大澳北山

天氣轉好,又係時候去行山,臨打風似有火燒天,於是揀咗個有得影日落既方向.認真冇雷公咁遠,大澳仲要行去嶼北界碑先係登山口,一路登山係暴曬,唔好以為冇草一定唔會迷路,最後一段係亂石陣,好易同真路混淆,要小心記住回頭路.

人算不如天算,雖然係日落位,但似乎日子唔啱,個太陽側到.....用大澳做地景恐怕不可能,只可搵爛鬼港珠澳大橋, 臨日落成天魚鱗雲,睇怕糊得出呱?最後都係燒唔起.

跟住就係影埋個夜景,落山後飛跑去趕車,臨開車前兩分鐘趕到,厠所都幾乎去唔切.

挑戰飛蝦

年年7月左右,嘉道理農場就會排隊上山影紅飛蝦,似乎係呢度獨有,搵咗平日去,竟然得三個人,有個人話來埋呢次唔來喇,原來入場費同車錢都加咗,佢已經係長者價都要五十幾蚊,我係八十蚊,真係有啲肉赤.

一入到去就見到目標紅飛蝦,點解對唔到焦架?原來上次影飛機較咗三米至無限遠,防震Mode 2,一時太心急冇睇設定就影,錯失良機.見到普通蝶,佢唔郁咁我就攞翻微距鏡影,始終係微距影出來細節多啲.

冇咁珍貴但好靚既透翅飛蝦出現,我未影過所以好興奮,呢個時候體驗咗新鏡既最大好處,對焦快,放大率夠,完全不需思考,對住佢瘋狂連拍就係.為咗畫質好啲,用咗1/640秒快門,對翼矇矇地,下次都係1/800秒好啲.

一係乜都冇,樓梯口堆白花竟然有三隻同時出現,影到唔影,不過呢度環境比較亂,好多時都遮咗隻蝦.

終於紅蝦又出現,影咗幾張佢就飛走咗.角度麻麻,想走近小小影大隻啲已經冇機會,而且呢隻出現比較緊張,走太埋嚇走咗有機會俾人埋怨.

桃園旅遊

公司突然送幾日假,原本咁熱係冇旅遊計劃,臨時就決定去桃園走一轉.

日日都34度,朝早都係行吓商場算數,原本諗住去大溪啲博物館睇睇再去影大溪橋夜景,點知星期一係休館,侷住等夜晚,原本好多雲,入夜居然有啲紅,這裏有個平台可以水平影,唔駛低炒,雖然近咗啲要用到最wide.

今日熱都冇計,安排咗去桃園機場戰備聯絡道近距離影飛機,全程曝曬,飛機一閃即過,又唔係班班都咁近,我都走灟咗幾次機會.好可惜成程前面一架車,一個人都冇,比對唔到飛機大細有啲可惜.

夜晚近近地去酒店附近景福宮影吓條龍噴水,有燈光變化,晏啲仲有水霧表演,不過趕住食飯唔得閒等.

去台灣行咁高既山真係第一次,不過鳶山呢度係可以的士直達的,只係走就要自己行,但全程水泥路就濕濕碎啦.幸運地有啲燒天,可惜太陽係側咗.

之後影夜景既構圖其實靚啲,可以影到個欖核似的公路,如果太陽呢邊落就好喇.

今天來到竹圍漁港,走到橋上影個例景先,如果夜晚有着燈應該都幾靚,又係冇時間留咁耐.

主菜係來呢個豬鼻子沙灘影日落,走咁遠只係為咗幾塊水泥木板.

又係時候講拜拜.可以去桃園機場二號航厦撈埋啲汁,如果日落時間來可以影到日落加起飛既飛機,可惜又係等唔到,依家大背光,只好求其影吓啲飛機.

醒獅邀請賽

炎炎夏日,都係涼吓冷氣影室內好.去到現場睇睇個賽程表,原來總共只有八場,四場地青,四場樁柱係咁多.

地青其實冇乜好影,都係影佢掟嘢,啲評判擺陣又係冇預觀眾睇,四個坐四角,成日遮住,唔記得係乜嘢青,總之係掉個橙出來.

仲有蛇青,呢個易明白啲.

四場好快就完,終於到我想影既樁柱,好極唔駛俾評判阻頭阻勢.上次企地下抵炒唔係好得,上二樓又好似太高,終於去到觀眾席頂層,高度幾唔錯,用85mm距離剛剛好.可以影到跳起又見到咁上下高樁柱,用135mm就會冇乜樁,似係從地下跳起.

端午節龍舟競渡

經過三年疫情折磨,今年端午節終於復辦龍舟競渡,原本都影到有啲厭,但可以試吓支新鏡.....

香港仔來慣來熟,第一時間就係去公厠門口既起點附近,除非實力相距非常大,否則啲龍舟應該未散,亦唔會好似起點咁仲處於未夠速度狀態,首先用1/100秒影,我認為呢個快門速度可以在人面清楚同埋水花程度攞一個平衡.變焦鏡好處係可以好易轉去400mm,唔駛換增距.

全日最多係中龍比賽,下試1/50秒,水準都幾參差,試過一起步四隻之中有兩隻突咗出來,搞到想影四隻爭持就冇喇.龍舟對焦原本唔難,所以唔係好體驗新舊鏡分別.但新鏡甚小有迷焦.

始終係大龍先有氣勢,水花多好多.但係龍頭既紅花點解跌咗落來架?

再來大龍,氣勢就是不同.

死心不息觀景山

自從夜拍失敗後,知道慢快門只可以實現在早上,於是今次用新鏡加配減光鏡再挑戰.舊鏡口徑大,加減光鏡太貴.

1/20秒失敗率太高,鎖定用1/30秒,加咗ND 8之後居然都要用F9先唔爆光,之前實在太亂來,呢種國泰機最多,幾乎七成都係佢,錯過了也不可惜,而且佢起飛的地方比較前.去到塔到已經太高.

最開心就係呢種大機,爬升慢又夠大架,去到兩個塔先剛離地,甚至去到三支煙窗嗰邊都仲勉強影到.

呢架都去得到三支煙窗,可惜又係把握唔到,1/30秒其實都唔容易.

香港航空機比較細.

又係國泰,呢種機型比較特別,有好多好靚既機種都把握唔到.磨爛蔗都冇用,下午開始背光.

首支E mount鏡

次次相機革命都梗係搞到好多舊嘢冇晒支援.自從轉咗E mount機,支老爺Tamron 200-500居然認唔到,搞到要用佢的話一係就用翻舊機,一係就要帶兩部機.仲有兩個問題,佢係副廠鏡,舊機只支援中間嗰堆對焦點,有次影龍舟就冇辦法將前面嗰隻放低啲,侷住事後裁.最後一個原因係佢對焦好慢而且放大率低,對稍為活躍既蝴蝶無能為力.

要敗家零舍多理由,蝶友其實推薦咗我好耐,依家幾乎個個用Sony無反影蝶既都實有呢支原廠100-400mm F4.5-5.6,冇乜人再用微距鏡.對焦快放大率都叫做夠用.不過真係貴到癲.支Tamron 200-500只好賤賣,事關防潮箱冇乜位.

影黃鴨仔

隔咗十年又有黃鴨仔訪港.今次仲打孖來添,原本6月10日先開始,但見人6月9日已經出相,襯未到週末去希望小啲人.

人係多但係添馬公園地方大,即使正中的觀景台都唔駛排隊,而且多數人係用電話影冇用腳架霸位,想影一張正中既冇問題,對鴨仔對我來講係擺得太埋,侷住用廣角焦距影,有啲變形,不過就啱電話射程,安排合理.

近中環嗰邊有位突咗出來,可以對正側影唔駛被欄杆阻住只可斜影,焦距就要長啲,我只帶咗85mm,開埋APS-C模式都只可以係咁.

其實我係想影到鴨仔配啲好細既人,咁先可以顯得兩隻鴨仔夠大,反而側邊既觀景台可以做到,一於晏小小開腳架影夜晚.

隨住天色變暗,快門越來越慢,由於海水會沖郁鴨仔,就算開盡F2.8光圈,ISO都要好癲先涷結到鴨仔動作,死火,冇帶50mm F1.4來,得翻85mm有大光圈,呀.....幾乎爆框都冇計,後來仲開咗燈,淨係照住一隻鴨,搞到光差大仲難影,但係啲水有光又幾好睇.

慢快門影獨木舟

影運動較進階既方法就係慢快門,現在冇交相壓力,可以搏啲,獨木舟是還沒有試過的項目,雖然年中係有好多比賽,但野外的一般距離太遠,而且好多時起點只影到背脊,城門河係一個比較好既地方.

以往都好注重要影到好多隻艇,只要靠近起點其實唔難做到,特別係太家速度差不多既時候,快既運動員其實唔係咁多,一齊慢既結果就係冇乜動感囉.

同一快門速度,有快既選手畫面氛圍即刻唔同咗,背景同水面都會更加有移動既感覺.

見到艇既方向唔同咗即係已經到下午喇,來到這個拍攝點頗消耗體能,起點不像賽艇設在近雙子橋位置,又唔近火炭路,剛剛在中間,哪一邊過河都係行餐死.我索性行翻去石門食飯後再搭車到火炭站先行.

除咗路途遙遠,這一邊起點附近是沒有遮陰的,要長時間曝曬,呢啲立划板設計係好反智,超級慢,當日風有點大,居然有運動員因為逆風闗係搞咗一大輪都去唔到起點,真正比賽都唔會有乜速度感,影到划水就算.

仲有一種雙人艇,比較小人玩,有幾場都係得兩隻艇比賽,影到三隻算好彩.

冒險影速度滾軸溜冰

難得有比賽但天文台話會有狂風暴雨.睇翻大會網頁又冇話取消喎,既然係咁都照去啦,最多唔對路就走人.

為咗更有效果,今次我增加難度挑戰1/50秒,炒相率大增,但出來效果又係比較出,一時手腳慢,搞到好似面璧咁添.

嗰日來影相人好多,個個都唔驚落雨,搞到我都坐到好邊吓,咁都好既,可以影到轉彎位,不過矇成咁其實都唔係好覺畫面有三個人.

天氣出奇地好,出埋太陽搞到要戴帽,不過差唔多到中午時成個天黑晒仲刮起大風,睇翻天文台兩量紀錄,將軍澳已經落緊雨,睇怕就快來到柴灣,大會宣佈將工作人員午膳時間縮短至15分鐘,盡快繼續比賽,原本我都想下午換一換位補啲正面起步相,都係唔博喇,好彩上咗港鐡先開始落雨,越來越大原來已經變紅雨.