大尾篤影日落

上次去影汲水門大橋只去到左手面,啲橋墩有小小黐住唔係咁靚,對面馬路又唔俾行,諗住今次搵吓右面護土牆有冇啲隠蔽位置可以偷偷地鼠過去右面影,最多唔得既話就改去花瓶頂影日落囉,臨出門口先醒起………哎呀,花瓶頂應該係影日出先見到青馬橋的.冇影唔係天氣問題,係方向唔啱.偷渡槓龜率又好大.臨急臨忙唔去得遠,就求求近近地去咗大尾篤.

太近變咗好早就來到,碼頭個景都算中規中距啦,搵唔到更好位就來呢度影,咦,有條效遊徑喎,官方時間一個鐘,分十二段,每段一個生肖,噱頭嘢,不過話唔定有觀景台,決定上去行吓,話咁快就到第一景,登登登登,船灣淡水湖………不過只係見到平時去影星既水壩.仲要鬼死咁多樹遮住,舉盡部相機先影到小小.

好快就去到觀景台,可直望八仙嶺,整個八仙嶺日落都好喎,政府啲觀景台唔知點解硬係好多樹圍住,八仙嶺要加多八棵樹先影到日落,罷了,去翻山下面等,原來燒烤區呢度都影到八仙嶺,仲冇咁多樹阻住,觀景台真垃圾.可惜呢度角度唔係咁啱影日落.

除咗燒烤仲有其他嘢玩喎,怪唔之得周圍都係人.

最後疊埋心水等日落,想搵多啲船做前景啦,搵來搵去都係得一隻,後尾仲飄走埋,好彩唔係搞HDR,否則變晒鬼船.個太陽又係好高就俾山遮住喇.今次試咗新既夾相方法,用圖層搞既話始終超黑既山同超光既天空既夾線係會有小小問題,一係天空有啲光邊,一係山有啲黑邊.推shadow冇咁易有邊(其實推得太勁都會有),不過會搞到畫面好灰,而且暗位好大noise.今次做法係先用推shadow處理最難搞既夾線位,即係用天空啱光暗既相先夾一張推shadow都幾勁既相,咁即使擦過龍都唔會點起邊,之後再覆蓋地面下去,由於邊位已搞咗,可以唔駛擦咁貼避開起邊問題.效果我覺得都幾自然.遇到啲好光暗分明既夾線好過就咁擦.

四探馬草壟

第一次去多雲遮咗太陽冇日落,得翻夜景,第二次超大煙霞,係就係冇乜大光差,直出都得,不過好似影霧景咁,第三次萬里無雲,結果係駕車既朋友遲到.去到太陽已經走咗 :(

今次都冇諗住去,只係上次去蛇嶺搵唔到路,睇完中原地圖再搵,點知條路又係俾鐡閘封咗,見仲有時間就改為行去馬草壟,原本好多雲都冇諗住有日落,好彩啲雲夠高,咸疍被遮完之後又出翻來.算是意外收獲.馬草壟光差分佈十分複雜,靠圖層夾相係搞唔掂,最後只可以靠推陰影位再配圖層盡量搞.由於太陽仲好高已經被大厦遮住,個天仲係太光.我係等太陽唔見咗,個天冇咁光再影多張,之後先夾相露個太陽出來.大厦太岩殘好難搞得好,推下陰影就算.漁塘係點等都係啲水光過草好多,又係推陰影,不過我都影咗一張係地面既夾上去.

一場來到梗係影埋夜景,我發覺上次影得太Tight,今次影多啲個天,而且上次太心急走,個天未夠暗,由於之前誤打誤撞知道料壆村有小巴走,唔駛行一個鐘出去,一於等啱光先影.最後由於深圳嗰邊燈光光過漁塘好多,要影多張夾埋,構圖亦改小小,因為我覺得下面嗰點燈光有啲趣味性.坦白講影夜景容易得多亦靚得多,不過日落係另一種風味既.　

戶外閃避球

好彩見人影過戶外所以問一問,知道係戶外我就唔帶咁多定焦鏡喇,一支70-200mm就搞掂.戶外光線充足唔駛影得咁慘呱?

 

比賽在學校的操場進行,唔知係咪知道係小學比賽,竟然冇人報名,得我一個人影.唔緊要,戶外應該唔怕冇相交呱?來個開波先啦,原來又係男外混合比賽架,冇辦法,一隊波十幾個人唔係咁易湊得夠腳.

 

攻擊一樣容易影,1/800秒快門多數都sharp.要波在半空中影多幾張都唔難撞中.

最難搞依然係影防守,上次等佢剩翻冇乜人先影嗰個方法竟然行唔通,規矩唔同咗,唔駛冇晒人先輸的,到咁上下就會點吓邊方人多就算贏.冇辦法,侷住撞下.睇咗一陣,最近波嗰個通常會係目標.所以專係捕住佢.

原來人面對一些快速迎面而來既物體時,係會不由自主咁變出古怪表情的,這個很有趣 :P

哈哈,如果佢地事後睇翻啲相會有乜感想呢? :P

 

普通夜景

買咗新腳架要實際試吓佢既穏定性,我覺得乜架生都好,最好避免重要時候係第一次用,你覺得理所當然冇問題但就出現問題既情況係經常會遇到.例如唔識用快拆板,唔識較開合模式,長鏡極限用幾高等等…….

其實測試只要喺屋企對住條街影吓夜景已經搞掂,呀…..我都會,咁出街可以試埋攜帶性嘛 :P. 一時間冇乜好地方,出開旺角,順便去就近既龍翔道觀景台,搭87B,豐力樓落,行幾分鐘就到.不過……景就好一般,前面好多樹好阻吓.只可從樹隙中間影出去,淨係影到啲樓都冇乜構圖.這情況啱晒可以用長鏡避開啲樹.感覺得負重都好盡吓,開始有啲唔係好穏,但總算影到清楚既相.

轉個角度,其實都係差唔多.用長鏡冇乜前景,欠缺立體感.

Magic hour轉眼就過,嗱嗱聲換支短鏡影張多小小景既就收工.呢度有一度好係有厠所,可以洗個面先走,如果有埋小食亭可以補給就更好.

一場來到,影埋個現場環境,三個東菇亭有頂,就算落雨,如果唔太大都可以避得吓,唔駛照淋.

減磅

一路用開既Manfrotto 190 pro鋁合金腳架都算好用,夠實淨之餘又有中軸橫置可以影低角度,雖然我都未係年紀大,機器壞咁嚴重.但攞佢其實都有啲負擔,重可以當做運動,不過最麻煩係佢好掗拃.太長上交通工具唔知塞去邊好,旅行的話拖細喼都唔掂,會突咗一段出來,除非拖大喼………

的起心肝走去買翻支旅行腳架. 做過功課鎖定Manfrotto Befree 鋁合金或者炭繊. 好就梗係炭繊好啦,但跟據綱上資料,價錢等餘兩支鋁合金!重量就只差300g.咁好似唔多值,不過捻上手…又真係有啲分別個喎,1.1Kg比起1.4kg,完全唔聚手,幾喜歡…….鋁合金都要1430,嘩,咁炭繊咪要接近3000!鬥爭一輪貴就貴啦,費事買完又唔鐘意.咦,唔知係乜特價,原來只係2030.快快樂樂買咗佢.

同老大哥比,打開後其實唔係差好遠,都可以去到好高吓.不過好意外,就算大家升埋中軸都係差唔多.不過重量就差得多啦.1.1Kg對超過2Kg.

低角度就差好遠喇,老大哥可以完全貼地咁滯.Befree由於中軸頂住....如果影貼地既昆蟲,蝴蝶或者花卉會差啲.不過,其實......影蝴蝶係唔會帶咁大枝腳架去的.影花就會.至於收合就更加冇得比,細兩個碼,可以塞入細拖喼(其實係背包),咁去旅行就真係可以成日帶住支腳架都得喇.不過都有樣嘢唔係好慣.支腳架開合有三個mode,摺合,高及低,黑暗中扭來扭去要操練一下,同埋我好驚我幾粒掣咁搞法會好快蝕.不過都唔驚得咁多喇.架生係買來用,用爛咗只好再買……所以你話有錢多好.

新田村路荷花

在網上睇到呢個荷花池夠長,花又冇咁密容易影到有水的構圖,引起了我的興趣.同埋今次我要試吓早啲去,試吓太陽斜光的效果.

一係唔早,一係早到盡.睇定港鉄同76K巴士頭班車時間,太和港鐡係5:47,而上水巴士係6:00.真係好敏,計埋車程恐怕要跑去巴士站.因為一趕唔到下一班就係6:30.終於趕到,似乎呢班車都係夾定俾頭班港鐡啲人搭的.不過……懶醒累事,一見到新田就落車.點知荷花池係另一邊路尾,行餐死.跟住原來近荷花的位置河對面,又走錯方向搵來搵去搞到七點幾先開始影第一張相.求其影張荷花綠底開吓齋先.

這邊是背光位置,淺色既荷花冇咁易爆光,而且陽光穿過草叢做成一點點光點,就利用佢來襯吓啲花同葉.為咗要晒塊葉,搞到朵花有啲矮添 :P

 

隔得開啲係好啲,可以用水做背景.之前兩張都影花蕾,今次加埋開咗既.

試吓影wide啲即刻覺得好亂,啲花其實唔疏,不過係同對岸有啲距離.

再加埋水影啲wide景,太陽已經開始高,荷葉面白晒.都係時候走喇.

過翻對面再視察吓環境,原來都仲可以影吓倒影,懶得換70-200mm,有啲爆框都算喇,我都係第一次咁影倒影,都幾新奇.

再搵啲低啲既花影多張,開始幾大風吓,等好耐都影唔到一張,而且馬路旁影成日有車經過身後,危險都唔會既,因為啲車實睇到你,但好似唔係好友善,嫌我地阻住佢咁,都係早啲走翻屋企瞓吓算喇.

蝴蝶五弄

我影蝴蝶來來去去都係大埔附近,問吓影開蝶既朋友有冇新地方,知道企嶺有白傘弄影(其實我唔知白傘係點既樣,初初仲以為係鬍鬚仔),不過冇乜所謂,只想去吓新地方,有就有,冇都冇相干.

第一隻遇到既唔係白傘弄,而係馬弄,佢好特別有紅色既眼睛,記得好耐前都遇過一次,唔知係咪習性關係,硬係喱埋晒啲暗位,上一次失敗咗,今次用到F4.5, iso 800, 1/60sec都仲好暗.我從來都未用過F4.5咁大光圈的,1/50sec試咗好多張都唔得,其實依張都有小小鬆,最後軟件推光要去到iso 2000,起晒渣,如果當時有腳架就好喇,不過大熱天時………

一路行先知原來今日目標有三弄,呢隻就係白傘弄喇.可惜佢在葉底,好暗又背光,但都好過剛才,勉強用到F5.6,都要iso 1600.雖然我有帶閃燈,但弄蝶對眼反光,一閃就會有個大光斑,所以唔用得,如果有腳架…

轉頭又有人話搵到綠弄,不過…….又係葉底,仲黑到有腳架都影唔到,一定要閃,算把喇,夾硬用閃影都係盞delete.未失望完又話又黑傘弄,今次…都係葉底呀,唔係呱?要唔要即刻翻屋企攞腳架?好彩佢個位冇咁暗,iso 1000就影到,算係唔駛食白果.

咁搞法唔係路,行出去光啲既地方睇吓有冇機.哎呀,竟然有師兄搵到露天綠弄呀,就算點唔靚位都好過黑暗葉底啦,自己唔爭氣只係影到一張暗底既夠sharp.

最後呢隻我自己搵的,我都唔知係乜弄,搵到綠弄嗰位師兄講我知係雅弄.以上就係今次影到既五弄喇,有四種我都未見過.真係大開眼界.

體驗航拍

近排多咗好多人玩航拍,咁確係幾新奇既,就算你點唔怕辛苦,上山影風景點都有取景限制,唔係話邊個位都去得到.航拍就唔同,基本上去邊都得,而且………唔駛上山呀.用成粒鐘行生行死,成身臭汗先去到既拍攝位置,航拍用一分鐘就去到.而且價錢已經回落咗好多……不過要我買我又唔係好想,屋企又要放多舊嘢,最主要係唔知攞去邊度玩,跌落來會撞死人既地方一定唔敢玩,得翻山旮旯地方可以去,仲有,部機係唔夠力載部單反或者至少無反上去,只可以有DC仔質素……咁唔買點體驗?咁我細佬買咗我可以黐來玩囉.

原來唔係一開機就可以飛的,要先連接咗電話做實時取景,又要在起飛地方搞一輪定咗位,確定識得自己回航先會有顯示允許飛行.搞好晒之後控制好直接吓,左控制桿四個方向係上昇,下降,向左,向右,右控制桿就係左轉,右轉,其餘有啲掣影相,控制鏡頭角度,拍片,回航等.但感覺幾驚吓,要飛到好遠,直情唔見咗架機先影到有啲嘢睇既畫面.

一舊電充飽只可以玩28分鐘,未影之前熱身已經玩咗一半,驚飛得太耐翻唔到來,唯有用第二舊電實拍,在空中轉一轉角度影既嘢已經完全唔同.原本想試吓飛近啲樓,一來驚失事炒埋去,二來驚俾人投訊偷怕就冇試喇.

一場飛到上去,我覺得再高啲將相會更震憾,越飛越高,我細佬開始有啲驚架機翻唔到來,為免嚇親佢,只係飛高小小就算數,按下自動回航按鈕,聽到確認OK才放下心頭大石……….這個時候,意外發生了,咪咁黑心唔係撞機,係在降落途中一隻蝴蝶被吸引了過來,結果就係一隻翼冇咗之餘仲爆埋肚,如果當時唔係蝴蝶而係雀仔應該會上演空中鐡達尼,諗起都覺得恐佈.

體育節壘球

朋友終於忍唔住買咗支150-600mm長鏡.除咗打雀外,影遠距離戶外運動都係試鏡好項目.襯住體育節未完,就帶佢去玩吓.

有影友講過,影戶外活動最正一係曬到爆,夠晒光,一係Touch wood就落狗屎,影泥漿咁話.不過………佢係講緊用定焦F2.8大炮影,150-600mm……落大雨就算唔怕濕水都肯定唔夠光影.就算有舊雲遮遮都差啲.快門變慢最好影捕手,因為在接波嗰陣,大部份時間都唔係好郁既,我試過1/200秒快門都影到.

例牌啲都影埋投手,影捕手或者擊球手都有機會估唔中,但影投手一定唔會估錯,肯定每一球都會掂波,實有相,不過sharp唔sharp就靠自己喇.

自然要影埋擊球,今日啲準繩度真係麻麻,好多全壞球,一唔係就打到唔知飛咗去邊.求其影幾張就算.

其實我最想影係剷壘,難度其一係唔會經常發生.時間充足既話真係未洗過褲咩?就咁跑過去就算啦.

就算發生,仲要估係邊個壘,第一棒唔駛估,打中實係跑二壘,不過二壘通常夠時間,唔多會剷,如果滿壘,即係個個壘都有人,用緊四,五百mm焦距要突然由擊球或者投球位置即係搵剷壘個位,由於視角窄,可能講緊要十秒,八秒時間.zoom翻wide啲搵到再zoom埋去都唔快得幾多.分分鐘已經完事.我個方法就係放棄擊球位置,會爭取到多一點時間,最好係影到個波在空中,防守球員又未接到,跑壘既剷到沙塵滾滾就為之very good喇,我真係影到架,可惜矇咗,接咗波既都算啦,揼爆心口呀.

再接再厲,嘩,剷還剷,睇人呀.要影到被剷個壘啱啱有人接波係可遇不可求的,因為是但一個壘接波都可以Kill到跑壘嗰個.所以頭先真係想死.

再來,今日擊球就真係麻麻,但係啲人又幾肯剷喎,我平時都唔多影到,今日都有幾張喎 :)

悶熱松仔園

天氣熱,即係又到蟲出沒的季節.幾辛苦都要去松仔園朝吓聖.成山都係人,旅遊車越來越多既場面已經無可避免,唯有接受.天氣熱得來好潮濕,我個眼鏡成眼都矇矇,不停要抺.

昆蟲到了發情期,大量竹節蟲在交尾,幾乎梗有對喺左近.不過……….好難影.由於佢地身體好長又多數在雜草中搞嘢,要成隻都入鏡既話畫面簡直亂到不堪,完全唔知影緊乜.開大光圈又sharp唔到兩隻,搞咗一大輪都係冇相,只可以影吓大蚊.

今晚個引閃好似神神地,時得時唔得,嘥咗我好多機會.依家諗翻可能係唔夠電,呢張影完好黑,要事後推光兩級,即實際用咗Iso 1600去影,但對焦又好準就是旦啦.

又到咗另一個爆發區,周圍都係,其實呢種蟲我已經影過,但陪朋友來好似乜都唔影咁唔係幾好,又影吓.

又見到竹節蟲,今次個角度好似好小小,離背景較遠.我決定要用盡一切努力影好佢,於是不斷試垂直角度,唔同光圈咁影咗一大堆相,燃燒閃光燈既壽命及電芯電力.最後叫做勉強可以,光圈結果都係F16.真係大啲啲都唔得.我特登唔影晒啲腳,因為蟲體會太細.搞完一輪成身濕晒.

回歸途中遇見最後一個爆發區,頭先明明經過但走灟咗眼.由於要趕時間,冇心機慢慢影,隨便影咗兩張就走,估唔到景深又剛剛好.