照

撞啱星期日又係初一,有人約去影大佛開燈,唔係就咁喺寶蓮寺影而係上山,雖然天氣麻麻地,都引起咗我興趣,未試過高位影大佛開燈,如果陣間好彩有埋日落或者雲海更加不得了.


現實總係同想像有出入,日出雲海都預咗冇,最壞既情況都出現埋,就係落雨,初初毛毛雨諗住夾硬擔遮影,點知越落越大,能見度仲要降到接近零,個大佛咁遠得翻個烘,勉強冇幸福,決定去寶蓮寺近距離影吓就算,近距離都好矇,就建議不如走啦,但係又有人想堅持,咁就堅持啦,雨好密,咁反而同燈光出咗啲物理變化,雨成了投影幕,形成四周金光圍繞大佛,如來神掌第一式佛光初現.


影咗幾張襯個天未黑晒去影埋正面啦,嗱嗱聲跑去起壇,掛住影相機完全冇遮冇擋就咁淋雨,都係趕唔切,天已黑齊,金光範圍擴大到成個畫面咁滯,如來神掌第六式佛光普照,外圍唔多夠藍,不過PS好易搞掂,原本可以再藍啲光啲,都係適可而止好喇,一齊去影既人睇到穿煲就唔好啦.瘦田冇人耕,原本廣場一個人都冇,我地影影吓多咗十幾二十人.好在我已經影完,啱啱夠時間趕得及搭尾班車走.

18 則留言:

  1. ㊗️ 新春愉快 身體健康 事事如意

    嗰名佛光普照襯得上嗰照片👍🏼

    回覆刪除
  2. 謝謝鼓勵,新年快樂,身體健康,心想事成.

    回覆刪除
  3. 有時候落雨都唔係壞事,"佛光普照"拍出氣氛來!

    回覆刪除
  4. 有點霧景反而覺得幾特別呢!!

    回覆刪除
  5. 好有氣氛!我幾時都係咁話:既來之則安之,既然來到了,乜都要影番啲。

    回覆刪除
  6. 就係囉,有啲霧反而好似幾特別咁 :P

    回覆刪除
  7. 或者錯有錯著,雨絲下影出佛光初現,幾好吖!

    回覆刪除
  8. 第一次見到大佛的夜景相,好特別!

    回覆刪除
  9. 既然去到、無論點環境都要影吓嘅…
    不是吖、金光燦燦好靚呀、仲好有氣氛添!

    回覆刪除