這個計劃了很久,要好天又要大水退,仲要係星期六或日.總係好難滿足晒所有條件,等了又等,卒之等到九星連珠,龍穴大開之時先成行.網上資料由鹿頸出發來回要五個鐘.加埋我唔識爆林,靠綑邊嗰段要多三倍時間,最後連埋開餐,用咗六個鐘先搞掂.網上話一路跟住荔枝窩方向路牌就得,去到榕樹凹村我都係咁做,越行越唔對路,但手機冇訊號,冇得靠Google map,直至去到高位先發覺去咗鎖羅盆方向,要行翻轉頭,白白浪費咗時間同體力.過程中我係直情搵唔到爆林入口,只係一直綑邊,不過.......都係要爆林,綑邊路線有啲位個地係林林地,除非諗住對鞋行完就唔要,否則都係要爆入側邊小小在樹叢中穿插,唔同既係睇住海岸線,唔會迷路.
好不容易見到架生锈剷泥車,即係冇行錯路同就快到.死火,24mm唔夠wide,唔想玩駁相,終於斜斜地搵到個高位影得晒個天池.因為網上見到既構圖都好扁,我特登帶咗支單腳諗住進一步升高部機.不過睇來唔需要,係好咗啲啲,相信平地用效果會明顯得多,但唔值得攞咁重.影完就好快啲走,要襯住水漲前離開綑邊位.
放相後有去過既人問我係咪水小咗,我估係我影得細咗,再放多張有人比對既,我估都要50人先夠圍一個圈.
你要小心啲呀！雖然照片拍得好靚，但要注意安全。
回覆刪除謝謝關心,日光日白應該冇乜危險既.
刪除張張靚相皆辛苦，謝謝你分享！
回覆刪除謝謝你的鼓勵 :)
刪除我經常都話啦，只要有靚景，閣下去的地方比我去的難度更大，真個是：
回覆刪除萬水千山不怕難
龍潭虎穴視等閒
哈哈,只係比起你容易嗰啲難小小 :P
刪除辛苦晒👍 個水氹就在灘邊，應該都唔會乾，潮漲就會自動補水。
回覆刪除綑邊實在好危險千萬要小心，人們都放眼在是否難行，但絆倒跌親風險好高，因為隨身裝備重量，識游水跌落水人會沉，撞親頭暈倒就更加不得了。
冇錯係應該會自動補水,綑邊都係行岩石頂,要萬二分小心,落水就唔會,都離海邊有啲距離,但跌親就唔講得小.
刪除