屯門徑

朋友介紹一條可以輕輕鬆鬆的路線,炎夏唔好咁辛苦,即去冇猶豫.

小巴落車行冇遠就到登山口,全程都係石屎路,果然係家樂徑,呢度最出名其實唔係屯門景,係彩色欄杆,但對我來講只係普通欄杆油咗唔同顏色,所以重點都係放係日落同夜景度,大厦景比較普通,於是押重注落個天度,最後啲雲都算唔錯呀.

會唔會燒天呢?結果係唔會,不過個天紅紅地都照影.

最後就係乜都唔搞既普通夜景,影完好快就可以落到山食飯,好極.

安達臣石礦場

上次去飛鵝山望到呢度已經打算要來影日落,網上介紹可以經馬游塘或者炭山村其中一邊上,不過有提到炭山村有幾條狗,最好避免夜晚經過.咁就由馬游塘上啦,其實係遠咗.行行下,前面有工程,危險.照入,嘩,果然唔掂,長命斜地又林,用埋旁邊條繩借力幾經努力先上到.點知係另一個斜坡既開始,陳間夜媽媽要咁走唔係好掂,只好放棄.

搵另一日由炭山村上,入口確實有幾條狗,但冇乜點理我,搵到寫住大上托既入口照上就係喇.其實都有啲容易迷路,只好挷多幾條絲帶,最後認住邊個位出石礦場係好緊要,因為佢好似青欣山影青馬橋咁好多出入口會唔知去咗邊度的.為咗縮短走既時間,我只在最低層影就算,但原來都到行到好入先冇樹擋住,可能工地擺滿竹同有啲垃圾,啲蚊多到不得了,我用咗成半支蚊怕水噴向我四周先勉強頂得順.好不容易影完走人,去到村口最擔心既事冇發生到.可能啲狗瞓咗.其實行高幾層應該靚啲.不過都係咪搞.

影飛盤

有成兩年冇影運動,反應已經生晒锈.咁啱有教攝影朋友開活動,走去磨下刀先.

雖然大熱天時,但都要揀室外活動影,因為室內要戴口罩,影唔到運動員表情真係搵來搞,不過...呢位運動員玩咁高強度運動竟然都戴口罩,真係佩服佩服,唔單只我反應慢咗,支328好似都係,第一張總係唔中焦.到中嗰陣已經接實咗隻飛盤.

為咗增加翻自信,影啲距離遠啲既成功率高啲 :P

又遲了一步,已經接實咗.

要增加成功率,影掟出來嗰吓係最易,幾乎要幾多有幾多.

距離比較遠添,加多個瞓低咗既人豐富一下內容.希望來緊有多啲活動可以令技術純熟翻.

影地毡

中環裝咗個叫川流不息的藝術品,本來冇諗住去影,不過朋友約就去吓.

去到都有毛毛雨,心諗都好,陣間有倒影可以影,諗住都要等夜晚影先靚,所以只係求其影咗一兩張日景.

點知,有陣急雨來,遮都開唔切,不過開咗都冇用,雨大到都係半身濕晒,之後喱埋出入口帳篷度等到,腳下其實都係水浸,一直等到Magic hour,再唔影黑晒就走得,一場來到點都影翻一張先走,擔住遮真係好難搞.

天空好似太多空位,影多張近啲就算,我覺得摩天輪呢邊靚啲,大厦嗰邊有點亂,平時都會影埋既,但天文台預告大雨來緊,都係唔好磨爛蓆喇.

龍山

行九龍坑山既時候見到有個牌指住龍山,去查吓原來都要行幾遠,由粉嶺嗰邊上會近啲.

搵入口搵搵吓原來就係上次去影香園圍既塘坑村,只要繼續上就係,上咗一輪去到一個電塔下面,個景都幾靚同幾熟口熟面,其實就係上次塘坑村個景,不過海拔就高咗,右手面係日落位,雖然地景麻麻,都照影啦.

有試過行高啲攻頂,不過好似仲阻就放棄,冇咁高走得快仲好,另一邊就係香園圍口岸條橋,其實可以影wide啲要晒成座山,但係我又唔想條圓形橋太細,最後決定係咁.

最後再影大啲就收工喇.

觀塘噴泉

原本諗住去觀塘工厦影個大景,上到天台個景真係無敵,影晒郵輪碼頭同另一邊條路既盡頭.可惜.....喂,要鎖鐡閘喇,走啦,不單只冇得喺天台影,個保安仲押住我落地下,想喺樓梯窗口伸部機出去影都唔得.一場來到,不如去碼頭影吓幾舊磚日落夜景啦,點知.....幾舊磚冇咗.

不過偶然見到用咗5000萬起既噴泉,手頭得支24-70mm都影吓啲小朋友玩水.有啲太陽光背光啲水花都幾出,不過光圈細,人多雜亂.入夜更加唔夠光影.

於是翌日又約朋友來影,前一日曬到爆,竟然變陰天,冇計,水冇咁出,但冇背光就冇咁黑面,來招衝力射球先.

看天殘腳,85mm同135mm都帶咗來,原本諗住用凳仔坐定定影,不過鏡頭換來換去好煩,最後決定用晒135mm就算數.但就要走來走去.

哈,如來神掌第八式.

影完水花,影埋你個大肚仔.

入夜就係大光圈既強項,不過都要等有燈光照到個人先得,個天藍藍地加埋發光既水柱都幾得意.

最後影埋七點半既表演,仲以為原地影,原來表演係另一個池,個個就企喺池邊睇,用到最wide都影唔晒,不過都冇乜所謂,其實個啲花式好普通.

影血月的經驗

一向對甚麽超級月亮,月蝕冇乜興趣,所謂超級月亮只係大7%,搵支長鏡實際啲.月蝕更無謂,影相既話同唔係滿月冇分別.不過今次話有血月有啲特別就走去試吓.做咗一輪功課,黃埔海濱應該最好,有機會有水平線月出,咁就可以煲到個月光超大前景又唔會爆晒框,月出時間又啱啱好日落之後,個天仲係藍色應該好靚.

人多成點都唔駛我講.早一個鐘來到近入口既已經冇晒位,我仲同人講咁大個海濱實有位.咁事實上左手邊行遠小小都仲有位放到腳架,不過走嗰陣就要行遠啲囉.之前最擔心既低雲今日係冇.但係夠鐘月出後成15分鐘都冇嘢睇,終於有人話見到,但水平線附近乜都冇喎,原來已經升到好高喇,應該係個天太光,之前睇佢唔到.月蝕既關係,個月光得一條.

再等,月光已經入咗雲,到佢出翻來已經好高吓,爆晒框,影直度又唔多啱口味,同埋天色越來越黑,搞到冇晒心機.

剩翻一招只好用移形換影大法令月光時光倒流去翻之前靚既場景.個月光實際真係咁大同喺嗰個位置架,不過唔係呢隻色之嘛.

最後就係我之前既理想構思喇,水平月出用到300mm加1.4增距地景都仲未爆框.真係咁理想既話照睇煲到600mm都仲得.跟據今次經驗,要避開月蝕,要揀月出時間在日落後半個鐘最好.下次再試吓.

微縮展的測試

呢類微縮展已影過好多次,而且啲展品有啲都係重覆.咁啱天氣熱同事去行山縮沙,我建議不如去涼吓冷氣啦,反正你地都係旨在食餐飯.其實我仲有一個目的就係試吓終極景深合成可以去到甚麼程度,影一個模型究竟搞唔搞得掂呢?

好熱門嗰啲唔啱我,我要搵啲冇乜人睇既慢慢搞.就鎖定棚屋啦.對焦郁小小就影一張,一共影咗15張.夾完都係有好多地方穿崩,可以見到好多位突然多咗撻矇既地方,就算人手搞都救唔翻,應該係張數太小,我估起碼要30張先夠.

張數小會有乜問題呢?先問一個問題,一個公仔,後面係對面海,中間冇住何連結,要影幾多張先夠?照計兩張就可以,實情係影背景嗰張會留低一個大於公仔好多既散景.於是合出來公仔四周會多咗圈散景,因為跟本冇背景清楚既資料.所以冇得懶,要當中間有連結咁影.呢張都要影五張先夠.

咁你可能覺得,要景深又唔駛好大放大率用電話影咪得囉.一定程度係,不過電話一來低光畫質比較爛,二來得廣角焦距,會有前大後細既問題.而且相機喜歡既時候可以控制自己要既景深.

只用兩張合成,一對新人及花環門口,地上景深變化其實有一點怪,真係好在意既話可以用小印章搞搞佢.

比較正常的場景,如果個垃圾桶要清埋就好大工程,所以由得佢.現場仲有好多更有挑戰性場景,不過要搞到幾十張相影一個模型好似唔係好值得,當上了一課就算.最後想講講Nikon相機的景深包圍功能.只要設定每次對焦移動多小就會自動幫你影.事實上邏輯有啲問題,就以公仔加對面海例子,近景要好密,對出小小到無限遠可能兩到三張就夠.用相機功能可能影一萬張都似.相機已經有焦距,光圈及對焦距離資料,其實係唔駛用家再輸入,自動搞掂晒先完善嘛.今次口水比較多,希望大家不要給悶親.

錯過大陰頂

上次去完昂船凹,知道高小小就係大陰頂,正路係陰澳上,不過好似路況有點崎嶇,夜走有啲驚,研究一輪,可以遠小小由花瓶頂過去,全程冇遮擋至小不會迷路.到達登山口,意外發現旁邊有一條小徑應該都係住大陰頂方向,不如咁咪仲直接.....

越行越唔對路,草越來越高,同埋邏輯上有錯,上咗花瓶頂先行過去同下面行到大陰下先上去路程唔會短咗.決定近返.這個時候上花瓶頂再過大陰頂已經太晏,趕不上日落,只好作罷,下次先去,就咁影吓青馬橋夜景,之前影到好爆框,今次影濶啲.

天水圍曲紋紫

朋友報料,天水圍近輕鐡站公園有大量曲紋紫,仲有好多對交尾.打鐡襯熱,交尾既嘢陣間就冇.但係去到一隻都冇,再問清楚原來係再旁邊公園,而且要朝早去機會先大....

只好再去過,一去到好多人就知冇去錯地方,果然有兩棵樹係好多曲紋紫飛來飛去,不過交尾就搵咗一輪先有.原本仲諗住又要夾相,結果係一張就搞掂.

跟住係影草上面,今次要夾喇,又影得唔夠,大嗰隻翼尖有小小矇.其實兩個方向大嗰隻既翼都有一忽崩咗,好彩唔算太嚴重,事後都補得翻.

最後就係影爛葉,其實麻麻,不過話冇人影過就影啦,今次對蝶比較冇咁平,影咗四張,最終又係翼尖差小小,功力始終未夠純.