飛機齊放冇薪假

疫情的關係,好多航班都取消,飛機被迫停晒喺停機坪,形成有趣的畫面.是攝影好題材.計距離最近係觀景山,但太矮,而且頗多遮擋,影唔成變咗影油庫日落,夜景.今次問清楚人,原來係360救援徑先啱.

行行吓我先知道原來我之前來過喇.仲有帶長鏡添,不過嗰次係影吊車,冇帶腳架,今次攞埋腳架,長鏡關係仲要係重嗰支,真係行到腳軟.經過一輪試影,我決定咗有四個構圖,首先影最近嗰排.真係黑仔,未入黑前明明有五架機的,竟然走咗一架.

跟住就係影一張最多飛機既,我揀咗光線最好既時刻影呢個構圖,我相信比較有代表性,可惜跑道比較闊,令飛機群睇起來比較疏.

之後係特寫其中一個機群,我揀咗個最水平嗰堆,睇來上下比較多空位,不過我係專登既,因為我預咗裁成16:9做個鎖機畫面,裁完啱啱好.

天色越來越暗,影埋最後一個比較差既位置,空位多之餘亦多數只影到機尾.只係撈埋啲餸汁.