曬到死影曲棍球

近排天氣真係搞到唔多敢報名影戶外活動.不過京士柏曲棍球場就唔驚,因為觀眾席有蓋,只要唔好落到唔停,有雨大不了就避入觀眾席最多唔影注.

一早確實係有小小天陰既,但係過咗一陣就陽光普照.天文台明明話狂風大雨喎.好學唔學,學埋財政司咁死人都話落雨,唔落你地咪好開心囉.咁都係既,好在出門口時靈光一閃,攞埋遮陽帽出來,否則肯定變燒豬.大太陽又用到70-200mm,1/1250秒幾乎涷結一切.

即使用長鏡,都仲可以保持到1/800秒,奔跑動作都勉強可以搞掂,球在半空機會不多的.

成堆人既畫面,仲連棍都跌埋,一到這種雜亂場面,細光圈既缺點就出晒來.但唔用佢又唔夠長.

勁曬換來快快門及快對焦,其實我係寧願曬啲既,影唔到幾舒服都冇用.由於在底線,冇乜點影過龍門,哈哈,一影就影到佢呵疍 :P

隨住時間過去,太陽開始下山,又係咁,最勁既隊伍係排在最後.睇樣都知係勁隊,曲棍球最勁唔係鬼佬,係阿差.有半邊場已經陷入陰影,得翻半邊場影,瞓埋一堆都好過冇啦.

雙人彈網攝影

上次影彈網只得單人真係唔知影咗乜.今次影雙人期望畫面可以豐富啲.

影雙人最大好處係個人唔駛影到好大都可以塞滿畫面.較容易影埋張彈床入鐘,咁人地先知係影緊彈網,而唔係跳樓.之前我係單次對焦,今次直情用十倍放大手動對焦,成功率仲高咗,不過有啲趕頭趕命一上彈床就跳既我就唔切對焦喇.一般跳到最高係接近靜止,而動作亦係最大,係拍攝好時機.

這是另一種動作,冇頭先肢體張得咁開,可觀性較低.睇翻上次啲相,其實都係暗咗小小.今次一於用盡F1.4光圈影.好在個場觀眾席係梯級,可以水平影,否則對定焦肯定唔中.

咪以為同步好易,我揀咗好多先有接近的..........這,這也太離譜吧 @@

有一天我們會飛,如果手低啲冇遮面就好喇.

由於用盡F1.4光圈,我唔太敢隨便改變拍攝角度,驚郁得太勁景深會唔夠包,有啲運動跳得幾跳移咗位都冇計,搞到兩個疊埋一齊添.

終於等到男子組出場.不過.....其實女子組好睇啲.男子組只係一味跳得夠高,同步方面係比女子差,一味出蠻力,唔夠幼細囉.

仲有小朋友組,佢地咁細粒我都要走前一行影先掂.我覺得今次好似影陸上跳水咁,都係影彈高嗰吓動作,不過機會多跳水好多 :)

影飛碟

哈哈,並唔係指外星人嗰啲.亦都唔係三文治機做嗰啲,而係平時去沙灘玩嗰啲,不過今次係着運動衫玩的.

同一般球類唔同,個飛盤係會在空中滑翔,停留比較長既時間,所以要影到飛盤在空中其實唔係咁難.

但係要影到好似攬球咁搶飛盤就比較困難,一來用長鏡視角窄,搵目標,構圖慢,二來長鏡對焦慢,變咗乜都慢吞吞,三來原來飛盤跌咗落地係算失手,控盤權會去咗對方度,所以一接唔到就唔會追,而交碟亦傾向十拿九隠先交.短傳佔大部份.

據我觀察,好似冇越位呢樣嘢,只要飛到隻碟俾近底線既隊友,跑兩步就可以得分,係小有會長傳時機,不過影相就冇乜用,得一個人唔好睇,哎呀,今次失敗咗.

仲有一樣嘢好困擾就係背景好亂,雖然焦距係長,但係光圈細令到景深好長,平時用70-200mm可以整矇既背景依家同主體黐一舊.變得好干擾甚至唔知影緊乜.

頭先嗰張原本都成堆人,亂上加亂都唔會相差太多.有啲淨係得翻兩個人既就……….如果入支500mm F4或者300mm F2.8……呵呵.哎呀,好痛,咪打頭……welcome to the real world.

川龍搵珍蝶

記得之前人地帶我去過係超多珍蝶的,用圍都有,甚至幼蟲,蛹及成蟲一齊出現,實有收獲冇理由不去吧,而且以前嗰啲影得好差…….

嘩,唔知搞乜鬼,咁山旮旯既地方竟然人山人海.仲有好多係駕車來,睇見佢地就慘,啲車出出入入,左避右避咁搵位俾我實掉頭走就算數.不過我仲慘,落到田竟然一隻珍蝶都冇,菜粉就好多,不過佢地好活躍,好難接近,求求其其只可影到咁細隻.

撞到好耐冇見既同道中人,大家都話唔知做乜咁靜,等等吓仲落埋雨,睇怕可以收工,佢地話除咗呢度,橋上面都有機會有,咁我就去碰吓運氣,見到成班人喺度影即係真係有………..一隻咁多.仲要係葉底添.原本就要用閃燈先啱,但係呢種蝶無論眼部定對翼都非常反光,影出來好膠,侷住背光就咁影 @@

後來飛咗去第二個地方,唔駛俾樹葉遮住,除埋個增距,收細小小光圈影,實在當天係大陰天.非常暗的.

得一隻都冇乜好影,初初仲諗住有交尾.咁啱有隻蟌,黑色都殺啦.個綠底係朋友拉起塊大葉幫我整的 :P　

體育節藝術體操

一連兩個月Samsung體育節有大量體育項目可以攞正牌去影相,對我呢種人來講實係太開心.藝術體操平時係唔俾影相的.搏矒扮家長都唔得.

 

今次有啲我未見過既項目,呢個叫繩操,除咗跳繩之外,仲會將條繩Fing來Fing去做花式.

 

 

另一種叫做.....空手.哎呀,即係乜架生都冇,就咁自由體操,不過佢唔同競技體操咁會有空中翻騰三周半加轉體360度,只係好似跳吓舞咁,都幾悶,我影影吓直情停咗手.

 

 

體育節既水準通常唔及正式總會比賽,這是比較遺憾的地方,但呢個比賽都係嗰班人,真好,哎呀,差小小出咗界添,呢張影直度會易好多,但我總係唔想影直度 @@.

 

 

又一次夾硬影橫度 :P

 

 

帶操我覺得係咁多項目中最難影的.絲帶形狀要靚之餘.又要個人唔好太細粒,因為絲帶舞動範圍好大,人夠大絲帶好易就出晒界,我聽見有人講話要收埋啲長鏡.冇錯係實冇出界,不過影到細細粒我就覺得唔靚喇.

 

 

加埋圈操應該齊喇.

 

 

灟咗集體操添,旁邊位師姐話集體操唔影喇,實係亂到死,咁都係既,撗掂唔差幾,影埋囉.

又有新項目喎,叫做三球兩帶,不過其實都係好亂 @@

兒童乒乓球打吡大賽

影兒童賽多數都係中招的.好多時兒童賽等於低水準,但唔駛去我最憎既伊館,又落雨,室外活動死晒,就去啦.

去到撞到個朋友做大會攝影,仲講我知邊幾個大熱要留意,可惜......兩個場中間係唔俾入的.即係只可以在場後面再隔住家長或者教練席後面影,135mm影得好細粒.所以我得翻最入面嗰兩個場影,係嗰度先可以企側邊.小朋友的水準比想像中好,起碼一定打贏我,影個標準反手先.

影埋正手.呢度冇伊館咁黑底,就算黑頭髮,着黑衫都唔會黐晒底.

仲有肉緊既表情.

一路都唔知甚麽叫做打吡大賽,終於有人話俾我聽係只可以參加一次咁解,贏咗可以代表香港打亞洲賽,輸咗想出年再來過係唔得的.唔知係咪個個都諗住實贏?好多輸咗既喊到唔停.肥仔輸咗兩局已經喊住打,睇見都陰公,不過人生係要受吓挫折先會長大既.

到準決賽階段竟然.........淨係開中間既枱.即係唔夠近影特寫.只好影吓有兩個既畫面唔駛咁空虛啦.見跟住再影都係咁上下,早啲走 :P

尋找黑丸

我向來影蝴蝶都冇乜計劃,次次都係求其走去去開既地方碰碰運氣.所以約朋友去影蝶都淨係識得去鳳園,但世上有好多奇人異士,係可以知道邊個地方,有邊種蝶,幾時出現的.跟佢地就可以影某一個品種既目標蝶喇.今次既目標叫做黑丸…….

 

這個時期,黑丸會在烏蛟騰出沒,由於車好疏,我已經太耐冇去,點去都唔記得喇.好彩有人帶路.一去到已經好幸運見到佢,原來係指甲尾咁上下大既灰蝶.可惜佢一路冇停,最後仲飛走埋.只好等,同埋搵其他嘢影,呢種蜻蜓咁上下既原來叫做蟌.背景幾靚可惜背光,冇計,閃燈打下去,給眼睛留下一個光點.

呢隻蝶成日飛來飛去,不過大家都好似冇乜興趣,其實佢都唔錯吖,又大隻易影,位就唔多靚,地下之餘又背光,又侷住用閃燈,原本應該叭地背景先靚既,但地下濕濕地,都係蹲低影就算喇 :P

今次同平時唔同,一般日影既話我只會帶一支燈插機頂補補光就算,因為日頭啲昆蟲好高警覺性,搞飛燈十之八九整走佢,但仲有十份一機會係遇到唔走既,由於我知道黑丸係白色,好大機會黑底,所以為咗嗰十份一機會攞多支燈同埋燈架來.用喺黑丸度就仲未有機會,不過蚊就有一隻,佢啱啱停在暗位,連背景都係暗,啱晒,好似夜攝咁影佢,唯一唔同係唔駛用LED燈幫助搵佢同對焦.

等到頸都長,黑丸真係出來仲停定,嘩,全世界都圍晒埋去,雖然圍住隻蝶既圓周都有一定大小.但平行對翼既只有正面同背面兩個方向,其中一邊有嘢頂住,實際上係得一個位.變咗要排隊一人影吓.不過呢個位係正既,背景遠之餘有小小逆光.平衡咗白色既蝶身,唔駛變黑底.就都冇咁啱.我其實想再影大啲,但實在太驚整走佢.

隻蝶又在第二個位出現,呢個位就冇之前咁好喇,我擔心既黑底終於出現.我係好想好想攞支閃燈出來幫個背景補補光,但個位實在太窄,連人都企唔晒,再放燈架實在冇可能.陣間整走咗隻蝶就變大罪人,唯有硬幹啦.結果自然係暗底.加光都唔加得咁多.我自己平時實唔會等咁耐,有就有,冇就算,今次因為大家都咁堅持,連我都被帶動到有嘢影到.

下花山影荃灣

白茫茫的天氣就像魔咒一樣揮之不去,都唔理得咁多喇,順便當行吓山啦.

登山入口在港安醫院對面,行到咁上下見到元荃古道指示照行就係,一路都係梯級或者水泥路,實在係非常實在.依家有點怕大難行危險既山路.可是,去到怕攝點原來到最高位既石群係要行一段唔太長,但好多沙既斜路,有啲唔係好想上去,見有個低啲既位其實都唔錯,就喺度試影吓.似乎影wide啲多啲景觀感好啲,但又會有好多雜草入鏡……….

終於決定爬高啲,高咗自然就可以將個景拉高啲,唔駛咁扁長,段路真係頗險要,而事實上高度唔係差太多.依家仲有光上上落落都冇問題,陣間天黑要靠電筒落來有啲膽怯.都係算喇.去翻頭先個位安全啲,為咗唔要啲草只好zoom出啲,構圖有啲迫都冇計喇,反正咁大煙霞遠景都係矇查查.之後再用軟件拉翻直啲大厦又再迫啲 @@

影舉重

舉重好難影到有乜動感.但係我鐘意影未影過既項目.雖然係我唔太喜歡既伊館.

觀眾席都離選手頗遠,坐到第二行用135mm先啱啱夠長.其實影橫度選手又企真晒既話係會出界,不過我唔影企直晒的,因為企直一係未開始,一係舉完,表情經放鬆晒.呀…唔記得講,呢個項目係由企直,蹲下,再企直為之完成.有樣好弊係個評判坐到鬼咁正中,成日入鏡.

影咗一陣就轉項目,叫臥推舉,顧名思義係瞓喺度舉,問題喇,就算舉起相機都唔係好影到塊面.影影下我見有人走咗去後面擔凳在隔板頂伸出來影,我又走去影埋一份,係好啲,但其實都唔多夠高,搞到唔知點算好.

見到有人越走越埋,差唔到在工作人員旁邊用wide鏡影,梗係唔係執輸啦,我都有咁埋走咁埋,用50mm影下睇到側面的畫面.

又有新項目出場,舊鐡是放在地面的,睇怕都有挺舉或者抓舉睇喇呱?咦,原來企直就算架喇,唔緊要,影吓啲人既古怪表情,哈哈,鍚啖先.嗰舊鐡應該都幾重,運動員放低時地下會震一震的.

哈哈,我最鐘意睇到人辛苦,眼都變成一條線,靚女都變咗唔靚添 :P

終於都到男子組出場喇,我要睇挺舉,我要睇抓舉.不過………係冇架.整個比賽就係得呢三種,呢種叫做蹲舉,好啦,唯有集中影表情.Hi, super Mario.陳間唔知有冇草菇呢 :P

啲膚色好似偏紅咗喎,其實白平衡係冇改過架,我睇住運動員塊面由白瞬間即變紅,谷到成隻田雞咁 :P

哎呀,你做乜咁傷心呀?哈哈,架甩底多咗兩隻手成個千手觀音咁 :P

香港大狹谷

之前已去搵過一次,可惜趕唔到日落,差唔多到達之前又有點迷路,最終放棄咗.

今次有人帶路,雖然天氣灰白白,都想去睇吓.終於到達影日落既例位,之前見其他人既相係估唔到個狹谷係咁大的,因為冇人物做比例既關係,我以為只係一個小泥坑扮大景.所以我今次特登影到有個人來做個對比.

 

呢度地形咁特別冇理由影一張相就走,我試咗幾個角度但點都唔夠對正兩個山谷之間靚,除咗例位,應該仲有一個位可以影到接近中間位,就係……….例位既對面喇.唔易去架,就算出動絶招勞工手套,都要好小心翼翼,因為失足真係會粉身碎骨,所以都唔敢去到咁盡,最後只可以側側地影.

 

 

有啲人都好搏架,走到好出影到此一遊,睇見都牙煙,不過呢處冇咁高,跌到都應該唔會渣都冇既 :P

 

 

再影其實都係差唔多.橫掂有腳架,影一張蛇口既夾相,當日好白茫茫架,如果一張過,個海絶對會白晒先見得陸地.