影浮屍

心血來潮,要搵日放工搭船過去影呢舊嘢,可惜佢係停香港嗰邊,停九龍直情行過去影就得,上海運停車場都見到佢,不過就太遠.

 

諗住星期四來應該冇乜人,原來都唔小,尚算可以行到最前面,下面實在太近,我得24mm影唔晒成隻公仔,而且我想快快門影一張公仔再慢快門影靚對面海.個公仔疊到啲樓會搞唔掂.好彩附近都有啲高位,但一係角度唔好,一係好多嘢遮,嘩,遮咗半隻公仔咁滯.

 

 

大會都知個個想對正自拍,封咗中間個台要限制人流,出幾多入幾多,排咗一陣就入到,對正係好得多,影到最wide影埋前面啲人比較吓個公仔有幾大.

 

 

此行目的係為咗影夜景,入得來就唔出翻去喇,都係等半個鐘,咁早開腳架阻住人自拍唔係幾好,差唔到啱天色先走埋去嗱嗱聲影幾張.人算不如天算,冇錯公仔係做到唔黐大厦,不過嗰兩隻船就唔到.只好將就將就,ISO 200,快門盡量慢希望可以收多啲光圈,最後1/2秒,F5.6.事後幾乎唔駛執,個公仔有射燈射住,超光,只要等到個天一樣光影就得,再黑小小反而搞唔掂.星期五睇新聞,原來隻公仔竟然提早走,如果放假先影就影唔到喇.