景深堆疊進化版

最早用這方法係合成完之後睇吓邊部份出問題,就出翻去先整矇會產生問題的位置再合成.咁做其實邏輯上有啲問題,首先要合成咗先知邊度會出問題,嘥咗做一次既時間,另外位置要估,如果出問題的區域需要較精準既操作是不可能.....

於是我要研究一個可以順序處理既方法,就搵呢張蝴蝶交尾相試試佢,這是當時的景深情況,差不多包晒左邊隻蝶,但翼尖開始矇,第二張對焦翼尖,景深可以包埋右邊蝴蝶既肚部份,第三張對焦右邊蝴蝶既頭,最後一張就係右邊蝴蝶既翼尖.

合成出來問題都唔大,又係啲鬚出問題,今次我唔再估估吓,我在對正圖層之後每一個圖層都另存一個影像.邊部份出問題只要搵翻冇事嗰張疊上去抺一抺就正常翻,而且可以睇住來抺唔驚出界.

最後大功告成.

髻山小小收獲

見有人在髻山影到芒蛺,引起了我集郵的興趣.

一早去到已經有好多蝴蝶.........飛來飛去,得個睇字冇得影,等咗好耐終於見到有隻係人都不肖一顧既紐灰蝶,朋友話都費事影,咁冇嘢玩都影吓啦,我要挑戰100%焦平,有咁大影咁大數毛,其實係集郵之外既另一種滿足感.

諗住就係得一隻既時候,朋友話有交尾影.雖然係普通蝶,不過唔駛趕頭趕命慢慢影都好難得.其中一隻斜咗最啱要來挑戰景深堆疊,一共四張就可以影到兩隻都清晒.飲啖水,食個包之後真係見到芒蛺,仲要都肯停吓.可惜天陰陰佢唔肯合翼,影到都冇用.睇來每種蝶都有出沒時間,早來都冇用,鬼佬教朝早等蝶未瞓醒開腳架影嗰招係用唔着.

俾黑丸玩

年年都係,最早既鳳園影三弄之外,下一個品種就係烏蛟騰黑丸.烏蛟騰既小巴好疏班次,尤其走嗰吓,試過有年幾乎上唔到車,要等個半鐘,而且入到去仲要行一個鐘去上苗田,真係好難提得起勁,不過聽過今年小巴站入小小就有,唔駛點行,咁又去得過.

更好既係今日有加班車,否則可能下午都未上到車,因為超多人入去.入到去冇耐就見到一堆人起勢影,不過佢地唔鐘意排隊亦唔介意打邊爐,搞到背景變晒人底.都係避一避同朋支去大楓香樹嗰邊睇睇,見到佢,就影影.

其實有好多普通蝶都係冇好好影靚佢地的,普通既蝶唔代表一定合作,咁啱見到有隻停咗,完成咗一路都冇完成既動作.

頭先嗰班人都應該差唔多影飽,翻去睇吓,終於可以靜靜地等吓機會.隻黑丸係唔多會飛遠,但好小停,而且停極都係啲怪位.搞來搞去都冇乜收獲,終於停咗個冇咁雜既位,但冇乜光,已經用到1/80秒快門,ISO都要去到1600.仲要合翼合得一半,斜斜地,侷住又要夾,一張頭,左右翼各一張.事後發覺唔多夠景深,翼中間有啲紋冇咗,手術麻麻地.冇耐剛才班人又翻來,都係時間去食嘢跟住收工.

意外的坪洋日落

有消息坪洋再有白茅,希望夠密影翻上次個大景,天氣已經麻麻,諗住最多唔影個天,點知去到啲白茅十分稀疏,朋友話不如去後山影日落夜景.

呢個景已經影過兩次.再影只可以望個日落靚啲,但個天成個都係灰色喎,點知好似上次影港珠澳橋咁真係有一刻個太陽走咗出來,雖然冇燒天,都唔做有啦,我特登調低啲色溫等個天藍啲冇咁齋.

之後就係順便影埋個夜景啦,其實同上次影嗰張一模一樣.

靜英英松仔園

年年驚蟄過後都實係啲天陰陰,灰矇矇既天氣,唔多啱影風景,明知蟲仔應該唔多,都冇計去松仔園碰碰運氣.

一路行到上入口都係乜都冇,到落樓梯先見到呢隻平時都唔會點影既蜘蛛仔,今次我想試吓夾相增加多點景深同盡量影大啲,二話不說加埋個1.4增距,實在太震搞唔掂.齋180微距影到盡1:1其實都唔易,影咗三張就算數,事後都要裁頗多先有咁大,而景深其實只係包到啲眼同前面匹鬚.

行行吓地下有蛙,好小見佢唔係喱埋一二邊,我今次扒地影咗六數用來疊,好在支閃燈頂得順係咁閃.

竟然超好運見到有隻蜉蝣飛到葉底,但係佢所處地方係懸崖邊,我唔係好敢企咁出,姿勢唔多穏定,只係影咗兩張來夾就算數,放大睇個身中間係矇矇地的.就係得咁多喇.

行路上飛鵝山

係人都知上飛鵝山可以坐的士直達觀景台,但行山強身建體嘛,其實係唔捨得的士錢.

為咗同坐的士既景觀有啲唔同,我冇去觀景台而改去發射站,原來都要行幾遠的.途中可以望到白沙灣遊艇,遠就遠咗啲,得24-70mm要裁好多,但比去尖風山安全得多.再來的話帶支135mm就啱晒.

上到頂有個直昇機場,有班後生仔在打咭.

另一面可以望到安達臣石礦場,我下一個目標就係喺啲一級級位度影日落.

穿過發射站先望到市區景,回頭離遠小小影佢好過太近影到斜晒.

今天日落係頗悶既濁水疍.可能太差,小有地包場.

之後慣例影埋個夜景就走人喇.

影婚紗相

已經好耐冇影過Model,這原本是上年的活動,限聚令下一拖再拖咁就搞到三月中,我仲以為安排兩個人影,原來係四個,真係自己呃自己,加埋Model,化妝師,領隊點數都係七個人啦,陣間一人五千蚊就......

影Model好多時都係行行企企,求其搵塊牆又話係景,我都小影咗好多,不過呢個活動話會好似影Pre-wedding咁,有飛紗,有壓光咁又有啲興趣,一開始領隊就幫我地打反光板,效果又幾自然,最主要係方便過用閃好多.

只係一陣間,只係一個位,跟住領隊就閃咗去,求其叫Model去太大陽下就算數,結果一係黑晒面,一係成面影.

一路都係行行企企,講好咗既飛紗好似唔記得咗咁.

原來最尾都會玩一下飛紗,只限頭紗,同預想有啲落差,都好過冇啦,不過壓光就真係冇喇,都估佢咁懶冇可能托支影樓燈出來架喇 :P

小白鷺餐廳天空之鏡

早排搭火車經過見到小白鷺餐廳終於拆咗啲竹棚,決定搵日去影吓佢倒影,上天文台網頁見到微風先去.

水面果然幾靜,行過對面岸可以對正正面影,實際又只係普普通通.

影吓另一面既樹木,只係差幾棵紅葉,否則同流水響都冇乜分別.

這個景很普通是吧?請留意一下左上角的石塊,佢實際係水底下的,這其實是一個倒影反轉的相,可以看到水面有幾平.離開時見門口有一堆鬱金香,只得Wide鏡個景又好似冇乜特別,花展都影過就冇影,點知翻到屋企睇FB先知原來好多人係特登去影的.

我覺得夜晚既倒影應該幾靚,於是又來多一趟,天文台明明話係微風,點解啲水咁鄒既,而且四周是山又冇燈光,黑媽媽淨係得間餐廳都頗平淡.算啦草草影完收工.

影木棉

木棉由於有好多雀鳥會去搵食,影出來內容會豐富好多.以往都有影過,不過天橋高唔過啲木棉樹.多數只可以低抄雀仔肚....

今次搵到停車場旁邊有木棉樹,可以上到四樓,水平影角度靚得多,之前用200-500mm光圈太細,ISO用到好高,今次改用300mm F2.8再加1.4增距影.焦距雖短小小,但入光量大可以唔駛咁高ISO,畫質好啲.最難搞係相思仔,得手指尾咁大,裁好多先睇到佢.

雖說光圈大,加完1.4X得翻F4,再要收一級先sharp得翻F5.6,現場實在係暗,勉強再開大到F5.0,銳利度還可以,都要用到ISO 1000先有1/320秒快門.雀你種類好多,眼見都有接近十種.

大隻既就易影好多,容易對焦亦唔駛勁裁,我呢個快門速度其實好保守,隻雀郁小小都會矇,只好影多幾張搏有張中.

即使ISO 3200都勉強可用,但咁係基於唔裁既情況,勁裁既話其實雜訊都會放大埋.此時開除雜訊係會滑咗,但羽毛上既細節都會變到一 pet pet.雀在花中間幾得意,但就唔夠突出囉.

樹下面更暗,侷住將快門降到1/250秒.

其實今日主要目標係影松鼠,上午一共出咗來三次,都係要用1/250秒搏嗰啲位.總算叫做影到.

將軍澳誇灣大橋

經新聞講一講,近日好多人去影嗰舊預制件,我自然都去襯襯熱鬧,由於舊預制件離岸邊頗遠,最好既方法就係航拍,亦可以就啱日落方向.不過唔知乜事,一起飛已經話訊號有問題,唔理照飛,點知一飛上去部機就直去,大驚按Home,部機竟然立即降落,停咗再按,終於正常翻,都係唔好飛喇,用單反影.

死火,啲圍欄好高,腳架仔開盡都唔夠高,好彩朋友提醒我可以放圍欄上面,條橋未起好肯定唔會開燈,即係要入黑前靠外來光影到夠光.為咗要影多一個角度,冇時間影太多相夾,由得啲船矇.

所謂另一個角度就係對正條橋,天黑得好快,要兩分鐘快門先夠光,反正唔駛再轉位,我就開大光圈,加高ISO影清啲船.搞掂收工,希望條橋完成時呢個位仲有得影啦.