2020年1月12日 星期日

京崑藝術共欣賞

上次因為美麗的誤會影咗霸王別姬,最精彩就只有將軍跳起嗰一吓.今次講明有大量動作就又影吓.如果諗住好似牛池灣文娛中心咁,可以水平對正個台影就大錯特錯.社區會堂就係普通椅水平放,擔高頭睇嗰隻. 要應對呢個情況只好後排攻擊,企起身影減低低炒既變形.我帶埋300mm,最壞情況就係企到最後唔會阻到人.原來咁諗既人唔止我一個,最後面貼牆已經冇晒位,幸好最後排座椅後面仲有企位,135mm都夠長.


點知一開波,前面坐緊嗰兩個人企起身不特止,仲企埋上張椅度,完全俾佢遮晒.我同旁邊位師兄都唯有咋咋底企上椅度影.開場冇耐就有打鬥畫面.


終於……俾人鬧,你地唔可以企上椅度喎,我冇所謂,最緊要前面都唔好企高就得喇.咁大家一齊企起身其實後面都係被阻的,我一早預咗,有絶招反mon,舉高過頭就搞掂,不過就攰啲.影咗一輪高速快門決定搏吓玩慢,影咗一大堆先影到一張,我比較奄尖,塊面矇咗既唔會要.


會堂仲有一樣比劇院差就係光線.比體育館仲要暗2/3級,我見有人用150-600mm之類細光圈長炮影,可能要全程玩晒慢快門先夠光.上次影將軍跳起,今次影埋兩個嘍囉襯佢.


原本話一共兩場,突然間又話多一場,可惜係文戲,個個停晒手,我都係隨便影幾張交差就算數,橫掂有時間,搏多張慢快門.


之後就係到萬眾期待既天女散花.超長水袖做出各種花式.個個睇到拍爛手掌,亦係燃燒快門既時候.記憶卡寫入紅燈幾乎長着.捲出四個圈真係勁.


飛身轉圈一樣掂,可能係太精彩關係,見到又有人偷雞企上椅度影,希望唔好搞到有人投訴下次冇得影啦.


最後原來會做海報轉出成個圈既動作.死火,我啱啱玩緊慢快門,有機會影矇咗,最後成個圈嗰張真係唔得,喊都無謂,事實上慢快門對絲帶既形態影響唔係咁大,唔值得咁搏,不過手既模糊就好明顯,得翻張唔圓既,都好過冇.

14 則留言:

  1. 前面座位啲人都企起身,仲企埋上張椅度添,真係好過份噃,咁人哋唔使睇架啦

    回覆刪除
    回覆
    1. 咁佢地原本係坐最後一排,即使企起身都唔會阻到觀眾既,只係阻住在座位後面既企位啫.

      刪除
  2. 個日我都聽聞有位師兄同我同行的朋友講,玩慢快門。

    回覆刪除
    回覆
    1. 個台比較暗,如果冇大光圈定焦,想快快門要超高ISO @@

      刪除
  3. 水袖花散最精彩。黑色背景,主体顏色好突出,好靚。

    回覆刪除