島耕作的網誌

2021年8月26日星期四

獅子會影蟲

好耐冇去過獅子會自然教育中心影蝴蝶,一來比較遠,二來好似次次都冇乜收獲.過咗咁耐又去試吓先.

蝴蝶其實係有既,不過都係普通品種,就冇乜特意去追逐佢地,反而地上見有蟲,佢啱啱停在個位我手肘有支撑向下影的位置.平時好小呢個角度影,今次雖然暗暗地,但姿勢穏定可以用慢啲快門都OK.

來到一個有好多鬚狀植物的地方,超多呢種蝶,超級普通,但我影埋嗰啲都係歪歪斜斜,決定花時間搞搞佢,要影到唔難,但要冇鬚遮住就真係國家級任務,搞咗好耐先成功.

嘩,好大隻,仲啱啱脫咗皮唔多郁,啱晒慢慢影,原本佢啲腳义得好開好靚,但佢吊住郁來郁去,到我影得掂已經縮咗唔小打晒拆扣.

之前都係帶包來食,今次試吓聰明茶座,得四個餐,一個Pizza餐同三個漢堡包餐,配上高糖汽水及熱氣薯格.漢堡包塊肉又高脂,真係唔多啱老人家,好彩有個係雞肉漢堡,終於我淨係食咗個包就算.如果好似麥記咁轉粟米就好喇,出到種瓜的地方,好多唔知係咪果蠅的物體.細粒到死好難搞,搞得兩搞去咗背光位,侷住出閃,咁就弊,眼睛留下一個古怪光點.

呢隻蟲見人地既相就見得多,我係第一次影,佢知我影佢成日擰轉面背住我,又係搞到滿頭大汗先影到,此時都好晏,係時候收工,影蝶變咗影蟲.

2021年8月23日星期一

三門仔另一景色

次次去三門仔影日落都係用嗰啲浮屋做前景,但佢地好深色,唔同大尾篤啲白色船仔好容易可以推翻光,我記得其實堤壩後面都有啲船仔,用來做前景唔知會唔會好啲呢?

走入村搵,一路都有嘢擋住,再入就變咗去馬屎洲既路,途中只發現近村入口,公厠對出比較開揚小小,但啲船離得頗遠,構圖好空虛.再行過啲,終於發現有一間住家旁邊的種花小空地可以靠近啲船,不過又好似太近,好逼咁,算喇唔再搵.太陽似乎太高就開始消失,冇乜日落氣氛添.

2021年8月16日星期一

公園影雀

朋友通知公園有靚位可以近距離影到相思,這個不得了,可以唔駛咁辛苦上山又有好嘢影冇理由唔去.

影相位係直接曬到,一路等肯定變人乾,侷住喱埋花槽,見到有相思先走出去.走來走去錯失頗多機會,等待時刻冇嘢做影吓麻雀仔.

係就係耐唔耐會有相思飛落來,不過全部都係去晒花中間,都唔好講背景雜唔雜,影到冇遮冇擋都已經有一定難度,搞咗成朝都冇收獲.食個晏翻來再影,好得多,太陽移咗位可以走出去等,終於等到相思肯出來,搞咗成日就真係得呢一刻有相,雖然有啲黑底.

之後就冇之後喇,旁邊有棵好靚大紫薇花,相思唔會去架喇,影吓其他雀既後尾枕就收工.

2021年8月12日星期四

影輕鐵

輕鐵有乜好影?其實好多輕鐵車站都頗有特式,而佢比較短既車身令我想影一影佢既搖鏡.

藍地站有一個列車駛出隧道的畫面.原本打算地下用支長鏡影上去,但一來太遠,二來冇可能企正中間影,即使唔介意斜斜地,都會被側個牌擋咗一忽.結果要爬上欄杆,走到貼近個牌,彎腰申出去影.問題係唔係不停有車,要爬定上去等,影完真係腳仔軟.

跟住來到有斜路既建安站,要將條斜影到好斜要盡量用長焦距.諗住用300mm再加1.4X,斜係好斜,不過太爆,影到架車好大,其實可以走出馬路中心再增加距離,不過我係奉公守法既好市民,用翻300mm就算,可以影埋啲,雖然都係有點大,不過再減焦距就唔夠斜喇.

然後係玩搖鏡,經過Goggle Map估算,石排站可以有一定距離影到冇欄杆遮擋既位置,咁啱去到仲有條天橋可以對正水平,不過都係太近,用85mm只影到一忽,用50mm係得,但要勁準水平,側小小都變咗大細頭,最後放棄.

死心不息,搵條打馬路再試影成架車,影係影到,不過市區中心車速太慢,用到1/20秒都冇乜效果.

龍門居站天橋可以影到鳥瞰角度,搭四個站四蚊多啲其實都幾貴,因為真係一陣間就到,等咗一陣就影到三架車同時出現的畫面.

尾站就係去兆康站影夜晚.咁遠又係四個幾,都唔知啲車費係點計.未天黑落樓下食個飯先,市區影相有呢個好處.呢度有欄杆原本唔係幾好,但搖鏡之後矇咗又唔係好覺.諗住天橋唔驚撞到人車速應該快啲,結果都唔快得幾多,可能冇遠就係第二個站,都未加盡速又要減速,最後破極限用到1/15秒.不過另一個原因係好暗,街燈照唔到架車,肉眼睇幾乎係全黑.

2021年8月8日星期日

殘念飛蝦

上次唔知去影飛蝦攞支微距去自然乜都影唔到.今次改用300mm再加1.4x試試.

用長鏡就係為咗用自動對焦,加咗增距其實有減速度,不過冇計都要加,一來增加工作距離,二來係增加放大率,呢類大光圈長鏡既設計最近對焦距離頗長.近小小會對唔到焦導致影到好細粒,加咗增距幫到啲.裳鳳呢啲咁活躍既唔靠自動對焦好難影,而佢有翻咁上下大隻,放大率可以唔駛咁大都得.

紅珠鳳蝶都夠大隻.

終於到今日主角紅蝦,實在太細粒,差唔多要去到最近對焦距離先勉強有嘢睇,一遠小小就唔掂,但一走得太埋又影唔到,搞到角度靚既反而矇咗.

普通蝦都殺,但佢去埋啲暗地方,又雜,麻麻地啦.其實最想影透翅飛蝦,不過成日都冇出現.

估唔到臨上車有隻牛肉乾影,可以用一用支微距鏡.

2021年8月2日星期一

格仔山攝影

其實之前已經來咗一次,不過係摸門釘,唔知整乜鎖晒鐵閘冇得入,最近見有人出片我估係重開再來.

好在真係重開,我以為係裝修甚麽,原來係啲格仔甩晒色殘晒,要重新油翻靚佢,咁都好既,影相靚啲,要影晒啲格仔即使用超角鏡近影都會變晒形,最佳方法就係航拍啦.部航拍機好似都好耐冇用.

之後就係望出去既夜景喇,景觀同嘉頓山差唔多,上來既辛苦度都係差唔多.勝在冇難度啦.

2021年7月27日星期二

戴口罩既體操

之前都有個室內舞蹈可以影,但疫情下室內活動要戴口罩,睇唔到表情差好遠,今次室外搞應該唔駛戴口罩呱?

估錯咗,都係戴口罩的,既然來咗就照影,先來啲群操,太陽未落山,雖然舞台後面係密封,但反射光都夠照,ISO 400快門已不錯.

小朋友帶操,大會個攝錄影機全遮右手邊台,咁既安排都有,完全唔顧觀眾睇唔睇到.我只好淨係影左面台.

四大項目自然有棒操,除咗大會攝錄機,我發覺有一班影相人成日都係走去前場企起身影,雖然佢地係企大會攝錄機前面,但佢地貼住個台,變咗斜斜地影右面都俾佢地阻埋.

最後係圈操,原本座位之前既人都好識做舖咗地下坐,唔會阻到後面,搞搞下就開始有人舉高部手機影,連中間都遮埋,我呢張相好似好乾淨,其實右下方係有兩個好大人頭連手機,只不過運動員啱啱跳高,冇疊埋一齊,比較容易事後P走佢地.

原來除咗四大項目,仲有呢啲類似跳舞既.太陽落咗山,ISO開始標升,大會仲有樣唔掂就係點解會黑背景架,東方人頭髮黐晒地.

情況越來越失控,個個有樣學樣舉電話影,甚至企埋起身,我原本考慮好唔好帶300mm來後排攻擊,最後怕重冇帶到,睇來決定係正確,一來唔夠大光圈,二來後排都俾人遮晒啦.

情況開始失控,有啲影相人開始企正中間,我都係企正中間,不過我係座位側,佢地係座位前,觀眾都一臉無奈.大會燈光又係搞鬼,唔夠光之餘仲紅紅綠綠.

終於到頒獎喇,諗住走人點知又話頒獎後有彩疍,咁又等多二十分鐘.表演由大姐姐擔旗,情況全面失控,所有人湧晒去舞台前面.我侷住走台側冇人既地方.我唔想同電話爭位之外,亦唔想用wide鏡影到變晒形.同之前小朋友唔同,個個都好高大搞到爆晒框,最後只有一張收獲.呢個時候我明白大會部攝錄點解要擺台前面.

2021年7月22日星期四

菱角山攝影

知道有呢個位好耐,一直猶豫只因水路太遠,夏天影完夜景落山最快得九點鐘船,出到中環,仲要轉港鐵,翻到屋企夜媽媽,網頁仲話冇乜位放腳架,要早去,終於的起心肝搵咗日平日去.搭四點半香港仔船,臨到開船一刻突然有五個後生仔趕到上船,每人一支腳架...........

好不安,我仲諗住陣間食埋嘢先上山,驚夜晚落山啲茶餐廳收晒工,究竟好唔好唔食嘢同班後生仔鬥快上山呢?點知....茶餐廳係冇開既,正諗住捱餓之際,有間南丫小食有開,仲有麵食添,呢個時候已經見到班後生仔經過小食店向山上出發.冇計,希望攝到位吧.上山途中竟然見到班年青人.原來佢地邊行邊玩慢慢走,二話不說爬咗佢地頭一支箭上山搵咗舊石開支腳架卡定位.個位好窄,頂盡放兩支腳架.但呢個應該唔係最好位,我見人地可以影到成個灣唔會斷開,估計係冇遠望到突出去嗰舊石.襯年青人未到去探吓路,硬係搵唔到路.可能要過咗發射站落一段再上翻來,平時一定搵落去,今日要睇住個位就放棄.估唔到日落有小小燒天,年青人雖然架生好齊,但似乎只係隨意影吓,我叫佢地放支腳架埋來都話唔駛.

影埋夜景趕落山襯未開船再食小小嘢先.年青人未走,佢地原來一心影埋銀河.連南丫小食都收埋工,得啲海鮮酒家,好彩士多有豆腐花頂吓肚,去到中環再去Seven整份三文治先翻屋企.

2021年7月17日星期六

潛入工厦

朋友通知近觀塘碼頭工厦可影到靚景,絶對好消息,之前見人影過都幾靚,最重要係唔駛上山嘛.從十樓窗門望出去有啲唔係好妥,我見人地可以影到條公路盡頭,但係就算伸部相機出去向橫影都係被大厦牆壁阻住.於是,我走咗上天台.嘩,個景真係無敵,開定腳架等日落.點知.....要鎖門呀,走啦.管理員先生之後仲押我坐電梯落翻地下.