月出海運停車場

雖然唔係日日落雨,但係有一種天氣叫做能見度低,影遠景唔掂,只好搵近景.咁啱月出時間係日落後冇耐,可以影到藍天加月光,於是近近地去海運停車場.

一般上呢度唔係影烟花就係影幻彩詠香江,但我覺得文化中心嗰邊都幾靚.專登走遠啲用支85mm影等個月光大啲.首先月光出來嗰陣地面係未開燈的,但個天幾藍,決定以月光曝光影咗先,到後來着燈再影一張地景夾上去就兩樣都有喇.另一個問題就係會郁既渡海小輪喇,長快門會有小小矇,我開大光圈加高小小ISO影咗一張再來埋上去就搞掂.

新山頂纜車

剛剛冇耐前新山頂纜車終於重開,又係時候去紀念吓.網上攻略話紅棉道天橋可以影到橫向既纜車,有耐性的話甚至可以挑戰搖鏡,紅棉道係搵到喇,亦都上了天橋,可惜連纜車毛都見唔到.

罷了,只好就咁行纜車徑吧.之前傳聞會有幕門設計,變咗睇唔到架纜車,好在係流既,依然可以在路軌旁邊見到成架車,第一站就去到起點附近,啱啱有車駛入站,可以用新買既Minolta 200mm去影,唔駛用135mm裁,天陰陰,真係要全開光圈先掂.

轉個方向影埋啲人上車.

一路行上山頂既位置舊車時都影過,所以直奔白加道車站影今日主菜.參考上次經驗,今次要用更高ISO同更慢快門去等車廂裏面唔好咁黑.我仲準備多一支閃燈打算離機照亮車箱側面.咁黑自動對焦好易拉風箱,所以係手動對準個滑輪,見車幾乎到就狂影,但閃燈電力有限,加上要加顏色瀘紙,最多閃三次,事實上一張就夠,不過失手要等好耐先有第二班車.事後發覺側面嗰支燈幾乎冇用,反而增加咗欄杆既陰影.變咗阿茂整餅.影完原本可以等纜車落山,不過梗係經濟啲上山頂搭小巴啦.又係搞搞震冇幫襯.

大生圍影窿窿

自從有人出相,FB立即被洗版,可以想像現場有多擠擁.我又驚佢突然注水白行,過咗好多日都依然有人出相.我終於搵咗日平去搏搏.去到小巴站已經見到有幾組人等,有啲擔心會冇位.不過好處就係可以跟住人,唔驚唔識路.網上話搭到總站再跟太陽方向行,照做應該會迷路,實際係村口落再直入就係,方向差咗九十度.

嘩,超多人,好彩側邊仲有啲位,如果五點先到應該就冇晒位.千萬唔好貪近走前啲,啲泥原來好林,聽到哎呀,有個人成隻腳插咗入去,要人扶先起得翻身,不過對鞋同條褲就唔駛要喇.其實咁低角度影係唔靚啲,啲窿窿會好扁同埋遠啲既唔見咗,冇計,雖然後排有高位,但會影到前面好多人囉.有啲低雲,曝曬個幾鐘之後終於要影最後一度光,得到一張人人都有既相.啲人繼續磨爛蓆等火燒天,我就快手快腳走人喇,小巴得19個位,個小巴司機到站打翻台話仲有百幾人喺度,麻煩搵車入來救援.

補充焦距

自從支龍仔70-200mm F2.8跌爛咗之後,一路都係靠135mm影完再裁.咁樣全片幅當APS-C用始終係差咗.最近Sony出咗70-200mm F2.8二代,又輕,畫質又好,不過價錢嚇死人,要超過二萬,諗住退而求其次整支二手一代啦,都要一萬多小小,重都算數,睇測試畫質竟然係麻麻,副廠又冇出,搵支二手副廠單反鏡應該好平,但支舊鏡開晒F2.8影都係麻麻,而我又諗住係全開影室內用.室外用200-500mm就算啦.

用超過二萬蚊去補支85mm同埋135mm焦距太昂貴,於是諗到Minolta支200mm F2.8,話晒係定焦,睇測試全開畫質都好好.之前見到有二手叫價七千幾,覺得唔值.後來就冇再出現過,最近搵搵吓見到有,三千幾就接咗佢翻來.支鏡好輕,連腳架環都冇,同佢大哥300mm F2.8比細咗兩個碼,就連135mm都重過佢,帶埋佢都冇太大負擔.期待出動.

Mega Box影景

一直都有諗法去呢個便捷景點,不過好似除咗隔住商場玻璃就冇乜計.終於得知原來可以喺七樓停車場或者十樓溜冰場外面有位.咁梗係越高越好,點知十樓露台封咗,侷住去七樓.

商場的好處係可以涼住冷氣等夠鐘先上去影,呢個冷門位冇乜人爭唔駛咁早霸位,影完仲可以即刻去商場食飯.景就麻麻啦,要舒服唔要求得咁多.由於圍牆頗高及厚,除非你支腳架可以開到超高,否則細腳架直接放在圍牆上仲冇咁阻.

順便影埋個夜景.

撈埋汁影另一個方向就收工.

利安後山

之前自己去搵,山就搵唔到,只係在長命樓梯附近同埋遠啲既公園度影吓,直至上次企嶺下碰到有人話下午去跟住佢地去先搵到.其實我之前都見到有條山路,不過行行吓唔對路行翻轉頭.雖然上山入口唔係我搵到嗰條路,但都係會行行吓覺得唔對路嗰種.

終於來到山頂,原來好細地方吓,人多啲都冇位企.陰暗地方有幾隻小豹律津蝶,呢種蝶頗大隻同成日見但係好難影,專喱埋暗位仲要係開翼,吓吓要高角度接近真唔容易,不斷追逐下終於等到佢高位合翼,雖然背光都叫做影到.唔攞閃燈喇.陣間錯過咗就冇喇.

目標蝶要下午先會出現,等待期間只好見乜影乜,呢隻弄蝶連交尾都影過,單隻就盡量影大隻啲,欣賞吓佢啲毛.

又有隻唔知乜蝶,睇真啲我好似其實未影過.

目標蝶卒之下午二時半出咗來,聽講係早咗,之前係三點,可惜我都未見到佢已經走咗,之後一直都冇出過來.好彩都有隻綠灰出現,可惜背景比較花,影咗先陣間睇吓會唔會有第二個位靚啲,為咗要影到佢腹部嗰執毛,唔顧得焦平要斜小小,幸好最後夾三張都夠景深.之後就冇之後喇,飛走咗.

再挑戰婆髻山

多年前去過婆髻山都已經好艱辛,可惜嗰次大霧,乜都影唔到就走咗,今年鼓起幹勁再挑戰過.

事實上上次係未去到山頂,因為再上都冇意思,今次能見度幾好,雖然都可以在上次的位置影(都行到好甘),一場來到冇理由唔攻頂,為咗避免行行吓行咗去西天,我放到好慢腳步,出門前飲大量水,上山過程都密密飲水.幾乎虛脫先到頂,火燒天就冇喇,清水疍我都接受既.

呢度個景比較扁,上下好多空位,比較適合裁成16:9做電腦Wall Paper.撈埋個夜景之後就要落山,睇見條路都覺得辛苦,尤其體力已經用到七七八八.好不容易捱到上巴士,之後幾日都唔想再行路.

芝加哥大學

聽個名仲以為係外個地方.其實佢係同香港大學有關係,網上睇到有個位可以影日落,校園裏面都好似幾靚,近日天氣時晴時雨,上山有風險,留在地上安全啲.

一入門口其實就已經係影日落個位,時間仲早,去行吓其他地方先,不過.......度度都欄晒鐵鏈,學院範圍,不得內進.侷住齋等,悶得滯,竟然灟波,個太陽俾啲雲遮住咗,冇計啦,只好就咁影吓.

企嶺下老圍影蝶

次次去企嶺下老圍都係水浪窩落車行過去,中間嗰段路其實冇乜嘢影,今次直接就喺企嶺下老圍落車.原來在村屋旁邊有條路可以直去到公厠位置,以往唔知道要行翻轉頭走.

再次去到上次影飛蛾同毛蟲嗰個位,終於搵到有蝴蝶,仲係未見過,不過個樣灰頭灰腦,冇乜貴氣,應該都係普通嘢,咁我未影過佢又唔點郁,就慢慢影好佢.

行行吓無意中在路邊見到青斑交尾,雖然係Cheap嘢,但交尾都未影過,未準備好佢地居然飛走,仲入埋樹林,好彩我夠眼睇到佢停低位置.唔理咁多放低背包在路邊,爬上樹林斜坡影佢地,非常暗,搞咗好耐,盤算一下應該都影到先離開.點知冇耐喺淺灘又見到佢地,好極,呢度光好多,剛擺好架式,側邊竟然又有幻紫班交尾,位置仲易影,不如影佢先,三心兩意之際,飛走咗去樹頂,都係唔好咁多心,影靚青斑先.

行翻出石屎路,點知又有一對青斑交尾.仲有更神奇既事,又見到一對幻紫斑交尾.我估應該唔係剛才嗰對,以為我眼利,原來係交尾大爆發.

城門河賽艇

賽艇其實幾悶吓,同龍舟差唔多,都係影多船畫面同場比拚.可惜賽艇設計太好,唔駛好似龍舟咁爬到面容扭曲,影出來唔夠刺激,不過今次我想練習慢快門.

由於200-500只可用在舊機,用唔到畫面邊緣既對焦點,侷住重啲都要帶300mm再加1.4x增距.賽事分2000m及1000m,起點係唔同的.冇錯在1000m起點係可以影埋2000m賽事經過既艇,不過要同時影到好多船都係唔好離起點太遠,好易散晒.所以2000m比賽時我就去2000m起點影,終於等到最多人既八人組.

中間有幾場1000m比賽,唔影好似好嘥,於是就行1000m去起點,每場起步間隔10分鐘,真係趕到滿頭大汗,哎呀,竟然係最悶既單人賽.

都係放棄最尾嗰場1000m去翻2000m起點.否則真係會虛脫.由於用到420mm焦距,慢快門係好高失敗率,我只帶咗單腳架,可能三腳架會好啲.雖然慢到1/80秒,都係冇乜搖鏡效果.因為艇既移動實在係太慢,唯一係可以表現到槳既動態.

下午要遷就光線方向要過橋對面,冇咗有頂既座位,曬到變人乾,唯有每場一影完即行100m去翻樹陰.仲有個問題係大會用咗近岸呢邊做下一場等候位,賽事主要用遠處幾條線,焦距都唔係好夠長.如果唔多過三隊的話可直接放棄,慢快門仲可以做出大水花效果.

藍衫呢隊明顯比其他隊伍快,可以做到有小小搖鏡既感覺,水花也較大.

好多人話背光先有藝術效果,但係我好憎啲水爆晒變晒白色.超好彩,決賽幾乎係滿座,用到最近第二條線,影到個人夠晒大.