2019年5月27日 星期一

玩離地

又係三叔體育節,今次係藝術體操,呢個係一年之中唯一既機會,其他比賽日子都係唔俾影相的,只要走去接待處寫低個人資料就有攝影證,其實都冇對證件,亂咁寫都得 :P


影過好多次,今次要玩全離地,即係到地既唔影,先來比較hea既就咁跳起,蕙荃係偏暗既體育館,同其他館比暗咗大約2/3級,即係平時用ISO 1600,呢度要用ISO 2500,又或者要降低快門速度搏一搏.


來張認真啲既正面跳,有同以前既攝影會會員一齊來,聽到佢地快門聲係小咗好多.冇再瘋狂連拍,好多時淨係影一張,可能技術高超咗,又或者唔駛交相,影唔到就算,唔好咁傷機.


到咗比較難搞既繩操,年紀大反應慢,我其實只係想擺側個人小小,但好多次都出咗界唔見咗隻手,呢張終於成功,裁都冇咁啱.


側跳又係,硬係反應唔切冇咗一忽頭,捧操就冇咗一忽手,呢張其實都幾乎出界.


去翻評判席做背景,其實係第二日既比賽,高級組既關係多咗好多人來,我上午又唔得閒,來到靚位已經冇晒,只好對住評判影,運動員望向上因為有一支棒掟咗出去等接,早小小影到支棒在空中就好喇.


高級組先有既圈操,原本諗住去坐既位置已經滿座,搞到背景勁花添.


真正大會攝影係坐評判旁邊,機會係最多,通常表演都係盡量對住評判,不過今次既機會係我既.


死喇,乜咁耐都仲未有帶操出場架,我五點就要走喇,又係要高級組先有,終於差唔多夠鐘先出,帶操極難搞因為條帶好長,我見好多人轉咗wide鏡影,但我又唔係咁鐘意搞到個人咁細粒.哈,好似尾咁幾得意,帶操另外一個難處係運動員成日失手,做一次動作解一次帶,極不流暢,有人唔駛解帶成套舞晒已經好勁.

20 則留言:

  1. 有時候影快動作我會用連環快拍功能,以爭取更大的成功機會,連環快拍會傷機的嗎?

    回覆刪除
    回覆
    1. 快門有壽命,影得多係會快啲玩完架,但影唔到要既相好似耐用又冇乜意思 :p

      刪除
  2. 姿勢美妙!捕祝得很好!

    回覆刪除
  3. 有評判作背景畫面都幾豐富

    回覆刪除
  4. 嘩哈哈~~ 堅離地 , 體操吸引人就是佢有好多好靚 ge花式動作. 好好睇

    回覆刪除
    回覆
    1. 哈哈,增加啲新鮮感嘛,我朋友話之前覺得體操好悶,影相之後覺得動作好靚.尤其影得中嗰吓 :P

      刪除
  5. 哈,堅離地,影得好有水準,要俾個 like 你!(^ω^)

    回覆刪除
  6. 好精彩,美妙動作捕捉得好靚。謝謝分享!

    回覆刪除
  7. 精彩的一輯相,堅離地哈哈~咩環境都難唔到你!

    回覆刪除
  8. 感覺呢D好難影,影得真不錯.

    回覆刪除