上白泥影蝶

朋友通報上白泥有美姬灰蝶出沒,我沒有影過,雖然比較隔涉,但都決定去一趟,而且仲可以順便影埋花燈街.

由於要影花燈,架小巴又取消咗一班車,去到已經係中午,大家已經連美姬交尾都影埋.唔緊要啦,單隻美姬好多,不過原來幾乎全部停在暗位,唔夠光之餘好易黑底.幾經波折,先影到一張個底比較光猛既.

之後都係差唔多,影到冇乜心機,去出面睇吓,見到佢,好似係普通嘢但都排晒隊.難得有黃花襯.

有訊號山下有美姬倒影,於是成班人湧晒落山,諗住排隊都唔得,隻蝶轉來轉去,只好圍住佢碰吓運氣,轉到啱焦平就影,我運氣比較差,到我影時形態唔係咁靚,但點都好過超暗位影.

翻上山,竟然有交尾,又排隊影餐飽,自從加入咗景深推疊既技術之後,我覺得最大作用就係影交尾.因為兩隻蝶個頭點都有小小距離,就算其中一隻點啱焦平都好,另一隻都可能會矇,單張得一個做法就係影到好細再裁大,但裁得多畫質會好爛.依家就兩隻都可以數毛,而交尾兩隻蝶係好定,可以慢慢影清楚.

差唔多要走,否則會好難搭車,見到佢飛出來,扒地影埋佢,弊,唔記得裝咗1.4X,幾乎爆框,不過影完又覺得幾合我風格.