328再出擊

好耐冇影網球,普通網球場冇觀眾席,冇可能俾你走入去阻住人地打波,要影網球全港得一個維園表演場可以做到.難得有賽事免費入場,就同朋友一早去霸最靚位影.大賽要安檢,見到我支328竟然叫我唔好攞出來用……住.咁奇怪?冇講理由都估到,今日大會合作伙伴係Sony,佢推緊佢支400mm F2.8新鏡,唔要有其他鏡搶鋒頭.咁都無謂為難人地,用住70-200mm先囉.

除非你有500,600mm鏡頭可以由底線影球員正面,否則第一排對住網中間既位係最正,可惜工作人員話預咗俾傳媒,要坐則兩個位,咁都仲算可接受距離,因為我都打算只影正光方向.用70-200mm其實幾適合,場中間可影全身,球員走埋來又可影半身或用短啲焦距.影吓開波先.

我支70-200mm唔知係咪跌過既問題,硬係只得一忽sharp,就算個身sharp個頭都可以唔sharp,縮光圈都一樣,好彩後來影影吓又正常翻,其實網球可以幾悶,運動員冇乜動作又係單打既話,可以張張都差唔多.呢張叫做肯走吓.

搞搞吓我見除咗Sony 428外,開始有其他人攞啲大炮出來影,我自然唔客氣都出328.變咗遠處影全身,場中影半身,近就影唔到.其實主要都係影半身.個人大啲視覺沖擊大啲.大太陽影網球其實好弊,好處係快門想幾快都得,但鴨咀帽既陰影就搞到個個變晒鐘無艷.　

都係半身啱我口味多啲.實在愛死會向上望的運動員.

之前話咗預俾傳媒坐嗰兩個位一路都冇傳媒來坐,鬼咩,呢啲資格賽又冇乜大球星,傳媒都要來咪好唔得閒?卒之有兩個遲來既人一個唔客氣就坐咗,佢地可能好奇怪咁靚位點解會冇人坐?工作人員照例又係咁,開咗賽就唔理.重演龍獅節事件,遲來先上岸.只好用328一味大特寫等自己開心吓.

影半身可以影到一啲影全身冇咁覺既細節,例如個波甩毛飄在半空.當天實力都幾一面倒,仲諗住下午點分批去食飯,結果打完啱啱一點,可以收工.

汀九橋新角度

我知道影汀九橋至小有三個位置,今次朋友介紹了第四個,差唔多係全景,影晒成條橋,十分感謝佢帶路.

仲諗住同我去過條路差不多,原來崎嶇好多,後段路線非常含糊,有啲甚至係踏草過,跟本冇路.所以今次買了兩卷絲帶,後段盡量掛多幾條,路途其實唔算長,就只係怕迷路.個景實在太近,用到24mm都包唔晒,無奈只好影小一忽,夜景來臨先影日落,太陽位置唔係好夾到大橋,雲彩又冇乜,真係普通過普通,只係用來攝吓時間.

跟住到主菜影大橋,冇咗小小真係有啲遺憾,如果有支16-35mm就好喇.季節轉換,早啲天黑早啲走本來係好事.但僵化的政府規定7點大橋先開燈,搞到不是影橋的季節.之前影青馬搞到我要揀啱日子影多次.不過我已經研發咗提早開燈大法.用咗幾次我有信心搞得掂.結果都係冇問題.不過呢個方法長時間唔可以郁支腳架,所以結果就係只有一張相喇.

328第二擊

其實之前已經第一擊咗,就係去伊館影泰拳,好似影得唔係幾好,除咗夠光之外唔係好用到佢既優點.今次影攬球比較啱用佢多啲.原本自己walk in諗住場邊影吓就算,點知碰到熟人,佢地有證,叫我詐底攝埋去影,又搞掂.

比200-500mm爽太多了.畫質簡直係兩個境界,呢張其實仲遠過半場,影得頗細粒吓,但中焦既地方銳利無比.裁翻大都絶對冇問題.200-500mm影到個人咁細就好勉強,就算唔裁都只係僅堪用,100%睇其實散散地,唔縮圖跟本唔多用得.另外就係背景分離,我專登成程開晒F2.8影,就算縮光圈都係只縮小小縮到F3.2睇吓解像度分別,即使勁裁都依然叫做有散景,200-500mm既話肯定黐晒底.

另外就係對焦速度及準確度既分別.剛才嗰張罰球頗多時間準備.呢個自由球要開出嗰吓先估到大約邊個位落.到搵到啲人走位再對焦,手腳慢小小好多時就影唔到.而且200-500mm對唔切好多時夾硬影咗都係矇.328成功率就頗高.

唔駛裁既距離就更加係正啦,奶油般的散景.

攬球自然就係攬埋一球.

噢,54比0,少林攬球!每場比賽只有上下半場各7分鐘,係非常短的,組織得來其實每半場得幾次機會,雖然入球分數有高有低,但咁既比數差唔多係一攞到就入.這也是7人賽比較好睇既地方,傳統15人賽可以悶到瞓着.

之前好怕觀眾席做背景,影完實係勁花,揀都揀唔翻啲球員出來,依家只要有小小距離就都可以接受,可以睇到後面遠小小既球員已經開始矇.

觀樂既時光過得特別快,又係時候講Bye bye.你慢慢瞓啦,我去達陣喇.

倒錢落咸水海

其實我考慮咗好耐想搵支300mm F2.8. 因為支200-500mm光圈太細,一暗啲就收工,而且背景分離做得唔好,解像度亦都係麻麻.Sony嗰支就冇可能喇.五萬幾蚊價格完全離晒地,而且相信有錢都唔知訂唔訂到.有諗過Sigma,二萬左右合理啲,不過都係要訂,而且因為年代久遠,睇review好似銳利度差小小.同別廠新鏡有啲距離,只係僅堪用,咁大支又阻地方,拖拖吓就不了了之.

朋友早排上網搵二手器材,咁啱見到支Minolta 300mm F2.8有人賣.問我有冇興趣.嘩,乜咁樣害我.價錢幾吸引,只係貴支135小小,雖然支鏡已經出咗25年,話晒係原廠,風評都好似唔錯,好小見到有得賣.但係Sony好似會就來唔做A mount機喎,就算轉無反,佢個轉接環都係咁多間廠之中最衰的,對焦速度同對焦點會下降到連入門機都不如.買A mount鏡預咗隨時變垃圾.不過…….就算將來轉會,我都唔會捨得攞幾皮嘢出來入支328架喇,人一世物一世,真係變垃圾都叫做體驗過.你見到張相,即係佢已經入咗門.

第一個問題來喇,佢雖然唔係好長,仲短過200-500mm,但佢直徑好大,根本放唔入防潮箱,而且頭大身細,好以以前咁橫放恐怕會整爛佢,有諗過就咁用鏡頭袋入住加包防潮珠就算.最後都係換咗個防潮箱最妥當,一係唔買,一買就買個70L既,連機身,閃燈,乜差都放晒入去.我老婆話我個防潮箱就來成個雪櫃咁大.

第二個問題就係支鏡重2.5Kg,雖然我試過手持都得,不過長時間應該會整親,而且真係唔多放心靠相機接環吊住支鏡,順便去整翻支土炮單棍,咁就影足一日都冇問題.咁樣搞一搞屋企多咗三件嘢,正宗一闊三大.幸好個相機袋仲可以夾硬放得佢落,否則就會係一闊四大.

雜錦城門水塘

山竹過後雖然好好天,但要上山既活動唔知啲路有冇問題唔多敢去.橫掂落咗咁多日雨,就去城門水塘睇吓有冇水浸白千層同埋灟斗排洪啦.

雖然山竹帶來好多雨水,但落波之後日日勁曬,啲水都冇得七七八八.而且除咗雨水外,佢仲帶來好多………塌樹.5個景點只有最普通既一景點無阻,影咗都唔靚決定慳翻啲時間,最後喺大城石澗影吓流就算數.

今日主菜其實係去影灟斗排洪加日落,上次搵來搵去都搵唔到,原來係要行相反方向.未到灟斗之前影影個倒影先.

今日日落唔錯呀,可惜灟咗咁多日,已經冇水去個灟斗度,而且好失策,去灟斗度有度門鎖住的.要在鐡枝間伸支鏡出去先可以正中影晒成個灟斗,仲要用超廣角或者魚眼先可以咁近都影得晒,得支24-70mm即係唔駛影.只好下次帶支魚眼同埋可以中軸橫向既腳架來再影過.咁影唔到灟斗就影橋墩加日落啦,坦白講唔多靚.求其用HDR搞掂個背光就算,假假地都由得佢.

觀眾席影跳舞

影會冇再搞活動唯有靠自己,朋友通知我有呢個活動就大家計劃一下,雖然我唔太鐘意伊館,不過國際賽一定係佢,所以都冇計.

 

冇咗記者證,卡位就要有啲攻略,雖然有攞飛,但冇劃位,所以要早一個鐘霸頭位.要保證坐到第一行,好彩有三個人,行開吓去厠所都得,否則水都唔敢飲.伊館最衰就係呢樣,背景好黑,亞洲人又多數黑頭髮,成日黐住一堆,浪費大好Pose.



背景雜就個個場都一樣架喇,呢度都唔例外,又浪費大好Pose.

真係想P走背景嗰兩對,最後覺得都唔係太礙眼就由得佢

有人認為只要支鏡光圈夠大就可以矇咗個背景,實情係有幫助但唔可以完全解決到問題.F1.8都夠大喇呱?仲要係長焦135mm,再影埋半身,冇錯係整矇咗個背景,但整唔矇啲雜色,始終都係好干擾.

咁搞唔係辦法,幸好後來有單獨表演,我一早就覺得應該係咁啦.一來影相背景乾淨啲,二來都公道啲,評判可以專睇一對人表演,唔駛同時睇十幾對灟咗眼,我專揀對住評判席嗰邊影,背景會比較淨乾.好小見跳牛仔起到咁高腳.

不過對住評判席都有一個弊端,就係運動員會掛住跳俾評判睇,成程搵個背脊得住你.哈,咁啱佢咁樣轉過來,背面變咗正面.

由於我用定焦.又冇得走來走去,其實得幾個位可以影.呢吓動作咁靚,冇計背景雜啲都要影.

呢對香港賽手真係由細影到佢大,記得初初影既時候佢地仲係小學生咁既.

又要鬧吓舊陣教跳舞既阿Sir,硬係冇教呢啲花式......:P

大潭水壩排洪

呢排係咁落雨,影呢啲就最啱,不過個個唔係嫌太遠就係嫌要上上落落太辛苦,咁好啦,我都慣咗單拖.

上次去斜炮頂經過見到有個站停正入口,照舊搭14號巴士就搞掂,壩頂行到壩底想像得到只係好近,一陣間就到.原來已經有幾多人,有兩個拍攝點可以選擇,一係在橋上用超廣角或者魚眼,一係行去石灘用普通焦距,我最憎近距離低炒所以揀咗後者,真係要非常小心,成地都係青苔,極跣,要對正個水壩基本上冇可能,一行後小小已經有樹遮住,越正中就要企得越前.而且已經有人企咗,我只好側小小,亦都要用盡24mm先影得晒個壩,有人甚至企入水中,壩上燈光好暗,我諗個天黑晒佢都未夠光,襯個天仲藍影張素材先.

最多等到咁,個天顏色及亮度還可以,不過曝光時間好長,增加咗有車經過既風險,果然係點就都就唔到,個天亦開始變黑,唔容許搞咁耐.罷了,都係用之前影低既素材夾夾佢就算.

就咁就搞掂?仲未,依個曝光值地面係好黑,要用三分鐘快門再影多一張夾上去.淨係要平均個場景亮已經由天光搞到天黑.

夾好晒啲相之後下一個步驟就係拉翻直個水壩,假就假啲,但似乎咁好睇過歪歪斜斜.之後再清除啲人玩航拍,電筒等做成既古怪光軌就大功告成喇.

回歸塔夜景

住大埔區咁耐都冇認真拍攝過呢個回歸塔.主要係冇乜特別.甚至有啲騎呢.微微雨冇乜地方好去就去影吓佢.

天冷開始早天黑,個塔又係要到7點先開燈,不過自從開發咗日夜結合既技術後,對呢啲唔郁既物體已經唔駛驚.照舊等到個天最藍既時候影一張,未開燈既關係,個塔係好黑.

跟住就係等開燈,不過就算開咗燈都好,照明係好唔均勻的,地面及塔中間都係黑媽媽,終於我用咗兩分半鐘快門先得出足夠亮度,燈是有點爆,懶既關係由得佢,有一點要注意,天空不能光過之前嗰張相,否則合成會出現問題,真係太光既話唯有留到天夠黑先影,之後合成圖層變亮就會出現翻之前未黑晒既藍天.

頂部既柱係爆晒光,唯有用圖層方法露出天未黑時影嗰部份,由於個天已經係一樣,油出界都冇所謂,好容易就搞掂,再接直埋個變形就搞掂收工.

鼠戰中環

呢個想去影幾年但年年都冇去,一來時間唔啱,二來覺得都幾騎呢,點解要係老鼠,唔係老虎,冇理由唔搵個威猛啲既代表,講完笑,其實我係覺得呢啲比賽都係玩玩吓性質,唔慌有乜高水平演出至真.

一如所料,大家都係志在扮鬼扮馬,當Halloween咁,大老鼠出現即刻好唔得閒,成為焦點.

有愛回家接受訪問,影.

仲要等成粒鐘先開賽,好鬼無聊,大家開始玩啲擺設.

我地係孖寶兄弟.1,2,3跳.

哈,又有明珠台靚女,真係衰俾條繩阻住晒.

好不容易先等到開跑,奇怪冇乜人爭位影相,實際上都冇乜特別,只係成堆人向前衝.

影得起跑就趕唔切影第二個位,原本都想試吓行捷徑截佢地,點知冇遠就入咗大厦,周圍又落晒欄咁,都係算數等佢地翻終點最穏陣,話咁快就見到有人翻終點,呢啲慈善嘢係咁意就算啦,唔通要搞到三項鐡人咁艱辛咩.終點都係一個個翻來冇乜大堆頭,求其影吓就算.

主賽完咗,之後仲有小型比賽,中間有啲表演,不過個台真係埋唔到去喇.求其周圍影吓人合照.

之後有公司高層賽,尊貴既高層又唔扮鬼扮馬,又唔跑得快,費事影,不過我諗最大價值係肯捐錢,最後有小朋友賽,反而最多人爭住影,咁又係,個台乜都完晒得翻佢地,家長又多,不過又係一陣間就完,可以收工.

高角度影泰拳

一向影泰拳都係場邊低炒.自從個影會冇乜再組織活動之後已經冇乜點影過.之前見過人地在高位用長鏡影好似比較自然,唔係下下影到鼻歌窿.咁啱伊館有得睇就去玩吓.

開三邊場,一邊係出場同電視台用,兩側出奇地近個台,又有正面射燈,名句照片唔夠好就係靠得唔夠近,所以就揀呢邊啦,不過要避開啲繩邊,都要坐翻咁上下高,坐位出奇地斜,就算攞支大炮伸出去影都唔會撞到前面觀眾個頭.但係咁斜影出來又好奇怪,唔駛影鼻歌窿但係就變咗影頭殼頂.

影多陣睇吓點,打餐死終於勝出,好奇怪拳證只會向住一邊竹舉行呢個儀式,坐另外一邊既觀眾永遠都只會睇到背脊.

咁斜唔多對路,寧可走低啲專攻半身,個場係非常多位剩的,唔係對正中間同超近嗰啲基本上任坐.一拳質中塊面睇你點頂,最可惜係個比賽有戴頭套,稍為側小小已經影唔到面.亦顯得比較業餘,超級大賽通常係冇戴頭套的.

泰拳可以用手肘,不過好奇怪係冇肘套,咁樣整一下個鼻骨要搞翻應該幾貴.

影下花絮,權證都未宣佈,呢位拳手已經預先慶祝,梗係,戰況簡直一面倒,會輸至奇,我都乘機紀錄低呢一刻.

橫掂冇乜人,試吓走去傳媒位對面先,冇正面光,只能靠兩側既側光.對正拳手出場,可以影到出場噴烟嗰吓,但啲烟會遮晒個拳手,所以要等一陣啲烟散咁啲先影到.

仲可以影到頒獎,呢個角度大會攝影師都冇.

講翻影比賽,雖然遠咗啲又冇正面光,但呢邊角度冇咁斜,就算影全身都唔會變咗影頭頂,如果有正面光,一定係首選.不過依家就經常黑面,起腳通常都只係踢吓人地對腳俾啲干擾,又或者最有用就係撐開對方,起到咁高踢頭好小見,不過佢對手係香港拳皇,冇乜作用,仲俾人一個回合就KO咗.