端午節龍舟競渡

經過三年疫情折磨,今年端午節終於復辦龍舟競渡,原本都影到有啲厭,但可以試吓支新鏡.....

香港仔來慣來熟,第一時間就係去公厠門口既起點附近,除非實力相距非常大,否則啲龍舟應該未散,亦唔會好似起點咁仲處於未夠速度狀態,首先用1/100秒影,我認為呢個快門速度可以在人面清楚同埋水花程度攞一個平衡.變焦鏡好處係可以好易轉去400mm,唔駛換增距.

全日最多係中龍比賽,下試1/50秒,水準都幾參差,試過一起步四隻之中有兩隻突咗出來,搞到想影四隻爭持就冇喇.龍舟對焦原本唔難,所以唔係好體驗新舊鏡分別.但新鏡甚小有迷焦.

始終係大龍先有氣勢,水花多好多.但係龍頭既紅花點解跌咗落來架?

再來大龍,氣勢就是不同.

死心不息觀景山

自從夜拍失敗後,知道慢快門只可以實現在早上,於是今次用新鏡加配減光鏡再挑戰.舊鏡口徑大,加減光鏡太貴.

1/20秒失敗率太高,鎖定用1/30秒,加咗ND 8之後居然都要用F9先唔爆光,之前實在太亂來,呢種國泰機最多,幾乎七成都係佢,錯過了也不可惜,而且佢起飛的地方比較前.去到塔到已經太高.

最開心就係呢種大機,爬升慢又夠大架,去到兩個塔先剛離地,甚至去到三支煙窗嗰邊都仲勉強影到.

呢架都去得到三支煙窗,可惜又係把握唔到,1/30秒其實都唔容易.

香港航空機比較細.

又係國泰,呢種機型比較特別,有好多好靚既機種都把握唔到.磨爛蔗都冇用,下午開始背光.

首支E mount鏡

次次相機革命都梗係搞到好多舊嘢冇晒支援.自從轉咗E mount機,支老爺Tamron 200-500居然認唔到,搞到要用佢的話一係就用翻舊機,一係就要帶兩部機.仲有兩個問題,佢係副廠鏡,舊機只支援中間嗰堆對焦點,有次影龍舟就冇辦法將前面嗰隻放低啲,侷住事後裁.最後一個原因係佢對焦好慢而且放大率低,對稍為活躍既蝴蝶無能為力.

要敗家零舍多理由,蝶友其實推薦咗我好耐,依家幾乎個個用Sony無反影蝶既都實有呢支原廠100-400mm F4.5-5.6,冇乜人再用微距鏡.對焦快放大率都叫做夠用.不過真係貴到癲.支Tamron 200-500只好賤賣,事關防潮箱冇乜位.

影黃鴨仔

隔咗十年又有黃鴨仔訪港.今次仲打孖來添,原本6月10日先開始,但見人6月9日已經出相,襯未到週末去希望小啲人.

人係多但係添馬公園地方大,即使正中的觀景台都唔駛排隊,而且多數人係用電話影冇用腳架霸位,想影一張正中既冇問題,對鴨仔對我來講係擺得太埋,侷住用廣角焦距影,有啲變形,不過就啱電話射程,安排合理.

近中環嗰邊有位突咗出來,可以對正側影唔駛被欄杆阻住只可斜影,焦距就要長啲,我只帶咗85mm,開埋APS-C模式都只可以係咁.

其實我係想影到鴨仔配啲好細既人,咁先可以顯得兩隻鴨仔夠大,反而側邊既觀景台可以做到,一於晏小小開腳架影夜晚.

隨住天色變暗,快門越來越慢,由於海水會沖郁鴨仔,就算開盡F2.8光圈,ISO都要好癲先涷結到鴨仔動作,死火,冇帶50mm F1.4來,得翻85mm有大光圈,呀.....幾乎爆框都冇計,後來仲開咗燈,淨係照住一隻鴨,搞到光差大仲難影,但係啲水有光又幾好睇.

慢快門影獨木舟

影運動較進階既方法就係慢快門,現在冇交相壓力,可以搏啲,獨木舟是還沒有試過的項目,雖然年中係有好多比賽,但野外的一般距離太遠,而且好多時起點只影到背脊,城門河係一個比較好既地方.

以往都好注重要影到好多隻艇,只要靠近起點其實唔難做到,特別係太家速度差不多既時候,快既運動員其實唔係咁多,一齊慢既結果就係冇乜動感囉.

同一快門速度,有快既選手畫面氛圍即刻唔同咗,背景同水面都會更加有移動既感覺.

見到艇既方向唔同咗即係已經到下午喇,來到這個拍攝點頗消耗體能,起點不像賽艇設在近雙子橋位置,又唔近火炭路,剛剛在中間,哪一邊過河都係行餐死.我索性行翻去石門食飯後再搭車到火炭站先行.

除咗路途遙遠,這一邊起點附近是沒有遮陰的,要長時間曝曬,呢啲立划板設計係好反智,超級慢,當日風有點大,居然有運動員因為逆風闗係搞咗一大輪都去唔到起點,真正比賽都唔會有乜速度感,影到划水就算.

仲有一種雙人艇,比較小人玩,有幾場都係得兩隻艇比賽,影到三隻算好彩.

冒險影速度滾軸溜冰

難得有比賽但天文台話會有狂風暴雨.睇翻大會網頁又冇話取消喎,既然係咁都照去啦,最多唔對路就走人.

為咗更有效果,今次我增加難度挑戰1/50秒,炒相率大增,但出來效果又係比較出,一時手腳慢,搞到好似面璧咁添.

嗰日來影相人好多,個個都唔驚落雨,搞到我都坐到好邊吓,咁都好既,可以影到轉彎位,不過矇成咁其實都唔係好覺畫面有三個人.

天氣出奇地好,出埋太陽搞到要戴帽,不過差唔多到中午時成個天黑晒仲刮起大風,睇翻天文台兩量紀錄,將軍澳已經落緊雨,睇怕就快來到柴灣,大會宣佈將工作人員午膳時間縮短至15分鐘,盡快繼續比賽,原本我都想下午換一換位補啲正面起步相,都係唔博喇,好彩上咗港鐡先開始落雨,越來越大原來已經變紅雨.

鹿頸影蟲

得半天時間,天氣又好似唔多穏定,不宜上山,去鹿頸睇吓有冇蝴蝶.

係冇既,去到鳳坑乜都冇,只好翻轉頭,記得來嗰陣啲欄杆有好多毛蟲爬來爬去,不過一心諗住影蝴蝶睇唔起,依家粗粗地都食餐啦.難得有一條曲起咗,不過暗地方唔夠光之餘啲蚊係好癲,用蚊怕水直噴佢都唔驚,搞到我唔敢逗留太耐影靚佢,怱怱影完就走人.

走到海邊,見到蟲蟲二號,佢都幾合作,我剪走阻住視線既草都冇嚇走佢.咁啱出翻小小陽光,如果唔係都幾難影.

再影棍網球

復常後多咗體育比賽,而且最重要係唔駛戴住口罩,可以影到個樣.

今次只帶咗300mm, 場唔係好大,裁到對面龍門解像度都仲可以,唔駛特登去邊線影.

棍網球可以網住個波就咁走,靠空中交波比較小,好多時都係影啲人走動,啱啱影到跳起,有點後悔冇帶凳仔來,低角度影會比較覺得個人在空中.

又試吓慢快門,其實同影跑步差不多.

開波都係慢快門好時機,兩個人會係搵支棍隊來隊去.唔知點解男子組要用白色波,成日同啲鞋呀,棍塊網呀,衫呀等黐晒底.

女子組用黃波冇咁黐底,終於影到攻門畫面,運動畫面由於太快,好多時用全畫面對焦費事咁費神要成日轉對焦點,唔知係咪舊鏡關係,好多時成個畫面得一個人都要好耐先搵到仲成日會追甩,我今次針對攻門畫面一早揀定一個細對焦區,結果係快好多.

呢張啱晒大會用呱?影埋個Banner同球證.

慢快門影冰球

冰球的運動軌跡不規則,不似單車,龍舟,溜冰等會長時間保持直線運動,有大量機會讓你嘗試,不過今次比賽由朝到晚,又唔駛交相,就算全炒都當攞個經驗啦,唔踏出第一步只會原地踏步.

穏陣啲先試1/100秒,原來專心影搖鏡機會都唔係太小,可能少年組爭奪不太激烈,較多空間滑行,成功是成功,效果卻不甚強烈.但佢地啲衫好鮮色.

好的,再下試1/60秒,竟然還有些成功的,成功率低得多但效果明顯,飛出去的波都變作一團.

之後到年齡稍大組別,動作比較快,我又上調至1/80秒,雖然未必影到移動瞬間,但啲棍模糊咗都唔錯.

之後再到高級組別,動作非常快,影咗一陣快速快門睇吓有冇個波在半空畫面,定格畫面已經冇乜價值,堅持翻1/80秒才像樣.

又到小朋友組了,改翻1/60秒先.

夜攝新嘗試

其實又唔算係新嘗試,只係一路都未成功過,因為必需要有一個好合作既目標....

呢隻蟲我之前都見過,不過擺閃燈時唔小心整跌咗佢唔見咗變到冇得影,今次佢都唔係好合作,雖然唔係好快,但成日郁來郁去,影極都唔靚,呢張已經係最好,隻眼都係小小遮.

成身都好痕,我知道明天肯定又係滿身紅點,見到兇手喇,佢企個位都唔錯,影到盡1:1,不過佢唔係好穏定,啲腳郁來郁去,睇怕一搞就會飛走,影咗就算.

終於見到目標喇,之前幾次都發現經常會見到菜粉蝶夜晚會就咁露天瞓覺,好合作,點影都得,講咗咁耐其實我係要影有水珠的大特寫.以往試過噴蜘蛛網,已經唔敢直噴,只係向上噴等水霧向下模彷微微雨,隻蜘蛛都係即走,有次仲整爛咗個網,今次菜粉蝶終於成功.跟住就係影,加埋1.4x影到最大夾咗兩張,一張眼頂,一張眼底,2x就真係搞唔掂.