虎山行

連場大雨終於有一日比較好天,但又唔係好敢搏去啲辛苦路線,萬一中途落雨唔單只食白果,仲可能要冒雨落山,分分鐘有性命危險,大澳虎山雖然車程遠咗啲,不過要行既唔多,落雨最多只係白行一趟.

這裏是白海豚觀景台,不過跟過旅行團既你都應該知啦,就算有幸遇到都只會見到一個白點.山上既雕像擺位亦都好奇怪,冇辦法影到正面.仲未得日落,影吓個山景,同埋搵吓影屋仔既位喺邊度,原來都好近,唔駛日落後走來走去趕下場.

太陽好快就被雲層遮住,日落又落空,右面有一堆橙色好怪既物體,但面積又好細,換咗長鏡影只得一片橙色冇乜睇頭,諗住等多陣就去影屋仔夜景.發呆期間橙色物體突然極速擴大,變成火燒天,從來未見過,靚到不得了,手忙腳亂立即換翻wide鏡,混亂中影咗一張,點知另外一邊燒得仲勁,九秒九跑去起壇,老人家手腳慢起得來已經燒完.

好啦,走去影屋仔夜景.點知超級大風,腳架都吹跌.死火,影極都矇,而且唔知點解個天黑得勁快,想等陣間冇風都唔得,唯有開大光圈,加高小小ISO搏搏,好彩都有張sharp,星芒就冇乜喇.影風景既嘢有時好難講,諗住十拿九穏既夜景幾乎槓龜,冇期望既日落又影到火燒雲.

學界龍獅賽

原本諗住去影跆拳道黑帶賽,飛身踢頭既畫面,無奈個比賽好似唔多想俾人睇咁,觀眾席只有自己人,仲排一個選手觀眾席係遮住公眾視線.好彩仲有Plan B,變咗去影學界龍獅賽.

咁樣搞一搞,要下午要來到.其實我係比較想影舞龍多過舞獅.見到有學生拉龍出門口,唔通想喺出面練吓先?再睇睇節目表.哎呀呀.....哎呀呀,原來舞龍已經在上午完晒喇.下午得翻舞獅,通常精彩既都留翻最尾架嘛,今次.........

冇計,專心影舞獅,我哋知道有採青,原來有分好多種,好多組都係玩呢種醉青,除咗舞來舞去之外,仲會扮吓醉,左搖搖,右搖搖,好似打醉拳咁.

一隻獅子只得兩個人玩參與率太小,其他人可以去打鼓打查查.小朋友,太可愛了,打鼓會不會太粗重了?

仲有一樣好熱門既係盆青,雖然醉都淨係對住個酒樽.但都有啲飲酒,醉酒動作,對住個盆,真係好難幻想到獅子點解會咁興奮.只好影吓啲跳起動作啦.

跟住有蟹青,照計獅子好難搵得到蟹食,一個陸上,一個水裏,或者去飲水時捉來食呱?盆青有時會跳吓上個盆度,蟹青純係虐待隻蟹.整到斷手斷腳之後仲要唔食一嘢掉咗佢,夠晒衰格.

之後仲有蛇青,做乜獅子食得咁古怪?而且其實唔係食既,將條蛇Fing一輪之後又係掉咗佢,超級唔環保.仲有乜青呢?竟然係地青.聽個名都知係乜道具都冇,就咁行來行去,俾小學雞中既小學雞玩既,休息吓睇吓相算數,費事嘥電.

 

悶咗一大輪之後開始擺陣,似乎有啲睇頭,不過原來都係行來行去居多.同想像中好大出入,算了時間也不早,早點收工翻屋企食飯.

西部通道攝影

想去影呢道成個月但一路都去唔成,上網查過資料,要7點半先開燈,仲遲過青馬大橋.必定要在比較遲天黑既日子先可以影到最佳光線.天公不做美,夏至以來個個星期都落雨.日照時間一日比一日短,真令人焦急,原本星期日我多數唔會出發,因為第二朝要翻早,但難得有一日係好天,夜就夜啦.網上資料係坐入下白泥既小巴在橋底落車行上去就係.不過其實入口係三义路,方向不清既話好易會去咗垂真對橋既位置,又或者唔知去咗邊,好彩我有人帶路至冇搞錯.

山頭上面好大,但啱位影既地方其實好小,最多放到4至5支腳架.24-70mm的話會影到好多無謂嘢.幸好我有帶135mm同埋1.4x增距.最後真係要用晒先啱心水.向西原本期望有日落,多雲之餘方向都唔啱,反而係去錯垂直方向嗰邊會啱啲,時間慢慢過去,估唔到7點半個天仲幾光.大概是向西的關係吧.景得一個,相自然最後就得一張.咪諗住用幾耐來就用幾多時間走,下白泥既小巴一定上滿先出來,亦一定唔會有人中途落車,要硬食行出去流浮山,所以見到有的士的話,唔好俾佢走 :P

一年一度,舞林聚會

其實唔係太鐘意去伊館影跳舞,背景黑媽媽,遇着亞洲人又係黑頭髮會好鬼異.不過冇計,世界賽一定係呢度搞,而且一年得一次,都要將就吓.

諗住星期五平日去會冇乜人,點知都係爆晒,有成10個人影,哎呀,原來今日主打標準舞,冇所謂,影得拉丁舞多當調劑吓.來吧,齊齊起舞.除咗會黑底外,仲係超迫人,超亂的.

我會盡量留意吓有冇淨係得一對選手既畫面,影相來講可能比較單調,但係參賽者可能想要呢類,冇咁多閒雜人等既相,快步舞經常有跳起的畫面,其實影直度會易影啲,冇咁易唔見咗一忽頭,但我有我既堅持 :P

中場來個唔知幾多歲以下拉丁舞,原本拉丁舞應該好刺激,不過咁細個就.....個個停晒手睇相,我影一兩張之後就利用啲時間趙翻2個包,飲啲嘢,頭先太趕食唔切飯.啲老細係咁,專係放工時間就搵你傾公事.

咁多隻標準舞之中我最鐘意華爾滋,比較多擺post姿勢,有我最鐘意既拗腰.可以影大特寫.講開又講,一般來講開晒對焦點話就話識得搵最近既物體對焦,我之前用過咁多部機都肯定唔得,呢啲姿勢實係去咗比較易對焦既後面既男人嗰度,新機竟然好多時都真係對到較近既女人,搞到要特登揀對焦點先影到,真係有辣有唔辣.

你拗我又拗,睇吓邊個拗得多,做女人真辛苦 :P

其實就咁打開一次影晒兩個都好呀.

入到最後六強的話,可以有優待單獨表演一次,唔駛同人撞來撞去,仲會有射燈,除咗影特寫,可以特登影細啲個人而加入現場燈光效果,其實都係跳翻相同花式啦,我諗冇人咁有型留翻幾招Solo先出呱?陣間入唔到決賽就一売眼淚.

所以如果之前記得有邊吓靚既,可以準備定等佢一出就影,當然要又係對住你,又啱距離先得啦,齊齊跳起.

到咗尾聲居然有拉丁舞比賽,仲要係16歲以上青年組,一於要打爆咭,但實在係太多人喇,仲要唔知點解全部走晒去一邊場,可能嗰邊裁判多呱?結果亂過亂世佳人,真係影咗乜都唔知呀@@

打飛

這個真是超高難度,咁細隻蝴蝶又飛緊,首先冇對焦快,放大率又有翻咁上下既鏡,微距鏡對焦慢而且得180mm,唔多夠長,再加1.4x更加慢到唔用得,200-500mm係長,但500mm既解像度再裁的話會好散,影大啲又唔得,會對唔到焦.而且佢對焦其實都好慢.........

最後決定用微距鏡加1.4x,等效都有252mm,不過手動對焦.......諗起都相當大挑戰性.世事就係咁,驚住唔夠長,即刻就來一嘢超近爆晒框,早知就除定個1.4x等佢.哎......其實美鳳蝶真的不太美,黑媽媽既身體,眼睛又留有強光照射下難看既光點.

跟住就係當日主角飛天紅蝦俠,就係因為佢搞到成個嘉道理蝴蝶園爆晒人,佢飛得快,停留時間短,試過想手動對到咁上下再AF,實在係甩到飛起,最後真係全手動對焦仲有把握.努力一輪之後都有幾張算做OK,不過背景就,同埋咁裁法又用高ISO影,質素認真係麻麻.

又係飛過不停既裳鳳蝶,不過佢已經算係咁多種飛蝶中比較冇咁郁既,係不停拍翼,但會在同一地方停留比較耐,可以多啲時間準備,唔似其他目標咁都未在觀景窗搵到佢已經唔見咗.只要俾啲耐性,試多幾次,係唔難影到sharp既相的.最大問題又係走唔到太近,都係要裁.實在唔多啱我風格.

又撻過

能夠公開影柔道既機會唔係咁多,印象中除咗捷青盃同埋三叔體育節就係冇.所以每次都會盡量去影.

影柔道話易影又得,如果你滿足啲拉拉扯扯,或者瞓喺度攬埋一舊既畫面,除非火速就一本,否則要影幾多有幾多,一組比賽交15張相都冇問題,不過攝影普及之後要求高咗好多,幾乎唔係撻緊既相都被視為失敗,甚至一定要個人在半空先叫影到.咁難度就差好遠,淨係等有撻呢個動作已經頗有難度,好多時影十場都係靠鎖技分勝負.難得有一下清脆既背負投,可惜人在半空嗰張矇咗,最後只能夠係咁.

其實更多既係求其推跌對方,然後玩攬埋一舊,都可以影到在半空架,就係兩個人都就來跌落地嗰吓 :P

有時撻就係撻喇,不過塊面又向咗下,尤其係背負投,好似怪怪的.所以我每次都會帶凳仔,務求用最低角度盡量影多啲塊面.

呢個直情唔知係乜招式,有機會又係大家一齊跌低.

每次如果影到新招式都會好開心,就好似影蝴蝶+1咁,上次影到肩車,今次影到個疑似掬投既動作,點解話疑似?因為唔係進攻既一下揪起對手掟落地,而係有人失重心成就咗個招式.好好好可惜影唔到樣哦,否則可以用來收藏,呢招好小見,多數係啲大隻佬選手先會用.所以硬係冇乜真實感 :P

輕排球攝影

排球但係輕,估計都係俾小朋友玩,場細,網矮,容易玩為賣點既小學雞項目,即管又去睇吓係乜來.

個場一見到就鐘意,除咗有樓梯級觀眾席之外,另外一邊仲有啲長凳疊起咗,可以爬上去用高角度影.或者你唔知我講乜,非職業水準既排球比賽一般唔會見到跳到成半身高過晒網,居高臨下既扣球畫面.通常只係手高過網,地面影既話永遠只會影到網中人.高角度就唔同,可以避咗塊網影到冇遮擋既畫面.原來唔係小朋友玩的,仲好比較刺激.

隨手執起地下個波感受吓,原來好林架.應該兜口兜面食波餅都唔會有事,而且場真係細好多,一個室內場可以間到六個比賽場地,中間嗰兩個場得135mm唔多夠長影,但貼邊嗰兩個場想影到幾爆都得,場細細易估到邊到有人牆攔網.

樓上影扣殺同攔網就幾好,但影地面波角度會頗怪,於是又走翻落地面影,由於個場細,好容易就會影到其他隊友.反而大賽好多時會影到得一個人喺度接波,可能個波林唔驚整親手指,我見好多次啲人都係咁接波法,好處係之後比較容易控制個波既去向.

傳統接法都有既,歷史悠久我諗總有佢既好處.

最想影當然係飛身救波既畫面.不過就好似入佢中路咁.....唔係咁易既.就咁接波邊得架,成個飛過去啦.

試來試去都係影唔到,都算見識過新活動,早啲翻屋企.

鳳園夜攝

次次去松仔園夜攝都要行嗰條長命斜.夜攝又多架生鬼咁論盡.鹿頸冇車又去唔到.燃起咗要搵個就腳地方既念頭.嵐山起咗之後,去鳳園多咗好多車,去或者翻都易好多.一於就.........

其實我咁做唔知有冇觸犯法例.因為鳳園實際上係要買票先入得去的,但買票既地方咁夜又已經休咗息,咁開放時間之外入去又理論上應該唔得.原本諗住淨係古家園一帶巡吓,但係啲狗好煩,係咁吠,侷住要行入啲.未入到裏面已經見到好多呢啲白色小東西,一時間都搞唔清邊度係頭,邊度係尾.

平時都冇留意,原來裏面好多閉路電視的,我估冇事冇幹唔會有人翻睇啲錄像呱?小心啲,盡量唔好照到自己個樣.夜晚會多咗好多飛娥類既東西飛來飛去.但形態靚既唔係咁多.多數頭細身大,又唔多合翼,除非爆頭,否則就係一個白色三角形,呢隻好細,影盡1:1先有咁大,當晚其實落完雨,從水滴上可以見到LED燈及閃燈的倒影.

物種都唔比傻仔園小喎,青蛙叫個不停,草蜢,八星虎甲蟲都有.不過位唔靚,背景好難搞.見到呢啲大嘢本該好開心,唔駛對焦對餐死.代價就係好難將佢從背景抽離.爆頭又成日俾佢對前腳遮住.

第一次見到龍眼雞就係鳳園,今日又見翻佢.影大嘢背景一定要夠遠,否則就好似剛才咁.

唔知係咪影得全身多,我發覺我手冇以前咁定.加咗1.4X之後成日唔中,之後要練習多啲先得,暫時既方法就係除走個1.4X.好耐冇試過呢種膚淺影法,重溫吓先,哎呀....陰公豬哦,原來前腳斷咗的.之前冇留意,佢眼下面有粒好似瘡咁既結構.

唔通佛祖又想玩我,影影吓竟然行雷閃電.陣間新聞紙報告有人深夜在鳳園被雷劈,就算唔死得都成世冇面見人喇.都係嗱嗱聲影埋隻肥蟲就走人.行行吓聽到好似開始有雨滴聲添,弊弊弊,呢度唔似得傻仔園咁有個亭可以避雨執嘢,陣間要開住遮執嘢都唔敢諗會衰成點,哎呀,都話咗玩我架啦,臨到出口竟然見到有隻手掌咁大既飛娥,應該係南嶺見到嗰隻品種,影唔影埋好呢?掙扎一輪都係算喇.陣間打水戰就..........

中伏青山

呢排真係冇乜運仔,中伏芭蕾舞之後又再中伏.話說突然間有幾日超好天,上天文台網頁竟然見到大嶼山能見度係50公里.呢個係從來未見過既數字,原本都計劃遲啲有人陪先去青山.但咁既機會我驚一錯過咗可能會要後悔一生.

冒住34度高溫會中暑的危險帶咗1.8公升水,再仿傚駱駝,上山之前飲定大量水,從屯門站經青山寺上山,跟據資料呢邊上比良景村上近接近一個鐘.查實屯門站到青山寺嗰段路都幾遠,值得花小小錢坐的士去到寺門口慳翻啲體力.彷彿是無盡的梯級,來到山腰,其實個景都唔錯.如果怕辛苦的話喺度影也無不可,但最可惜係會影到好多電線桿既電線.能見度沒想像中高,但都算唔錯.

上山既難度評價頗兩極,網站去到四粒星,但係有行過既人又話好容易.見到呢舊嘢即係已經捱到接近攻頂.綜合一下我的感受,全段路皆為斜路及梯級,沒有浮沙碎石,沒有剷林,沒有極險要需要手足並用的路段,係易行的.最高難度係海拔583m既高度,平時三百幾米都已經頗吃力,再chur多二百米真係腳震.流汗流到全身冇一吋地方係乾既.

點解話接近攻頂呢?實際最高點係呢個發射站裏面,標高柱同拍攝點亦都喺嗰度,諗住咁辛苦既地方冇乜人會上來,實際上非常熱鬧,見到成十幾人.連遮太陽既亭都冇晒位.

唔緊要,標高柱嗰度有發射站擋住,冇太陽曬住之餘仲頗陰涼,放定腳架順便試吓構圖,天氣不如想像中高清,算可以咁啦.

仲有半個鐘先日落,唔知點解日落方向好大煙霞,否則山脈配上日落都唔錯,一於留在原地等夜景,影過啲又試吓.

忽然有啲唔對路,好大風,搞乜鬼,成個景白晒,原來有啲雲吹咗埋來,再睇吓遠處嗰舊嘢,唔係咁大整蠱呱?臨到要影嗰吓先來啲咁既衰運.

祈求啲雲陣間會吹走.可能平時都冇乜燒香,佛祖都要玩吓我,雲不散之餘反而越來越密,頭先搞亂咗既構圖都冇辦法重整,對焦都睇唔到,只好見到稍清楚就盲拍,可惜光線暗都未曝完光又已經有雲遮翻.濕氣越來越重,搞到啲架生想滴水咁,而且好涷,涷到打冷震,磨到7點半知道再磨都冇用,只好懷着極差的心情,拖住極疲累的身驅,行翻583m落山翻屋企啦 :(

中伏芭蕾舞攝影

印象中芭蕾舞應該都頗單調,淨係成日用腳尖跳舞,咁未影過都要影吓既.之前都參加過這個機構的活動,都係交30-50張相就得,而且我見佢地攝影班學生多,要求頗低,矇矇地都冇所謂.上次影中國舞走嗰陣俾張咭佢抄咗啲相就完事,不過做嘢過得人過得自己,我事後都揀過執過再交過100張我覺得OK既相.

先講好的方面,大會既攝影席真係冇得頂,會覺得好被人專重,係觀眾席前面既5至7行中間位置,同參賽者成水平,仲要係評判前面,普通中距鏡頭就影到,唔駛出大炮,其他比賽跟本冇可能,只會被安排在一二角,冇雷公咁遠既位置,你影唔影到就閣下自理.很典形的芭蕾舞架式.

今次報名後先講交相要求,要求每隻舞要交15張相,仲要跟大會場刊編既號碼每隻舞開Floder上載,這實在頗厭惡的,一睇場刊,嚇咗一跳,兩個半鐘內有60隻舞,即係要交900張相.每隻舞得兩分半鐘,即係每十秒就要影到一張交得既相,減埋出場me me mo  mo,影到背面,唔中焦,矇咗,焦距唔啱既,應該每3秒就要影到一張先掂.嘩,超人都唔得啦.唔理喇,只好一見正面就狂影,行行企企都殺.坦白講,我第一隻舞由於焦距唔啱要換鏡,已經唔夠相.

仲有更大鑊,原來唔係所有參賽者都到齊的,諗住到時只靠順序開Floder就會搞錯,即係又要每隻舞開始之前對編號,我已經好忙喎,搞到倒瀉籮蟹,原來都有男生跳芭蕾舞的,但佢啲服裝比較似跳中國舞.

開場時有啲涷,慶幸有帶風褸,不過越影越熱,大概係心情緊張的關係吧,到後期已經好想快啲完,真係好攰,呢個參賽者幾積極,動作大開大合,可以提提神.

平時呢啲斜得咁緊要既畫面我通常都唔要的,今次要充數都照殺.終於捱到完場,一共影咗二千三百幾張相.即係連拍三張要有一至兩張交得先夠數,我知道有啲人會為求夠數同慳功夫,會就咁揀啲(甚至唔揀)比較好既Jpeg就算數,我實在做唔出,之後揀相同執相過程簡直想死,平時連拍差唔多既我實唔要,今次都要keep咗先,細粒既都要裁來用,一翻努力下只得三百幾張,都係唔夠數,算喇,唔夠好過交垃圾,忙中有錯,仲搞亂咗啲Floder俾收相嗰位師兄咋形,其實要咁多垃圾做乜呢?收相嗰個都希望見到10張8張靚相多過一大堆垃圾呱?呢啲做按快門機器既活動下次唔好搞我.