越野單車賽

同一日有兩個單車比賽,繞圈賽在公園舉行,肯定冇人阻我影相,但係上網睇睇地形,沿路好多樹木,而且貼在路邊拍距離太近,唔容易用搖鏡手法.越野賽在小輪車場舉行,最低限度可以喺觀眾席影,一於扮家長混入去......

果然好易就入到去,仲有洗手間,飲品售賣機同冷氣等候室,夠鐘先去觀眾席,仲有上蓋遮太陽,真係正.賽事開始.仲未試清楚設定已經走咗好多車.好彩都影到兩架車交錯既畫面.

今次唔係小輪車,即係BMX比賽,賽道唔經最精彩嗰兩個大碗形位,得翻中間波浪形跑道影,而其實好多位係阻住就好似咁,唔理咁多都照影.

觀眾席背後可以睇到越野部份.上斜部份車太慢,冇乜好影,啱啱有個向下斜位可以衝落來,係拍攝好機會.不過焦距要比較長,容易手震.

相信你都睇到現場好多膠紙做成既賽道,地面既情況就變成膠紙陣,基本上全部單車都被切開.

再加埋鐡欄同樹林,真係亂過亂世佳人.

中環街市微縮展

微縮展成日炒冷飯,好多都係展完又展,不過見廣告有啲新展品,可以專影呢幾件.

諗住平日去會冇乜人,結果係錯既,原來好多香港人係唔駛翻工架.維港全景梗係要影啦.不過長條形影晒既話會穿崩,我選擇只影一忽.係唯一一個冇玻璃擋住既景,有一點要留意,如果好似我咁諗住疊相,影前景既時候記得等屏幕冇嘢播緊,到最後一張先影有煙花既,否則會花到唔用得.

呢個景好經典,同以前攝影大師既構思差唔多,好多人去抄,模型只係貪得意,我平時應該都唔會影.

街市內部景,一唔小心影到後面個進擊的巨人添.

個戲棚其實好大好靚的,不過全部一支支竹唔識影,只好影個台啦.

輕鐵新景,又有進擊的巨人,裁無可裁,再裁架輕鐵會冇咗一忽.我其實同朋友夾咗話幫手搵件衫做背景遮遮的,不過佢話咁多人搞啲咁既嘢驚俾人炳.

爬龍舟個個都係影前面嗰隻,矇咗個背景,我都有影不過我想影埋個全景.水平角度係夾唔到的,一定會有光暈圍住啲sharp位,其實依家都有,不過比較冇咁覺眼.點解咁似用電話影既?都係由得後面班觀眾矇咗佢感覺靚仔啲.

呢個場景無論如何都想清晒表達吓係好多人.咁亂有小小光暈都唔係好覺既.

社山攝影

好難得有小小陽光,唔想搞咁夜要搵個近既地方,最近就係社山.

一路都冇來只因知道個景係麻麻,山高只有百幾米,半粒鐘左右就登頂,不過下面馬路都幾斜.拍攝的位置不多,要zoom到35mm先可以避開旁邊的雜樹.臨到日落又來低雲搞彎咗,好在都有啲紅霞,來個三分天下,天地屋各一份,等埋開燈就搞掂.

水浪窩搵蟲

印象中水浪窩有個位都有啲特別蝶.去到先發覺唔記得咗路,結果又係行咗去榕樹澳嗰頭.一路都好靜冇嘢影.直至去到海邊,我有啲印象三弄好似係呢度影.不過今日就係冇.

無聊地睇人地玩水上活動,終於見到有條毛毛蟲爬欄杆,有啲暗佢又不停咁爬,影到眼花,同佢玩咗好耐先有幾張可以.由於郁緊無奈地要一張過.

諗住走突然有嘢飛埋個水上活動中心廣告度,原來係隻蛾,藍底都幾好,雖然佢好扁平,但影得大其實都要兩張先夠景深.

虎地拗鳳眼藍

一向只在元朗出現既鳳眼藍,最近傳出上水都有,雖然影過,不過只係用航拍,又咁近我都去吓啦.網上教上水站搭小巴再行16分鐘,不過睇Google map就咁行去係23分鐘,咁就直接行啦.

終於去到,唔係日落位唔駛就時間.亦都小咗人長期用腳架卡位,例景好快就影完,仲趕得切去食晏.

坪洋白茅

聽到網友說白茅田已封非常失望,不過朋友話未去過就算冇得入都想去睇睇,最多到時冇就去睇芒草同又上小山影日落.

剛過咗牌坊不久,竟然見到好大片非常密既白茅,比上次密得多,而且居然冇封可以行入去,可惜天陰個天白晒,於是過多兩日見有太陽又來過,帶咗腳架來,但唔多夠高,一來啲草會疊埋一堆好扁平,二來前後景深差太多,啲草郁來郁去夾相恐有機會穿崩,為咗避免冒險,最後決定手持舉高部機影,另外雖然有太陽但都好大煙霞,通常影日落都會整紅啲增加氣氛.不過我想啲白茅真係夠白,個天要就一就.而現場其實都係差唔多,個天冇乜色.

鹿頸影蟲蟲

天陰陰出發去鹿頸,影蝴蝶應該好不利,唔夠光蝴蝶會小啲出來,又唔夠光,而且好多蝴蝶都唔合翼.不過人地又落雨都影到喎.

走到幾乎到海邊都冇乜收獲,終於見到隻黃色甲蟲仔.太暗好難影,結果都影唔到成個殼清晒.

走到鳳坑諗住塊大草地會有啲橙色蝴蝶,點知都係冇,再行入啲係有呀,不過啲位好暗而且地面林林地,路兩邊又岩殘,要好有運先有好位,搞咗一輪都係得個搞字,翻去大草地離遠就見到佢,點色一粒咁停喺支草度好顯眼,不過黑媽媽唔多討好.風大都好難夾相,侷住一張過.

豆釘仔都好啦,打橫既翼垂直畫面,點夾都冇用,不過我都影咗兩張令到前後兩塊翼都在景深內.

大埔碼頭日出

上次去影白鷺我已經打算來呢度影日出,因為唔駛坐車,早啲起身行過來就得,雖然都要大約45分鐘.

為咗瞓盡啲,早餐都唔食住,影日出好處係唔駛摸黑走,好彩有兩隻船構圖唔駛咁齋.冇大廈唔駛影着燈,一分鐘都唔駛就影完,行翻45分鐘翻屋企食早餐.

影螢火蟲

見到有人出相,終於的起心肝去一次,為咗避免太多人,請假平日去,四點幾去到已經有四支腳架喺度,嗰個位其實最多都係放五六支腳架,侷住越過禁止進入區域小小.越來越多人,卒之有人直情入晒禁區,有啲就影其他位.眼見都有三十幾人.

聽講上年張屋個位已經冇乜螢火蟲,變咗呢個樹頭係新拍攝點.啲人話要樹頭加星軌,但今晚成天雲,白茫茫一片.搞到個天爆晒光.我其實想退後一點,但恐怕一退後就會冇咗個位.主角影蟲就地下多啲啦.過程其實冇乜技術可言,較啱曝光就開連拍影到尾翻屋企慢慢夾.螢火蟲唔多,夾幾張就得既運氣就冇喇.整晚影咗七百幾張,大約一半係有嘢,再剷走啲太小既,最後可用係135張.一次過夾部電腦頂唔順,最後分咗三次先掂.激死,多數蟲係去咗畫面中間,底部好空虛,早知影高啲.走既時候經其他地方都一路有人影,嗰晚沙螺洞應該有超過五十人.

又去夜攝

疫情下乜鬼活動都冇晒,影吓生態都係唔多選擇既選擇.都懶得上松仔園,就近去吓鳳園就算.

諗住都係影吓蜻蜓,蜘蛛呢啲常客,點知好彩遇到螳螂,螳螂最難搞係對眼,凸出頗多,一影得大小小眼就會矇咗,正合練習用景深堆疊,影半身都係差小小,小咗中間嗰張,佢幾細隻,又有時會郁吓.細細張睇先OK.

再影全身,就比較容易.又到個身差咗小小,不過以我標準都算合格.

走前小小見到大蚊交尾,不過係垂直方式吊住,原本係好理想方便做散景,但郁來郁去實在冇可能影得到.原來係旺地,仲有另外一對,平放幾好影,不過缺點就係會有閃燈做成的陰影.

有班點紋既蟲,唔知點解要卷成咁.

都係蟲,好多毛好難搞.又係有大蚊既問題,有陰影,搞搞吓接近十點,出到去啱啱好有去大埔墟既車,但我去大埔中心方便啲,點知司機同我講尾班車走咗架喇,去大埔墟站啦.明明個站寫尾班車十一點喎,可能疫情關係提早咗.