2018年7月28日 星期六

愛笑的model

連日落雨,搞到原本去石澳影都要臨時改做室內, 室內又唔駛俾場租,領隊諗到賽馬會藝術中心,我之前同同事去過一次,冇乜特別靚景,不過就唔驚落雨,算啦好唔好都一餐.臨出發領隊話佢有事要早走,問我可唔可以頂佢個位,都冇乜特別嘢做,安排吓位置就可以,冇所謂啦,不過去到門口貼住話不準攝影團體在此影相,點算……


中伏唯有偷偷摸摸搵地方,參考臥底電影,第一時間諗到天台,原先估計落雨仲驚天台有冇頂,點知曬到燶,要搵有陰影地方先掂,否則唔頂得幾耐.啱啱有啲枱凳,可以叫model坐下,佢幾好笑容,消耗咗唔小電力.


天台周圍白牆好單調,侷住要轉位,唔敢去到樓下咁揚,夾硬搵啲走廊位就算,希望撞唔到食蕉,Model又擺出招牌笑容,背景就雜咗啲,但大家都影得幾高興.


有來過既人知道7樓有塊小草地可以去,政府地方就係咁奇怪,會有個唔用來收租既空間,唔理咁多又可以影到model既笑容.


仲加埋鬼馬動作.


通常每次活動model都會換一次衫,一來唔駛咁悶,二來順便休吓息.不過今次model帶咗成喼衫,咁就換多套啦,事實上都冇乜地方好影,打發吓時間,結果又係走翻去草地.今次坐住笑.


時間差唔多,走去走廊影多幾張就收工,最後都要整個鬼馬動作.

沒有留言:

張貼留言