誤打誤撞畢拉山

早前去咗一轉紅香爐峰,登山口到頂只係十多分鐘,可能由於太方便,上到去已經成堆人,冇晒位放腳架.得翻好多草阻住既位,夾硬影咗翻去都係剷晒.

只好平日去多次,一時失魂魚錯過咗上山頂個位,越行越唔對路,正想翻轉頭之際竟然發現另一個入口,有啲崎嶇,好彩路程短及有勞工手套,上到來竟然包場,不過角度有差,望唔到會展,再望翻過去紅香爐峰,估唔到都係好多人,隨遇而安影翻個日落先.

大厦大背光一啲太陽光都冇,唔多啱我口味,我比較喜歡斜逆光有小小光到,好自然用提早開燈大法夾夾佢.

後尾我發覺太陽落咗山後既紅霞仲靚過剛日落嗰刻,於是我用同樣方法夾咗另一張,仲自然.

秀茂坪影車軌

見人影得幾靚我又想去影,原本都唔知喺邊度,好彩放大張相睇到個商場係寶達商場,只要去對面搵個高位就搞掂啦.觀塘站係直情有小巴直達寶達商場,對面原來有條好幾層樓高既天橋,得來全不費功夫.

天下着微雨,真係啱晒呢度,因為有頂.天色暗啲燈早咗開,由於構圖中沒有天空,唔駛等個天變藍已經可以開始影,有預感欄桿會好高,腳架又會頂住貼唔到邊,影得wide欄桿就會入鏡,所以帶埋迷你石膏手來,果然用得上.即刻開始影,十分鐘都唔駛就影完,早早地去食飯.

昂船凹二重夾

去這個地方的資料不多,網上只搵到一個,話因為要行馬路邊危險所以唔公開.只好自己搵地圖,最正路既Goggle Map竟然直情冇呢個地方.好彩中原地圖有.路線都好簡單,翔東路旁邊就係登山口.而所謂馬路邊亦都係指翔東路.

好快就到咗,仲有成個幾鐘先日落,搵個陰位打住機等.日落冇雲遮,但就比較清水,簡單做個HDR.

之後就係等夜景.天清無雲,好容易影到好藍既天.但硬係差咁啲,冇錯就係前景好黑,冇乜街燈既關係,就算用B快門都谷唔光個前景.

又試吓用提前開燈大法,結果只係換咗個天同海,草光咗小小,但暗既地方依然都係好暗.

最後我諗到不如用日落HDR嗰張夾夜景.只取奇燈光及車軌,終於啱心水.

之後仲可以影埋欣澳站嗰邊夜景,但由於要保證夜景個天空夠黑夾相先唔會出事,已經錯過咗最好既時機,只好夾硬影光個天再夾,效果變咗麻麻地.

首次飛甩

影完煤氣廠覺得幾得意,雖然我知道發電廠冇煙噴冇咁好玩,不過南丫島發電廠好似冇乜好位影,應該幾啱用航拍.

天色灰沉沉,日落又冇行,但我都飛出去練習吓路線先.睇以為好近,原來要飛好耐吓先到的,影到三支大煙通.冇日落,冇藍天真係冇乜睇頭.

順便轉個方向影吓島上面景物,都係好一般.之後我想飛去正面影個全景,真係勁遠,呢個時候....訊號弱,請調整天線角度,未夠遠哦,再搏多小小,卒之,畫面變成定格黑白,死火,飛甩我其實都試過,上次影鳳眼籃出事後個鏡頭唔郁得,但當時距離近,可以靠目視自己回航,今次都唔知去咗邊.只好靠自動回航,好在,聽到引擎聲,執翻身彩.

到咗夜景既時刻,剛才陰影仍在,都係唔好飛咁遠,就咁高高地影側面算數.實在係好暗,ISO 400都要用到兩秒,只好狂影多幾張,最後都有兩張中.

上白泥影蝶

朋友通報上白泥有美姬灰蝶出沒,我沒有影過,雖然比較隔涉,但都決定去一趟,而且仲可以順便影埋花燈街.

由於要影花燈,架小巴又取消咗一班車,去到已經係中午,大家已經連美姬交尾都影埋.唔緊要啦,單隻美姬好多,不過原來幾乎全部停在暗位,唔夠光之餘好易黑底.幾經波折,先影到一張個底比較光猛既.

之後都係差唔多,影到冇乜心機,去出面睇吓,見到佢,好似係普通嘢但都排晒隊.難得有黃花襯.

有訊號山下有美姬倒影,於是成班人湧晒落山,諗住排隊都唔得,隻蝶轉來轉去,只好圍住佢碰吓運氣,轉到啱焦平就影,我運氣比較差,到我影時形態唔係咁靚,但點都好過超暗位影.

翻上山,竟然有交尾,又排隊影餐飽,自從加入咗景深推疊既技術之後,我覺得最大作用就係影交尾.因為兩隻蝶個頭點都有小小距離,就算其中一隻點啱焦平都好,另一隻都可能會矇,單張得一個做法就係影到好細再裁大,但裁得多畫質會好爛.依家就兩隻都可以數毛,而交尾兩隻蝶係好定,可以慢慢影清楚.

差唔多要走,否則會好難搭車,見到佢飛出來,扒地影埋佢,弊,唔記得裝咗1.4X,幾乎爆框,不過影完又覺得幾合我風格.

尋找停車場

自從在油麻地停車場影完廟街及天后停車場影完維園後,我覺得停車場可以係一個影相既地方,於是我打開地圖搵吓有冇好地方.要有啲景,最後鎖定咗上環林士街停車場.

天氣好不穏定,不過停車場有上蓋,落雨都唔駛驚,話口未完,一陣巨雨已經來緊,半個對面海都遮咗.

雖然有上蓋唔怕濕身,但咁大雨其實冇晒能見度,最終都會得個吉.好彩咁大雨唔落得幾耐,最佳時刻冇俾佢搞彎咗.

再轉個角度影埋港澳碼頭,跟住收工.

應吓節

今天的計劃是去白泥影蝴蝶,要在元朗搭小巴,帶多支wide鏡順道去近期大熱既大橋街市影吓燈籠應吓節.

一早去到己經有四個人影緊,影吓側邊啲金魚燈籠熱吓身先,角度斜斜地,於是我多影咗三張唔同對焦位置翻去做景深堆疊.

跟住就係難度最高既正面全景,實在冇可能等到冇人,只好用埋佢地做構圖.

影高啲等下面啲人小啲又得唔得呢?都係唔多行得通.

見有人喺對面影,我又行過去試吓,仲差,燈既數量差好遠,呢個時候開始多人,係時候收工,大家中秋節快樂.

去夜攝

呢排又限聚,又落雨,宅到爆,夜攝冇咁多限制,解吓毒.

都冇乜期望,求其搵啲嘢玩吓疊景深.果然有蜻蜓,不過係背脊對住我,唔緊要,我就影你頸部結構.佢好細隻,影到1:1再開埋APS-C模式個頭都係得一半.原本可以加埋個1.4增距.不過咁會超難影.景深超淺要疊多好多張,而且穏定性好差,分分鐘會失敗.現在1:1好容易影咗4張就成個頭清晒.

草蜢應該實有既,有之餘居然係交尾,我太注意後面嗰隻個頭要清,結果只影咗三張,兩張係兩隻草蜢個頭,一張係前面嗰隻既大腳,欠咗交尾嗰度,好彩唔太矇,同後面隻腳矇咗.想再補佢地已經郁咗.

有蟲仔水珠,都要影頭中尾三張先掂.

草蜢食草,只影到一張佢就轉好古怪角度,冇辦法,個大脾矇咗.收獲咁小其實好大原因係早走咗,以往都影到11點,依家9點就走,年紀大唔想捱咁夜.

龍翔道大波板

經過龍翔道錯失火燒雲既慘事後,要去捕鑊影大波板車軌,今次我坐多兩個站巴士去到澤安村先落車,據我估計,拍攝地點應大約在澤安村後面,行行吓去咗一堆豪宅,但越行越唔對路,越高就越遠離目標,行翻轉頭.原來龍坪道有條好細既分义路可以去到龍翔道路邊.正正就係拍攝點.

呢條路有車入到來,只要行出鐡線網就可以影,另一個位置就係爬上公園鐡線網外圍,照計越高越好,不過又變咗俾下面遮咗最近既路面小小,而且會影到好大幅黑色既牆,最後都係決定下面位影,唔知點解冇乜車,就算夾相車軌都係比較疏落.

航拍煤氣廠

煤氣廠其實頗近我住的地方,去過影但還顧四周,可以高處影既應該都係私人地方.冇計,只好飛入去.

咁想去影係見到佢好多管道幾得意,同埋有啲管會噴煙,用飛機影就啱喇,專登飛埋支煙通度影,失敗,個天太光同啲煙黐晒底,只好飛高啲用廠景去突出啲煙.

跟住影一影個全景.

其實影日景只係探吓路,我主要想影夜晚開晒燈同埋可以用個天做背景睇到啲煙.平時要等到個天好藍先開始,但煤氣廠啲燈好光,個天仲有小小光就要開始.試過只係用ISO 200,唔知係咪飛得近好似好易矇,最後都係用翻ISO 400,搞到好多雜訊.

順便影埋個大景.

最後就係影噴煙,點解要朝早來一次先就係天藍既時間係好短,上到去要即刻知道飛去邊個位置.唔練習一次先搵得位來個天已經黑晒,呢張其實都好敏水.由1/5秒快門加到1/2秒先夠光,銳利度都差咁啲.