南瓜星人闖科園

聽個名都知道係萬聖節嘢,諗住應吓節但又唔想去蘭桂坊迫就近近地去影吓裝飾就算.

海報話5米高外星人都估到實係吹氣啦,實物咁大舊好貴的,特登加入齒輪,螺絲釘鬼怪不足,反顯得趣怪.

樓梯有一個都好大既,又係吹氣公仔.

仲有蜘蛛啦,啲蜘蛛網真係太求其.

最後梗係唔小得南瓜頭啦,自從有咗淘寶之後,到處都係差唔多既南瓜,我屋企樓下嗰啲竟然同公司樓下既係一模一樣.

雜錦一碟

最近影蝶不利,次次出動都係得一兩張,可能已經係天涼關係,一於炒埋一碟.

松仔園傳出有枯葉蛺蝶,令到呢個已經幾近被人遺忘的地方一早聚集咗十幾人,無奈大家要失望而回,蝶毛都冇隻,最後影得一個空心殼.

好耐冇去過獅子會自然教育中心,記憶中都係冇乜嘢影,但有車直達唔駛點行,果然,成日就係見到一隻裴豹,咁蝴蝶園果邊係有好多青班既.

兩次失敗之後決定去遠啲既大澳,超級多人,可惜蝶就............搞咗成日得一隻珐灰,交尾都影過變得冇乜價值.

去五指耙公園打疍帶咗長鏡,未到時間居然見到蝴蝶交尾,普通係普通啲,好過冇.

花叢好多細蝴蝶,上花又影多張.

五指耙公園打疍

朋友問我話有人帶路去光明區影景,事實上我上個星期先去完,會唔會又係去嗰度架?是關水路都好遠,重覆就唔好啦.後來知道唔係咁就去啦.

原來今日既目標係打疍,即係影咸疍黃太陽,打疍我其實興趣不大,因為前景會變咗剪影黑媽媽,純粹為見吓好耐冇見既朋友.既然一場來到就諗吓點影靚佢.帶埋腳架來做HDR,以前HDR做出來好卡通,現今Light room做出來已經頗自然,原本太陽會移動係會有鬼影.我用咗包圍曝光同電子快門,一來用到400mm焦距會好震,機械快門連拍真係會矇的,二來相機自動加曝光可以確保1/10秒就影第二張,盡量減小太陽移動幅度.朋友的目標係要影到個太陽正正在兩個塔中間,位就得一個,可以影既時間亦非常短,我就側小小都冇所謂啦.

冇口罩冰壼盃

首次影冰壼盃係疫情期間,雖然影咗但戴住口罩實在樣衰,所以要影多次.

今次多咗隊伍同時比賽,有時會遮咗其他隊伍,洗地唔係組組都影到,有啲成日望地下影唔到面,成日就得呢隊最好影.

之後就剩推冰壼出嗰吓.全場幾乎得一個位影,餐廳嗰邊個位太後,除非坐入裏面,對面其實都好敏,已經係界限線後面,遇着去到盡先出手既就影唔到.

本來就冇喇,只係得兩種畫面值得影,不過見呢個參賽者壓得好低都幾得意,影埋佢.

家國情微型藝術展

好多微縮展展品都係用完又用,今次聽講有新展品.原來展覽有兩層,樓下幾乎全部係舊嘢,睇過晒唔花時間,如果你未睇過其實都好精彩,特別係舞火龍,搶包山同賽龍舟係好精美.

新展品大三巴,其實係有埋前面條樓梯的,不過影埋既話會太多反光,最後決定只影個排坊

港珠澳大橋,個設計好有問題,原本日夜變色係好想法,但有乜理由條水平線唔係喺底架,變咗兩條水平線.

今日主菜就係火箭發射,明明寫住搭正同30分表演,竟然早咗5分鐘,失落咗一次,跟住我早10分鐘已經企定好位,燈光加煙霧都有啲像真度.

呢個肯定係新做的慶祝熊貓BB.

小蠻腰一啲都唔小,成個人咁高,結果影出來一睇就知係模型,我比較喜歡做細啲,配合廣州市全景.

華潤大厦都一樣,唔夠特式.

嗇色園非遺匯演

知道冇門票可以企外面睇我又去襯吓熱鬧.其實我唔想入去坐要低炒,企出面第一排無論距離同角度都剛剛好.

第一場係魚燈舞,估都估到係模擬啲魚在游泳,唔知點解背景個月光係扁的.而且偏排比較求其,應該舞蹈員要唔好遮到條魚先似嘛.不過最開心係佢地會巡勻晒成間黃大仙廟,與眾同樂,畀大家打卡打個夠.

表演大約半個鐘一場,之後就到武當武術,比起九龍公園既武術比賽,精彩度差頗遠.

最後睇埋呢個長興百葉龍,其實都係舞龍,不過龍身係荷花,同平時啲龍唔同,最失敗係竟然用咗白色背景太失色.

傘樹相思

朋友通知私人地方既傘樹又有相思出沒,之前用200-500影又唔好天,相片質素麻麻,今次襯好天攞支300mm F2.8去影.

500都唔夠長,300更細粒,不過好天夠光可以加2x增距.更加好係今次多咗兩棵好近既樹開花,有隻憤怒相思,加咗增距始終係差啲既,已經收到F8光圈,啲花仲係出晒紫邊.幸好銳利度還算不錯.

上次就係影這個比較遠的位置,相思的話就算600mm都係太細,影呢啲大隻既就可以.

相思都唔小,一個好大問題係背景都好雜亂,好不容易先有幾張唔會亂到隻唔知去咗邊.

維園綵燈會

維園交通方便,去影花燈應吓節.

樓下影好似太大路,學翻上次影年宵市場咁去天后停車場影成個景.花燈好光,要影到佢唔爆背景會好黑,只好HDR.現今HDR自然咗好多,以前只可以用佢處理邊位.

之後就係影近啲淨係要花燈.冇乜特別,不過呢度最大好處係行一陣就可以過馬路大家樂食晚餐.

年末場地單車賽

朋友通知單車館比賽埋今次就會大修,出年先重開,雖然都影過頗多次都影多次吧.

在我認知中,只有兩種畫面係值得影,最標準既就係呢個車龍出彎,實際操作其實唔係好難,由於頭車同較後既車方向唔同,好易有效果,而頭車亦未到直線運動,冇咁易失手,通常影幾轉就有收獲.難度在於要多人比賽先有咁長車龍,另外要唔好有wide鏡黨啱啱企正你面前貼住跑道影先得.我試過為咗避佢地跑半個場過對面影.

另一種係用長鏡影對面,最大好處係唔會有人遮住我,但內檔既車會被欄杆上下切開,而且由於是比賽中段,車排得比較開,呢一張機會好難得,因為係淘汰賽,有一個衝線加分位,小有的一大堆車.好可惜呢張影得唔太清.

最後呢個係朋友介紹我的衝線位,如果角度低啲就好,依家咁好似冇乜衝擊力,當然仲可以影中間水平位,不過一架架車影就唔駛來單車館啦.

側光夜攝

自從去過鳳園夜攝,我都冇再去松仔園,可以早啲翻屋企唔駛搞到咁夜.

一來到就見到迎客蜥,我記得只在鳳園先會咁完全外露任影,松仔園嗰種係好怕光,一照就走人,上次條尾矇咗,今次用好多時間就到正焦平影.幾乎唔駛裁所以散景好散.

之後靜英英,試吓行去好多蜘蛛既分枝路,見到呢對情侶做緊恩愛既事自然要紀錄一下,呢種情況最難搞係啲陰影,我盡量將支機頂燈擰側再加柔光版,但咁樣會令兩隻蟲一光一暗,我既解決辦法係將支背景燈擰側小小,等有小小側光補一補啲陰影,最後就係咁喇.

飛蛾從來晚上都不缺,但多數反轉停葉底,停得咁四正係好小有,我又用咗同樣方法加啲側光增加立體感.呢個方法都有缺點,背景唔可以太遠因為閃燈位置限制咗,要來影迎客蜥就唔得喇,背景有成二米遠.