又到馬拉松

坦白講,影咗咁多年開始有啲悶.而且年紀大,上橋涷到死唔想再去.揀個最容易影位置參與下就算.灣仔運動場影吓Snap shot,合照等就最好喇,最重要係有厠所,有水飲哦.

呢度主要係影三公里輪椅賽,運動場設施最完善,有長凳可以坐低食個包先影,仲有最最最正就係夠晒光,輪椅速度又慢,肯定有貨交.

輪椅賽話咁快就影完,之後就出翻近會展位置等半馬經過,個天開始光,可以唔駛用閃燈.初初到的都係得一個人,冇乜美感,後來多人但又會好似張張都差唔多……

前年拍過會展附近,知道轉彎有條大斜路幾好影,由於斜路關係,前面跑手唔會遮晒後面,可以影到好多人既感覺.除咗輪椅組,仲有親子組都係運動場出發.不過極hea,大部份都係行多過跑,志在親子.

懶得就懶,唔直接行去維園喇,勁多人迫餐死,除咗上天橋影一兩張好多人既相外就冇乜作為,去翻會展付近影埋全馬就算數,唔明點解係要有架電單車在前幾名跑手前面.唔知會唔會係電動車呢?否則啲跑手係咁吸死氣分分鐘中毒.同埋最緊要係……阻住我 @@

例牌又影吓多人既畫面.平地始終係會遮咗後面,又冇斜路,又冇欄桿爬高小小,舉高部機影就最簡單,不過如果部機冇反mon就盞搞,實係影到歪歪斜斜.

好喇,決定影埋水站就走,個水站擺位好奇怪,應該梗係盡量等運動員攞水之後可以直衝架嘛,但係佢整到斜斜地,變咗運動員要斜出,咁既安排搞到我唔係好敢企佢地旁邊,分分鐘成杯水潑埋來之外,人撞人受傷都似.侷住走遠啲影攞完水嗰吓.乜咁大嘥,飲小小就唔要.

你都唔好得幾多,又係天一半,地一半.

正想走的時候,每年都幾乎實見到佢既鯊魚又出現,OK影埋佢就去翻灣仔坐地鐡走,溫馨提示,千萬唔好諗住銅鑼灣站出,處處封路,肯定有排都迫唔到入維園,天后會快好多.

幾乎每年都有人借呢個盛事求婚.翻到維園都俾我見到一對喎.仲因應大家要求來個Kiss擺拍.其實咁樣係咪真係會增加成功率架?如果被拒絶真係好瘀喎…………

鳳園提早開工

天氣依然很冷,我個人習慣係唔會去影蝴蝶,昆蟲等題材的.多得識了班影蝶發燒友,經常出發又貼出收獲,知道原來都有得影,又有人搞,咁就去吓.

我住得近,好早就到咗,可惜係冇乜用,硬係好似搵唔到嘢影,只係見慣見熟,已經影過好多次既品種.終於都要等到朋友到達,等佢搵到呢隻稀有品種我先開齋,而事實上我跟本唔知係稀有,俾我見到既話會以為係普通斑蝶,可能會唔影添. 想像唔到咁冷天氣竟然有十幾人來咗,結果又係成班人圍住影,角度麻麻,冇所謂啦,好過乜都冇.

蝴蝶其實係有既,出乎意料數量其實唔小,只係見慣見熟,大家冇乜意願按快門,橫掂冇嘢影我又玩下.

呢隻common弄平時真係冇人理啦,我影得幾影居然搞到幾乎排隊咁滯.

接下來就係今日主角蚜灰蝶,由於佢既波點花紋,大家都叫佢做小鳳姐,比手指尾指甲仲要細小小,而且飛起來唔容易見到啲波點,但啲人又分到架喎.真該死,停極啲位都鬼咁高,如果得我一個我就會放棄唔怕架喇,這時就明白點解人地次次有收獲,自己就成日槓龜.竟然有人諗到搬張長凳過來企高影.仲要唔夠高再企上凳背,搵人扶住影.成件事好危險但又好熱血.最後當然又係演變成排長龍.咁既姿勢實在好震,輪咗幾轉先終於有張叫做sharp.但其實咁企都仲未夠高.就唔到平行隻蝶.落住微兩又有小小風,不得不開大光圈,上半部既花紋化晒.

泥涌清水疍

影日出既交通安排真係頗麻煩,除非唔計錢吓吓打的.否則通宵車係冇乜選擇.等到正常車又趕唔到.冬天日短夜長,無聊查一查日出時間,咦,7:10其實港鐡開咗,搭頭班車的話唔係太遠都應該去到.之前見到人地在泥涌影既綠藻加日出好正.但綠藻出現日子唔清楚,只好搏一搏.5:45頭班車出大學再轉小巴.快到唔相信,6:30都未夠就到咗.

綠藻...........係冇既,影日出囉.有山遮住既關係,太陽要成7:30先肯出來,係就係好好天,一粒雲都冇,肯定唔會遮住日出食白果,不過冇雲又好單調,冇得火燒雲,友儕叫呢啲做清水疍.被視為失敗.咁都冇計啦,希望下次來有火燒雲加綠藻吧.

影多張多啲地下既,都係冇乜睇頭,如果地下係綠藻咁就差好遠.唔影日出晏小小來淨係影綠藻得唔得呢?我真係試過,由於水漲關係,會掩過晒啲綠藻,變咗綠藻糖水 XD

香港仔避風塘三合一

新年日日都落雨,太過大龍鳳要上山嗰啲唔係好敢去.最後選擇了新通車南港島線附近既香港仔避風塘.利東站行出去幾分鐘就到.

之前搵過幾個避風塘都只可以水平拍攝,船疊船真係唔多掂.呢度可以在鴨脷洲大橋上對正影真係唔錯.同去黃金海岸一樣,個諗法係要同時影到夠sharp既船,又要影到大厦夠景深同勁星芒.首先就係快門有咁快得咁快涷結咗飄飄吓既船先.最後係開盡F1.8, ISO 200先做到.

之後改翻ISO 100, F10爭取足夠景深.信不信由你,由於前面隻船都算幾遠吓.F1.8其實都已經夠景深,但保險計,陣間即使我既新諗法星芒合成失敗咗都有啲渣拿,唔駛得翻張冇星芒既相.問題來喇.頭先一秒都唔駛就影完.但用翻正常夜景拍攝手法快門幾近30秒.而原來身處既鴨脷洲橋並唔係咁隠陣,巴士,貨車等重型車經過身後係會有明顯震動.曝光過程中遇到佢地就玩完.等到冇車先影得唔得?一來30秒都幾耐.見到冇車唔代表影緊都係冇車來(出口後面俾隧道遮咗),二來其實冇得等,因為景物等得兩等會唔啱色.未必較得翻,夾相就會穿崩.等天黑既時候我已經諗定辦法.就係開B快門,有車過就用黑咭遮一遮暫時中斷曝光,等震完先攞開黑咭再曝光.一手睇手機秒錶,一手攞黑咭真係倒瀉籮蟹.

最後就係收盡光圈爭取最大星芒.咦,點解去唔到F22既?原來支鏡最盡得F16,我係第一次用到咁細光圈,唔緊要,就F16啦.之前左搞右搞,其實個天已經唔啱色喇,幸好最大既星芒黐唔到佢.更細既入光量加上超多巴士,搞來搞去最後要接近兩分鐘曝光.

到咗最後既合成步驟,船同水面跟他部份唔駛太準,唔到邊都唔覺,合成非常容易.星芒由於四周都花晒,亦完全冇問題.用唔到F22有啲可惜,不過F16都要兩分鐘,F22搞搞吓4分鐘都唔奇,到時可能要開長時間曝光除雜訊,即係8分鐘,諗起都黐線 :P　

嘉道理花季

未等到春回大地,嘉道理的花季已悄悄來到.查看農場的網頁,開花指數只係三四成,但農曆年唔開,過後又唔係幾得閒,都要夾硬去,以往經常被人垢病,上山車票給幾個人買晒既情況有改善.今年改咗只可一人買一張,要有票就唔該早啲來排隊.

雖則話得三四成開花,但來到山頂見到幾棵都開得唔錯,我估個指數係指有幾多棵數係有開花,因為有啲仲係一堆柴支咁的.今次特登帶埋200-500mm來,希望可以扯散個背景,不過…都係亂過亂世佳人. @@

又試吓影梅花,我比較喜歡梅花因佢既花比較密,但越密越衰,畫面花到不能辨認,佢有唔係開到成山都係可以用wide鏡影嗰種,最後只好搵啲大單邊既來影.

始終用翻微距影特寫先好啲,又原地踏步,唔想咁影都冇計.其實啲花真係唔錯架喇,一支樹都有咁多朵.試過去大陸影,一支樹支真係只得一朵花都會架.

梅花搞唔掂影翻山櫻,佢有多啲比較伸出來既花,較容易得出乾淨的背景.雖然都係要影特寫.

綠底影完影埋黃底,奇怪點解會有黃底,只要花冇陽光直曬,白平衡就會偏冷,較翻正之後原來綠底就會變黃.

仲有最難搞既紅底,要將附近既花變散景要搵到離得比較遠既花先得,否則就會又亂成一團.搵好耐先勉強搵到一個位.

最後影翻個最易影既藍底,基本上唔會有背景亂既問題,如果埋到去,手機都影到.又到新年,祝大家金雞報喜,龍過雞年,雞年發財,日日大銑雞,牛白腩,雞雞雞,全部都係雞 :P

小夏威夷徑

同事間開了一個行山群組,針對星期五下午有半天時間,選擇啲比較容易行既路線.網上自己加名參加,到時集合就得.首發就係小夏威夷徑,我其實對香港啲水坑般瀑布麻麻地,不過同事間咁約係首次,棒吓場.當時攞齊架生順便影吓相,點知………原來係好似八萬五咁,冇講話真係去係代表唔去架.橫掂預咗去,你地唔去我自己去囉.

真係超易行,話就話一個鐘,行快小小既話,去到瀑布其實半個鐘都夠.果然係小水坑,都影吓啦,好多人影瀑布鐘意用慢快門搞到霧氣咁,我反而喜歡快小小有點波濤洶湧的感覺.

往後走可以影到水由上而下咁流,除咗快門速度外,瀑布既水極反光,搞到側邊既景物都黑晒.點多張光啲既夾埋是常識吧.四周岩岩殘殘一啲都唔難夾.

冇乜好玩再特寫啲水.

正常來講影到呢到可以走得,但唔怕死的話可以着翻對勞工手套.沿瀑布旁邊慢慢半行半爬去頂部(有個好霸氣既名唔記得咗).失足的話唔斷骨都肯定成身濕晒,器材報廢.其實咪又係差唔多,只係大小小.悲劇發生喇,咪咁黑心,唔係我跌落水,做乜支Tamron 17-50mm個變焦突然咁緊?原來已經zoom到過咗無限遠.夾硬扭翻轉頭之後已經失去了變焦能力.年尾流流搞啲咁既嘢呀.支鏡先$2800,攞去整真係不如買過支,算啦,用Sigma 18-35加Sony 50頂住就算喇.估唔到鏡頭都可以用得爛 @@

影跳繩

之前只影過一次.穏陣起見我有好多都係sharp咗搖繩嗰個人,亦太多單人跳起,比較沉悶的畫面,今次希望盡量影跳起既人,增加一點難度希望有較好既作品.

 

今次好好運,冇單人項目,只有三個團隊,全部都係群揪,啱晒我.簡簡單單先來個多人就咁跳,對到面反而冇咁好,影得多人會好疏落,側側地用長小小焦距反而影到密的感覺.難度也不高,由於係原地跳,其實可以對咗焦先,一心撞跳到最高嗰吓就得,出奇地容易.

 

 

自己單獨跳太容易喇,兩個人Fing,一個人跳一樣冇問題.

 

 

用坐姿又跳吓,但求增加新鮮感.

 

 

手都用埋,實際上之後係仲有個人跳上佢地上面一齊跳的,可惜我影矇咗.

 

 

可能大家都意識到齋離地跳已經太悶,所以開始搞吓新花臣.呢招除咗兩個人同時跳之外,仲要玩埋繩中繩.對我來講簡直係冇可能做到.

 

 

繩中繩都玩埋仲可以點呢?就係一個人Fing,兩個人跳喇.我覺得真係好迫呀,肥小小都唔掂.

 

 

仲有一招就係同時係Fing,又同時係跳,簡直亂晒大籠,好混亂呀  @@

轉會

對影相人來講,這是個蝕大本的決定,不過今次只係手機 :P

一路用開既Note 2終於出事,無端端成日自己reboot.尤其係入Facebook,極不便.本來用開Samsung都想用翻佢,但就算唔驚爆炸,新機已經再冇得換電,我呢啲古老人唔係咁like.今時今日仲有得換電既得翻LG.V20好正,上網睇睇,原來仲有部Stylus 2竟然有我以為要放棄既觸控筆.(可以玩翻烹飪發燒友).最緊要唔係好貴.4K mon,影相影片等對我來講都係可有可無,可以慳翻啲錢.
同佢影翻張相,明明抺乾淨喎,乜影出來咁多塵,新機乜都快,但玩Game竟然有時會lag.算啦,只係偶爾,同埋影相真係.....只有全自動,除咗冇手動對焦外,仲係光暗,白平衡,甚至連解像度都冇得較既 @@

充電方面有驚喜,竟然有好耐冇見過既义電座,以前換咗電為咗要保證士啤電係100%滿電,义完又要換翻舊用過既入機,依家义完就可以放埋一便,人性化得多喇.為咗跑數,啲大廠越做越賤,冇得換電,冇得插咭,冇聽筒插,自家插頭.務求吸盡你既血,實在係.......

大欖角機場多普勒天氣雷達站

個名真係夠晒長氣,做乜要改個咁難讀既名,不去研究,由於佢外形係一個波,幾特別,而且聽講全水泥路,易行,下定決心去一轉.

確實真係全車路,好耐未試過咁輕鬆,去到上埋護土牆,有啲唔對路…….點解好似都係要低抄咁既.好彩細心搵吓原來有泥路可以再上高啲,不過就有啲後悔冇帶勞工手套.幸好唔駛行好耐.個位原來仲係日落方向,但今日啲雲…….終於又變咗等夜景.後面其實仲有好多景,但為咗避開長條形既構圖,搞到太多無無謂既天同地,我只揀咗一忽來影.雷達站光管同後方街燈形成雙色溫,就到街景雷達站變到好藍,不過都幾好睇,就由得佢.前方土地再加shadow就完成.

金色波浪

一直都打算去谷埔影蘆葦草海,但……打波先來落雨,影相先來扭親腳,拗柴搞到我唔係好行得路.幾個星期過去熱情都冷卻了,亦擔心蘆葦草已枯死,結果不了了之.早前同朋友駕車咁啱經過鹿頸,隨便走走,竟然發現有個位唔駛點行,不過當時天陰陰又冇帶偏光鏡,顏色唔係好出,有水面既畫面都死白,就決定好天再去多次.

有陽光果然唔同,蘆葦由一片死白變得金黃色.水亦由死白反光變得碧綠,就算唔用偏光鏡都綠,有就更加綠到發黑.一般諗法都係加埋藍天綠山,綠水就最豐富啦,實情係我覺得佢地既形太平版,反而好一般.

影翻tight啲,成個畫面都係草,仲唔係金色波浪.如果有啲風吹到一層層咁仲好.

行入小小有個凹位可以影到多啲水既構圖,唔駛獨孤一味蘆葦呀,蘆葦呀咁.好彩對面農場有間屋仔,否則都幾單調.所以我都唔打算大特寫,影啲淨係得蘆葦,乜都冇既畫面.

再行入啲去到農場屋仔嗰度仲可以影到背光畫面,如果唔係山比較高會遮住太陽,甚至可以影到日落.不過實際上呢度係私人地方,終於搞到有人帶住三條狗埋來.幸好佢幾有禮貌,只係話我地會阻住佢地做嘢,你地不如出翻出面影,雖然出面都係私家路,但冇咁阻佢地.咁我地都明白既,反正已經影完 :P